လါနိၣ်ဝ့ဘၢၣ် ၄သီ, ၂၀၂၆နံၣ်, ခ့ၣ်အဲးစံၣ်,
လၢတၢ်ကမၤလၤကပီၤဝဲ ကညီနံၣ်ထီၣ်သီ ဒီး မၤဖျါထီၣ် ပှၤကလုၥ် အသူးသ့ၣ်လၤကပီၤအဂီၢ် ကၠီၣ်တဲၣ်-ကညီကီၢ်ဆၢ တၢ်ရ့လိၥ်မုၥ်လိၥ်ကမံးတံၥ်(TKBRC-အထီ)တီခိၣ်ရိၣ်မဲမၤဝဲ တၢ်ကွဲမုၥ် ကီၢ်ပူၤ, ကီၢ်ချၢ ကီၢ်ဆၢ ကညီဖိတဖၣ်လၢ ပၣ်ဃုၥ်ပၣ်ဂီၢ် လၢ လံၥ်ဆီရဲၣ် တၢ်ကွဲးပြၢ တၢ်ရဲၣ်တၢ်ကျဲၤအဂ့ၢ်, ရၤလီၤပၥ်ဖျါဝဲန့ၣ်လီၤ.
တၢ်ကွဲးပြၢ လံၥ်ဆီရဲၣ် အံၤအတၢ်မုၢ်လၢ်ကွၢ်စိမ့ၢ်ဝဲလၢ တၢ်မၤလၤကပီၤဝဲ (၂၇၆၆)နံၣ် ကညီနံၣ်ထီၣ်သီဒီး ပှၤကလုၥ် တၢ်ရိၣ်ဖှိၣ်ဃူဖိး အဂီၢ် အဂ့ၢ်,သ့ၣ်ညါဘၣ်ဒ်တၢ်ရၤလီၤပၥ်ဖျါဝဲအသိး န့ၣ်လီၤ.
လၢတၢ်န့ၣ်အဃိ ပှၤကိးဂၤဒဲး ကနုၥ်လီၤသတြီၤတၢ်အဂီၢ် (TKBRC) ကမံးတံၥ်ခိၣ် ကီၢ်ကစၢ်န့ၢ်စိ ကွဲမုၥ်ဆီၣ်သခူဝဲဒ်အံၤန့ၣ်လီၤ.
“ပှၤအဲၣ်ဒိးနုၥ်လီၤ သတြီၤတၢ်တဖၣ်အဂီၢ် ယသးခုဒိၣ်မးလီၤ. အခဲအံၤပပှၤကလုၥ်တဖၣ် အိၣ်ဒၣ်လၢတၢ်ကီတၢ်ခဲ တၢ်နးတၢ်ဖှီၣ် တၢ်ဃံးတၢ်စ့ၤအဆၢကတီၢ်ဒံး လီၤအဃိ, ပကဘၣ်လဲၤခီဖျိအီၤဒ်လဲၣ်န့ၣ် ပကဘၣ်ဃုထံၣ်သကိး တၢ်တၢ်ဃူတၢ်ဖိး ပကထံၣ်လိၥ်ပတၢ်ဂံၢ်ဆူၣ် ပကပၥ်ဖျါထီၣ်ဒီး ပဆၢမုၢ်လၢ်လၢတၢ်ပဲၥ် အၢပဲၥ်သီတၢ်ထံၣ်လိၥ်သး တၢ်ဂံၢ်စၢ်တဖၣ် သုတမၤအသးတဂ့ၤန့ၣ်လီၤ ”အဂ့ၢ် စံးဝဲန့ၣ်လီၤ.
