လါယနူၤအါရံၤ ၆ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ် ဖၣ်အၣ်ကီၢ်ဆၣ် ချၢၣ်ဃဲၤသ၀ီအပူၤ အပူၤကွံၥ်သုးကလၢၤ တၢ်လီၢ်လၢ တၢ်ကရၢၢ်ပၣ်ဃုၥ်၀ဲဒီး လီၢ်က၀ီၤကမျၢၢ်သ၀ီဖိအဟီၣ်ခိၣ်ဟံၣ်လီၢ်အံၤ အပူၤကွံၥ်လါအခါ(BGF)ထုးကွံၥ်၀ဲတနီၤလံအဂ့ၢ်န့ၣ် ကီၢ်ရ့ၣ်ပှၤဘၣ်မူဘၣ်ဒါဒီး လီၢ်က၀ီၤကမျၢၢ်စံး၀ဲန့ၣ်လီၤ.
သုးခိးကီၢ်ဆၢ(BGF)သုးကလၢၤလၢအိၣ်ဆီလီၤသးဖဲဘူၣ်ပြၢးကရူၢ် ချၢၣ်ဃဲၤသ၀ီအပူၤအံၤ သုးကလၢၤတၢ်လီၢ်လၢ(BGF)ကရၢၢ် ပၣ်ဃုၥ်၀ဲဒီး ပှၤသ၀ီဖိအဟံၣ်လီၢ်ဟီၣ်ခိၣ်အံၤတဖၣ် ဖဲအပူၤကွံၥ်လါဒံၣ်စ့ဘၢၣ်ထီၣ်အခါန့ၣ် လၢကျဲမုၢ်ထီၣ်တကပၤ(BGF)ထုးကွံၥ် ၀ဲတၢ်လီၢ်တနီၤဒီးသုးက့ၤအသးဆူကျဲ၀ၢ်ခီမုၢ်နုၥ်တကပၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤပှၤဘၣ်မူဘၣ်ဒါဒီးကမျၢၢ် အအိၣ်န့ၣ် လီၤ.
(BGF)ထုးလီၤစှၤအသုးကလၢၤတၢ်လီၢ်၀ံၤမၢ၀ဲပှၤသ၀ီဖိလၢအဃ့ၢ်ထီၣ်တ့ၢ်(၃)နံၣ်ဘျဲၣ်အံၤတဖၣ် က့ၤအိၣ်လၢအဟံၣ်အဃီ ဘၣ်ဆၣ် အပူၤကွံၥ်သုးကလၢၤအခိၣ်အဃၢၤတၢ်ဒိးဃၥ်မ့ၣ်ပိၢ်အိၣ်အဃိ သ၀ီဖိတဖၣ်က့ၤအိၣ်လၢအဟံၣ်တဘူၣ်ဒံးဘၣ်အဂ့ၢ်န့ၣ် ချၢၣ်ဃဲၤသ၀ီဖိလၢအဃ့ၢ်ထီၣ်ခီဖျိ(BGF)သုးကလၢၤအဃိအံၤတဂၤ စံးဘၣ် ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
အ၀ဲစံး၀ဲလၢ“ခဲအံၤအ၀ဲသ့ၣ်(BGF)က့ၤသုးလီၤကဒါသးလၢမုၢ်နုၥ်တကပၤ.အက့ၤသုးသးခဲအံၤနါက့န့ၢ်ဃုၥ်ဒီးသ၀ီဖိအတၢ်လီၢ် တက့ဒံး, လၢသ၀ီပူၤလီၤ. အ၀ဲသ့ၣ်ဂၢၤကရၢၢ်ဒုအပၣ်ဃုၥ်ဒံးဘၣ်ဆၣ်ပှၤဟံၣ်ခီဒုတဘၣ်လၢၤဘၣ်, ခဲအံၤယဆိမိၣ်ကပၣ်ဃုၥ် ပှၤသ၀ီဖိအဟံၣ်တဖျၢၣ်ခံဖျၢၣ်ဒံး.အမၢပှၤသ၀ီဖိဟဲက့ၤအိၣ်ဘၣ်ဆၣ်ခီဖျိအ၀ဲသ့ၣ်အိၣ်ဒံးအဃိပှၤဟဲက့ၤအိၣ်တဘူၣ်လၢၤဒံးဘၣ်.ယထံၣ်ပှၤသ၀ီဖိဟဲက့ၤဘှီထီၣ်အဟံၣ်ကအိၣ်တဖျၢၣ်ခံဖျၢၣ်ဒံးလီၤ”အဂ့ၢ်န့ၣ် စံး၀ဲန့ၣ်လီၤ.
