လါစဲးပထ့ဘၢၣ် ၁၂ သီ, ၂၀၂၅ နံၣ်, ခ့ၣ်အဲးစံၣ်
တကီၢ်ခါကီၢ်ပယီၤထံရူၢ်ကီၢ်သဲးတၢ်ဂ့ၢ်ကီလၢအဟဲကဲထီၣ်ခဲအံၤ ကမ့ၢ်လၢတၢ်ဘှါဆှဲအီၤလၢသုးဂံၢ်ဘါန့ၢ်ဝဲတညီဘၣ်အဃိ ကျဲအဂ့ၤကတၢၢ်တဘိလၢတၢ်ကဘၣ်ဃဲၣ်လီၤဘှါဆှဲအီၤလၢတၢ်ထံၣ်လိၥ်အိၣ်သကိးလၢစီၤနီၢ်ခိၣ်အဂ့ၢ်န့ၣ် ဒံၣ်မိၣ်ခြ့ၣ်စံၣ်ကညီမၤ ဘျုးသုးမုၢ်ဒိၣ်(DKBA) လီၢ်ခၢၣ်သးထုးထီၣ်ပၥ်ဖျါဝဲဖဲတဟါအံၤန့ၣ်လီၤ.
ထံကီၢ်တၢ်ဂ့ၢ်ကီလၢအဟဲကဲထီၣ်အံၤတဖၣ် တၢ်မ့ဘှါဆှဲအီၤလၢတၢ်ဒုးတၢ်ယၤအဖီခိၣ်န့ၣ် တမ့ၢ်လၢကဘၣ်ဂီၢ်ဖိးဒ့ဝဲဘၣ်အသိး ဘၣ်ဒိဘၣ်ထံးက့ၤဝဲလၢကမျၢၢ်ထံဖိကီၢ်ဖိလီၤအဃိ တၢ်စုဆူၣ်ခီၣ်တကးအမဲၥ်ညါတၢ်မ့ဃဲၣ်လီၤဘှါဆှဲအီၤလၢတၢ်ထံၣ်လိၥ် အိၣ်သကိးန့ၣ် မ့ၢ်ကျဲလၢအဂ့ၤဒိၣ်ကတၢၢ်အဂ့ၢ်န့ၣ် DKBA သုးဂ့ၢ်ဝီခိၣ် သုးခိၣ်ကျၢၢ်ဖိ စီၤစ့ၤဝ့ စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤ.
အဝဲစံးဝဲလၢ“ပထံပကီၢ်တၢ်အိၣ်သးခဲအံၤပမ့ဘှါဆှဲလၢတၢ်ဒုးတၢ်ယၤအဖီခိၣ်ဒုတဘၣ်ဂီၢ်ဖိးဒ့ဘၣ်.နၤနၢၤတထံၣ်,ယၤနၢၤတထံၣ်.မ့ဝံၤဘၣ်ဒိအါလၢကမျၢၢ်မီၤ. ပမ့ဘှါဆှဲအီၤလၢတၢ်စုဆူၣ်ခီၣ်တကးအမဲၥ်ညါမ့ထံၣ်တဲသကိးလိၥ်သးန့ၣ်မ့ၢ်တၢ်လၢအဂ့ၤ ဒိၣ်ကတၢၢ် လီၤ.”အဂ့ၢ်န့ၣ် စံးဝဲန့ၣ်လီၤ.
လၢန့ၣ်အမဲၥ်ညါတၢ်ဃုထၢလၢသုးမီၤစိရိၤကမၤဝဲဘျီဝဲအံၤစ့ၢ်ကီးန့ၣ် ဒ်သိးကီၢ်ပယီၤဒီတဘ့ၣ်ခါဆူညါတၢ်ဆီတလဲလၢအဂ့ၤဒီး ခိၣ်နၢ်လၢ ကမျၢၢ်ဃုထၢထီၣ်ဝဲတဖၣ်ကအိၣ်ထီၣ်ဝဲအဂီၢ် ကကျဲးစၢးမၤစၢၤဝဲတသ့ဖဲအသ့အဂ့ၢ်န့ၣ် (DKBA)လံၥ်တၢ်ပၥ်ဖျါအပူၤ ပၥ်ဖျါဝဲန့ၣ်လီၤ.
