လါဖ့ၤဘြူၤအါရံၤ ၂၅ သီ, ၂၀၂၆ နံၣ်, ခ့ၣ်အဲးစံၣ်
ကီၢ်ကၠီၣ်တဲၣ်-ကီၢ်ပယီၤကီၢ်ဆၢ ဒူပျၥ်ယၥ်ကီၢ်ရ့ၣ်(သုးက့ ၆)ကီးတရံးကီၢ်ဆၣ် မၠၣ်ဝတံၣ်ဝ့ၢ်ဃၢၤ ဖလူကရူၢ် တၢ်လီၢ်တတီၤအပူၤ ဖဲမဟါအနံၤန့ၣ် ပယီၤသုးပညိၣ်တ့ၢ်လီၤဝဲဒြိလၢသိလ့ၣ်ကျဲအဃိ သံ(၅)ဂၤအကျါပၣ်ဃုၥ်ဝဲတၢ်ဘၣ်ဘျုးဒံၣ်မိၣ်ခြ့ၣ်စံၣ် ကညီ သုးမုၢ်ဒိၣ်-DKBA အပှၤ(၃)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဖဲမဟါလါဖ့ၤဘြူၤအါရံၤ ၂၄ သီ ကဘၣ်ဖဲဂီၤခီ ၉း၀၀ ဃၣ်ဃၣ်အဆၢကတီၢ်န့ၣ် တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ် (DKBA)သိလ့ၣ်တခိၣ်လၢက့ၤလီၤဆူမၠၣ်ဝတံၣ်အံၤ ဖဲက့ၤတုၤလၢဖလူကရူၢ် တၢ်နၢအုၣ်ခံကျဲ (ရဲကုန်း)တၢ်လီၢ်အံၤအခါ ပယီၤသုး တ့ၢ်လီၤဝဲဒြိတဘ့ၣ်လၢကျဲမုၢ်ပူၤန့ၣ်လီၤ.
ဘၣ်ဃးတၢ်ဂ့ၢ်ကဲထီၣ်သးဘျီဝဲအံၤ လီၢ်ကဝီၤကမျၢၢ်ပှၤဘၣ်မူဘၣ်ဒါလၢအသ့ၣ်ညါထွဲတၢ်ဂ့ၢ်အံၤတဂၤစံးဝဲလၢ“တၢ်န့ၣ်ဘၣ် လၢပှၤ သဝီဖိအကါန့ၣ်ဟးဂီၤလၢကျဲပူၤ.အဃိ(DKBA)ကါခီဒုတိနိၣ်ဝဲဘျီစံၣ်လီၤမၤစၢၤဝဲန့ၣ်.ပယီၤခီဒုဟးလူၤကွၢ်လၢတၢ်ဖီခိၣ်မၢ်မၢ်လီၤ.အဃိန့ၣ်ထံၣ်ဝဲဘျီပျၢ်ထီၣ်ဒြိဖးဒိၣ်လၢတၢ်ဖးဖီဝံၤတ့ၢ်လီၤဝဲဘျီဘၣ်ဝဲန့ၣ်.ပယီၤသုးန့ၣ်ဟးဆှၣ်တၢ်အိၣ်မၢ်မၢ်လီၤကွၢ်ဝဲတၢ်မ့ၢ်လီၤဆီန့ၣ်ကွံၥ်လီၤဝဲလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
လၢပယီၤသုးတ့ၢ်လီၤဒြိဘျီဝဲအံၤအပူၤန့ၣ် (DKBA)အပှၤသံ(၃) ဂၤအသိးကမျၢၢ်စ့ၢ်ကီးသံဝဲ(၂)ဂၤတကးဒံးဘၣ်အမဲၥ်ညါ ဘၣ်ဒိၣ် ဘၣ်ထံးစ့ၢ်ကီးဝဲ(၅)ဂၤ အဂ့ၢ်န့ၣ် (DKBA)ပှၤကတိၤတၢ်ပၢ သုးခိၣ်ဒိၣ်စိ စီၤဖါဘျဲၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤ.
“တၢ်လီၢ်တခါန့ၣ်ဘၣ်လၢခံခီခံကပၤဘၣ်သဂၢၢ်လိၥ်သးအဖီခိၣ်ပပှၤခီန့ၣ်ဘၣ်လၢက့ၤလီၤဆူမၠၣ်ဝတံၣ်.က့ၤလီၤဘျီဘၣ်န့ၢ်လၢတၢ်တီၤဒ်န့ၣ်.ဘၣ်လၢအဝဲသ့ၣ်ခံဖုဖံးတၢ်မၤတၢ်တၢ်ရဲၣ်တၢ်ကျဲၤအိၣ်ဒ်န့ၣ်အဃိ ပပှၤန့ၣ်ကါဟးဂီၤဘျီဘၣ်လၢဆီၣ်ကါဆၢကတီၢ်ဒီး ပယီၤသုးန့ၣ်အဒြိလီၤအဃိပပှၤသုးဖိသံ(၃)ဂၤဒီးကမျၢၢ်သံ(၂)ဂၤမီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတဂီၤအံၤ န့ၣ်လီၤ.
တၢ်နၢအုၣ်ခံကျဲ ယဲကိ(ရဲကုန်း)တၢ်လီၢ်လၢတၢ်ကဲထီၣ်သးခဲအံၤန့ၣ် အိၣ်ဝဲဖဲလ့ၣ်က့ၣ်ကိၥ် စွဲၤတီၤကိကွၢ်လီၤဒီး ဟီၣ်ကဝီၤဝဲန့ၣ် ဘၣ်လၢဒုးယၤတၢ်သဘံၣ်သဘုၣ်ဟီၣ်ကဝီၤအအဃိ တၢ်တဟ့ၣ်တၢ်ပျဲလၢတၢ်ကလ့ၢ်ထီၣ်လ့ၢ်လိၤစ့ၢ်ကီးဘၣ်ဘၣ်ဆၣ် လီၤဆီဒၣ် တၢ်(DKBA) အပှၤလ့ၢ်ထီၣ်လ့ၢ်လိၤဝဲအိၣ်အဂ့ၢ်န့ၣ် ကရူၢ်ခိၣ်နၢ်တဖၣ် စံးဝဲန့ၣ်လီၤ.
ဒ်န့ၣ်အသိးဘၣ်တၢ်ဃးတၢ်ဂ့ၢ်ကဲထီၣ်ဘျီဝဲအံၤ ဒုၣ်ဒါတကပၤအတၢ်ပညိၣ်အိၣ်ဒ်လဲၣ်တသ့ၣ်ညါဘၣ်အဃိ ခါဆူမဲၥ်ညါကမျၢၢ်ထံဖိ ကီၢ်ဖိမ့ၢ်ဂ့ၤ, ကညီဖီၣ်စုကဝဲၤကရူၢ်ကရၢတဖုဖုမ့ၢ်ဂ့ၤကဟးထီၣ်က့ၤလီၤလၢတၢ်ပလီၢ်ပဒီပူၤအဂ့ၢ်န့ၣ် သုးခိၣ်ဒိၣ်စိ စီၤဖါဘျဲၣ် စံးအါ ထီၣ်ဝဲန့ၣ်လီၤ.
“ခးကမၣ်ဒုတမ့ၢ်ဘၣ်တၢ်န့ၣ်ပယီၤသုးန့ၣ်ကွံၥ်လီၤဒြိဘျီဘၣ်ဝဲပပှၤန့ၣ်.အဝဲသ့ၣ်အတၢ်ပညိၣ်အိၣ်ဒ်လဲၣ်ဒုပတသ့ၣ်ညါဘၣ်မီၤ.အမၤတၢ်န့ၣ်တကွၢ်ထံကွၢ်ဆးတၢ်ဘၣ်ဘျီတဘၣ်လၢအဒုၣ်အဒါဘၣ်,ဘၣ်ပပှၤလီၤမီၤ.အဃိပအဲၣ်ဒိးတဲလၢထံဖိကီၢ်ဖိ မ့ၢ်ဂ့ၤ, သုးမုၢ် သံၣ်ဘိတဖုဖုမ့ၢ်ဂ့ၤမ့ဟးထီၣ်က့ၤလီၤန့ၣ်ပလီၢ်သူၣ်ပလီၢ်သးမီၤ.ခဲအံၤတၢ်ကဲထီၣ်သးဒုပမ့ဘၣ်တဂၤန့ၣ်ပဘၣ်ကီၤကစုလီၤ.ဘၣ်မနုၤအဃိလဲၣ်တၢ်ကဲထီၣ်သးခဲအံၤန့ၣ်မ့ၢ်ဝဲတၢ်ဒုးတၢ်ယၤဟီၣ်ခိၣ်အမဲၥ်ဖံးခိၣ်လီၤ.အဃိလ့ၤတက့ၤမ့တလဲၤဘၣ်န့ၣ်ဂ့ၤကတၢၢ်လီၤ”အဂ့ၢ်န့ၣ် စံးဝဲန့ၣ်လီၤ.
