Home တၢ်ကစီၣ် KNU ဒွဲၣ်အူမၤဟးဂီၤကဒီးဝဲ WY ကသံၣ်ကသ့ၣ် ၅၀၀,၀၀၀ ဃၣ်ဃၣ်လၢတၢ်ဖီၣ်န့ၢ်ဝဲဖဲမုၢ်တြီၢ်ကီၢ်ရ့ၣ်ကီၢ်ဆၢတြဲၤ

KNU ဒွဲၣ်အူမၤဟးဂီၤကဒီးဝဲ WY ကသံၣ်ကသ့ၣ် ၅၀၀,၀၀၀ ဃၣ်ဃၣ်လၢတၢ်ဖီၣ်န့ၢ်ဝဲဖဲမုၢ်တြီၢ်ကီၢ်ရ့ၣ်ကီၢ်ဆၢတြဲၤ

15
0

လါနိၣ်ဝ့ဘၢၣ် ၁၅ သီ, ၂၀၂၆ နံၣ်, ခ့ၣ်အဲးစံၣ်

ဖဲလါနိၣ်ဝ့ဘၢၣ် ၁၃ သီအနံၤန့ၣ် လၢပ့က့ကရူၢ်အပူၤ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ မုၢ်တြီၢ်ကီၢ်ရ့ၣ် လီၢ်ကဝီၤပှၤဘၣ်မူ ဘၣ်ဒါ တီခိၣ်ရိၣ်မဲဒွဲၣ်အူမၤဟးဂီၤကွံၥ်ဝဲ ကသံၣ်ကသ့ၣ်(၄၉၀,၀၀၀)ဖျၢၣ် လၢဘၣ်တၢ်ဖီၣ်န့ၢ်အီၤဖဲထံဆၢကီၢ်ဆၢ တြဲၤအံၤအဂ့ၢ်န့ၣ် ကီၢ်ရ့ၣ်တၢ်ကစီၣ်ထုးထီၣ်ပၥ်ဖျါဝဲအသိး သ့ၣ်ညါဘၣ်န့ၣ်လီၤ.

WY ကသံၣ်ကသ့ၣ်ကသံၣ်ပျုၢ်အဖျၢၣ်(၅၀၀,၀၀၀)ဃၣ်ဃၣ်လၢတၢ်ဒွဲၣ်အူအီၣ်ဝဲခဲအံၤသ့ၣ်တဖၣ်န့ၣ် အပူၤကွံၥ်လါအီကူး ၁၈ သီအနံၤ လၢဃိၣ်လိၥ်ကျိအကွၥ်ခံအံၤတဆီ ဖဲတၢ်ကလဲၤဆှၢဝဲဒၣ်ဆူဖၣ်အၣ်ကီၢ်ရ့ၣ်(သုးက့ ၇)မဲၢ်သဝီတၢ်လီၢ်အခါန့ၣ် ဘၣ်တၢ်ဖီၣ် န့ၢ်အီၤဖဲကီၢ်ကၠီၣ်တဲၣ်-ကီၢ်သူလ့ၤကီၢ်ဆၢ မုၢ်တြီၢ်ကီၢ်ရ့ၣ် ဃိၣ်လိၥ်ကျိကၢၢ်နံၤ အီးလီးတြဲၤအံၤအဂ့ၢ်န့ၣ် စံးဝဲဒၣ် န့ၣ်လီၤ.

ဟီၣ်ကဝီၤအပူၤ စးထီၣ်ဖဲ ၂၀၁၁-၂၀၁၂ ကီၢ်ပယီၤမၤဝဲထံကီၢ်ဒီဘ့ၣ်တၢ်ပတုၥ်တၢ်ခးအခါန့ၣ် ကသံၣ်ကသ့ၣ်ကသံၣ်မူၤဘှီးတဖၣ် အံၤ တၢ်ထံၣ်န့ၢ်ဝဲအိၣ်ဘၣ်ဆၣ် လီၤဆီဒၣ်တၢ်စးထီၣ်က့ၤဖဲ ၂၀၂၁ သုးဟံန့ၢ်ဆူၣ်ထံကီၢ်တၢ်စိတၢ်ကမီၤဝံၤလီၢ်ခံတုၤလၢခဲအံၤန့ၣ် ကီၢ်ဆၢဃိၣ်လိၥ်ကျိဒီတကျိၤန့ၣ်တၢ်ဖီၣ်န့ၢ်ဝဲကသံၣ်ကသ့ၣ်တဖၣ်အံၤအိၣ်ထီၣ်ဝဲတလီၢ်လီၢ်အဂ့ၢ်န့ၣ် မုၢ်တြီၢ်ကီၢ်ရ့ၣ် ကညီဒီကလုၥ် ပၢၤကီၢ်သုး(KNPF) သုးခိၣ်ဒိၣ်ဂီၢ်ဂ့ၢ် စီၤန့ၢ်မူ စံးဝဲဒၣ်န့ၣ်လီၤ.

