လါစဲးပထ့ဘၢၣ် ၈ သီ, ၂၀၂၅ နံၣ်, ခ့ၣ်အဲးစံၣ်
ဖဲမဟါလါစဲးပထ့ဘၢၣ် ၇ သီအနံၤန့ၣ် သုးမီၤစိရိၤအကဘီယူၤလဲၤခးလီၤတၢ်လၢခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅) လူၤသီကီၢ်ဆၣ် စၢၤသွဲၣ်သီကၠိကရၢၢ်ပူၤအဂ့ၢ်န့ၣ် သ့ၣ်ညါဘၣ်လၢလီၢ်ကဝီၤပှၤဘၣ်မူဘၣ်ဒါ အအိၣ် န့ၣ်လီၤ.
ဖဲမဟါ ဂီၤခီ ၉း၃၀ ဃၣ်ဃၣ်အဆၢကတီၢ် သုးမီၤစိရိၤ(Jet Fighter)ကဘီယူၤလဲၤတ့ၢ်လီၤဝဲမ့ၣ်ပိၢ်(၂)ဖျၢၣ်လၢလ့ပူၤဒၢ စၢၤသွဲၣ်သီကၠိကရၢၢ်ပူၤ အဃိ ကၠိတၢ်ဖီအီၣ်လီၢ်(၁)ဖျၢၣ်ဒီးတၢ်ပၥ်ကီၤတၢ်ဖိတၢ်လံၤတၢ်သူၣ်ထီၣ်လီၢ်(၁)ဖျၢၣ်ဟးဂီၤကွံၥ်ဝဲအဂ့ၢ်န့ၣ် (သုးက့ ၅) ပှၤကတိၤ တၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးဝဲန့ၣ်လီၤ.
အဝဲစံးဝဲလၢ“ဖဲတနံၤညါအံၤ ၇ သီ ဂီၤခီကဘၣ်ဖဲ ၉း၃၀ ခိၣ်ဃၢၤအခါန့ၣ် ပယီၤသုးကဘီယူၤဟဲခးလီၤဝဲတၢ်လၢလ့ပူၤဒၢတၢ်လီၢ် ကၠိကရၢၢ်ပူၤ. ဖဲန့ၣ်ကၠိအတၢ်ဖီအီၣ်လီၢ်န့ၣ်ဟးဂီၤ.မ့ဝံၤဘၣ်ဝဲဒီးကၠိပှၤပၥ်တၢ်ဖိတၢ်လံၤလီၢ်မီၤနီၤ .မ့တၢ်ဖီအီၣ်တၢ်လီၢ် တဖျၢၣ်န့ၣ်ဒုဟးဂီၤလၢၤ. အခးဝဲန့ၣ်(၂)ဖျၢၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲမဟါအနံၤန့ၣ်လီၤ.
ကဘီယူၤလဲၤတ့ၢ်လီၤမ့ၣ်ပိၢ်ဘျီဝဲအံၤခီဖျိဘၣ်လၢအိၣ်ဘှံးနံၤ ကၠိတထီၣ်ဘၣ်အဃိ ပှၤကညီ တၢ်သံတၢ်ဘၣ်ဒိဘၣ်ထံးတအိၣ်ဝဲ ဘၣ်အသိး ကၠိအံၤတၢ်တမၤလိမၤဒိးစ့ၢ်ကီးတၢ်လၢအပူၤလၢၤဘၣ်အဂ့ၢ်န့ၣ် သုးက့ ၅ ပှၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးအါထီၣ်ဝဲ န့ၣ်လီၤ.
“ကၠိတဖျၢၣ်အံၤအပူၤကွံၥ်န့ၣ်ကဘီယူၤဟဲခးတၢ်အိၣ်တဘျုးဘျီလံ.အဃိန့ၣ်ပှၤဆီတလဲအလီၢ်လၢတၢ်လီၢ်အဂၤ.အိၣ်ဒၣ်ပှၤပၥ်တ့ၢ်က့ၤလၢတၢ်ဖိတၢ်လံၤဒီးတၢ်အီၣ်တၢ်အီဒ်န့ၣ်လီၤ.မ့မ့ၢ်ပှၤကၠိဖိန့ၣ်ပှၤသိၣ်လိက့ၤတၢ်လီၢ်လၢအဂၤ.အဃိန့ၣ်တၢ်ဘၣ်ဒိဘၣ်ထံးတအိၣ်ဘၣ်မ့မ့ၢ်ပှၤကညီန့ၣ်”အဂ့ၢ်န့ၣ် စံးဝဲန့ၣ်လီၤ.
ဒ်လီၢ်ကဝီၤပှၤဘၣ်မူဘၣ်ဒါစံးဝဲအသိးန့ၣ် ကၠိလၢကဘီယူၤလဲၤတ့ၢ်လီၤဝဲမ့ၣ်ပိၢ်ဖဲမဟါအနံၤအံၤ အိၣ်တဘူးတယံၤဝဲဒီး ဒ့ၣ်ဘူးနိၣ် သဝီဒီး အပူၤကွံၥ်(၂၀၂၄)လါမးရှး ၁၄ သီအခါစ့ၢ်ကီး ခီဖျိလၢကဘီယူၤလဲၤတ့ၢ်လီၤမ့ၣ်ပိၢ်အံၤအဃိ ဒ့ၣ်ဘူးနိၣ် သးစၢ်မုၣ်ဖိသံ တဂၤ ဒီး တၢ်သူၣ်ထီၣ်တဖၣ်ဟးဂီၤကဲထီၣ်ဒံးဝဲန့ၣ်လီၤ.
(သုးက့ ၅)ဟီၣ်ကဝီၤအပူၤ သုးဟံန့ၢ်တၢ်စိတၢ်ကမီၤဝံၤလီၢ်ခံ တၢ်ဒုးကဲထီၣ်အိၣ်ဂ့ၤတအိၣ်ဂ့ၤ ကျိဖးဒၣ်အမဲၥ်ညါ ခီဖျိကဘီယူၤ လဲၤတ့ၢ်လီၤမ့ၣ်ပိၢ်လၢဒူသဝီ,တၢ်ဖံးအီၣ်မၤအီၣ်လီၢ်ကျဲတလီၢ်လီၢ်အဃိ ကမျၢၢ်ဟံၣ်ဃီအမဲၥ်ညါကၠိ, တၢ်ဘူၣ်တၢ်ဘါတၢ်သူၣ်ထီၣ် ဟးဂီၤကဲထီၣ်ဝဲဒီး ဒ်န့ၣ်အသိးကမျၢၢ်ဃုၥ်ဒီးကၠိဖိတဖၣ်သံဘၣ်ဒိဘၣ်ထံးအိၣ်ဝဲခဲအံၤခဲအံၤန့ၣ်လီၤ.