လၢတၢ်န့ၣ်အဃိ ကမျၢၢ်ထံဖိကီၢ်ဖိလၢအအဲၣ်ဒိးဟ့ၣ်တၢ်ဖးတဖၣ်အံၤကကဟုကယၥ်ဝဲအသိး ကမျၢၢ်လၢအတအဲၣ်ဒိးဟ့ၣ် တၢ်ဖးဘၣ်တဖၣ်စ့ၢ်ကီးတမ့ၢ်လၢတၢ်ကတြီမၤတံၥ်တၥ်အဝဲသ့ၣ်ဘၣ်အဂ့ၢ်န့ၣ် DKBA သုးခိၣ်ကျၢၢ်ဖိ စီၤစ့ၤဝ့ စံးအါထီၣ်ဝဲန့ၣ်လီၤ.
“တမ့ၢ်လၢပဆီၣ်ထွဲသုးမီၤစိရိၤဘၣ်.အိၣ်ဒၣ်ကမျၢၢ်လၢအဲၣ်ဒိးဃုထၢထီၣ်ခၢၣ်စးတဖၣ်န့ၣ်ဒီးအဲၣ်ဒိးဟ့ၣ်တၢ်ဖးတဖၣ်န့ၣ်(DKBA)ကမၤစၢၤကကဟုကယၥ်အီၤမီၤ.မ့ဘၣ်သးလဲၤဟ့ၣ်တၢ်ဖးန့ၣ်တၢ်တြီတအိၣ်ဘၣ်ဒီးမ့တအဲၣ်ဒိးဟ့ၣ်တၢ်ဖးဘၣ်န့ၣ်တၢ်တြီမၤတံၥ်တၥ်တအိၣ်စ့ၢ်ကီးဘၣ်”အဂ့ၢ်န့ၣ် စံးဝဲန့ၣ်လီၤ.
(DKBA)ကရူၢ်အံၤ ဖဲအပူၤကွံၥ်တနံၣ်အံၤလါယူၤ သုးမီၤစိရိၤတီခိၣ်ရိၣ်မဲမၤဝဲ ၂၀၂၅ Peace Forum တၢ်တဲသကိးတၢ်မုၥ် တၢ်ခုၣ်အခါန့ၣ် လဲၤထီၣ်ဝဲတၢ်အိၣ်ဖှိၣ်ဝံၤ တၢ်ဃုထၢလၢသုးမီၤစိရိၤကမၤဝဲအံၤခီဖျိထံရူၢ်ကီၢ်သဲးတၢ်အိၣ်သးတဂၢၢ်တကျၢၤ ဘၣ်အဃိ တမ့ၢ်လၢအကဲထီၣ်လိၣ်ထီၣ်ကညီဝဲဘၣ်အဂ့ၢ်န့ၣ် စံးဘၣ်တ့ၢ်ဃၥ်ခ့ၣ်အဲးစံၣ်-ကညီတၢ်ကစီၣ်အိၣ်ဝဲန့ၣ်လီၤ.
ဒ်န့ၣ်အသိး (DKBA)ကညီဖီၣ်စုကဝဲၤကရူၢ်ကရၢအံၤအမဲၥ်ညါ သုးခိးကီၢ်ဆၢ(BGF)အံၤစ့ၢ်ကီး တၢ်ဃုထၢလၢသုးမီၤစိရိၤ ကမၤဝဲဘျီဝဲအံၤန့ၣ် ကပၣ်ဃုၥ်ပၣ်ဂီၢ်ဆီၣ်ထွဲမၤစၢၤဝဲအဂ့ၢ်န့ၣ် ထုးထီၣ်ပၥ်ဖျါလံၥ်တၢ်ပၥ်သးတဘ့ၣ်ဖဲတလါအံၤလါစဲးပထ့ဘၢၣ် ၃ သီအနံၤဒံးန့ၣ်လီၤ.
