လါအီးကထိဘၢၣ် ၂၁ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ဖၣ်အၣ်ကီၢ်ဆၣ် ဝဲပၠၣ်ကရူၢ် ဖါပီၢ်သဝီပူၤ ပယီၤသုးလၢအိၣ်(သုးက့ ၅) ဒွဲၣ်လိကီၢ်ဆၣ် ကမၤမိၢ်ဝ့ၢ်ပူၤအံၤ တဖၣ် ခးလီၤကျိဖးဒိၣ်အဃိ ကမျၢၢ်သံ(၄)ဂၤဒီး ဘၣ်ဒိဘၣ်ထံးအိၣ်လၢအဂၤ(၁၀)ဘျဲၣ်အဂ့ၢ်န့ၣ် လီၢ်ကဝီၤ ပှၤဘၣ်မူဘၣ်ဒါစံးဝဲန့ၣ်လီၤ.
ဖဲမဟါလါအီးကထိဘၢၣ် ၂၀ သီ ဟါခီ ၅း၃၀ ဃၣ်ဃၣ်အဆၢကတီၢ်န့ၣ် တၢ်ဒုးကဲထီၣ်တအိၣ်ကမၤမိၢ်ပယီၤသုးတဖၣ်အံၤခးလီၤ ကျိဖးဒိၣ်(၃)ဖျၢၣ်လီၤတဲၥ်ပိၢ်ဖးထီၣ်ဝဲလၢဖါပီၢ်သဝီဖိ ကၠိကရၢၢ်အခိၣ်အဃၢၤအဃိ ကမျၢၢ်သံတဘျီဃီဖဲန့ၣ်(၂)ဂၤအကျါပၣ်ဃုၥ်ဝဲ ဖိသၣ်(၁)ဂၤအဂ့ၢ်န့ၣ် လီၢ်ကဝီၤကမျၢၢ်လၢအိၣ်ဘူးဖဲန့ၣ်တဖၣ် စံးဝဲအသိး သ့ၣ်ညါဘၣ်န့ၣ်လီၤ.
မ့မ့ၢ်ကမျၢၢ်လၢအဘၣ်ဒိဘၣ်ထံးသ့ၣ်တဖၣ်အကျါတနီၤန့ၣ်မ့ၢ်လၢဘၣ်ဒိနးနးကျံၤကျံၤအဃိတၢ်ဆှၢအဝဲသ့ၣ်ဆူတၢ်ဟံၣ်ဒီး ဖဲန့ၣ်အကျါ နၢ်ဟူလၢအသံကဒီး(၂)ဂၤအဂ့ၢ်န့ၣ် လီၢ်ကဝီၤကမျၢၢ်တဂၤ စံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤ.
“အိၣ်ခးစိဝဲလၢကမၤမိၢ်တကပၤန့ၣ်,ခးစိဝဲဒီးဟီၣ်ဝ့ၣ်စၣ်(၁၂၂ မမ)ကျိဖးဒိၣ်.အဘၣ်သီသီခါန့ၣ်အသံ(၂)ဂၤ.ပှၤနီၢ်ဒိၣ်တဂၤ,ပှၤဖိ သၣ်တဂၤ.ဘၣ်ဆၣ်ခဲအံၤပနၢ်ဟူအသံခဲလၢၥ်အိၣ်(၄)ဂၤလံ.အသံအါထီၣ်(၂)ဂၤအံၤမ့ၢ်အလဲၤသံလၢတၢ်ဆါဟံၣ်ဟဲက့ၤဧါမၤလီၤတံၢ်တန့ၢ်ဒံးဘၣ်.အဘၣ်ဒိခဲလၢၥ်န့ၣ်ကအိၣ်လၢအဂၤ(၁၀)ဘျဲၣ်ညါ.မ့ၢ်တမ့ၢ်ခီပကမၤလီၤတံၢ်က့ၤမီၤ”အဂ့ၢ်န့ၣ် စံးဝဲန့ၣ်လီၤ.
ဒ်လီၢ်ကဝီၤပှၤဘၣ်မူဘၣ်ဒါစံးဝဲအသိးန့ၣ် ဖါပီၢ်သဝီလၢပယီၤသုးခးလီၤကျိဖးဒိၣ်အံၤန့ၣ် အါဒၣ်တက့ၢ်မ့ၢ်ဝဲကညီသုးခိးကီၢ်ဆၢ (BGF) အဟံၣ်ဖိဃီဖိအိၣ်ဝဲလီၤဒီး သဝီအံၤပယီၤသုးခးလီၤကျိဖးဒိၣ်တမ့ၢ်ထဲတဘျီအံၤဘၣ် မ့မ့ၢ်တခီဖဲအပူၤကွံၥ်တနံၣ်အံၤ လါဖ့ၤဘြူၤအါရံၤ အခါန့ၣ်စ့ၢ်ကီး ကမၤမိၢ်ပယီၤသုးဒီးကဘီယူၤခးလီၤတၢ်အဃိ ဝဲပၠၣ်ကရူၢ်ဒီးမဲၢ်ကနးခံကရူၢ်ပူၤ တၢ်သူၣ်ထီၣ် ဟးဂီၤအါမးကဲထီၣ်ဒံး ဝဲန့ၣ်လီၤ.
သုးမီၤစိရိၤအံၤဘူးထီၣ်ဖဲတၢ်ဃုထၢအံၤတၢ်ဒုးကဲထီၣ်အိၣ်ဂ့ၤတအိၣ်ဂ့ၤ ခးလီၤကျိဖးဒိၣ်,သူဝဲကဘီယူၤဟးတ့ၢ်လီၤဝဲမ့ၣ်ပိၢ်လၢ ကမျၢၢ်အိၣ်ဆိးလီၢ်ကျဲဟဲအါထီၣ်ဝဲအသိး ဖဲလါအီးကထိဘၢၣ် ၁၉ သီ မုၢ်ဃ့ၢ်လီၤ ၁ နၣ်ရံၣ်ဃၣ်ဃၣ်အဆၢကတီၢ်န့ၣ် သုးမီၤစိရိၤ ကဘီယူၤလဲၤတ့ၢ်လီၤမ့ၣ်ပိၢ်(၅)ဖျၢၣ်ဒံးလၢမုၢ်တြီၢ်ကီၢ်ရ့ၣ်(သုးက့ ၅)ဒွဲၣ်လိကီၢ်ဆၣ် ထံသဘျုၣ်ထၣ်ကရူၢ် ဖွ့ထီၣ်ရူၢ်သဝီ ပူၤဒံး အဂ့ၢ်န့ၣ် သ့ၣ်ညါဘၣ်န့ၣ်လီၤ.
