တၢ်ခးသံ BGF သုးဖိတဂၤလၢဃိၣ်သၢဖျၢၣ်၀့ၢ်

လါယူၤ ၁၇ သီႇ ၂၀၂၁ နံၣ်ႇ ခ့ၣ်အဲးစံၣ်

ဖဲမဟါ(လါယူၤ ၁၆)သီ မုၢ်ထူၣ် ၁၁ နၣ်ရံၣ်အဆၢကတီၢ် တၢ်ခးသံ၀ဲဒၣ်သုးခိးကီၢ်ဆၢ (BGF)သုးဖိတဂၤ ဖဲကညီကီၢ်စဲၣ်ႇ ကၠၤအ့စ့ၣ်ကၠံကီၢ်ဆၣ် ဃိၣ်သၢဖျၢၣ်၀့ၢ် က၀ီၤဒ့ ၄ ဟံၣ်တဖျၢၣ်အပူၤအဂ့ၢ်န့ၣ် သ့ၣ်ညါဘၣ်လၢၦၤအိၣ်၀့ၢ်ပူၤတဖၣ်အအိၣ်န့ၣ်လီၤႉ

ခီဖျိတၢ်ခး၀ဲအဃိ သုးခိးကီၢ်ဆၢ(BGF)နီၣ်ဂံၢ်(၁၀၂၁)သုးဖိ မီၤကၠီၤအံၤ အခိၣ်သၣ်ဃံဘၣ်၀ဲဒီးကျိ ၃ ထံၣ်ဒီး သံ၀ဲဒၣ်လၢဃိၣ်သၢဖျၢၣ်ကမျၢၢ်တၢ်ဆါဟံၣ်အဂ့ၢ်န့ၣ် သ့ၣ်ညါဘၣ်လၢဟီၣ်က၀ီၤကလုာ်ဒူၣ်ဖီၣ်စုက၀ဲၤကရူၢ်အအိၣ်န့ၣ်လီၤႉ

“ဖဲမုၢ်ထူၣ် ၁၁ နၣ်ရံၣ်အဆၢကတီၢ်န့ၣ် တၢ်ခးကဲထီၣ်၀ဲလီၤႉ ကဲထီၣ်၀ဲလၢ (BGF)ကိၤစိ၀့အဖိခွါအဟံၣ်လီၤႉ မ့ၢ်မတဂၤခး၀ဲလဲၣ်ႇလၢတၢ်ဂ့ၢ်မနုၤအဃိလဲၣ်န့ၣ်တသ့ၣ်ညါဘၣ်မီၤနီၤႉ ၦၤလၢအဘၣ်ဒီးကျိန့ၣ်မ့ၢ်၀ဲဒၣ်(BGF)အၦၤ တၢ်ကိးအမံၤလၢမီၤကၠီၤလီၤႉ တၢ်လဲၤဆှၢအီၤလၢတၢ်ဆါဟံၣ်ဒီးသံ၀ဲလီၤ”အဂ့ၢ်န့ၣ် ဃိၣ်သၢဖျၢၣ်၀့ၢ်ဖိလၢတအဲၣ်ဒိးပာ်ဖျါအမံၤတဂၤ စံးဘၣ်ခ့ၣ်အဲးစံၣ်န့ၣ်လီၤႉ

(BGF)အၦၤသုးဖိမီၤကၠီၤလၢအသံတဂၤအံၤ အပူၤကွံာ်လါန့ၣ် ၀့ၢ်ပူၤတၢ်မၤ၀ဲတၢ်ထီဒါသုးမီၤစိရိၤတၢ်ပာ်ဖျါထီၣ်သးအပူၤ ဟးလူၤမၤတံာ်တးတြီ၀ဲကမျၢၢ်တဖၣ်အဂ့ၢ်န့ၣ် ၦၤအိၣ်၀့ၢ်ပူၤတဖၣ်စံး၀ဲန့ၣ်လီၤႉ ဘၣ်ထွဲဒီးတၢ်ဂ့ၢ်ကဲထီၣ်သးအံၤ တကီၢ်ခါခဲအံၤ ၦၤဘၣ်မူဘၣ်ဒါလၢအဘၣ်ထွဲတဖၣ် ဃိထံသမံသမိး၀ဲတၢ်အဂ့ၢ်န့ၣ် သ့ၣ်ညါဘၣ်လၢၦၤအိၣ်၀့ၢ်ပူၤကမျၢၢ်တဖၣ်အအိၣ်န့ၣ်လီၤႉ

ဖဲအပူၤကွံာ်(လါယူၤ ၈)သီအနံၤစ့ၢ်ကီး ဃိၣ်သၢဖျၢၣ်၀့ၢ်ႇ သ၀ီသီအပူၤ ၦၤလၢတၢ်တသ့ၣ်ညါအမံၤတဂၤဟဲဒိး၀ဲဒီးဆဲးကဲးခးသံ၀ဲဒၣ် မိၣ်ဃူဖိးပၣ်တံၣ် ဘျီၣ်ဒိၣ်ခၢၣ်စး မံၣ်၀့ၤသံၤဖၠိကဲထီၣ်သးအိၣ်၀ဲအသိး ခီဖျိမ့ၣ်ပိၢ်ပိၢ်ဖးထီၣ်လၢ၀့ၢ်ပူၤတလီၢ်လီၢ်အဃိ ဘၣ်ယိၣ်လၢကဘၣ်ဒိဘၣ်ထံးကမျၢၢ်ထံဖိကီၢ်ဖိအသးသမူတဖၣ်အဂ့ၢ်န့ၣ် သ့ၣ်ညါဘၣ်လၢၦၤအိၣ်၀့ၢ်ပူၤကမျၢၢ်တဖၣ်အအိၣ်န့ၣ်လီၤႉ