တကးဒံးဘၣ်(BGF)အသုးကလၢၤအံၤအိၣ်ဆီလီၤအသးလၢသ၀ီပူၤကျဲမုၢ်ထီၣ်ဒီးမုၢ်နုၥ်ခံကပၤလၢၤလီၤဘၣ်ဆၣ်ခဲအံၤ ထုးကွံၥ်အသုးကလၢၤထဲမုၢ်ထီၣ်တကပၤလီၤ,မ့မ့ၢ်လၢကျဲမုၢ်လၥ်ခီတကပၤန့ၣ် (BGF)စံး၀ဲလၢအ၀ဲသ့ၣ်မၤဆှဲ၀ဲဟီၣ်လၥ်မ့ၣ်ပိၢ်လၢ တၢ်ဒိးလီၤတ့ၢ်၀ဲအံၤတလၢၤဒံးဘၣ်အဃိ ကမျၢၢ်ဟံၣ်လီၢ်လၢပၣ်ဃုၥ်၀ဲ(၁၅)ဖျၢၣ်ဃၣ်ဃၣ်အံၤ လ့ၤတက့ၤတပျဲပှၤကမျၢၢ်က့ၤ အိၣ်၀ဲဒံးဘၣ်အဂ့ၢ်န့ၣ် ချၢၣ်ဃဲၤသ၀ီဖိတဂၤဃီ၀ဲန့ၣ် စံးအါထီၣ်၀ဲန့ၣ်လီၤ.
(BGF)ထုးကွံၥ်အသုးကလၢၤတၢ်လီၢ်တနီၤအိၣ်ထီၣ်အဖီခိၣ်အံၤ ကမျၢၢ်တဖၣ်သးခု၀ဲဘၣ်ဆၣ် ကယဲၢ်မ့ၢ်သုးကလၢၤလၢမ့အိၣ်လၢ သ၀ီပူၤလံန့ၣ်ကဲထီၣ်တၢ်နိးတၢ်ဘျးလၢကမျၢၢ်အဂီၢ်အဃိ သ၀ီဖိတဖၣ်အဲၣ်ဒိး၀ဲလၢ(BGF)ကထုးကွံၥ်အသုးကလၢၤခဲလၢၥ် တဘၣ်အိၣ်ဆီလီၤသးလၢသ၀ီပူၤလၢၤဘၣ်အဂ့ၢ်န့ၣ် သ၀ီဖိတဖၣ်စံး၀ဲန့ၣ်လီၤ.
ဘၣ်ဃးတၢ်ဂ့ၢ်အံၤန့ၣ် ဖၣ်အၣ်ကီၢ်ဆၣ်ခိၣ် စီၤစၤဒၤသ့ စ့ၢ်ကီး စံး၀ဲလၢ “အသုးတလဲလီၢ်န့ၣ်ကမ့ၢ်လၢအနၣ်ဟူ၀ဲ တၢ်ကစီၣ် ဟးထီၣ်ဒီး အ၀ဲသ့ၣ်အံၤမၤတၢ်လၢအတဘၣ်ဘၣ်အဖီခိၣ် ကဆီတလဲအလီၢ်တစဲး ဒ်န့ၣ်လီၤ. သုးလီၢ်တစဲးနါက့ပမ့ကွၢ် န့ၣ် အသုးလီၢ်ဂ့ၤ,တသုးဂ့ၤအတလီၤဆီဘၣ်မ့ၢ်တၢ်အလီၢ်လီၢ်လီၤ.ပတဲအဒိလၢညါန့ၣ်အအိၣ်ဖဲကျဲမုၢ်ဆၢခိၣ်ခဲအံၤန့ၣ်အိၣ်၀ဲဖဲကျဲမုၢ်ဆၢလၥ်တကပၤလီၤ,တမ့ၢ်အယံၤဘၣ်အိၣ်ဒၣ်သုး၀ဲကျဲဆၢခိၣ်ဒီးကျဲဆၢလၥ်ဒ်န့ၣ်လီၤ.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဒ်န့ၣ်အသိးတကီၢ်ခါခဲအံၤ (BGF)မၢပှၤကမျၢၢ်က့ၤအိၣ်ဘၣ်ဆၣ် ပှၤကမျၢၢ်က့ၤအိၣ်ဒံးဘၣ်ထဲစှၤဖျၢၣ်လီၤဒီး တကးဒံးဘၣ် ခီဖျိသုးကလၢၤအခိၣ်အဃၢၤန့ၣ်အပူၤကွံၥ်တၢ်ဒိးလီၤဃၥ်မ့ၣ်ပိၢ်အိၣ်အဃိ ကမျၢၢ်တဖၣ်လၢကက့ၤအိၣ်တ့ထီၣ်ဘှီထီၣ်အဟံၣ် အဃီအဂီၢ် တၢ်ဘံၣ်တၢ်ဘၢတအိၣ်ဒံးဘၣ်အဂ့ၢ်န့ၣ် ဖၣ်အၣ်ကီၢ်ဆၣ်ခိၣ် စံးအါထီၣ်၀ဲန့ၣ်လီၤ.
