လါယနူၤအါရံၤ ၂၀ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)ဟီၣ်ကဝီၤလၢတၢ်ဒုးဆူၣ်ဝဲအံၤ တလါအံၤ(၁၅)သီ အတီၢ်ပူၤ တၢ်ဒုးကဲထီၣ်ဝဲလၢပယီၤသုးဒီးဟီၣ်ကဝီၤ(KNLA)သုးပၥ်ဖှိၣ်အဘၢၣ်စၢၤ ၃၆ ဘျီဒီး ပယီၤသုးတကပၤသံ ဘၣ်ဒိဘၣ်ထံး ၁၇ ဂၤ အဂ့ၢ်န့ၣ် မုၢ်တြီၢ်တၢ်ကစီၣ်ထုးထီၣ်ပၥ်ဖျါဝဲန့ၣ်လီၤ.
(သုးက့ ၅)ဟီၣ်ကဝီၤအပူၤ တနံၣ်အံၤ(၂၀၂၆)နံၣ်ထီၣ် တလါအံၤလါယနူၤအါရံၤ ၁ သီတုၤ ၁၅ သီ လၢ(၁၅)သီတၢ်ဒုးတၢ်ယၤ ကဲထီၣ် ၃၆ ဘျီ အတီၢ်ပူၤအံၤ ပယီၤသုး တကပၤသံဝဲ(၇)ဂၤ ဒီး ဘၣ်ဒိဘၣ်ထံးဝဲ(၁၀)ဂၤ န့ၣ်လီၤ.
လၢ(၁၅)သီအတီၢ်ပူၤအံၤ ပယီၤသုးမီၤစိရိၤ(Jet-Fighter)ကဘီယူၤလဲၤခးလီၤတၢ်လၢဒူသဝီကမျၢၢ်တၢ်ဖံးအီၣ် မၤအီၣ် လီၢ်ကျဲအိၣ်ဝဲခဲလၢၥ်(၅)ဘျီ, ခးလီၤဝဲ(122-MM/ 120-MM/60-MM)ကျိဖးဒိၣ်(၄)ဘျီဒီး ဟးတ့ၢ်လီၤဝဲဒီးဒြိ (၁)ဘျီအဃိ ကမျၢၢ်ဘၣ်ဒိဝဲ(၁)ဂၤအဂ့ၢ်န့ၣ် ပၥ်ဖျါဝဲန့ၣ်လီၤ.
တကးဒံးဘၣ်ဟီၣ်ကဝီၤတၢ်လီၢ်လၢတၢ်ဒုးကဲထီၣ်တဖၣ်အံၤအါဒၣ်တက့ၢ်န့ၣ်အိၣ်ဝဲဒၣ်လၢဒွဲၣ်လိကီၢ်ဆၣ်ပူၤ အဂ့ၢ်န့ၣ် (သုးက့ ၅) သုးက့ခိၣ် သုးခိၣ်ကျၢၢ်ဖိ စီၤဂံၢ်နွံ စံးဝဲန့ၣ်လီၤ.
“လၢသုးက့ ၅ ဟီၣ်ကဝီၤပူၤ တၢ်ဒုးကဲထီၣ် ၃၆ ဘျီန့ၣ် အါဒၣ်တက့ၢ်လၢဒွဲၣ်လိကီၢ်ဆၣ်ပူၤ လ့ဖိထၣ်ကရူၢ် ဝါဒူ,ဝၣ်သိခိၣ်, ကတၢတံၥ်ဒီး ဖၣ်ပူၣ်ဟီၣ်ကဝီၤတၢ်လီၢ်သ့ၣ်တဖၣ်အံၤလီၤ.”အဂ့ၢ်န့ၣ် စံးဘၣ် ခ့ၣ်အဲးစံၣ်-ကညီတၢ်ကစီၣ်ဖဲတဂီၤအံၤန့ၣ်လီၤ.
ဖၣ်ပူၣ်ဝ့ၢ်ဒီးကတၢတံၥ်အံၤခီဖျိအိၣ်ဝဲဒီးပယီၤသုးကလၢၤဒီး (သုးက့ ၅)အပှၤကဝီၤခးဝဲအဃိ သုးကလၢၤအံၤသုတလီၤတဂ့ၤဒီး လၢကမၤအါထီၣ်အသုးဂံၢ်ဘါအဂီၢ် ပယီၤသုးအံၤလၢကမၤမိၢ်ဝ့ၢ်တဆီဟဲထီၣ်ဝဲန့ၢ်တနံၣ်ဃၣ်ဃၣ်လံဘၣ်ဆၣ် ခီဖျိတၢ်ခိး ခးဝဲ လၢတၢ်ဒ့ၣ်စၢၤအဖီခိၣ် တိဝဲတန့ၢ် ဘၣ်ဂုၤက့ၤလီၢ်ခံအိၣ်ဒံးဝဲဖဲဝါဒူသဝီခိၣ်ဃၢၤတုၤအခဲအံၤန့ၣ်လီၤ.
တကးဒံးဘၣ်ဖဲအပူၤကွံၥ် ၁၆ သီ မုၢ်နၤခီ ၁၁း၀၀ နၣ်ရံၣ်ဃၣ်ဃၣ်အဆၢကတီၢ်န့ၣ်စ့ၢ်ကီး လၢဖၣ်ပူၣ်ဒုးယၤသုးကလၢၤ အခိၣ် အဃၢၤန့ၣ် သုးမီၤစိရိၤအကဘီယူၤ(Y-12)လဲၤတ့ၢ်လီၤဝဲမ့ၣ်ပိၢ် တစှၤန့ၢ်အဖျၢၣ်(၆၀)လၢသုးကလၢၤအခိၣ်အဃၢၤ ကဲထီၣ်ဒံးဝဲ အဂ့ၢ်န့ၣ် သ့ၣ်ညါဘၣ်လၢသုးက့ပှၤဘၣ်မူဘၣ်ဒါအအိၣ်န့ၣ်လီၤ.
ဒ်ကီၢ်ရ့ၣ်တၢ်ကစီၣ်ထုးထီၣ်ပၥ်ဖျါဝဲအသိးန့ၣ် မုၢ်တြီၢ်ကီၢ်ရ့ၣ်(သုးက့ ၅)ဟီၣ်ကဝီၤအပူၤ ၂၀၂၅ လါယနူၤအါရံၤ တုၤ လါဒံၣ်စ့ဘၢၣ် လၢတနံၣ်အတီၢ်ပူၤ ပယီၤသုးဒီး(KNLA)အဘၢၣ်စၢၤတၢ်ဒုးကဲထီၣ်ဝဲ(၁,၁၁၃)ဘျီဒီး ပယီၤသုးတကပၤသံဝဲ (၂၈၄)ဂၤ,ဘၣ်ဒိ (၄၅၉)ဂၤ န့ၣ်လီၤ.
