လါစဲးပထ့ဘၢၣ် ၁၇သီ, ၂၀၂၅နံၣ်, ခ့ၣ်အဲးစံၣ်.
ဖဲတလါအံၤလါစဲးပထ့ဘၢၣ်ထီၣ်သီတၢတနွံအတီၢ်ပူၤန့ၣ် တၢ်ဂ့ၢ်အကလုၥ်ကလုၥ်အဃိ KNLA တီခိၣ်ရိၣ်မဲတၢ်ပၢၢ်ဆၢသုးပၥ်ဖှိၣ်သ့ၣ်တဖၣ်ဘၣ်ထုးကွံၥ်သးဖဲအ့ရှၢၣ်ကျဲမုၢ်ဒီး တကီၢ်ခါခဲအံၤန့ၣ် ကီးတရံး-သ့ၣ်ဃးလီၤတီၢ်-ရၤမတံ ဟီၣ်ကဝီၤသ့ၣ်တဖၣ်န့ၣ် ပယီၤသုးကရူၢ်ဒိၣ်စိကဒါက့ၤဝဲန့ၢ်ဝဲဒၣ်လံန့ၣ်လီၤ.
ဒီးခီဖျိလၢ ပယီၤသုးကရူၢ်အံၤဒိၣ်စိကဒါက့ၤဝဲဒၣ် ကျဲမုၢ်လၢအရ့ဒိၣ်လၢ ကီၢ်ပယီၤ-ကီၢ်ကၠီၣ်တဲၣ် ကီၢ်ဆၢတၢ်ကူၣ်လဲၤမၤကၤအဂီၢ် လၢအမ့ၢ်အ့ရှၢၣ်ကျဲမုၢ်အံၤန့ၢ်လံအဖီခိၣ် ဖဲလါစဲးပထ့ဘၢၣ်(၇)သီအနံၤန့ၣ် ပယီၤသုးကရူၢ်အံၤဘိးဘၣ်ရၤလီၤဝဲလၢ KNUအကီၢ်သူလ့ၤတၢ်မံမီၢ်န့ၣ် မၤလီၤပှီၢ်ဝဲန့ၢ်လံအဂ့ၢ် ဘိးဘၣ်ရၤလီၤဝဲဒၣ်န့ၣ်လီၤ.
လၢတၢ်ဂ့ၢ်ဝဲအံၤအဖီခိၣ်န့ၣ် ကညီဖိကသူၣ်ထီၣ်ကီၢ်သူလ့ၤသးသဟီၣ်န့ၣ်မတဂၤမးမၤလီၤပှီၢ်အီၤတန့ၢ်ဘၣ်ဒီး ပယီၤသုးကရူၢ်အတၢ်ကတိၤဝဲန့ၣ်န့ၣ် မ့ၢ်ဒၣ်တၢ်မၤဆူၣ်ထီၣ်အသုးမုၢ်သံၣ်ဘိသးသဟီၣ်ဒီးတၢ်မၤကမၣ်ထံဂုၤကီၢ်ဂၤပဒိၣ်အမဲၥ်လီၤအဂ့ၢ် KNU-ကညီဒီကလုၥ်စၢဖှိၣ်ကရၢအပှၤကတိၤတၢ်ပၢ ပဒိၣ်စီၤကျၢၤစ့ စံးဘၣ်ဝဲ ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤ.
အဝဲစံးဝဲလၢ“ပကညီဖိကသူၣ်ထီၣ်ကီၢ်သူလ့ၤန့ၣ် မတဂၤမး ဟဲမၤလီၤပှီၢ်တန့ၢ်ဘၣ်န့ၣ်ပသ့ၣ်ညါပဝဲကိးဂၤဒဲးလီၤ.တၢ်ဂ့ၢ်ဝဲန့ၣ် ဘၣ်ထွဲဝဲဒီး ဒီတကလုၥ်သးသဟီၣ်န့ၣ်လီၤ.အဃိန့ၣ်အဝဲသ့ၣ်(သုးကရူၢ်)တၢ်ကတိၤဝဲန့ၣ် န့ၣ်မ့ၢ်ဝဲဒၣ်တၢ်ကတိၤလၢတဲဆူၣ်ထီၣ်အသုးမုၢ်သံၣ်ဘိသးသဟီၣ်ဒီးဒုးထံၣ်ကမၣ်ဝဲဒၣ်ထံဂုၤကီၢ်ဂၤပဒိၣ်အမဲၥ်န့ၣ်လီၤ.ဒီးပသူၣ်ထီၣ်ပကီၢ်သူလ့ၤန့ၣ်အိၣ်ဝဲဒီးအကျိၤအကျဲတၢ်ရဲၣ်တၢ်ကျဲၤလီၤတံၢ်လီၤဆဲးန့ၣ်လီၤ.ဒ်တၢ်ရဲၣ်တၢ်ကျဲၤအိၣ်အသိးဒီးတၢ်ပၥ်ပနီၣ်တၢ်ဆၢကတီၢ်တပတီၢ်ဘၣ်တပတီၢ် တခါဝံၤတခါ ပကရဲၣ်ကျဲၤအီၤန့ၣ်တၢ်ရဲၣ်တၢ်ကျဲၤအိၣ်လီၤတံၢ်လီၤဆဲးလံန့ၣ်လီၤ.”အဂ့ၢ်စံးဝဲဒၣ်န့ၣ်လီၤ.
