လါယူၤ ၁၀ သီႇ ၂၀၂၁ နံၣ်ႇ ခ့ၣ်အဲးစံၣ်
ကညီကီၢ်စဲၣ်ႇ ဖၣ်အၣ်ကီၢ်ဆၣ် မံၤကၠံၣ်သ၀ီကရူၢ် ၀ဲပၠၣ်သ၀ီပူၤ သုးခိးကီၢ်ဆၢ BGF ကိးထံၣ်၀ဲဒၣ် လီၢ်က၀ီၤ သ၀ီဖိတဖၣ်ဒီး ဟ့ၣ်တၢ်ဆီၣ်သနံးမၢ၀ဲသ၀ီဖိတဖၣ်ပျဲထီၣ်အဖိကၠိအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအ အိၣ်န့ၣ်လီၤႉ
ခီဖျိသရၣ်မုၣ်ကၠိခိၣ်ဒီးလီၢ်က၀ီၤသ၀ီဖိလၢအတူၢ်လိာ်၀ဲဒၣ်သုးမီၤစိရိၤတနီၤလဲၤတၢၣ်၀ဲအဃိ ဖဲအပူၤကွံာ်(လါယူၤ ၇)သီအနံၤ BGF သုးခိၣ်တ့ၤ၀့အံၤကိးထံၣ်၀ဲဒၣ်လီၢ်က၀ီၤသ၀ီဖိတဖၣ်ဒီးစံး၀ဲလၢ မ့ၢ်တပျဲထီၣ်ဖိသၣ်ကၠိ ဘၣ်န့ၣ်ကဟံးအရ့လီၤအဂ့ၢ်န့ၣ် လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤ စံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“ဖဲအံၤၦၤလၢအးကၠိဖိမံၤတဘူၣ်ဘၣ်အိၣ်လီၤႉ ခီဖျိၦၤတလဲၤအးကၠိဘၣ်အဃိ ကိး၀ဲတၢ်အိၣ်ဖှိၣ်လီၤႉ ကိး၀ဲဟံၣ်တဖျၢၣ်တဂၤဖဲမုၢ်တနံၤဒီးစံး၀ဲလၢ သုမ့ၢ်တအးကၠိဘၣ်န့ၣ် ကဟံးအရ့လၢသုဆဲးကျိးဒီး ၦၤပူထီၣ်လီထီၣ်တၢ်ဖိလီၤႉ ဖဲန့ၣ်တဘၣ်သးအးကၠိဘၣ်ဆၣ် ဘၣ်အး၀ဲလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ
၀ဲပၠၣ်သ၀ီပူၤအံၤအိၣ်တုၤ၀ဲဒၣ်လၢတီၤထီကၠိအပတီၢ်ဒီး အပူၤကွံာ်ကၠိဖိမၤလိတၢ်အိၣ်၀ဲအဂၤ(၃၀၀)ဘျဲၣ်ဘၣ်ဆၣ် တကီၢ်ခါခဲအံၤ ခီဖျိၦၤလဲၤအးကၠိအိၣ်ထဲ(၁၀၀)ဘျဲၣ်လီၤအဃိ ဘၣ်တၢ်တဲပျံၤတဲဖုး၀ဲဒ်အံၤအသိး ကၠိခိၣ်ဃုာ်ဒီးကၠိသရၣ်/မုၣ်ခဲလၢာ်စ့ၢ်ကီး မ့ၢ်ၦၤလၢအအိၣ်လၢ(Non-CDM)အပူၤတဖၣ်အဂ့ၢ်န့ၣ် လီၢ်က၀ီၤဖိတဂၤဃီအ၀ဲန့ၣ် စံးအါထီၣ်၀ဲန့ၣ်လီၤႉ
“ကၠိန့ၣ်ကၠိဖိအိၣ်၀ဲအဂၤ(၃၀၀)ဘျဲၣ်လီၤႉ အခီၣ်ထံးန့ၣ်ကၠိဖိတဖၣ်ထီၣ်ကၠိတဘူၣ်ဘၣ်ႉ ထီၣ်၀ဲတဘူၣ်ဘၣ်အဃိ လဲၤထီၣ်၀ဲထဲအဂၤ(၁၀၀)ဘျဲၣ်လီၤႉ တၢ်အံၤ အ၀ဲသ့ၣ်တဲလၢ တၢ်ကူၣ်ဘၣ်ကူၣ်သ့ဒီးထံရူၢ် ကီၢ်သဲးန့ၣ်တဒံးသိးဘၣ်ႇတဘၣ်တၢ်နီတမံၤဘၣ်ႉ တထီၣ်ဘၣ်ဒီးတန့ၢ်ဘၣ်ႇအါကိ၀ဲဒၣ်ကျိလီၤမီၤနီၤႉ ဖဲအံၤဒုၦၤတဘၣ်သးထီၣ်နီတဂၤဘၣ်” အဂ့ၢ်န့ၣ် လီၢ်က၀ီၤဖိတဂၤဃီအ၀ဲန့ၣ် စံးအါထီၣ်၀ဲန့ၣ်လီၤႉ
လၢန့ၣ်အမဲာ်ညါ ဖဲအပူၤကွံာ်(လါယူၤ ၇)သီအနံၤ ကိးထံၣ်၀ဲဒၣ်လီၢ်က၀ီၤသ၀ီဖိတဖၣ်ဒီး ကၠိတၢ်ဘံၣ်တၢ်ဘၢအဂီၢ်မၢ၀ဲဒၣ်လီၢ်က၀ီၤသ၀ီဖိတဖၣ်အိၣ်ခိး၀ဲတၢ်တနၤ ၂ ဂၤဒီး တဟ့ၣ်ဒုးနုာ်၀ဲ ၦၤလီၤဆီဘၣ်ဒီး မ့ၢ်ထံၣ်ၦၤလီၤဆီန့ၣ်ကဘၣ်ဆဲးကျိးဒုးသ့ၣ်ညါအ၀ဲသ့ၣ်အဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ
၀ဲပၠၣ်သ၀ီအပူၤ ခီဖျိၦၤလၢအတူၢ်လိာ်၀ဲသုးမီၤစိရိၤ(တၢ်မဲာ်ချံ)တဖၣ်အိၣ်၀ဲအါမးအဃိ လီၢ်က၀ီၤဖိလၢ အတတူၢ်လိာ်၀ဲသုးမီၤစိရိၤဘၣ်တဖၣ်စ့ၢ်ကီး တၢ်အိၣ်မူတၢ်ဘံၣ်တၢ်ဘၢတအိၣ်၀ဲဘၣ်အသိး ၦၤလၢအတူၢ်လိာ်ဆီၣ်ထွဲ၀ဲဒၣ်ဒီကလုာ်ဒံၣ်မိၣ်ခြ့ၣ်စံၣ်ကရၢ NLD တဖၣ်စ့ၢ်ကီး ဘၣ်တၢ်တဲပျံၤတဲဖုးအ၀ဲသ့ၣ်အိၣ်၀ဲအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ
