လါယူၤလံ ၃ သီ, ၂၀၂၆ နံၣ်, ခ့ၣ်အဲးစံၣ်
ကီၢ်ကၠီၣ်တဲၣ်-ကီၢ်ပယီၤကီၢ်ဆၢ ခ့ၣ်အဲၣ်ယူၣ် ဒူပျၥ်ယၥ်ကီၢ်ရ့ၣ်(သုးက့ ၆)ရၤမတံကီၢ်ဆၣ် မၠၣ်ဝတံၣ်ဝ့ၢ်ဃၢၤ ဖလူ,မ့လဲၣ်ပၤ ဟီၣ်ကဝီၤလၢဒုးယၤတၢ်သဘံၣ် သဘုၣ်ကဲထီၣ်တလီၢ်လီၢ်အံၤ ဒုးယၤတၢ်သဘံၣ်သဘုၣ်ကဲထီၣ်အဃိ မဲၢ်ကိၥ်က့သဝီ လၢအိၣ် ကီၢ်ကၠီၣ်တဲၣ် သူမှဲကျိကပၤအံၤ တၢ်ခီထီၣ်ခီလီၤထံကျဲတၢ်လီၢ်(၄)တီၤ တၢ်ပံးကွံၥ်တစိၢ်တလီၢ်အဂ့ၢ်န့ၣ် သ့ၣ်ညါဘၣ် န့ၣ်လီၤ.
ဖဲအပူၤကွံၥ်လါယူၤအခါန့ၣ် လၢမၠၣ်ဝတံၣ်ဝ့ၢ်ကလံၤထံး ဖလူ,မ့လဲၣ်ပၤဟီၣ်ကဝီၤတကပၤန့ၣ် တၢ်ဒုးက့ၤကဲထီၣ်ကဒါဝဲလၢ ဟီၣ်ကဝီၤကညီဒီကလုၥ်တၢ်ထူၣ်ဖျဲးသုးမုၣ်ဒိၣ်(KNLA) ဒီးပယီၤသုးတဖၣ်အဘၢၣ်စၢၤဒိၣ်ဒိၣ်မုၢ်မုၢ်န့ၣ်လီၤ.
လၢတၢ်န့ၣ်အဃိမဲၢ်ကိၥ်က့ကၠီၣ်တဲၣ်သဝီလၢအိၣ်တခီတဝၢ်ဝၢ်ဒီးမ့လဲၣ်ပၤ,ဖလူသဝီအံၤ အပူၤကွံၥ်လါယူၤ ၂၁ သီအခါန့ၣ် ခီဖျိကီၢ်ပယီၤတကပၤတၢ်ဒုးကဲထီၣ် ကျိလီၤတဲၥ်ဝဲဒၣ်လၢကၠိတၢ်သူၣ်ထီၣ်ခိၣ်ဒီး စးထီၣ်ဖဲန့ၣ်ကၠီၣ်တဲၣ်တကပၤ ပံးကွံၥ်ဝဲကၠိ တစိၢ်တလီၢ် တကးဒံးဘၣ် မၤဃံးထီၣ်ဝဲတၢ်ဘံၣ်ဘၢတဘျီဃီန့ၣ်လီၤ.
တၢ်ကဲထီၣ်သးဖဲန့ၣ်ဝံၤလီၢ်ခံ လၢထံဆၢကီၢ်ဆၢတၢ်ဘံၣ်တၢ်ဘၢအဂီၢ်ဒီးတကးဒံးဘၣ်ဒ်သိးတၢ်လဲၤစိၥ်ဆှၢဝဲတၢ်အီၣ်တၢ်အီ, သုးတၢ်ပီတၢ်လီသုတသ့တဂ့ၤအဂီၢ်န့ၣ် မဲၢ်ကိၥ်က့ဟီၣ်ကဝီၤပူၤ တၢ်ခီထီၣ်ခီလီၤထံကျဲတၢ်လီၢ်တဖၣ်အံၤ စးထီၣ်ဖဲတနံၤအံၤလါယူၤ ၃ သီအံၤ ကၠီၣ်တဲၣ် ပှၤဘၣ်မူဘၣ်ဒါဘၣ်နဲၣ်လီၤတၢ်ကလုၢ်လၢတၢ်ကစးထီၣ် ပံးကွံၥ်ဝဲအဂ့ၢ်န့ၣ် သ့ၣ်ညါဘၣ် န့ၣ်လီၤ.
