လါမးရှး ၁၂ သီ, ၂၀၂၆ နံၣ်, ခ့ၣ်အဲးစံၣ်
ဖဲတနံၤအံၤလၢခ့ၣ်အဲၣ်ယူၣ် ချၢၣ်လွံၢ်ထူၣ်ကီၢ်ရ့ၣ်(သုးက့ ၃)ဒီး မုၢ်တြီၢ်ကီၢ်ရ့ၣ်(သုးက့ ၅)ဟီၣ်ကဝီၤအပူၤ ကဘီယူၤလဲၤတ့ၢ်လီၤ ကဒီးမ့ၣ်ပိၢ်အဃိ ကမျၢၢ်သံခဲလၢၥ်(၈)ဂၤဒီးဘၣ်ဒိဘၣ်ထံးဝဲ(၂၃)ဂၤအဂ့ၢ်န့ၣ် ကီၢ်ရ့ၣ်ခံဘ့ၣ်အံၤပှၤဘၣ်မူဘၣ်ဒါစံးဘၣ်ခ့ၣ်အဲးစံၣ်-ကညီ တၢ်ကစီၣ်န့ၣ်လီၤ.
မုၢ်တြီၢ်ကီၢ်ရ့ၣ် ဒွဲၣ်လိကီၢ်ဆၣ်အပူၤ ဖဲတနံၤအံၤလါမးရှး ၁၁ သီ မုၢ်ထူၣ် ၁၂း၀၀ အဆၢကတီၢ်ကဘီယူၤလဲၤတ့ၢ်လီၤဝဲ မ့ၣ်ပိၢ် (၆)ဖျၢၣ်ဂီၢ်မုၢ်ကရူၢ် ဝီၢ်မုၢ်သဝီပူၤ ကမျၢၢ်ဘၣ်ဒိ(၁)ဂၤဒီး တကတီၢ်ဃီမၤကဒီးဖဲမုၢ်ဃ့ၢ်လီၤ ၂ နၣ်ရံၣ်အဆၢကတီၢ် ဟဲတ့ၢ်လီၤ ကဒီးဝဲ မ့ၣ်ပိၢ်(၄)ဖျၢၣ် လၢမးလံလၢၢ်သဝီပူၤအဃိ သဝီဖိပိၥ်မုၣ်ဘၣ်ဒိ(၇)ဂၤ အမဲၥ်ညါမၤကဒီးဖဲဟါခီ ၃ နၣ်ရံၣ်အဆၢကတီၢ် ဟဲတ့ၢ် လီၤကဒီး ဝဲမ့ၣ် ပိၢ်လၢဖှၣ်ဟဲထူၣ်သဝီပူၤအဃိ ကမျၢၢ်သံ(၂)ဂၤဒီးဘၣ်ဒိဘၣ်ထံးဝဲ(၁၀)ဂၤအဂ့ၢ်န့ၣ် (သုးက့ ၅)ပှၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးဝဲန့ၣ်လီၤ.
တကးဒံးဘၣ်ဖဲတနံၤအံၤ ၁း၀၀ နၣ်ရံၣ်ဃၣ်ဃၣ်အဆၢကတီၢ်စ့ၢ်ကီး လၢချၢၣ်လွံၢ်ထူၣ်ကီၢ်ရ့ၣ်(သုးက့ ၃)ဆီထံးကီၢ်ဆၣ် အီပလါ သဝီအပူၤစ့ၢ်ကီး ကဘီယူၤ လဲၤတ့ၢ်လီၤဝဲမ့ၣ်ပိၢ်(၃)ဖျၢၣ်အဃိ ကမျၢၢ်သံ(၆)ဂၤအကျါပၣ်ဃုၥ်ဝဲ ဖိသၣ်မုၣ် (၆)နံၣ်တဂၤဒီး ဖိသၣ်ပိၥ်ခွါ(၆)နံၣ်တဂၤ အဂ့ၢ်န့ၣ် ကီၢ်ရ့ၣ်ပှၤဘၣ်မူဘၣ်ဒါစံးဝဲန့ၣ်လီၤ.
ကဘီယူၤလဲၤတ့ၢ်လီၤမ့ၣ်ပိၢ်ဘျီဝဲအံၤကမျၢၢ်သံအမဲၥ်ညါဘၣ်ဒိဘၣ်ထံးစ့ၢ်ကီးဝဲ(၄)ဂၤအံၤအကျါစ့ၢ်ကီးပၣ်ဃုၥ်ဝဲ ဖိသၣ်မုၣ် (၉)နံၣ်တဂၤဒီး ပှၤသ့ၣ်တဖၣ်အံၤဘၣ်ဒိဘၣ်ထံးဝဲအစုအခီၣ်,အဖံဘၣ်ခိၣ်,အကံၣ်ဒုၣ်,အယီၢ်ဒ့အဂ့ၢ်န့ၣ် ကီၢ်ရ့ၣ်ပှၤဘၣ်မူဘၣ်ဒါ စံးဝဲအသိး သ့ၣ်ညါၣ်ဘၣ်န့ၣ်လီၤ.
