လါအီးကထိဘၢၣ် ၉သီ, ၂၀၂၆နံၣ်, ခ့ၣ်အဲးစံၣ်,
ကီၢ်ကၠီၣ်တဲၣ်-ကီၢ်ပယီၤကီၢ်ဆၢ ကညီကီၢ်စဲၣ် ရၤမတံဝ့ၢ်အပူၤ ပှၤလၢအဖီၣ် ကီၢ်ပယီၤခိၣ်ဂီၤ ဟံၣ်ခိၣ်စရီလၢအိၣ် ကီၢ်ခီဒိၣ်ဒီး ကီၢ်စဲၣ်လၢအဂၤသ့ၣ်တဖၣ်အံၤ တၢ်ကမၤန့ၣ်ဝဲအီၤ (UID Smart Card)အဂီၢ် တကီၢ်ခါခဲအံၤ တၢ်ရဲၣ်တၢ်ကျဲၤ တအိၣ်ဒံးဝဲ ဘၣ်အဂ့ၢ်, သုးကရူၢ်အစုတီၤဖီလၥ် ကီၢ်စဲၣ်ပတီၢ် ပှၤဘၣ်မူဘၣ်ဒါတဖၣ် ရၤလီၤပၥ်ဖျါ ဝဲ ဒၣ်န့ၣ်လီၤ.
သုးကရူၢ်အတၢ်ဘိးဘၣ်ပၥ်ဖျါရၤလီၤသးဝံၤအလီၢ်ခံ, ဘၣ်ဃးဒီးတၢ်ထုးထီၣ် (UID) အဂ့ၢ်အံၤဝ့ၢ် လီၢ်ကဝီၤဖိ တနီၤ ပၥ်ဖျါထီၣ်ဝဲတၢ်ပဲၥ်ထံနီၤဖး လၢသုးကရူၢ်အဖီခိၣ်လၢ စိၤရှၢၣ် မံးဒံးယၢၣ်အပူၤ အကလုၥ်ကလုၥ် အိၣ်ဝဲလီၤ.
ဝ့ၢ်ပူၤ တၢ်မၤန့ၢ်ကမျၢၢ်ထံဖိကီၢ်ဖိ (UID)တၢ်အိၣ်သးအဖီခိၣ်, ကမျၢၢ်လီၢ်ကဝီၤ ပိၥ်ခွါတဂၤ စံးဝဲလၢ
“အခီၣ်ထံးပှၤမၤန့ၢ်တၢ်လီၢ်ခဲလၢၥ်လီၤ လၢခံတနံၣ်ဝံၤတနံၣ်ပှၤမၤဃံးထီၣ်က့ၤ.ခဲအံၤ ပှၤမ့ထိစ့ မၤနါက့န့ၢ် ဒၣ်တၢ်လီၤ ဘၣ်ဆၣ် ဘၣ်အိၣ်ခိးတၢ်ယံၤဒီး လၢၥ်တၢ်ဆၢကတီၢ် လၢၥ်ကျိၣ်စ့အါ န့ၣ်လီၤ.” အဂ့ၢ်စံးဝဲန့ၣ်လီၤ.
ဒ်သုးကရူၢ် အတၢ်နုၥ်လီၤဆူထံလီၢ်ကီၢ်ပူၤကိၥ်တိၥ်ဝဲၤကျိၤ ဒီး ကမျၢၢ်ဂံၢ်ဘါ ဝဲၤကျိၤပၥ်ဖျါဝဲအသိးန့ၣ်, စးထီၣ်ဖဲ (၂၀၂၄)နံၣ် လါမ့ၤ (၁)သီအနံၤအပူၤ ထံဆၢကီၢ်ဆၢ တၢ်ဟးထီၣ်က့ၤလီၤအဂီၢ်ပှၤလၢ ပတံထီၣ် လံၥ်လဲၢ် ဒ်အမ့ၢ် BP (Border Pass) ဒီး TBP (Temporary Border Pass) သ့ၣ်တဖၣ်အံၤကဘၣ်အိၣ်ဝဲဒီး (UID) လဲးမး အဂ့ၢ်, သ့ၣ်ညါဘၣ်န့ၣ်လီၤ.
ဘၣ်ဆၣ် စးထီၣ် ဖဲ(၂၀၂၅)နံၣ် လါယနူၤအါရံၤ အပူၤ သုးကရူၢ်အံၤ နဲၣ်လီၤက့ၤဝဲလၢ (UID) ကးအံၤ တၢ်ကဘၣ်မၤန့ၢ်ဝဲ ကမျၢၢ်လီၢ်ကဝီၤဖိလၢအိၣ်ဒီး ဟံၣ်ခိၣ်စရီဘၣ်ထွဲ ကီၢ်ဆၣ်တဖၣ်အပူၤ ဒီး မ့ၢ်မ့ၢ် ပှၤလၢ အိၣ်ကီၢ်ခီဒိၣ်ဒီး ကီၢ်စဲၣ်လၢတၢ်လီၢ်အဂၤတဖၣ်သ့ၣ်တဖၣ်အံၤ ကဘၣ်က့ၤမၤဝဲ လၢအနီၢ်ကစၢ်တၢ်လီၢ်တၢ်ကျဲ အဂ့ၢ်, သ့ၣ်ညါဘၣ်န့ၣ်လီၤ.
ရၤမတံဝ့ၢ်ပူၤ တကီၢ်ခါခဲအံၤကမျၢၢ်လီၢ်ကဝီၤဖိလၢဖီၣ်ဝဲ ရၤမတံကီၢ်ဆၣ် ဟံၣ်ခိၣ်စရီတဖၣ်လဲၤမၤဝဲ (UID) အိၣ်ဝဲ ကိးနံၤဒဲးဃၣ်ဃၣ်အဂ့ၢ်, သ့ၣ်ညါဘၣ်န့ၣ်လီၤ.
ဒ်န့ၣ်အသိး, လီၢ်ကဝီၤဖိလၢ အိၣ်ကီၢ်ခီဒိၣ်အဂၤဒီး ကီၢ်စဲၣ် ကီၢ်ဆၣ်အဂၤတဖၣ်တခီ ခီဖျိ မၤဝဲဖဲ ရၤမတံဝ့ၢ်ပူၤ တန့ၢ်ဘၣ်အဃိ လဲၤမၤဝဲဆူ ကီးတရံးကီၢ်ဆၣ် တပၤ အိၣ်ဝဲဒီး, တမ့ၢ်အနီၢ်ကစၢ် တၢ်လီၢ်တၢ်ကျဲဘၣ်ဆၣ် တၢ်မၤ န့ၢ်အဝဲသ့ၣ် အိၣ်ဝဲအဂ့ၢ် လီၢ်ကဝီၤဖိတဖၣ်စံးဝဲန့ၣ်လီၤ.
