လါယူၤ ၁၈ သီ, ၂၀၂၆ နံၣ်, ခ့ၣ်အဲးစံၣ်
စးထီၣ်ဖဲအပူၤကွံၥ်လါမ့ၤထီၣ်အဆိကတၢၢ်တနွံအခါန့ၣ် ပယီၤသုးကျိၤဟဲထီၣ်ဝဲလၢခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅) ဘုသိၣ်ကီၢ်ဆၣ်ဒီးဒွဲၣ်လိကီၢ်ဆၣ်ပူၤအဃိ တကီၢ်ခါခဲအံၤတၢ်ဆၢကတီၢ်တုၤဃီၤဝဲလၢကၠိက့ၤအိးထီၣ်ကဒါလံဘၣ်ဆၣ် ဟီၣ်ကဝီၤဖဲ န့ၣ်အပူၤ ကၠိ(၁၅)ဖျၢၣ်တၢ်အိးထီၣ်တဘူၣ်ဒံးဘၣ်အဂ့ၢ်န့ၣ် သ့ၣ်ညါဘၣ်လၢပှၤဘၣ်မူဘၣ်ဒါအအိၣ်န့ၣ်လီၤ.
အဃိကၠိလၢတၢ်အိးထီၣ်ဝဲတဘူၣ်ဒံးဘၣ်သ့ၣ်တဖၣ်န့ၣ်မ့ၢ်ဝဲ လ့ဖိထၣ်ကရူၢ်ဒီးမဲၤပ့းကရူၢ်ပူၤ မဲးကၠံၣ်ခံကၠိ, မီလိၥ်ကျိ, နဲၤကး, ဝၣ်သိထၣ်,တရီပူၤ,ဝၣ်သိခိၣ်,မိၣ်လိၣ်ပၢ်,နိၤဃဲထၣ်,ဘီကၠိၣ်ထၣ်,လၢၢ်ကွဲဖိ,လၢၢ်ကွဲဒိၣ်,ပိၤကၠံၤ,မဲကလါ,သ့ၣ်ခိၣ်ကျါဒီးတဃီၤခိၣ်ကၠိသ့ၣ်တဖၣ်အံၤန့ၣ်လီၤ.
ကၠိဘၣ်ထီၣ်အဆၢကတီၢ်ခီဖျိလၢကၠိအိးထီၣ်တသ့ဘၣ်အဖီခိၣ် ဘၣ်ဒိဘၣ်ထံးဝဲဖိဒံဖိသၣ်,ပှၤကၠိဖိအတၢ်ကူၣ်ဘၣ်ကူၣ်သ့ အမဲၥ်ညါ ခဲအံၤဆၢကတီၢ်ဘၣ်ဝဲလၢပှၤကဘၣ်စးထီၣ်ကဒါက့ၤတၢ်ဖံးတၢ်မၤဘၣ်ဆၣ် ကမျၢၢ်တဖၣ်က့ၤလီၤကဒါတၢ်ဖံး တၢ်မၤတသ့ဘၣ် အဂ့ၢ်န့ၣ် (သုးက့ ၅)ပှၤကတိၤတၢ်ပၢ ပဒိၣ်စီၤထိၣ်ရီဘ့ၤ စံးဝဲန့ၣ်လီၤ.
“ခီဖျိလၢပယီၤသုးကျိၤဟဲထီၣ်ဟူးဂဲၤခးဝ့ၢ်ဝီၤကျိဒိၣ်,တ့ၢ်လိၤဒြိ,ဒွၣ်အူသဝီအဖီခိၣ်န့ၣ် ကမျၢၢ်ဘၣ်စံၣ်ဘၣ်ဃ့ၢ်မ့ဝံၤ ခဲအံၤ တၢ်ဆၢကတီၢ်ဘၣ်လံ ကၠိလၢထီၣ်တသ့ဘၣ်န့ၣ်အိၣ်(၁၅)ဖျၢၣ်ညါ. အဃိန့ၣ်ဘၣ်ဒိဘၣ်ထံးဝဲဘၣ်ဖိသၣ်အတၢ်ကူၣ်ဘၣ် ကူၣ်သ့ ဖးဒိၣ်လီၤ. အဂၤတခါန့ၣ်ခဲအံၤဒူသဖိသဝီဖိတဖၣ်န့ၣ်ဆၢကတီၢ်ခဲအံၤအကဘၣ်သူၣ်တၢ်ဖျးဘၣ်ဖံး တၢ်မၤတၢ်မီၤ. သနါက့အဝဲသ့ၣ်ဘၣ်ပၥ်တ့ၢ်အဟံၣ်အဃီဘၣ်ကဲထီၣ်က့ၤပှၤဃ့ၢ်မှံဟးဖျိး ဒ်သိးပသ့ၣ်ညါဘၣ်န့ၣ်သဝီလၢအဘၣ်ဃ့ၢ်ထီၣ် အိၣ်ဝဲ(၁၃)ဖျၢၣ်”အဂ့ၢ်န့ၣ် စံးဝဲန့ၣ် လီၤ.
ဒ်ကီၢ်ရ့ၣ်တၢ်မၤနီၣ်စရီပူၤအိၣ်ဝဲအသိးန့ၣ် ပယီၤသုးအတၢ်ဟဲထီၣ်ဘျီဝဲအံၤအပူၤန့ၣ် ဒွဲၣ်လိဒီးဘုသိၣ်ကီၢ်ဆၣ်အပူၤ ဒူသဝီ (၁၃)ဖျၢၣ် လၢအဘၣ်ဃ့ၢ်ထီၣ်သ့ၣ်တဖၣ် န့ၣ်မ့ၢ်ဝဲ ဘီကၠိၣ်ထၣ်,နိးဃဲထၣ်,မိၣ်လိၣ်ပၢ်,မီလိၥ်ကျိ,နဲၤကး,မဲးကၠံၣ်ခံ,တရီပူၤ, လၢၢ်ကွဲဖိ, လၢၢ်ကွဲဒိၣ်,ပိၤကၠံၤ,မဲကလါ,တဃီၤခိၣ်ဒီးဝၣ်သိခိၣ်သဝီ ပှၤနီၣ်ဂံၢ်လၢအကလးဘၣ်ဃ့ၢ်ထီၣ်ဝဲတုၤလၢခဲအံၤန့ၣ်လီၤ.
တကးဒံးဘၣ်လၢပယီၤသုးအတၢ်ဟဲထီၣ်ဟူးဂဲၤတလါဘျဲၣ်အတီၢ်အပူၤအံၤစ့ၢ်ကီး ခီဖျိအဝဲသ့ၣ်တၢ်ဟူးတၢ်ဂဲၤဒ်အမ့ၢ် ကျိဖးဒိၣ်, ဒြိ, ကဘီယူၤဒီး ဒွဲၣ်အူအီၣ်ဝဲအံၤအဃိ ဟံၣ်တၢ်သူၣ်ထီၣ်အူအီၣ်ဟးဂီၤဝဲ(၁၆၀)ဖျၢၣ် အဂ့ၢ်န့ၣ် ခ့ၣ်အဲၣ်ယူၣ်တၢ်မၤနီၣ်ပူၤအသိး သ့ၣ်ညါဘၣ်န့ၣ်လီၤ.
တကီၢ်ခါခဲအံၤကမျၢၢ်လၢအဃ့ၢ်ထီၣ်သ့ၣ်တဖၣ်အံၤအဂီၢ် ဂံၢ်ခီၣ်ထံးတၢ်ကရၢကရိတနီၤဟဲဆီၣ်ထွဲမၤစၢၤဝဲအိၣ်ဘၣ်ဆၣ် ခီဖျိကမျၢၢ် ပှၤဃ့ၢ်မှံဟးဖျိးအနီၣ်ဂံၢ်အါအဃိ ဂံၢ်ခီၣ်ထံးတၢ်အီၣ်တၢ်အီအမဲၥ်ညါခဲအံၤခီဖျိတၢ်စူၤခါအဃိ လိၣ်ဘၣ်ဒံးဝဲ တၢ်ခိၣ်ဒုး(တၤလပၣ်)ဒီး ကသံၣ်ကသီတၢ်ဆီၣ်ထွဲမၤစၢၤအဂ့ၢ်န့ၣ် ပဒိၣ်စီၤထိၣ်ရီဘ့ၤ စံးအါထီၣ်ဝဲန့ၣ်လီၤ.
