လါယူၤလံ ၂၂သီ, ၂၀၂၅နံၣ်, ခ့ၣ်အဲးစံၣ်
ကညီကီၢ်စဲၣ် သုးခိးကီၢ်ဆၢ BGF အံၤလၢ ကဆီတလဲက့ၤသးဆူ ကညီဒီကလုၥ်သုးမုၢ်ဒိၣ် KNA အဂီၢ် မၤဝဲတၢ်ဟံးန့ၢ်ကမျၢၢ်တၢ်ဘၣ်သးတခါဖဲအပူၤကွံၥ်လါယူၤ(၂၀)အနံၤလၢ တၢ်လီၢ်ခီတီၢ်ပူၤအဂ့ၢ်သ့ၣ်ညါဘၣ်လၢ BGF အပှၤဘၣ်မူဘၣ်ဒါအအိၣ်န့ၣ်လီၤ.
လၢ(BGF)ကဆီတလဲက့ၤဆူ (KNA)အဖီခိၣ်အံၤန့ၣ် သီခါမ့ၢ်ဂ့ၤ,ထံရူၢ်ကီၢ်သဲးပၣ်တံၣ်ခိၣ်နၢ်မ့ၢ်ဂ့ၤဒီးဒူသဝီကရူၢ်ခိၣ်နၢ်မ့ၢ်ဂ့ၤန့ၣ်အတၢ်ပၥ်သးအိၣ်လၢသးဆူၣ်ဝဲဒီးတူၢ်လိၥ်ဝဲဒၣ်အဂ့ၢ် (BGF)သုးဟီၣ်ကဝီၤနီၣ်ဂံၢ်(၂) အသုးဟီၣ်ကဝီၤခိၣ် သုးခိၣ်ကျၢၢ်ဖိ စီၤတ့ၤဝ့စံးဘၣ်ဝဲ ခ့ၣ်အဲးစံၣ် ကညီတၢ်ကစီၣ် ဒ်အံၤန့ၣ်လီၤ.
အဝဲစံးဝဲလၢ“ပအိၣ်ဖှိၣ်ဘၣ်ဃးလၢပဆီတလဲက့ၤလၢ(KNA)အဂ့ၢ်န့ၣ်လီၤ.ပအဲၣ်ဒိးသ့ၣ်ညါသီခါမ့ၢ်ဂ့ၤ,ထံရူၢ်ကီၢ်သဲးပၣ်တံၣ်ခိၣ်နၢ်မ့ၢ်ဂ့ၤ,သရၣ်သမါမ့ၢ်ဂ့ၤ,ဒူခိၣ်သဝီခိၣ်သ့ၣ်တဖၣ်မ့ၢ်ဂ့ၤမ့ၢ်ဝဲအသ့ၣ်တဖၣ်ပၥ်သးအိၣ်ဒ်လဲၣ်အဂ့ၢ်န့ၣ်လီၤ.တၢ်လီၤဆီလၢအဂုၤအဂၤတအိၣ်ဘၣ်.ပကထီလၢ (KNA)န့ၣ်အဝဲသ့ၣ်သးဆူၣ်ဝဲဒီးတူၢ်လိၥ်ဝဲခဲလၢၥ်လီၤ.သနၥ်က့သီခါအိၣ်တပါခံပါလၢဘၣ်ယိၣ်ဝဲလၢတၢ်ဒုးမ့ၢ်ကဲထီၣ်န့ၣ်ကကဲထီၣ်တၢ်ဝံတၢ်ယိးလၢကမျၢၢ်အဂီၢ်န့ၣ်ပၥ်ဖျါထီၣ်စ့ၢ်ကီးဝဲအိၣ်ဝဲဒၣ်န့ၣ်လီၤ.”အဂ့ၢ်စံးဝဲဒၣ်န့ၣ်လီၤ.
လၢန့ၣ်အမဲၥ်ညါ သီခါ,ထံရူၢ်ကီၢ်သဲးပၣ်တံၣ်ခိၣ်နၢ်,ဒူသဝီခိၣ်နၢ်ဒီးသုးမုၢ်သံၣ်ဘိသ့ၣ်တဖၣ်သးဆူလၢကဆီတလဲက့ၤဝဲ (BGF)ဆူ(KNA)ဘၣ်ဆၣ် တၢ်ကစးထီၣ်ဆီတလဲအီၤမုၢ်နံၤမုၢ်သီတၢ်ဆၢကတီၢ်ဖဲလဲၣ်န့ၣ်တၢ်တဲလီၤတံၢ်အီၤတသ့ဒံးဘၣ်အဂ့ၢ် သုးခိၣ်ကျၢၢ်ဖိစီၤတ့ၤဝဲတဲအါထီၣ်ဝဲဒၣ်စ့ၢ်ကီးန့ၣ်လီၤ.
