ပယီၤသုးခးလီၤကျိဖးဒိၣ်အဃိလ့က့ၣ်သ၀ီပူၤဟံၣ်ဟးဂီၤ(၂)ဖျၢၣ်
လါနိၣ်၀့ဘၢၣ် ၃၀ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဟီၣ်က၀ီၤ ဘံလ့ကီၢ်ဆၣ်အပူၤန့ၣ် ဖဲလါနိၣ်၀့ဘၢၣ် ၂၈ သီအနံၤ ပယီၤသုးလၢအိၣ်ဆီလီၤသးဖဲလ့က့ၣ်သ၀ီပူၤတဖၣ်အံၤခးလီၤကျိဖးဒိၣ်အဃိ ဟံၣ်ဟးဂီၤ၀ဲ(၂)ဖျၢၣ်အဂ့ၢ်န့ၣ်သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ ဖဲမဟါအနံၤဟီၣ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)နုာ်လီၤခးပယီၤသုးဒီးသုးခိးကီၢ်ဆၢ(BGF)လၢအိၣ်လ့က့ၣ်သ၀ီပူၤတဖၣ်ကဲထီၣ်သး၀ံၤအလီၢ်ခံပယီၤသုးခးလီၤကဒါကျိဖးဒိၣ်ဆူသ၀ီပူၤတကးဒံးဘၣ်ပယီၤသုးကျိဖးဒိၣ်လူၢ်လၢကမၤမိၢ်အံၤစ့ၢ်ကီးခးလီၤစၢၤ၀ဲကျိဖးဒိၣ်တုၤလၢမုၢ်နၤတၢ်ခံးညါအဂ့ၢ်န့ၣ် သ့ၣ်ညါဘၣ်န့ၣ်လီၤႉ ခီဖျိပယီၤသုးခးလီၤကျိဖးဒိၣ်အဃိကမျၢၢ်ဘၣ်ဒိဘၣ်ထံးတအိၣ်၀ဲဘၣ်ဆၣ်သနါက့ မ့မ့ၢ်လ့က့ၣ်သ၀ီ စီၤကၠီၦၢ်အဟံၣ်ဒီးသရၣ်မုၣ်နူၣ်နူၣ်၀့ၤအဟံၣ်အံၤဟးဂီၤကွံာ်၀ဲအဂ့ၢ်န့ၣ်ခ့ၣ်အဲၣ်ယူၣ်(ဒူသထူၣ်ကီၢ်ရ့ၣ်)နဲၣ်ရွဲၣ် ပဒိၣ်စီၤအ့နဲၤစံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ အ၀ဲစံး၀ဲလၢ“ဖဲမဟါမုၢ်ဆါခါန့ၣ်ပယီၤသုးလၢကမၤမိၢ်တကပၤန့ၣ်ခးလီၤစိ၀ဲကျိဖးဒိၣ်(၅)ဖျၢၣ်ႇလီၤတဲာ်လၢလ့က့ၣ်သ၀ီချၢမီၤနီၤႉမ့၀ံၤပယီၤသုးလၢအိၣ်လ့့ၣ်သုးကလၢၤတဖၣ်နါက့လၢမုၢ်နၤခီန့ၣ်ခးလီၤကျိဖးဒိၣ်လၢသ၀ီပူၤဒံးႉဘၣ်ဟးဂီၤ၀ဲၦၤဟံၣ်(၂)ဖျၢၣ်ႉအ၀ဲတဖျၢၣ်န့ၣ်မ့ၣ်အူအီၣ်၀ဲဒီးၦၤအိၣ်လၢသ၀ီပူၤတဖၣ်လဲၤမၤလီၤပံး၀ဲအဃိအူအီၣ်တစဲးလီၤႉလ့က့ၣ်သ၀ီပူၤအံၤၦၤအိၣ်တ့ၢ်က့ၤသၢပူတပူလီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ ပယီၤသုးခးလီၤကျိဖးဒိၣ်လၢသ၀ီပူၤတလီၢ်လီၢ်တကးဒံးဘၣ်လီၢ်က၀ီၤကမျၢၢ်စ့ၢ်ကီးဘၣ်ယိၣ်လၢကဘီယူၤကဟဲခးလီၤတၢ်အဃိသ၀ီဖိတဖၣ်လဲၤစံၣ်အိၣ်စိဃာ်လၢအဘူးအတံၢ်သ၀ီအိၣ်၀ဲအသိးတနီၤန့ၣ်လဲၤစံၣ်အိၣ်၀ဲလၢကစၢၢ်ခီၣ်ထံးလ့ပူၤလၢၢ်ပူၤအဂ့ၢ်န့ၣ်သ့ၣ်ညါဘၣ်န့ၣ်လီၤႉ “ကမျၢၢ်တဖၣ်စံၣ်စံၣ်က့ၤက့ၤလီၤႉၦၤက့ၤအိၣ်လၢသ၀ီပူၤလီၤတံၢ်တဘူၣ်ဘၣ်ႉခဲအံၤနါက့ၦၤလဲၤအိၣ်လၢလ့ပူၤညါလဲၤအိၣ်လီၤႉဖဲမဟါန့ၣ်ခးလီၤကဒီးကျိဖးဒိၣ်ႉပယီၤသုးကလၢၤအိၣ်လၢသ၀ီပူၤအဃိတအိၣ်ဘၣ်မုာ်မုာ်ခုၣ်ခုၣ်ဘၣ်ႉခဲအံၤနါက့တၢ်ကီတၢ်ခဲအိၣ်လၢကအီၣ်ကအီမီၤနီၤ”အဂ့ၢ်န့ၣ်လီၢ်က၀ီၤပိာ်မုာ်တဂၤစံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လ့က့ၣ်သုးကလၢၤအံၤပယီၤသုးဒီး(BGF)သုးပာ်ဖှိၣ်အနီၣ်ဂံၢ်ခဲလၢာ်ကအိၣ်၀ဲအဂၤ(၇၀)ဃၣ်ဃၣ်ညါဒီး ဒ်န့ၣ်အသိးလၢအ၀ဲသ့ၣ်ကမၤဂ့ၤထီၣ်က့ၤအသုးကလၢၤအဂီၢ်န့ၣ်မၢဆူၣ်၀ဲကမျၢၢ်အိၣ်၀ဲအမဲာ်ညါခးတပျုာ်တပျီာ်ကျိတလီၢ်လီၢ်အဂ့ၢ်န့ၣ်လီၢ်က၀ီၤကမျၢၢ်စံး၀ဲန့ၣ်လီၤႉ ဖဲအပူၤကွံာ်လါမ့ၤ ၁ သီအနံၤစ့ၢ်ကီး ခီဖျိသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢလ့က့ၣ်သ၀ီပူၤ(၂)ဘျီအဃိ မ့ၣ်အူအီၣ်ဟးဂီၤ၀ဲဟံၣ်အဖျၢၣ်(၁၀)ဘျဲၣ်ဒီးသ၀ီဖိလၢအဃ့ၢ်ထီၣ်တဖၣ်စ့ၢ်ကီးပယီၤသုးနုာ်လီၤမၤဟးဂီၤအဟံၣ်အဃီအဂ့ၢ်န့ၣ်သ့ၣ်ညါဘၣ်န့ၣ်လီၤႉ
ပယီၤသုးဒီးသုးခိးကီၢ်ဆၢ(BGF)ခိးထၢစ့လၢဖၣ်ပူၣ်၀့ၢ်ချံသန့လီၢ်
လါနိၣ်၀့ဘၢၣ် ၃၀ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)ဟီၣ်က၀ီၤ ဖၣ်ပူၣ်၀့ၢ်ပူၤန့ၣ် စးထီၣ်ဖဲလါအီးကထိဘၢၣ်လၢၤန့ၣ်ပယီၤသုးဒီးသုးခိးကီၢ်ဆၢ(BGF)ခိးထၢစ့လၢချံသန့လီၢ်အဂ့ၢ်န့ၣ် သ့ၣ်ညါဘၣ်လၢၦၤနီချံဖိတဖၣ်အအိၣ်န့ၣ်လီၤႉ လၢဖၣ်ပူၣ်၀့ၢ်ပူၤန့ၣ်တၢ်ကးတံၢ်ဃာ်၀ဲထံကျဲခိကျဲတၢ်လဲၤတၢ်က့ၤသ့ၣ်တဖၣ်ဒီးကယဲၢ်မ့ၢ်ချံသန့လၢလီၢ်က၀ီၤကမျၢၢ်ဟးထီၣ်က့ၤလီၤ၀ဲသ့ၣ်တဖၣ်န့ၣ်ပယီၤသုးဒီး(BGF)ဆီလီၤတြဲၤအိၣ်ခိးသမံသမိးတၢ်ဒီးထၢ၀ဲစ့လၢၦၤဆှၢထီၣ်ဆှၢလီၤတၢ်ဖိတၢ်လံၤကစၢ်တဖၣ်အအိၣ်အတီၤဘၣ်အတီၤဒီးဘၣ်ဟ့ၣ်လီၤ၀ဲဒ်တၢ်ဖိတၢ်လံၤအတယၢၢ်အိၣ်၀ဲအသိးအဂ့ၢ်န့ၣ်ၦၤနီချံဖိတဂၤစံး၀ဲဒ်အံၤန့ၣ်လီၤႉ “လၢချံသန့န့ၣ်ပယီၤသုးဒီး(BGF)ဆီလီၤတြဲၤအိၣ်သမံသမိးတၢ်မီၤနီၤႉပမ့ဆှၢတၢ်တဘျီန့ၣ်အိၣ်တ့ၢ်လၢပဂီၢ်တစဲးဖိလီၤႉအ၀ဲသ့ၣ်ဟံစ့ဒ်န့ၣ်အဃိလၢၦၤပနံာ်ကၤတၢ်ဖိအဂီၢ်စ့ၢ်ကီးတၢ်ကီတၢ်ခဲအိၣ်မီၤနီၤႉအ၀ဲသ့ၣ်ကွၢ်၀ဲလၢတၢ်ဖိတၢ်လံၤအတယၢၢ်ဒီးထၢ၀ဲဒၣ်အခိလီၤႉတၢ်ဖိတၢ်လံၤအတယၢၢ်မ့အါဒီးဘၣ်ဟ့ၣ်လီၤ၀ဲအါန့ၣ်ႉတချုးနတီၣ်ထီၣ်တၢ်ဖိတၢ်လံၤလၢချံပူၤဒံးဘၣ်အခါန့ၣ်မၢနစိာ်ဆိပာ်၀ဲတၢ်ဖိတၢ်လံၤအတယၢၢ်လၢစဲးထိၣ်တၢ်စီၤတၢ်မီၤနီၤႉ၀ံၤမးဘၣ်တီၣ်ထီၣ်လၢချံပူၤႉၦၤလၢအစိာ်လီၤတၢ်ဖိတၢ်လံၤတဖၣ်နါက့ဘၣ်ဟ့ၣ်ကဒီးစ့မီၤနီၤႉနမ့စံၣ်လီၤကဒီးလၢချံပူၤၦၤဟဲစိာ်န့ၢ်နၤတၢ်ဖိတၢ်လံၤတဖၣ်နါက့နဘၣ်ဟ့ၣ်လီၤကဒီးတဘျီႉဘၣ်ဟ့ၣ်လီၤအတီၤဘၣ်အတီၤဘျီတဘၣ်ဂီၢ်နီတစဲးဘၣ်”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါပယီၤသုးဒီး(BGF)အံၤအိၣ်ခိးထၢစ့လၢဖၣ်ပူၣ်၀့ၢ်ချံသန့တကးဒံးဘၣ် (BGF)လၢအိၣ်ခိးတၢ်ဖဲကတၢၢ်တံာ်ချံသန့တဖၣ်နါက့ဘၣ်ဟ့ၣ်လီၤ၀ဲစ့စ့ၢ်ကီးအဂ့ၢ်န့ၣ် ၦၤနီချံကစၢ်လၢအဂၤတဂၤစ့ၢ်ကီးစံး၀ဲဒ်အံၤန့ၣ်လီၤႉ “(BGF) တြဲၤလၢအိၣ်ထံကျိကၢၢ်ခိၣ်အံၤနါက့ဘၣ်ဟ့ၣ်လီၤ (၁၀၀၀၀) ကၠးစ့ၢ်ႉတမ့ၢ်တီၣ်တၢ်ဖိတၢ်လံၤဘၣ်ႇပၣ်ထဲဘူလီၤႉချံလၢအိၣ်ဟဲလီၤလၢဖၣ်ပူၣ်တဖၣ်န့ၣ်မ့ၢ်ဘၣ်ဟ့ၣ်၀ဲဆံးအါလဲၣ်ဒုတသ့ၣ်ညါဘၣ်ႉအပူၤကွံာ်လၢညါန့ၣ်တဘၣ်ဟ့ၣ်ဘၣ်ႉဘၣ်ဟ့ၣ်န့ၣ်ကအိၣ်ဖဲ (၂) လါဒံးလီၤ” အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤအလီၢ်ခံလၢခ့ၣ်အဲၣ်ယူၣ်(သုးက့ ၅)ဟီၣ်က၀ီၤအပူၤန့ၣ် ပယီၤသုးႇ(BGF)သုးပာ်ဖှိၣ်ဒီးဟီၣ်က၀ီၤကညီဒီကလုာ်တၢ်ထူၣ်ဖျဲးးသုးမုၢ်ဒိၣ်(KNLA)အဘၢၣ်စၢၤတၢ်ဒုးကဲထီၣ်၀ဲကိးမုၢ်နံၤဒဲးဃၣ်ဃၣ်န့ၣ်လီၤႉဖၣ်ပူၣ်၀့ၢ်(က၀ီၤဒ့)တကးဒံးဘၣ်အမဲာ်ညါလၢဖၣ်ပူၣ်–ကမၤမိၢ်ကျဲဒီတဘိန့ၣ်စ့ၢ်ကီး တၢ်ဒုးကဲထီၣ်ဒံး၀ဲတပယူာ်ဃီဒီးခံခီခံကပၤထုးထီၣ်လံာ်ဟ့ၣ်ပလီၢ်၀ဲလီၢ်က၀ီၤကမျၢၢ်တဖၣ်လၢတဘၣ်ဟးထီၣ်က့ၤလီၤဘၣ်န့ၣ်လီၤႉ လၢန့ၣ်အမဲာ်ညါဒူသ၀ီလၢအိၣ်ဖၣ်ပူၣ်–ကမၤမိၢ်ကျဲဒီတဘိအံၤန့ၣ်တၢ်ဒုးကဲထီၣ်တအိၣ်၀ဲဘၣ်ဆၣ် နၢ်ဟူကျိဖးဒိၣ်သီခဲအံၤခဲအံၤဒီးသုးမီၤစိရိၤကဘီယူၤစ့ၢ်ကီးဟဲဆှၣ်တၢ်ကိးမုၢ်နံၤဒဲးအဂ့ၢ်န့ၣ် ကမျၢၢ်လၢအိၣ်ဖၣ်ပူၣ်၀့ၢ်ပူၤတဖၣ်စံး၀ဲန့ၣ်လီၤႉ “တၢ်ဒုးဒုတကဲထီၣ်လၢၤဘၣ်ႉမ့မ့ၢ်လၢမုၢ်နၤခီန့ၣ်နၢ်ဟူဒံးကျိဖးဒိၣ်အကလုၢ်ဒံးႉလၢမုၢ်ဆါခီန့ၣ်ကဘီယူၤဟဲဆှၣ်တၢ်လၢဖၣ်ပူၣ်အံၤကအိၣ်ခံဘျီညါႉမ့ၢ်အကလဲၤဖဲလဲၣ်တကပၤလဲၣ်ဒုတသ့ၣ်ညါဘၣ်” အဂ့ၢ်န့ၣ် ကမျၢၢ်လၢအိၣ်ဖၣ်ပူၣ်၀့ၢ်ပူၤတဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဖဲအပူၤကွံာ်လါနိၣ်၀့ဘၢၣ် ၂ သီအနံၤစ့ၢ်ကီး ကမၤမိၢ်–၀ါဘိၤတီကျဲ သုးခိးကီၢ်ဆၢ(BGF)သုးကလၢၤတဖျၢၣ် လၢအိၣ်ဆီလီၤသးဖဲခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုက့ ၁)ဒီး မုၢ်တြီၢ်ကီၢ်ရ့ၣ်(သုးက့ ၅)အဘၢၣ်စၢၤအံၤန့ၣ် (KNLA)သုးပာ်ဖှိၣ်ထီၣ်မၤန့ၢ်ကွံာ်၀ဲဒီးဖဲန့ၣ်(BGF)အၦၤသံ၀ဲ ၇ ဂၤ အဂ့ၢ်န့ၣ် သ့ၣ်ညါဘၣ်န့ၣ် လီၤႉ
ပယီၤသုးဒွဲၣ်အူအီၣ်လီၢ်က၀ီၤကမျၢၢ်အဟံၣ်ဒီးနုာ်လီၤမၤ၀ဲတၢ်ထီၣ်ဒုး
လါနိၣ်၀့ဘၢၣ် ၃၀ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ၀ီၢ်ရ့ၣ်ကီၢ်ဆၣ်အပူၤန့ၣ် ပယီၤသုးနုာ်လီၤဒွဲၣ်အူအီၣ်၀ဲချၢၣ်–တကူၣ်တၢၣ်သ၀ီကရူၢ်ဟံၣ်ဃီတဖၣ်ဒီးနုာ်လီၤမၤ၀ဲတၢ်ထီၣ်ဒုးအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်တဖၣ်အအိၣ်န့ၣ်လီၤႉ ဖဲလါနိၣ်၀့ဘၢၣ် ၂၈ သီအနံၤန့ၣ် ပယီၤသုးနုာ်လီၤဒွဲၣ်အူအီၣ်၀ဲတကူၣ်တၢၣ်သ၀ီကရူၢ် ည့ခၠါမၠဲၤ (ပလ့ၤ)သ၀ီ ကမျၢၢ်အဟံၣ်တစှၤန့ၢ်(၂)ဖျၢၣ်ဘၣ်ဒီးနုာ်လီၤမၤ၀ဲတၢ်ထီၣ်ဒုးအဃိချၢၣ်ႇတကူၣ်တၢၣ်ႇပလ့ၤႇချၢၣ်သ၀ီဖိႇမၠိၣ်ဟီႇဖယါငါစူၤႇနါသဲၣ်ထိလီၢ်က၀ီၤကမျၢၢ်တဖၣ်ဘၣ်ဃ့ၢ်ထီၣ်၀ဲအဂ့ၢ်န့ၣ်သ့ၣ်ညါဘၣ်လၢၦၤမၤစၢၤၦၤဃ့ၢ်မှံဟးဖျိိးတဖၣ်အအိၣ်န့ၣ်လီၤႉ “ဖဲမဟါန့ၣ်ပယီၤသုးဒွဲၣ်အူအီၣ်၀ဲ(ည့ခၠါမၠဲၤ)ပလ့ၤသ၀ီဖိ စီၤဒူယ့ၣ် အဟံၣ်တဖျၢၣ်ဒီးဟံၣ်လၢအဂၤတဖျၢၣ်မီၤနီၤႉ မ့ၣ်အူခုၣ်ထီၣ်န့ၣ်ပထံၣ်ႉပယီၤသုးအိၣ်အဃိပလဲၤကွၢ်တဘူၣ်ဘၣ်မီၤနီၤႉအ၀ဲသ့ၣ်အိၣ်လၢသ၀ီကပိၤကပၤအဃိမတၤတဂၤမးလဲၤကွးရီဘၢၣ်အထုးတဘူၣ်လၢၤဘၣ်ႉၦၤကိးဂၤဒဲးန့ၣ်တၢ်ကီတၢ်ခဲအိၣ်ထီၣ်လၢတၢ်လုၢ်အီၣ်နီၢ်ခိသးသမူမီၤနီၤ” အဂ့ၢ်န့ၣ် ၀ီၢ်ရ့ၣ်လီၢ်က၀ီၤဖိ နီစံၤဖီၤ စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲမဟါလါနိၣ်၀့ဘၢၣ် ၂၉ သီအနံၤန့ၣ်လီၤႉ ဖဲလါနိၣ်၀့ဘၢၣ် ၂၈ သီ အနံၤန့ၣ် ခီဖျိပယီၤသုးကျိၤနုာ်လီၤ၀ဲလၢနိၣ်တကီကီၢ်ဆၣ် ကစၢၢ်တူၢ်ရဲၣ်ခီၣ်ထံး ဒီးသ၀ီခိၣ်သ၀ီဃၢၤအဃိ၀ီၢ်ရ့ၣ်လီၢ်က၀ီၤကၠိလၢဘၣ်တၢ်အိးထီၣ်၀ဲလၢသုးမီၤစိရိၤကူၣ်သ့၀ဲၤကျိၤအံၤတဖၣ်ဒီး ကမျၢၢ်ၦၤထူလံၤကၠိသ့ၣ်တဖၣ်ဘၣ်ဆိကတီၢ်ကွံာ်၀ဲတၢ်သိၣ်လိဒီးတနီၤန့ၣ်သုးအလီၢ်လဲၤမၤလိက့ၤတၢ်လၢကစၢၢ်ကလိကျါၦၢ်ပူၤအိၣ်၀ဲအဂ့ၢ်န့ၣ် သ့ၣ်ညါဘၣ်လၢကူၣ်သ့ၦၤဘၣ်မူဘၣ်ဒါတဖၣ်အအိၣ်န့ၣ်လီၤႉ ပယီၤသုးလၢအနုာ်လီၤအိၣ်ဖဲခ့ၣ်အဲၣ်ယူၣ်(၀ီၢ်ရ့ၣ်ကီၢ်ဆၣ်)တၢ်ပၢဟီၣ်က၀ီၤဒူသ၀ီပူၤတဖၣ်အံၤ နုာ်လီၤမၤဟးဂီၤ၀ဲလီၢ်က၀ီၤကမျၢၢ်အဟံၣ်အဃီဒီးက့ၤစိာ်၀ဲတၢ်ဖိတၢ်လံၤတကးဒံးဘၣ်အမဲာ်ညါဒွဲၣ်အူအီၣ်ဃုာ်စ့ၢ်ကီး၀ဲဟံၣ်ဃီတၢ်သူၣ်ထီၣ်တဖၣ်အဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ ဖဲအပူၤကွံာ်လါနိၣ်၀့ဘၢၣ် ၂၈ သီအနံၤန့ၣ် ပယီၤသုးကျိၤနုာ်လီၤ၀ဲလၢကစၢၢ်ကလိခီၣ်ထံးဒီး ဖီၣ်က့ၤကိး၀ဲချၢၣ်ႇပလ့ၤသ၀ီဖိအဂၤ(၁၀)ဃၣ်ဃၣ်လၢအမၤအီၣ်တၢ်ဖဲကျီးပူၤတဖၣ်ဒီးဖဲလါနိၣ်၀့ဘၢၣ် ၂၉ သီအနံၤန့ၣ် ပျၢ်လီၤက့ၤ၀ဲတနီၤလံအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ
ပယီၤသုးနုာ်လီၤဆ့ၣ်နီၤအိၣ်လၢသ့ၣ်ဘီဘိလီၢ်က၀ီၤန့ၢ်၀ံၤအလီၢ်ခံမၢ၀ဲလီၢ်က၀ီၤသ၀ီဖိကဟဲက့ၤအိၣ်လၢကစၢ်ဟံၣ်
လါနိၣ်၀့ဘၢၣ် ၃၀ သီႇ ၂၀၂၂ နံၣ်ႇ ခ့ၣ်အဲးစံၣ် သ့ၣ်ဘီဘိသ၀ီလၢတၢ်ဒုးကဲထီၣ်ဒိၣ်ဒိၣ်မုၢ်မုၢ်လၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်(Cobra)သုးကျိၤဒီးပယီၤသုးအဘၢၣ်စၢၤအံၤဖဲအပူၤကွံာ်စှၤသီအခါန့ၣ်ပယီၤသုးနုာ်လီၤဆ့ၣ်နီၤအိၣ်၀ဲန့ၢ်လံဒီး မၢ၀ဲလီၢ်က၀ီၤသ၀ီဖိတဖၣ်လၢကဟဲက့ၤအိၣ်လၢကစၢ်ဟံၣ်ဃီအဂ့ၢ်န့ၣ်သ့ၣ်ညါဘၣ်န့ၣ်လီၤႉ ဖဲအပူၤကွံာ်လါနိၣ်၀့ဘၢၣ် ၂၇ သီအနံၤန့ၣ် ပယီၤသုးနုာ်လီၤဆ့ၣ်နီၤအိၣ်လၢသ့ၣ်ဘီဘိသ၀ီန့ၢ်၀ံၤအလီၢ်ခံန့ၣ် အ၀ဲသ့ၣ်ကိးထံၣ်၀ဲဒူသ၀ီၦၤဘၣ်မူဘၣ်ဒါဒီးမၢ၀ဲဒၣ်လီၢ်က၀ီၤသ၀ီဖိလၢအဃ့ၢ်တၢ်ဒုးတဖၣ်ကဟဲက့ၤအိၣ်လၢသ၀ီပူၤအဂ့ၢ်န့ၣ်လီၢ်က၀ီၤသ၀ီဖိလၢတအဲၣ်ဒိးပာ်ဖျါအမံၤတဂၤစံး၀ဲန့ၣ်လီၤႉ အ၀ဲစံး၀ဲလၢ“ဖဲမဟါန့ၣ်ပလဲၤထံၣ်လိာ်သးဒီးပယီၤသုးဘျီန့ၣ်မၢ၀ဲဒၣ်သ၀ီဖိဟဲက့ၤအိၣ်လၢသ၀ီပူၤႉမ့ဟဲက့ၤအိၣ်န့ၣ်ကမၤတံာ်တာ်တၢ်အိၣ်စ့ၢ်ဧါႉတဲ၀ဲလၢတမၤတံာ်တာ်တၢ်နီတမံၤဘၣ်ဟဲက့ၤခီႉဟဲက့ၤအိၣ်လၢဟံၣ်လၢဃီဟဲက့ၤထီၣ်က့ၤကၠိႉမ့မ့ၢ်သီခါလၢအစံၣ်တၢ်ဒုးတဖၣ်န့ၣ်ဟဲက့ၤအိၣ်က့ၤလၢဖၠၣ်တဲ၀ဲဒ်န့ၣ်ႉမဟါန့ၣ်အ၀ဲသ့ၣ်ကိးထံၣ်သီခါကိးထံၣ်တၢ်အိၣ်ဖှိၣ်သရၣ်မၢဟဲက့ၤက့ၤမီၤနီၤႉတဲ၀ဲဒၣ်တဘၣ်လိၣ်စံၣ်လၢၤဘၣ်ႉယတဲအီၤမ့တခးတၢ်လၢၤဘၣ်န့ၣ်ၦၤကဟဲက့ၤမီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲမဟါလါနိၣ်၀့ဘၢၣ် ၂၉ သီအနံၤန့ၣ်လီၤႉ လၢန့ၣ်အမဲာ်ညါပယီၤသုးတဲစ့ၢ်ကီး၀ဲလၢလီၢ်က၀ီၤသ၀ီဖိမ့လဲၤဖံးမၤတၢ်န့ၣ်တမၤတံာ်တာ်၀ဲဘၣ်ဒီး ကမၤဆှဲန့ၢ်၀ဲမ့ၣ်ပိၢ်တကးဒံးဘၣ်အ၀ဲသ့ၣ်တအိၣ်ဆီလီၤသးလၢသ၀ီပူၤဘၣ်ဒီးကအိၣ်၀ဲဒ်လီၢ်က၀ီၤကမျၢၢ်အတၢ်အဲၣ်ဒိးအသိးအဂ့ၢ်န့ၣ် လီၢ်က၀ီၤကမျၢၢ်တဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ ပယီၤသုးအံၤနုာ်လီၤမၤဆှဲလဲ၀ဲသ့ၣ်ဘီဘိႇဂီၤလ့ၤကျဲဒီတကျိၤညါဒီးလၢကလုၢ်ဘၢဒိၣ်စိ၀ဲကျဲအံၤအဂီၢ်စ့ၢ်ကီးန့ၣ်ဘၣ်ဂုာ်ကျဲးစၢး၀ဲလၢအလါညါန့ၣ်လီၤႉဖဲအ၀ဲသ့ၣ်ဂုာ်ကျဲးစၢးနုာ်လီၤလၢကဒိၣ်စိ၀ဲကျဲအံၤအဂီၢ်န့ၣ်တၢ်ခးလိာ်သးကဲထီၣ်၀ဲဒီးဟီၣ်က၀ီၤ(Cobra)သုးကျိၤကိးမုၢ်နံၤဒဲးဃၣ်ဃၣ်ဒီးခီဖျိပယီၤသုးသံဘၣ်ဒိဘၣ်ထံး၀ဲအါအဃိအ၀ဲသ့ၣ်ကဘီယူၤဟဲက့ၤခးလီၤစၢၤ၀ဲတၢ်န့ၣ်လီၤႉ လၢန့ၣ်အမဲာ်ညါပယီၤသုးမၢသ့ၣ်ဘီဘိသ၀ီဖိဟဲက့ၤအိၣ်လၢသ၀ီပူၤဒ်အံၤအဖီခိၣ်န့ၣ်လီၢ်က၀ီၤသ၀ီတဖၣ်အိၣ်ဒီးတၢ်ပျံၤတၢ်ဖုးတၢ်ဘၣ်ယိၣ်ဘၣ်ဘှီဘၣ်ဆၣ်တနီၤန့ၣ်ခီဖျိကဘၣ်ထၢဖှိၣ်က့ၤတၢ်မုၢ်တၢ်ဘိလၢအ၀ဲသ့ၣ်သူၣ်လီၤတ့ၢ်ဃာ်၀ဲအိၣ်အဃိက့ၤအိၣ်လၢသ၀ီပူၤတနီၤလံဒီးတကးဒံးဘၣ်ပယီၤသုးတဲစ့ၢ်ကီး၀ဲလၢကပျဲဟးထီၣ်က့ၤလီၤလီၢ်က၀ီၤဖိအမဲာ်ညါခ့ၣ်အဲၣ်ယူၣ်အၦၤသုးဖိတဖၣ်ဘျ့ဘျ့ဆှီဆှီလီၤအဂ့ၢ်န့ၣ်လီၢ်က၀ီၤဖိတဖၣ်စံး၀ဲန့ၣ်လီၤႉ တၢ်သဘံၣ်သဘုၣ်လၢအကဲထီၣ်ခဲအံၤတဖၣ်န့ၣ်တမ့ၢ်အထီၣ်ဒုး၀ဲ(ခ့ၣ်အဲၣ်ယူၣ်)အၦၤတဖၣ်ဘၣ်ဒီး မ့မ့ၢ်တခီထီၣ်ဒုး၀ဲထဲလၢတၢ်ဒီသဒၢကမျၢၢ်သုး(PDF)အံၤလီၤဒီးတကးဒံးဘၣ်ပယီၤသုးဟ့ၣ်ပလီၢ်စ့ၢ်ကီးကမျၢၢ်တဖၣ်လၢတဘၣ်ပာ်ဖှိၣ်မၤသကိးတၢ်ဒီး(PDF)ဘၣ်ဒီးတၢ်မ့ဆီၣ်ထွဲမၤစၢၤအ၀ဲသ့ၣ်န့ၣ်ကဟးလူၤမၤဆှဲလဲ၀ဲအဂ့ၢ်န့ၣ် လီၢ်က၀ီၤကမျၢၢ်တဖၣ်စံး၀ဲန့ၣ်လီၤႉ ဒ်န့ၣ်အသိးလ့က့ၣ်ကိာ်က၀ီၤဒ့(၅)ဘ့ၣ်ဃုာ်ဒီးပဟံၣ်ကျီးႇထံမဲး၀ါခံႇယသ့ၣ်ကူၤလီၢ်က၀ီၤဖိလၢအလဲၤစံၣ်အိၣ်သူမှဲကျိကၢၢ်နံၤဒီတကျိၤအံၤတဖၣ်စ့ၢ်ကီးလ့က့ၣ်ကိာ်(စွဲၤတီၤ)ကျိဖးဒိၣ်လူၢ်သုးတြိၤ(၄၄)သုးတြိၤခိၣ်ဟဲကရၢကရိတဲဘၣ်ကမျၢၢ်ၦၤဃ့ၢ်တၢ်ဒုးသ့ၣ်တဖၣ်အံၤလၢကက့ၤအိၣ်လၢဒူသ၀ီပူၤအိၣ်၀ဲစ့ၢ်ကီးအဂ့ၢ်န့ၣ် လ့က့ၣ်ကိာ်ၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ
လိၣ်ဆှါသ၀ီဖိတဖၣ်တလါအတီၢ်ပူၤပယီၤသုးပျဲစိာ်က့ၤဟုသး(၂၀)ထၢၣ်လီၤအဃိဟုသးတကူတလၢလၢၤဘၣ်
လါနိၣ်၀့ဘၣၣ် ၂၉ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ၀ီၢ်ရ့ၣ်ကီၢ်ဆၣ်အပူၤ လိၣ်ဆှါသ၀ီလီၢ်က၀ီၤဖိတဖၣ်တလါန့ၣ်ပယီၤသုးပျဲစိာ်က့ၤဟုသးအထၢၣ်(၂၀)လီၤအဃိ ဟုသးတကူတလၢလၢၤဘၣ်အဂ့ၢ်န့ၣ်သ့ၣ်ညါဘၣ်လၢသ၀ီဖိတဖၣ်အအိၣ်န့ၣ်လီၤႉ လိၣ်ဆှါသ၀ီအံၤဟံၣ်ခိၣ်အိၣ်၀ဲအဖျၢၣ်(၃၀၀)ဃၣ်ဃၣ်ဒီးၦၤနီၣ်ဂံၢ်အိၣ်၀ဲ(၂၀၀၀)ဃၣ်ဃၣ်န့ၣ်လီၤႉစးထီၣ်လါနိၣ်၀့ဘၢၣ် ၁၆ သီအလီၢ်ခံန့ၣ် ကျးဆါတၢ်ဒီးၦၤနီသိလ့ၣ်ဖိလၢအိၣ်သ၀ီပူၤတဖၣ်တလါန့ၣ်ပယီၤသုးၦၤဘၣ်မူဘၣ်ဒါ ပျဲစိာ်က့ၤဟုသးအထၢၣ်(၂၀)လီၤအဂ့ၢ်န့ၣ်လီၢ်က၀ီၤသ၀ီဖိတဖၣ်စံး၀ဲန့ၣ်လီၤႉ “ၦၤဆါဟုသးဖိဒီးၦၤနီသိလ့ၣ်ဖိန့ၣ်တလါန့ၣ်ပျဲစိာ်က့ၤ၀ဲဟုသးအထၢၣ် (၂၀) လီၤႉလၢသ၀ီပူၤန့ၣ်ၦၤနီၣ်ဂံၢ်အါအဃိၦၤအီၣ်တလၢဘၣ်မီၤနီၤႉနဟဲက့ၤစိာ်ဟုသးမ့အါတလၢန့ၣ်အ၀ဲသ့ၣ်ဆိမိၣ်၀ဲလၢၦၤလဲၤမၤစၢၤတၢ်ပၢၢ်ဆၢကရူၢ်မီၤနီၤႉစးထီၣ်ဖဲအ၀ဲသ့ၣ်ဟဲအိၣ်လၢသ၀ီပူၤအလီၢ်ခံန့ၣ်နဖံးအီၣ်မၤအီၣ်တၢ်တသဘျ့လၢၤဘၣ်ႉဘၣ်ပျံၤဘၣ်အ၀ဲသ့ၣ်မီၤနီၤ” အဂ့ၢ်န့ၣ်လီၢ်က၀ီၤကမျၢၢ်တဂၤစံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဖဲအပူၤကွံာ်လါနိၣ်၀့ဘၢၣ် ၁၅ သီအနံၤစ့ၢ်ကီး ပယီၤသုးပာ်ဖှိၣ်လၢအိၣ်လိၣ်ဆှါသ၀ီပူၤအံၤဒီး ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)အဘၢၣ်စၢၤတၢ်ဒုးကဲထီၣ်အဃိပယီၤသုးက့ၤခးလီၤကျိဖးဒိၣ်ဆူသ၀ီပူၤန့ၣ်လီၤႉတကးဒံးဘၣ်ဒုးသုးကဘီယူၤစ့ၢ်ကီးဟဲတ့ၢ်လီၤမ့ၣ်ပိၢ်အဃိဟံၣ်ဃီကျီးကရၢၢ်ဟးဂီၤ၀ဲအသိးဘၣ်ပာ်တ့ၢ်ကွံာ်ဘုလၢတၢ်ကူးဃာ်၀ဲ၀ံၤတဖၣ်ဒီးတုၤလၢခဲအံၤဘၣ်ဃ့ၢ်မှံဟးဖျိးဒံး၀ဲအဂ့ၢ်န့ၣ်လီၢ်က၀ီၤသ၀ီဖိတဖၣ်စံး၀ဲန့ၣ်လီၤႉ “ဟံၣ်လၢအိၣ်ဘူးဒီးပယီၤသုးကလၢၤန့ၣ်အ၀ဲသ့ၣ်နုာ်လီၤမၤဟးဂီၤၦၤပဲတြီဒီးက့ၤစိာ်ၦၤဟုသးႇတၢ်လိမုၢ်ႇတၢ်ဖိတၢ်လံၤႇပိာ်မုၣ်ကူကၤခဲလၢာ်လီၤႉဖီၣ်မၤသံအီၣ်စ့ၢ်ကီးၦၤဆၣ်ဖိကီၢ်ဖိႉမုၢ်နၤခီၦၤမ့လဲၤလၢရီဘၢၣ်ကျီးမ့ထံၣ်၀ဲမ့ၣ်အူကပီၤန့ၣ်ခးဆိ၀ဲဒီးကျိအဃိမတၤတဂၤမးလဲၤမၤတၢ်တဘူၣ်လၢၤဘၣ်” အဂ့ၢ်န့ၣ်ၦၤလၢမၤစၢၤၦၤဃ့ၢ်မှံဟးဖျိးတဂၤစံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ပယီၤသုးကလၢၤလၢအိၣ်လိၣ်ဆှါသ၀ီပူၤအံၤအပူၤကွံာ်လၢညါန့ၣ်မ့ၢ်၀ဲဒၣ်(ခ့ၣ်အဲၣ်ယူၣ်)ဘံၣ်ဘၢသုးကလၢၤတၢ်လီၢ်ဒီးဖဲအပူၤကွံာ်(၂၀၂၁)လါအီးကထိဘၢၣ်န့ၣ်ပယီၤသုးနုာ်လီၤအိၣ်လၢသ၀ီပူၤ၀ံၤဆ့ၣ်နီၤအိၣ်က့ၤ၀ဲလၢ(ခ့ၣ်အဲၣ်ယူၣ်)သုးကလၢၤတၢ်လီၢ်အံၤလီၤအဂ့ၢ်န့ၣ်သ့ၣ်ညါဘၣ်လၢခ့ၣ်အဲၣ်ယူၣ်ၦၤဘၣ်မူဘၣ်ဒါအအိၣ်န့ၣ်လီၤႉ
သုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢခ့ၣ်အဲၣ်ယူၣ်(သုးက့ ၁)၀ဲၤလီၢ်ခိၣ်သ့ၣ်ရူတၢ်လီၢ်
လါနိၣ်၀့ဘၢၣ် ၂၉ သီႇ ၂၀၂၂ နံၣ်ႇ ခ့ၣ်အဲးစံၣ် လၢဒူသထူၣ်ကီၢ်ရ့ၣ် ဘံလ့ကီၢ်ဆၣ်အပူၤ ဖဲအပူၤကွံာ်လါနိၣ်၀့ဘၢၣ် ၂၆ သီ မုၢ်နၤခီ ၁၂ နၣ်ရံၣ်ဃၣ်ဃၣ် အဆၢကတီၢ်န့ၣ် သုးမီၤစိရိၤကဘီယူၤကၠဲး(၂)ဘ့ၣ်ဟဲတ့ၣ်လီၤမ့ၣ်ပိၢ်လၢတိတဲာ်ခံသ၀ီခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၁)၀ဲၤလီၢ်ခိၣ်သ့ၣ်ရူတၢ်လီၢ်အဂ့ၢ်န့ၣ်သ့ၣ်ညါဘၣ်လၢဟီၣ်က၀ီၤခ့ၣ်အဲၣ်ယူၣ် ၦၤဘၣ်မူဘၣ်ဒါအအိၣ်န့ၣ်လီၤႉ သုးမီၤစိရိၤအတၢ်ဟဲတ့ၢ်လီၤမ့ၣ်ပိၢ်ဘျီ၀ဲအံၤကမျၢၢ်ဘၣ်ဒိဘၣ်ထံးတအိၣ်၀ဲဘၣ်ဆၣ်သနါက့ တၢ်သူၣ်ထီၣ်ဟးဂီၤ၀ဲ(၂)ဖျၢၣ်အဂ့ၢ်န့ၣ်ခ့ၣ်အဲၣ်ယူၣ်(ဒူသထူၣ်ကီၢ်ရ့ၣ်)နဲၣ်ရွဲၣ် ပဒိၣ်စီၤအ့နဲၤ စံးဘၣ်ခ့ၣ်အဲးစံၣ်–ကညီတၢ်ကစီၣ်ဒ်အံၤန့ၣ်လီၤႉ “အဟဲတ့ၢ်လီၤတၢ်တဘျီညါအံၤလဲၤတ့ၢ်လီၤ၀ဲလၢသုးက့၀ဲၤလီၢ်ခိၣ်သ့ၣ်ရူမီၤနီၤႉဟဲတ့ၢ်လီၤ၀ဲ(၂)ဘျီတ့ၢ်လီၤ၀ဲလွံၢ်ဖျၢၣ်ႉသနါက့ၦၤကညီတအိၣ်ဘၣ်ႉၦၤကညီတအိၣ်ဘၣ်အဃိၦၤဘၣ်ဒိဘၣ်ထံးတအိၣ်ဘၣ်ႉဘၣ်ဟးဂီၤ၀ဲတၢ်သူၣ်ထီၣ်ဒုအိၣ်ႉမ့၀ံၤအဟဲတ့ၢ်လီၤ၀ဲလၢညါခါတဘျီန့ၣ်နါက့ဟဲတ့ၢ်လီၤ၀ဲလၢသ၀ီပူၤ”အဂ့ၢ်န့ၣ်အ၀ဲစံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဖဲအပူၤကွံာ်လါနိၣ်၀့ဘၢၣ် ၇ သီ မုၢ်နၤခီအခါစ့ၢ်ကီး ခီဖျိသုးမီၤစိရိၤကဘီယူၤကၠဲးဟဲတ့ၢ်လီၤမ့ၣ်ပိၢ်လၢ ဘံလ့ကီၢ်ဆၣ်(ဘီနီၤ၀ါ)သ၀ီပူၤအဃိဟံၣ်ဃီဟးဂူာ်ဟးဂီၤ၀ဲ(၅)ဖျၢၣ်ဒီးလီၢ်က၀ီၤကမျၢၢ်ဘၣ်ဒိ၀ဲ(၁)ဂၤအဂ့ၢ်န့ၣ် ခ့ၣ်အဲၣ်ယူၣ်စံး၀ဲန့ၣ်လီၤႉ လၢန့ၣ်အမဲာ်ညါခီဖျိသုးမီၤစိရိၤကဘီယူၤဟဲခးလီၤတၢ်လၢခ့ၣ်အဲၣ်ယူၣ်(ဘံလ့ကီၢ်ဆၣ်)ပူၤဒီးဟဲဆှၣ်တၢ်ဒီးကဘီယူၤတလီၢ်လီၢ်အဃိလ့က့ၣ်ႇတၤပီႇလၢၢ်ချီၣ်ႇပယၢ်ရီဃုာ်ဒီးသ၀ီလၢတၢ်ခိၣ်တၢ်ဃၢၤလီၢ်က၀ီၤကမျၢၢ်လၢအကထိဘၣ်ဃ့ၢ်ထီၣ်၀ဲအဂ့ၢ်န့ၣ်လီၢ်က၀ီၤကမျၢၢ်စံး၀ဲန့ၣ်လီၤႉ ပယၢ်ရီလီၢ်က၀ီၤကမျၢၢ်တဂၤစံး၀ဲ“ပနၢ်ဟူၦၤတဲလၢစှၤသီအတီၢ်ပူၤအံၤကဘီယူၤကဟဲတ့ၢ်လီၤမ့ၣ်ပိၢ်မီၤနီၤႉအဃိန့ၣ်ပဟးစံၣ်ဆိပာ်စၢၤႉလၢသ၀ီပူၤန့ၣ်ၦၤအိၣ်တ့ၢ်တဟံၣ်န့ၣ်တဂၤခံဂၤလီၤႉကဘီယူၤမ့ဟဲတ့ၢ်လီၤတၢ်န့ၣ်အါလၢမုၢ်နၤခီလီၤအဃိၦှၤတနီၤန့ၣ်လၢမုၢ်နၤခီန့ၣ်ဟးစံၣ်ပလဲာ်သးဒီးဟဲက့ၤကွၢ်ဟံၣ်လၢမုၢ်ဆါခီလီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဒ်န့ၣ်အသိးခ့ၣ်အဲၣ်ယူၣ်ဒူသထူၣ်ကီၢ်ရ့ၣ်(သုးက့ ၁)ဟီၣ်က၀ီၤတကးဒံးဘၣ်အမဲာ်ညါလၢ(သုးက့ ၅)ဒီး(သုးက့ ၆)ဟီၣ်က၀ီၤတကပၤစ့ၢ်ကီးစှၤသီအတီၢ်ပူၤအံၤသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်တပယူာ်ဃီလီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ပယီၤသုးတပျဲဟးထီၣ်လီၢ်က၀ီၤကမျၢၢ်လၢအိၣ်တီၤကၠၤအ့သီခါဖၠၣ်ကရၢၢ်ပူၤတဖၣ်အံၤလၢသ၀ီချၢဘၣ်