“လၢမုၢ်ထီၣ်တကပၤန့ၣ်ပှၤသ၀ီဖိက့ၤသူၣ်ထီၣ်အတီၤအဒဲဒုကအိၣ်ထဲဆံဆဲၣ်ဖျၢၣ်ဒုကအိၣ်တနီၤ.တနီၤခီန့ၣ်ခီဖျိ(BGF)အပှၤလၢအဒိး ဃၥ်မ့ၣ်ပိၢ်တဖၣ်န့ၣ်တနီၤနီၤအကစၢ်တအိၣ်လၢၤဘၣ်,တနီၤန့ၣ်အသံအိၣ်စ့ၢ်,မ့၀ံၤအစံၣ်ဖျိးအိၣ်ဒီး မ့ၣ်ပိၢ်န့ၣ်မ့ၢ်အအိၣ် တ့ၢ်ဖဲလဲၣ်တၢ်တသ့ၣ်ညါ၀ဲဘၣ်အဃိ ကမျၢၢ်ထံဖိကီၢ်ဖိန့ၣ်လၢအကက့ၤအိၣ်၀ဲအဂီၢ်ဘၣ်ပျံၤဘၣ်ဖုးတၢ် အိၣ်ဒံးမီၤနီၤ”အဂ့ၢ်န့ၣ် စံး၀ဲ န့ၣ်လီၤ.
(BGF)သုးကလၢၤလၢအိၣ်ဆီလီၤသးဖဲချၢၣ်ဃဲၤသ၀ီပူၤအံၤ အပူၤကွံၥ်မ့ၢ်၀ဲ(ခ့ၣ်အဲၣ်ယူၣ်)တၢ်သမံသမိးတြဲၤလီၢ်ဒီး ဖဲ(၂၀၂၁)သုးဟံ န့ၢ်တၢ်စိတၢ်ကမီၤ၀ံၤလီၢ်ခံ လါမးရှးထီၣ်အခါန့ၣ် ပယီၤသုးထီၣ်ဟံန့ၢ်၀ဲတၢ်လီၢ်အံၤ၀ံၤ(BGF)နုၥ်လီၤအိၣ်ဆီလီၤ၀ဲသုးကလၢၤ တကးဒံးဘၣ်ဒိးလီၤဃၥ်၀ဲမ့ၣ်ပိၢ်၀း၀းတရံးအဃိ ဖဲလါမ့ၤအခါန့ၣ်သ၀ီဖိလၢအိၣ်ဘူးသုးကလၢၤအခိၣ်အဃၢၤအံၤတဖၣ် ဟးပလဲၥ်သးန့ၢ်၀ဲ(၃)နံၣ်ဘျဲၣ်တုၤလၢခဲအံၤက့ၤအိၣ်က့ၤဆိး လၢအဟံၣ်အဃီတဘူၣ်ဒံးဘၣ်ထံၣ်ဘၣ်၀ဲတၢ်ကီတၢ်ခဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိး(BGF)နုၥ်လီၤအိၣ်ဆိးကရၢၢ်ထီၣ်အသုးကလၢၤအခါန့ၣ်စ့ၢ်ကီး ပၣ်ဃုၥ်၀ဲပှၤသ၀ီဖိအဟံၣ်တစှၤန့ၢ်(၂၀)ဖျၢၣ်ဒီး လၢန့ၣ်အမဲၥ်ညါ ပှၤကမျၢၢ်လၢအဃ့ၢ်ထီၣ်ဟးပလဲၥ်သးတဖၣ်အံၤအတၢ်ဖိတၢ်လံၤ,ဟံၣ်ထူၣ်ဃုၥ်ဒီးတၢ်ပီးတၢ်လီလၢအဂၤတဖၣ် တၢ်ဟံဆူၣ်က့ၤစိၥ်၀ဲခဲလၢၥ်အဂ့ၢ်န့ၣ် သ၀ီဖိလၢအတူၢ်ဘၣ်တၢ်သ့ၣ်တဖၣ်အံၤစံးဘၣ်တ့ၢ်ဃၥ်ခ့ၣ်အဲးစံၣ်-ကညီတၢ်ကစီၣ် အိၣ်၀ဲန့ၣ်လီၤ.
တကတီၢ်ဃီအပူၤကွံၥ်ခီဖျိလၢသုးကလၢၤအခိၣ်အဃၢၤဟီၣ်လၥ်မ့ၣ်ပိၢ်အံၤအဃိ ပှၤကမျၢၢ်ယီၢ်ဘၣ်မ့ၣ်ပိၢ်အိၣ်၀ဲအသိး ဆၣ်ဖိကီၢ်ဖိကျီၢ်, ပနၢ်,မဲးတဲးလဲးစ့ၢ်ကီးသံဘၣ်ဒိဘၣ်ထံးကဲထီၣ်အိၣ်၀ဲအမဲၥ်ညါ လၢသုးကလၢၤအံၤအဃိတုၤလၢခဲအံၤ တၢ်အိးထီၣ်ကၠိတဘူၣ်ဒံးဘၣ်ဒီးပှၤကၠိဖိတဖၣ်တၢ်မၤလိန့ၢ်က့ၤအလံၥ်လၢသ၀ီပူၤသရိၥ်အဂ့ၢ်န့ၣ် သ၀ီဖိတဖၣ်စံး၀ဲအသိး သ့ၣ်ညါဘၣ်န့ၣ်လီၤ.