လၢန့ၣ်အမဲၥ်ညါ ဒ်သိးကညီဖိသ့ၣ်တဖၣ်သုတအိၣ်ဒီးတၢ်ဃူတၢ်ဖိးလၢတၢ်သူၣ်ထီၣ်ကီၢ်သူလ့ၤတဂ့ၤအဂီၢ် ပယီၤသုးကရူၢ်န့ၣ်အိၣ်ဝဲဒီးတၢ်ရဲၣ်တၢ်ကျဲၤလီၤတံၢ်လီၤဆဲးအဃိကညီဖိသ့ၣ်တဖၣ်ကတီၤသူၣ်ပၥ်သးဘၣ်လၢတၢ်ဂ့ၢ်ဝဲန့ၣ်အဂီၢ်အဂ့ၢ် ပဒိၣ်စီၤကျၢၤစ့တဲအါထီၣ်ဝဲဒၣ်စ့ၢ်ကီးန့ၣ်လီၤ.
လၢတၢ်ကသူၣ်ထီၣ်ဝဲဒၣ် ကီၢ်သူလ့ၤအဂီၢ် တၢ်ဖံးတၢ်မၤလၢတၢ်ကတီၤပၥ်သ့ၣ်တဖၣ်န့ၣ်ဝံၤဝဲဒၣ်အမျးကယၤ(၈၀)အဂ့ၢ် ခ့ၣ်အဲၣ်ယူၣ်-အပှၤကတိၤတၢ်ပၢပဒိၣ်စီၤတီနံ စံးတ့ၢ်ဘၣ်ဝဲ ခ့ၣ်အဲးစံၣ်-ကညီတၢ်ကစီၣ်ဖဲအပူၤကွံၥ်လါယူၤအတီၢ်ပူၤအိၣ်ဝဲဒၣ်စ့ၢ်ကီးန့ၣ်လီၤ.
လၢတၢ်န့ၣ်အဃိဘၣ်ဃးဒီးတကီၢ်ခါခဲအံၤတၢ်ကဲထီၣ်သးလၢအ့ရှၢၣ်ကျဲမုၢ်န့ၣ်ခီဖျိလၢဒုးယၤဂ့ၢ်ဝီတၢ်ဖံးတၢ်မၤအဖီခိၣ်ဘၣ်ထုးကွံၥ်သးပျဲကွံၥ်အီၤတစိၢ်တလီၢ်လီၤဒီးတမ့ၢ်လၢအမၤဘၣ်ဒိဘၣ်ထံးဝဲဒၣ်သးသဟီၣ်လၢ ကညီဖိ ကသူၣ်ထီၣ်ဝဲဒၣ်ကီၢ်သူလ့ၤသးသဟီၣ် ဘၣ်ဒီးဒ်တၢ်ပၥ်လီၤတၢ်မၤရဲၣ်ကျဲၤအိၣ်ဝဲအသိးန့ၣ်ကဆဲးလဲၤဝဲတပတီၢ်ဘၣ်တပတီၢ်အဂ့ၢ် ခ့ၣ်အဲၣ်ယူၣ် စံးဝဲဒၣ်န့ၣ်လီၤ.
အ့ရှၢၣ်ကျဲမုၢ်အံၤန့ၣ် စးထီၣ်၂၀၂၃နံၣ်လါဒံၣ်စဲဘၢၣ်အဆၢကတီၢ် KNLAတီခိၣ်ရိၣ်မဲ တၢ်ပၢၢ်ဆၢသုးပၥ်ဖှိၣ် ဒိၣ်စိန့ၢ်ဝဲဒီး သုးကရူၢ်တကပၤဒ်သိးကက့ၤဒိၣ်စိကဒါက့ၤဝဲအဂီၢ် စးထီၣ်ဖဲ ၂၀၂၄နံၣ် လါအ့ဖြ့ၣ်အတီၢ်ပူၤန့ၣ် စးထီၣ်မၤဝဲထံကီၢ်ဒီဘ့ၣ်ပတီၢ်ဒုးယၤဒီးကိးန့ၢ်ဝဲအမံၤလၢ အီၣ်စ့ၣ်ယၣ် ဒုးယၤရဲၣ်ကျဲၤန့ၣ်လီၤ.
အီၣ်စ့ၣ်ယၣ်ပယီၤသုးကျိၤအံၤန့ၣ် သူဝဲဒၣ်ပှၤနီၣ်ဂံၢ်လၢအကထိအသိး သိၣ်လ့ၣ်မျိၥ်,သိလ့ၣ်ထး, Howitzer,Missile,ကျိဖးဒိၣ်အကလုၥ်ကလုၥ်,ဒြိ ဒီး ကဘီယူၤသ့ၣ်တဖၣ်သူဝဲဒၣ်ဒီး ၁နံၣ်ဒီး၉လါတီၢ်ပူၤ KNLA တၢ်ပၢၢ်ဆၢသုးပၥ်ဖှိၣ်ဒိၣ်စိဝဲန့ၢ်အလီၢ်ခံ ဖဲတလါအံၤ လါစဲးပထ့ဘၢၣ်(၆)သီအနံၤန့ၣ်သုးကရူၢ်က့ၤဒိၣ်စိဝဲကဒါက့ၤဝဲန့ၢ်အမဲၥ်ညါပယီၤသုးအံၤအိၣ်ဒီးတၢ်ရဲၣ်တၢ်ကျဲၤလၢကထီၣ်မၤဒုးယၤတၢ်ဟူးတၢ်ဂဲၤလၢရၤမတံဝ့ၢ်ကလံၤထံးတကပၤအဂ့ၢ် သ့ၣ်ညါဘၣ်ဒ်ဂ့ၢ်ခီၣ်ထံးပှၤဟ့ၣ်တၢ်ကစီၣ်ဖိစံးဝဲဒၣ်အသိးန့ၣ်လီၤ.
