လါအီကူၥ် ၁၇သီ, ၂၀၂၆နံၣ်, ခ့ၣ်အဲးစံၣ်,
ကီၢ်ကၠီၣ်တဲၣ်-ကီၢ်ပယီၤကီၢ်ဆၢ မဲၢ်လးကညီဘၣ်ကီဘၣ်ခဲဒဲကဝီၤ ကိးနံၣ်ဒဲး တၢ်စူၤခါအဆၢကတီၢ် ဖျၢၣ်ထူတၢ်ပြၢန့ၣ် တကီၢ်ခါခဲအံၤ ထီၣ်တုၤဝဲဒၣ်လၢ Semi , လၢ အိၣ်တ့ၢ် လွံၢ်ဖု ပတီၢ်လံအဂ့ၢ် သ့ၣ်ညါဘၣ်န့ၣ်လီၤ.
မဲၢ်လးဒဲကဝီၤ တၢ်စူၤခါဖျၢၣ်ထူတၢ်ပြၢဝဲအံၤ ကိးနံၣ်ဒဲးဖဲ လါယူၤလံအတီၢ်ပူၤန့ၣ် ဘၣ်တၢ်စးထီၣ်မၤအီၤဒီး အတၢ်ပညိၣ်မ့ၢ် ဒ်သိး သူဘီၣ်သးစၢ်လၢဒဲကဝီၤပူၤ တဖၣ်ကပူၤဖျဲးဒီးတၢ်မူၤတၢ်ဘှီး, တဂၤဒီးတဂၤကအိၣ်ဒီးတၢ်ရ့လိၥ်ဘၣ်ထွဲအဂီၢ်အဂ့ၢ် မဲၢ်လးဒဲကဝီၤခိၣ်စီၤဆၢဒ့ စံးဝဲဒၣ်ဒ်အံၤန့ၣ်လီၤ.
အဝဲစံးဝဲလၢ ” ဘၣ်ဃးဒီးတၢ်ဒုးအိၣ်ထီၣ် တၢ်စူၤခါဖျၢၣ်ထူတၢ်ပြၢအံၤ တၢ်ပညိၣ်တၢ်တိၥ်မ့ၢ်ဝဲ ဒ်သိးပှၤသူၣ်ဘီၣ်သးစၢ်တဖၣ် ကပူၤဖျဲးဒီးတၣ်မူၤတၢ်ဘှီး, ကဒဲကဒဲကအိၣ်ဒီးတၢ်ဖီၣ်လိၥ်သးစုလၢခါဆူညါအဂီၢ်, ကအိၣ်ဒီးနီၢ်ခိတၢ်ဂံၢ်တၢ်ဘါဒီး ကရ့လိၥ်မုၥ်လိၥ်သးဒီးကၠီၣ်တဲၣ်ဒူသဝီဖိလၢဟဲထူဘီဃုၥ်ဒီး ဒူသဝီခိၣ်နၢ် ပှၤဘၣ်မူဘၣ်ဒါတဖၣ်အဂ့ၢ်” စံးဝဲဒၣ်န့ၣ်လီၤ.
ဖျၢၣ်ထူတၢ်ပြၢဝဲအံၤန့ၣ် ဘၣ်တၢ်တီခိၣ်ရိၣ်မဲမၤအီၤလၢ ကညီသးစၢ်ကရၢ(KYO)ဒီး ဘၣ်တၢ်မၤအီၤဖဲ လါယူၤလံဒီးလါအီကူးအတီၢ်ပူၤအဂ့ၢ် သ့ၣ်ညါဘၣ်အသိး တနံၣ်အံၤန့ၣ် ဖျၢၣ်ထူ ကရၢလၢနုၥ်လီၤသတြီၤတၢ်အိၣ်ဝဲဒၣ် (၂၆)ဖုအဂ့ၢ် သ့ၣ်ညါဘၣ်စ့ၢ်ကီးန့ၣ်လီၤ.
လၢန့ၣ်အမဲၥ်ညါ လၢတၢ်ထီၣ်တုၤလၢ Semi ပတီၢ်အံၤ ပှၤအါဂၤပၥ်ပနီၣ်ဝဲလၢ Team သ့ၣ်တဖၣ်မ့ၢ်ဝဲဒၣ် Top Team အဂ့ၢ် ပှၤလိၣ်ကွဲဖိလၢအထီၣ်ဘၣ် Semi စီၤခဲၣ်ဒီၣ် စံးဝဲဒၣ်ဒ်အံၤန့ၣ်လီၤ.
အဝဲစံးဝဲလၢ ” လၢတဟါညါ အံၤ Semi န့ၣ် ပှၤအါဒံအါဂၤထံၣ်ဝဲဒၣ် လၢ Team သ့ၣ်တဖၣ်အံၤမ့ၢ်ဝဲဒၣ် Top Team ဒီးနကဘၣ်ဂုၥ်ယကဘၣ်ဂုၥ်ဒီး မ့ၢ်နၢၤမးဒီးကထီၣ်ဘၣ် Final န့ၣ်လီၤ. Semi အံၤ လၢပှၤ (၂၆) ဖုအကျါအိၣ်တ့ၢ်ဝဲဒၣ် (၄) ဖုအဖီခိၣ်နကဘၣ်ဂုၥ် ယကဘၣ်ဂုၥ်အဂ့ၢ်” စံးဝဲဒၣ်န့ၣ်လီၤ.
Team လၢအိၣ်တ့ၢ် Semi (၄)ဖုသ့ၣ်တဖၣ်အံၤမ့ၢ်ဝဲဒၣ် One Piece, Karen Young City, All For One ဒီးWe are Equal သ့ၣ်တဖၣ်အဂ့ၢ်သ့ၣ်ညါဘၣ်န့ၣ်လီၤ.
ဒ်န့ၣ်အသိး ဘၣ်ဃးဒီးတၢ်မၤဖျၢၣ်ထူ တၢ်ပြၢလၢမုၢ်နံၤဒိၣ်မုၢ်နံၤထီအံၤ အိၣ်ဝဲ(၄) ခါလၢအမ့ၢ် တၢ်စူၤခါဖျၢၣ်ထူတၢ်ပြၢ, (KYO) မုၢ်နံၤဖျၢၣ်ထူတၢ်ပြၢ, နံၣ်ထီၣ်သီဖျၢၣ်ထူတၢ်ပြၢဒီး ကၠိဖိသိၣ်တၢ်ပြၢအိၣ်ဝဲဒၣ်အဂ့ၢ်သ့ၣ်ညါဘၣ်န့ၣ်လီၤ.