“ပှၤကမျၢၢ်လၢအဃ့ၢ်ထီၣ်တဖၣ်တၢ်ကရၢကရိပှၤလဲၤတိစၢၤမၤစၢၤအိၣ်လီၤ.သနါက့ယဆိ မိၣ်တမ့ၢ်တၢ်ကူတၢ်လၢဘၣ်. တၢ်လိၣ်ခီအမံၤအါအမၠိအါတမ့ၢ်ထဲလၢတၢ်အီၣ်မိၢ်ပှၢ်တခါဘၣ်.ခဲအံၤတၢ်စူၤလီၤအဃိကလိၣ်ဝဲဒီး တၤလပၣ်ကအိၣ်ဝဲဒီဒူၣ်လီၤ ကသံၣ်ကသီမ့ၢ်ဂ့ၤ. ဖဲမဟါန့ၣ်(ခီး)တၢ်ကရၢကရိလဲၤလီၤဘၣ်ဆၣ်တကူတလၢဘၣ် ခီဖျိတၢ်လိၣ်အကပၤအါ မ့ဝံၤကမျၢၢ် စ့ၢ်ကီးအနီၣ်ဂံၢ်အါမီၤနီၤ”အဂ့ၢ်န့ၣ် စံးဝဲန့ၣ်လီၤ.
ဒ်လီၢ်ကဝီၤပှၤဘၣ်မူဘၣ်ဒါစံးဝဲအသိးန့ၣ် ပယီၤသုးအံၤအတၢ်ပညိၣ်အိၣ်လိၤလိၤလၢကဟဲထီၣ်ဒိၣ်စိက့ၤဟီၣ်ကဝီၤတၢ်လီၢ်လၢ ခ့ၣ်အဲၣ်ယူၣ် ဒိၣ်စိဝဲန့ၢ်တဖၣ်အံၤဒီးတကးဒံးဘၣ် ကလဲၤမၤအါထီၣ်အသုးဂံၢ်ဘါဆူဖၣ်ပူၣ်ဒုးယၤသုးကလၢၤလၢတၢ်က ဝီၤခးအီၤန့ၢ်လၢ(၂)နံၣ်ဃၣ်ဃၣ်အံၤအဂ့ၢ်န့ၣ် သ့ၣ်ညါဘၣ်န့ၣ်လီၤ
တကီၢ်ခါခဲအံၤမ့ဘၣ်ကွၢ်ဒူသဝီ(၁၃)ဖျၢၣ်လၢအဘၣ်ကွၢ်ဆၢၣ်မဲၥ်ဝဲတၢ်သံတၢ်ဘၣ်ဒိဘၣ်ထံး,တၢ်ဟးဂူၥ်ဟးဂီၤဒီးဘၣ်ဃ့ၢ်ထီၣ်တဖၣ်အံၤ အိၣ်ဆီလီၤသးလၢမမၤမိၢ်-ကတၢတံၥ်သဝီဘၢၣ်စၢၤကျဲတဖၣ်လီၤဒီး ခဲအံၤပယီၤသုးလၢအဟဲထီၣ်တုၤကတၢတံၥ် အံၤတဖၣ် တၢ်ရဲၣ်တၢ်ကျဲၤအိၣ်လၢကလဲၤထီၣ်ဆူဖၣ်ပူၣ်ဒံးအဃိ လၢတၢ်အိၣ်ကတီၤသးဒီးကဟးပလဲၥ်ဆိသးအဂီၢ် လီၢ်ကဝီၤ ပှၤဘၣ်မူဘၣ်ဒါ ဒုးသ့ၣ်ညါကမျၢၢ်အိၣ်အဂ့ၢ်န့ၣ် ခ့ၣ်အဲၣ်ယူၣ် စံးဝဲန့ၣ်လီၤ.