ဒ်လီၢ်ကဝီၤဒူသဝီပှၤဘၣ်မူဘၣ်ဒါစံးဝဲအသိးန့ၣ်(DKBA)အပှၤသံ(၃)အံၤမ့ၢ်ဝဲလီၢ်ခၢၣ်သးအပှၤဒီးသုးခိၣ်(စီၤသရံထူ)အပှၤ ဒီး ဘၣ်ဆၣ်မ့မ့ၢ်ပှၤလၢအဘၣ်ဒိ ဘၣ်ထံးတဖၣ်န့ၣ်မ့ၢ်ဝဲကမျၢၢ်န့ၣ်လီၤ.
တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)လၢအဆဲးလီၤထံကီၢ်ဒီဘ့ၣ်တၢ်ပတုၥ်တၢ်ခးအံၤ ခီဖျိလၢဒြိဒီးကျိဖးဒိၣ်အဃိ ကရူၢ်အပှၤ သံဘၣ်ဒိဘၣ်ထံးကဲထီၣ်တမ့ၢ်ထဲတၢ်တဘျီအံၤဘၣ်မ့မ့ၢ်တခီစးထီၣ်ဖဲတၢ်ထီၣ်ပယီၤသုးကလၢၤလၢအိၣ်ဆိၣ်စံမၠဲၣ် ဝ့ၢ်ခိၣ်ဝ့ၢ်ဃၢၤဟီၣ်ကဝီၤပူၤအခါန့ၣ် သုးမီၤစိရိၤအံၤလၢကဘီယူၤဒီးဒြိ,ကျိဖးဒိၣ်အံၤတဆီလဲၤခးလီၤတၢ်လၢကရူၢ်အံၤအ တၢ်ပၢဟီၣ် ကဝီၤခိၣ်နၢ်အဟံၣ်,သုးဖိသံၣ်ဖိအိၣ်အလီၢ်အိၣ်ဝဲဒီး တၢ်သံတၢ်ဘၣ်ဒိဘၣ်ထံးစ့ၢ်ကီးကဲထီၣ်အိၣ်ဝဲန့ၣ်လီၤ.
ဒ်န့ၣ်အသိးဘၣ်ဃးတၢ်ကဲထီၣ်သးဖဲမဟါဘျီဝဲန့ၣ်အခါစ့ၢ်ကီး(DKBA)ခိၣ်နၢ်တနီၤစံးဝဲလၢအမ့ၢ်ဒြိဖးဒိၣ်ဘၣ်ဆၣ် တၢ်ကဲထီၣ် သးအခိၣ်အဃၢၤန့ၣ်ခီဖျိတၢ်တထံၣ်ဝဲဒြိအက့အခီအိၣ်တ့ၢ်ဘၣ်အဃိ တနီၤန့ၣ်စံးဝဲလၢအမ့ၢ်(၁၂၀ မမ) ကျိဖးဒိၣ်စ့ၢ်ကီး အိၣ်ဝဲ န့ၣ်လီၤ.
မၠၣ်ဝတံၣ်ဟီၣ်ကဝီၤပူၤ စးထီၣ်ဖဲအပူၤကွံၥ်စှၤကိၥ်လါပယီၤသုးဟဲက့ၤဆ့ၣ်နီၤမၤအါထီၣ်သုးဂံၢ်ဘါအါအါဂီၢ်ဂီၢ်လၢ ဝ့ၢ်ပူၤဝံၤလီၢ်ခံ န့ၣ် ဒုးယၤတၢ်ဖ့ၣ်စၢဆဲးကဲထီၣ်ကဒါဝဲလၢအဝဲသ့ၣ်ဒီးဟီၣ်ကဝီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ် (KNLA)သုးပၥ်ဖှိၣ် အဘၢၣ်စၢၤ တုၤလၢခဲအံၤန့ၣ်လီၤ.