တၢ်ပြၢဘျီဝဲအံၤ ပှၤနုၥ်လီၤသတြီၤတၢ်တဖၣ် ကွဲးဝဲ လံၥ်ဆီရဲၣ်လၢ ကညီ, ပယီၤ, အဲကလံးကျိၥ် န့ၢ်ဝဲ (၃) မံၤလၢၥ် ဒီး ကျိၥ်(၃)မံၤလၢၥ်စုၥ်စုၥ် အိၣ်ဝဲဒီး တၢ်ပၥ်ပနီၣ် လံၥ်မဲၥ်ဖျၢၣ်အနီၢ်ဂံၢ် နီၢ်ဒွးတဖၣ် အမဲၥ်ညါ တၢ်ကွဲးအပူၤ တၢ်ကဘၣ်ပဒ့ၣ်ဟး ဆှဲးဝဲ တၢ်ကွဲး အတၢ်ကတိၤလၢအမၤဘၣ်ဒိဝဲ ပှၤကလုၥ်တၢ်ရိၣ်ဖှိၣ်ဃူဖိး တဖၣ် ဒီး တၢ် ကဘၣ် လူၤပိၥ်မၤထွဲဝဲ တၢ်ပြၢတၢ်နဲၣ်လီၤပၥ်လီၤ တဖၣ် အိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ.
လၢန့ၣ်အမဲၥ်ညါ, တၢ်ပြၢအပူၤ ပှၤဒိၣ်န့ၢ်ဘၣ်ခိၣ်ဖးတၢ်မၤနၢၤတဖၣ်အဂီၢ် တၢ်ပၥ်ပနီၣ်ဝဲ စ့(၄၀၀၀)လွံၢ်ကထိဘး တုၤလၢ (၇၀၀၀) နွံကထိဘး ဘၢၣ်စၢၤအိၣ်ဝဲအသိး, တၢ်ဟ့ၣ်မုၥ်သးအဂီၢ် တၢ်ပၥ်ပနီၣ်ဝဲ (၁၀၀၀)တကထိဘး အိၣ်စ့ၢ်ကီးဝဲ အဂ့ၢ် တၢ်ရၤလီၤပၥ်ဖျါဃုၥ်ဝဲ န့ၣ်လီၤ.
ဒ်န့ၣ်အသိး, တၢ်မၤလၤကပီၤကညီနံၣ်ထီၣ်သီမုၢ်နံၤ အတၢ်ပြၢဘျီဝဲအံၤအဂီၢ် ပှၤနုၥ်လီၤသတြီၤလံၥ်ဆီရဲၣ်ပှၤကွဲးတၢ်ဖိ သ့ၣ်တဖၣ်အံၤ ကဘၣ်ဆှၢထီၣ်ဝဲ အတၢ်ကွဲး စဲၤခံကတၢၢ်ဖဲ ဒံၣ်စဲဘၢၣ်လါလၢၥ် ဟါခီ(၁၂)နၣ်ရံၣ် ကတီၢ်ဒီး လၢတၢ်ဘိး ဘၣ်ပၥ်ဖျါက့ၤဝဲ ပှၤဒိးန့ၢ်ဘၣ်ခိၣ်ဖးအဂီၢ် တၢ်ကပၥ်ဖျါလီၤက့ၤဝဲဖဲ လါယနူၤအါရံၤ (၂) သီအနံၤအဂ့ၢ်, သ့ၣ်ညါဘၣ် န့ၣ်လီၤ.
တၢ်မၤလၤကပီၤ ကညီနံၣ်ထီၣ်သီအဂီၢ် (TKBRC) တီခိၣ်ရိၣ်မဲ တၢ်မၤဝဲ လံၥ်ဆီရဲၣ်တၢ်ပြၢအံၤ မ့ၢ်ဝဲ (၂)ဝီတဝီ အတၢ်ဟူးတၢ်ဂဲၤဒီး အပူၤကွံၥ်နံၣ် အဆိကတၢၢ် တၢ်မၤတၢ်ပြၢအပူၤ ကညီဖိလၢအိၣ်ဆိးတၢ်လီၢ်အါတီၤတဖၣ် နုၥ်လီၤသတြီၤတ့ၢ်ဝဲ (၁၅၀)ဘျဲၣ်အိၣ်ဝဲအဂ့ၢ်, သ့ၣ်ညါဘၣ်န့ၣ်လီၤ.