တကတီၢ်ဃီ ဘၣ်မနုၤ (BGF) က့ၤဆီတလဲက့ၤဆူ (KNA) အဂ့ၢ်လဲၣ်န့ၣ် ခီဖျိ ကွၢ်က့ၤဝဲ(BGF)တၢ်လဲၤကျဲ (၁၄)နံၣ်အတီၢ်ပူၤ သုးဖိလီၤစှၤဒီးအိၣ်တ့ၢ်က့ၤထဲ(၄၀)မျးကယၤခီဖျိ တနီၤသးပှၢ်အိၣ်ဘှံး,တနီၤဃ့ၢ်ဖျိးအဂ့ၢ်,ကမျၢၢ်ထံၣ်အဝဲသ့ၣ်လၢပကဲပယီၤပှၤဒီးသးတဆူၣ်ကဲBGFအသုးဘၣ်အဂ့ၢ်,ကီၢ်ပယီၤပဒိၣ်တပၥ်ပနီၣ်အဝဲသ့ၣ်လၢဘျီၣ်ဒိၣ်ပူၤဘၣ်အသိးတမ့ၢ်လၢကပၥ်ပနီၣ်အဝဲသ့ၣ်လၢကတီၢ်ယံၤအဂီၢ်ဘၣ်အဂ့ၢ်,BGF မ့ၢ်မၤတၢ်လၢလီၢ်ကဝီၤတၢ်လဲၤထီၣ်လဲၤထီအဂီၢ်ထဲလဲၣ်ထဲလဲၣ်ဘၣ်ဆၣ် ထံကီၢ်ပဒိၣ်မ့ၢ်ကိးတၢ်အိၣ်ဖှိၣ်န့ၣ် တၢ်တပၥ်န့ၢ်BGFလီၢ်ဆ့ၣ်နီၤဘၣ်အဂ့ၢ်ဒီးတၢ်တဟ့ၣ်အဝဲသ့ၣ်တၢ်ခွဲးတၢ်ယၥ်ဒ်သုးတဖုဘၣ်အဂ့ၢ်ခီဖျိတၢ်သ့ၣ်တဖၣ်အံၤအဃိ တၢ်ဘၣ်ဆီတလဲက့ၤဆူ (KNA) ကညီဒီကလုၥ်သုးမုၢ်ဒိၣ် အဂ့ၢ် သုးခိၣ်ကျၢၢ်ဖိစီၤတ့ၤဝ့တဲလီၤဖဲတၢ်မၤတၢ်ရဲၣ်တၢ်ကျဲၤမူးအဆၢကတီၢ်အိၣ်ဝဲဒၣ်စ့ၢ်ကီးန့ၣ်လီၤ.
လၢတၢ်မၤတၢ်ထံၣ်လိၥ်သးဒီးကမျၢၢ်တၢ်ရဲၣ်တၢ်ကျဲၤဘျီဝဲအံၤန့ၣ် (BGF)ကရၢခိၣ်ဃုၥ်ဒီးခိၣ်နၢ်ဒိၣ်ထီတဖၣ်,ကညီကီၢ်စဲၣ်ပူၤထံရူၢ်ကီၢ်သဲးပၣ်တံၣ်ခိၣ်နၢ်တဖၣ်, ကီးတရံး,ဖၣ်အၣ်,လူၢ်ပျဲၢ်,တၢ်ကြဲၢ်,ဖၣ်ပူၣ်ဒီးကမးမိၢ်ခဲလၢၥ်ကီၢ်ဆၣ်(၇)ဘ့ၣ်အပူၤ ဒူသဝီခိၣ်နၢ်သးပှၢ်သ့ၣ်တဖၣ်ဟဲထီၣ်ပၣ်ဃုၥ်ပၣ်ဂီၢ်ဝဲဒၣ်အဂ့ၢ် သ့ၣ်ညါဘၣ်လၢ BGF အပှၤဘၣ်မူဘၣ်ဒါအအိၣ်န့ၣ်လီၤ.