ဘၣ်ဃးဒီးတၢ်အိၣ်သးအံၤ ဖဲပခ့ၣ်အဲးစံၣ်-ကညီတၢ်ကစီၣ်ဆဲးကျိးသံကွၢ်ဝဲ မဲၢ်ကိၥ်က့ ကမျၢၢ်တဂၤအခါစံးဝဲလၢ “ဖဲမဟါန့ၣ် ကၠီၣ်တဲၣ်ပှၤဘၣ်မူဘၣ်ဒါဟဲကိးအိၣ်ဖှိၣ်ဝဲပှၤသဝီဖိဒီးတဲဝဲလၢတဒုးခီဝဲထံကျိလၢၤဘၣ်.မ့ဝံၤပှၤစိၥ်တၢ်အီၣ်တၢ်အီစ့ၢ်ကီးတန့ၢ် လၢၤဘၣ်.ဘၣ်မနုၤလဲၣ်န့ၣ်ပှၤအိၣ်ဖဲအံၤတဖၣ်တၢ်ဘၣ်အဝဲသ့ၣ်ဖးနးညါအဟံၣ်အဃီဘၣ်ဒိၣ်ဘၣ်ထံးမီၤခီဖျိလၢကျိချံလီၤတဲၥ် လၢအံၤတကပၤအဃိန့ၣ်.ကျိချံလီၤတဲၥ်ပှၤလဲၤတဲပယီၤသုးန့ၣ်တဲကဒါဝဲလၢလၢခံန့ၣ်တလီၤတဲၥ်လၢၤဘၣ်.အဝဲသ့ၣ်န့ၣ်လၢညါ ပှၤလဲၤ တဲန့ၣ်အတဲဝဲလၢကျိချံန့ၣ်အလီၤတဲၥ်နါက့တဘၣ်ပှၤကၠီၣ်တဲၣ်ဖိဘၣ်, အဘၣ်ဝဲပှၤကီၢ်ပယီၤဖိအဟံၣ်အဃီလီၤ တဲကဒါဝဲ ဒ်န့ၣ်အိၣ်လီၤ.ကျိချံလၢအလီၤတဲၥ်န့ၣ်ကဲဝဲပယီၤသုးအကျိချံလီၤ”အဂ့ၢ်န့ၣ် စံးဝဲန့ၣ်လီၤ.
တကးဒံးဘၣ်ဒ်သိးကမျၢၢ်သ့ၣ်တဖၣ်ကပူၤဖျဲးဒီးကျိအတၢ်လီၤဘၣ်ယိၣ်အဂီၢ် ကဆီလီၤမၤအါထီၣ်စ့ၢ်ကီးဝဲတၢ်ဘံၣ် တၢ်ဘၢ လၢ(၂၄)နၣ်ရံၣ်အတီၢ်ပူၤအဂ့ၢ်န့ၣ် မဟါလါယူၤ ၂ သီ ကၠီၣ်တဲၣ်ပှၤဘၣ်မူဘၣ်ဒါထံၣ်လိၥ်သးဒီး မဲၢ်ကိၥ်က့သူၣ်က့သးပှၢ်, ကဝီၤဒ့ပူၤကမျၢၢ်အခါ စံးလီၤဝဲအိၣ်န့ၣ်လီၤ.
တကီၢ်ခါခဲအံၤတၢ်ခီလ့ၢ်လိၤထံကျဲလၢတၢ်ပံးဃၥ်ဝဲအံၤန့ၣ် တၢ်ကအိးထီၣ်ကဒါမုၢ်နံၤမုၢ်သီအခါဖဲလဲၣ်န့ၣ်တၢ်ပၥ်ပနီၣ်ဝဲမုၢ်နံၤ မုၢ်သီတအိၣ်ဘၣ် ဘၣ်ဆၣ် ဒိးသန့ၤထီၣ်သးလၢကီၢ်ဆၢဒုးယၤတၢ်သဘံၣ်သဘုၣ်အဖီခိၣ်မးတၢ်ကက့ၤအိးထီၣ်ဝဲလီၤအဂ့ၢ်န့ၣ် တၢ်ပဲၥ်ထံနီၤဖးစံး ဝဲ န့ၣ်လီၤ.
ကီၢ်ကၠီၣ်တဲၣ် မဲၢ်ဆီးဟီၣ်ကဝီၤအမဲၥ်ညါဖိဖြးဟီၣ်ကဝီၤဒူသဝီလၢအိၣ်ဘူးသူမှဲကျိအံၤတဖၣ် ခီဖျိလၢကီၢ်ပယီၤတကပၤ တၢ်ဒုးတၢ်ယၤအံၤအဃိ ကျိဒိၣ်ဃုၥ်ဒီးကျိဖိ လီၤတဲၥ်လၢကီၢ်ကၠီၣ်တဲၣ်တကပၤကဲထီၣ်အိၣ်ဝဲတလီၢ်လီၢ်အသိး ခီဖျိလၢကျိချံ အံၤအဃိစ့ၢ်ကီးအိၣ်ထီၣ်တုၤလၢတၢ်ဘၣ်ဒိဘၣ်ထံးတၢ်သံတၢ်ပှၢ်ပတီၢ်ညါအဂ့ၢ်န့ၣ် သ့ၣ်ညါဘၣ်န့ၣ်လီၤ.