တကးဒံးဘၣ်အပူၤကွံၥ်လီၢ်ကဝီၤကမျၢၢ်တနီၤအကျါ ဖဲအဝဲသ့ၣ်လဲၤလီၤအိၣ်ဆိးလၢပယီၤသုးဟီၣ်ကဝီၤ အသိးအကျါအခါန့ၣ် သူဝဲဒၣ်ကသံၣ်ကသ့ၣ်အိၣ်ထီၣ်အဖီခိၣ် ကဲထီၣ်တၢ်လီၤဘၣ်ယိၣ်လၢကမျၢၢ်အဂီၢ်တကးဒံးဘၣ် ကဲထီၣ်တၢ်ကီတၢ်ခဲလၢခါဆူညါ တၢ်အိၣ်မူအဂီၢ်အဂ့ၢ်န့ၣ် ခ့ၣ်အဲၣ်ယူၣ် စံးဝဲန့ၣ်လီၤ.

မုၢ်တြီၢ်ကီၢ်ရ့ၣ်အပူၤ အပူၤကွံၥ်တနံၣ်အံၤ ၂၀၂၆ လါမ့ၤ ၇ သီအခါန့ၣ်စ့ၢ်ကီး WY ကသံၣ်ကသ့ၣ်(၉)ကကွဲၢ်ဘျဲၣ် လၢ တၢ်ဖီၣ်န့ၢ်ဝဲ လၢဃိၣ်လိၥ်ကျိ ခ့ၣ်အဲၣ်ယူၣ်တြဲၤအံၤတဖၣ် လီၢ်ကဝီၤခ့ၣ်အဲၣ်ယူၣ်ဒီးပၢၤကီၢ်ပှၤဘၣ်မူဘၣ်ဒါတီခိၣ်ရိၣ်မဲမၤဒံးဝဲတၢ်ဒွဲၣ်အူ မၤဟးဂီၤကသံၣ်မူၤဘှီးတၢ်ရဲၣ်တၢ်ကျဲၤတခါလၢကမျၢၢ်ဒီးပှၤဟံတၢ်ကစီၣ်ဖိအမဲၥ်ညါဒံးန့ၣ်လီၤ.

ဒ်န့ၣ်အသိးဟီၣ်ကဝီၤဖဲန့ၣ်အပူၤ WY ကသံၣ်ကသ့ၣ်လၢတၢ်ဖီၣ်န့ၢ်ဝဲတဖၣ်တၢ်ဒွဲၣ်အူမၤဟးဂီၤဝဲဒီးခဲအံၤတဘျီန့ၣ် အိၣ်လံဝဲ (၄)ဘျီလံအဂ့ၢ်န့ၣ် သ့ၣ်ညါဘၣ်န့ၣ်လီၤ.

ဘၣ်ဆၣ်ညီနုၢ်ကသံၣ်ကသ့ၣ်လၢတၢ်ဖီၣ်န့ၢ်ဝဲဖဲဃိၣ်လိၥ်ကျိကီၢ်ဆၢအံၤတဖၣ်အါဒၣ်တက့ၢ်န့ၣ် အိၣ်ဟဲဝဲဒၣ် လၢကရ့ၣ်နံၣ် ကီၢ်စဲၣ်ဟီၣ်ကဝီၤလၢအအိၣ်စဲဘူးလိၥ်သးဒီးမုၢ်တြီၢ်ကီၢ်ရ့ၣ်အံၤအဂ့ၢ်န့ၣ် ပှၤလၢဘူးဒီးဟီၣ်ကဝီၤတၢ်ပၢၢ်ဆၢသုးကရူၢ်အံၤတဖၣ် စံးဘၣ်တ့ၢ်ဃၥ်ခ့ၣ်အဲးစံၣ်-ကညီတၢ်ကစီၣ်အိၣ်န့ၣ်လီၤ.

ကီၢ်ပယီၤပူၤစးထီၣ်လၢ ၂၀၂၁ သုးဟံန့ၢ်ဆူၣ်ထံကီၢ်တၢ်စိတၢ်ကမီၤဝံၤလီၢ်ခံ ကီၢ်ကၠီၣ်တဲၣ်-ကီၢ်သူလ့ၤ ထံဆၢကီၢ်ဆၢဟီၣ်ကဝီၤ အမဲၥ်ညါ ခ့ၣ်အဲၣ်ယူၣ်တၢ်ပၢဟီၣ်ကဝီၤလၢအိၣ်တၢ်ကိပူၤသ့ၣ်တဖၣ်စ့ၢ်ကီး ကသံၣ်ကသ့ၣ်လၢခ့ၣ်အဲၣ်ယူၣ်တြီဃၥ်အီၤအံၤ ရၤလီၤသး ဟဲအါထီၣ်ဝဲဒၣ်ဖျါဖျိဖျါန့ၣ်လီၤ.

ဒ်န့ၣ်အသိးလၢတၢ်ရၤလီၤမၤကၤဒီးသူဝဲကသံၣ်ကသ့ၣ်တဖၣ်အံၤအဖီခိၣ် တၢ်ဖီၣ်န့ၢ်ဝဲအိၣ်တလီၢ်လီၢ်အသိး ကမျၢၢ်ဃုၥ်ဒီး သူၣ်ဘီၣ်သးစၢ်,ဖိဒံဖိသၣ်အနံၣ်(၁၀)ဘျဲၣ်ပၢၢ်တုၤလၢပိၥ်မုၣ်ပိၥ်မၢၤသးစၢ်တဖၣ်စ့ၢ်ကီး လီၤဘျၢဝဲဒၣ်လၢကသံၣ်မူၤဘှီးအံၤ အဃိအါထီၣ်ဝဲဒၣ်ကွ့ၢ်ကွ့ၢ်န့ၣ်လီၤ.