ဒ်န့ၣ်အသိးတချုးကဘီယူၤလဲၤတ့ၢ်လီၤမ့ၣ်ပိၢ်လၢဆီထံးကီၢ်ဆၣ်အံၤဒံးဘၣ်ဖဲနံၤဃီဖဲဂီၤခီ ၉း၂၅ မံးနံး ဒီး ၃း၀၀ နၣ်ရံၣ်အဆၢ ကတီၢ်စ့ၢ်ကီး လၢလၢၢ်ဒိၣ်ကီၢ်ဆၣ် လ့ၣ်ပ့ၣ်ဝဲသဝီအပူၤ ပယီၤသုးခီၣ်သုးရ့ၣ်(ခလရ-၂၆၄) သုးရ့ၣ်အံၤလဲၤ တ့ၢ်လီၤဝဲဒြိမ့ၣ်ပိၢ်(၉) ဖျၢၣ်အဃိ ကမျၢၢ်တၢ်သံတၢ်ဘၣ်ဒိဘၣ်ထံးတအိၣ်ဘၣ်ဘၣ်ဆၣ်ဟံၣ်တၢ်သူၣ်ထီၣ်ဟးဂီၤဝဲ(၆)ဖျၢၣ် စ့ၢ်ကီးအဂ့ၢ်န့ၣ် သ့ၣ်ညါဘၣ် န့ၣ်လီၤ.
ချၢၣ်လွံၢ်ထူၣ်ကီၢ်ရ့ၣ်အပူၤစးထီၣ်ဖဲလါမးရှးထီၣ် ၅ သီအံၤပယီၤသုးကျိၤနုၥ်လီၤတၢ်ဒုးဆူၣ်ထီၣ်ဝဲဒီးပယီၤသုးအံၤသူဝဲဒြိ, ကျိဖးဒိၣ် ဒီးကဘီယူၤတကးဒံးဘၣ်ဖီၣ်ကမျၢၢ်မၤသံဃုၥ်ဝဲအဃိ ကမျၢၢ်သံအိၣ်လံအဂၤ(၃၀)ဘျဲၣ်လံဒီးဘၣ်ဒိဘၣ်ထံးအိၣ်ထီၣ် တုၤလၢ(၂၀)ဃၣ်ဃၣ်လံအသိး ကမျၢၢ်တနီၤဘၣ်တၢ်ဖီၣ်ဃၥ်ဒံးအဝဲသ့ၣ်လၢပယီၤသုးတုၤလၢခဲအံၤအိၣ်ဝဲန့ၣ်လီၤ.
သုးမီၤစိရိၤအံၤစးထီၣ်လၢအဝဲသ့ၣ်မၤဝဲတၢ်ဃုထၢဝံၤလီၢ်ခံန့ၣ်လၢခ့ၣ်အဲၣ်ယူၣ်ဟီၣ်ကဝီၤအပူၤအဝဲသ့ၣ်မၤဆူၣ်ထီၣ်ဝဲ တၢ်ဒုး တၢ်ယၤအမဲၥ်ညါဟးခးလီၤတၢ်ဒီးကဘီယူၤလၢကမျၢၢ်ထံဖိကီၢ်ဖိအိၣ်ဆိးလီၢ်ကျဲကိးမုၢ်နံၤဒဲးအဃိကမျၢၢ်တဖၣ်ကအိၣ်လၢ တၢ်ဘံၣ် တၢ်ဘၢလီၢ်အဂ့ၢ်န့ၣ် (သုးက့ ၅)ပှၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် ဟ့ၣ်ပလီၢ်ဝဲကမျၢၢ်သ့ၣ်တဖၣ်န့ၣ်လီၤ.
သုးက့(၅)ဒွဲၣ်လိကီၢ်ဆၣ်ဒီးလူၤသီကီၢ်ဆၣ်အပူၤ ဖဲအပူၤကွံၥ်လါမးရှး ၈ သီ ဒီး ၉ သီအနံၤစ့ၢ်ကီး ခီဖျိကဘီယူၤလဲၤတ့ၢ်လီၤမ့ၣ်ပိၢ် အဃိ လီၢ်ကဝီၤကမျၢၢ်သံ(၄)ဂၤဒီးဘၣ်ဒိဘၣ်ထံးတစှၤန့ၢ်(၈)ဂၤကဲထီၣ်ဒံးဝဲန့ၣ်လီၤ.