လါနိၣ်၀့ဘၢၣ် ၂၈ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ်(သုးက့ ၆)ဟီၣ်က၀ီၤ ကြုၢ်တုကီၢ်ဆၣ်အပူၤ ပယီၤသုးလၢအနုာ်လီၤအိၣ်တီၤကၠၤအ့သ၀ီပူၤတဖၣ်တပျဲဟးထီၣ်လီၢ်က၀ီၤကမျၢၢ်လၢအိၣ်သီခါဖၠၣ်ကရၢၢ်ပူၤတဖၣ်အံၤလၢသ၀ီချၢဘၣ်အဂ့ၢ်န့ၣ်သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ စးထီၣ်လၢသုးခိးကီၢ်ဆၢ(BGF)ဒီးပယီၤသုးအဂၤ(၁၀၀)ဃၣ်ဃၣ်နုာ်လီၤအိၣ်လၢတီၤကၠၤအ့သီခါဖၠၣ်ကရၢၢ်ပူၤဒီးသ၀ီအခိၣ်အဃၢၤကစၢၢ်ခီၣ်ထံး၀ံၤအလီၢ်ခံန့ၣ်ပယီၤသုးတဖၣ်အံၤတပျဲဟးထီၣ်သီခါ(၁)ပါဃုာ်ဒီးအတကၢ်တဖၣ်အံၤလၢသ၀ီချၢလၢၤဘၣ်အဂ့ၢ်န့ၣ် လီၢ်က၀ီၤကမျၢၢ်တဂၤစံး၀ဲဒ်အံၤန့ၣ်လီၤႉ “ပယီၤသုးနုာ်လီၤအိၣ်လၢသီခါဖၠၣ်ကရၢၢ်ပူၤၦဲၤၦဲၤလီၤႉသ၀ီဖိဃ့ၢ်ထီၣ်ခဲလၢာ်လံႉသီခါဖးဒိၣ်ခီန့ၣ်မ့ၢ်လၢအသးၦၢ်လံအဃိတအဲၣ်ဒိးစံၣ်လၢၤဘၣ်မီၤနီၤႉအဃိန့ၣ်လၢသီခါဖၠၣ်ကရၢၢ်ပူၤန့ၣ်အိၣ်တ့ၢ်က့ၤအတကၢ်လၢကကွၢ်ထွဲအီၤမီၤနီၤႉခဲအံၤပယီၤသုးဟဲနုာ်လီၤအိၣ်လၢသီခါဖၠၣ်ကရၢၢ်ပူၤဒီးတပျဲဟးထီၣ်သီခါအတကၢ်တဖၣ်အံၤလၢသ၀ီချၢလၢၤဘၣ်”အဂ့ၢ်န့ၣ်လီၢ်က၀ီၤကမျၢၢ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဖဲအပူၤကွံာ်လါနိၣ်၀့ဘၢၣ် ၂၁ သီအနံၤန့ၣ် ပယီၤသုးနုာ်လီၤ၀ဲဒၣ်အါအါဂီၢ်ဂီၢ်လၢနီၤတလၤသ၀ီႇ လီကဲၤသ၀ီပူၤဒီးတၢ်ခးလိာ်သးကဲထီၣ်၀ဲဒီးဟီၣ်က၀ီၤတၢ်ပၢၢ်ဆၢသုးပာ်ဖှိၣ်၀ံၤအလီၢ်ခံ ပယီၤသုးသ့ၣ်တဖၣ်အံၤနုာ်လီၤအိၣ်၀ဲဒၣ်လၢတီၤကၠၤအ့သီခါဖၠၣ်ကရၢၢ်ပူၤအံၤန့ၣ်လီၤႉ တၢ်ခးလိာ်သးကဲထီၣ်တၢ်တနံၤန့ၣ်ပယီၤသုးဒီး(BGF)အၦၤသံဘၣ်ဒိဘၣ်ထံးကအိၣ်အဂၤ(၁၀)ဃၣ်ဃၣ်ညါအဂ့ၢ်န့ၣ် ၦၤလၢအဘူးဒီးဟီၣ်က၀ီၤတၢ်ပၢၢ်ဆၢကရူၢ်တဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“အိၣ်တနံၤန့ၣ်ပယီၤသုးဟဲထီၣ်တုၤလၢလီကဲၤသ၀ီညါႉမ့၀ံၤက့ၤထီၣ်တရံး၀ဲဒၣ်လၢလီကဲၤသ၀ီကစၢၢ်ခီၣ်ထံးတကပၤမီၤနီၤႉဖဲန့ၣ်ခံခီခံကပၤတၢ်ခးလိာ်သးကဲထီၣ်ႉဖဲကစၢၢ်ခီၣ်ထံးန့ၣ်ပယီၤသုးတဟဲဟံအၦၤသံစိၣ်ဘၣ်ကအိၣ်(၅)ဂၤညါႉတနီၤန့ၣ်အက့ၤစိာ်၀ဲႇက့ၤစိာ်၀ဲလၢအဘၣ်ဒိဘၣ်ထံးတဖၣ်လီၤႉၦၤသံန့ၣ်အါလၢ(BGF)မီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဖဲပယီၤသုးဟဲထီၣ်အခါခီဖျိအ၀ဲသ့ၣ်ခးတပျုာ်တပျီာ်ကျိဖးဒိၣ်ကျိဖိအဃိ လီၢ်က၀ီၤကမျၢၢ်သံလၢကျိဖးဒိၣ်လီၤတဲာ်ပိၢ်ဖးထီၣ်အကလုၢ်ဖးဒိၣ်အံၤအဃိ(၂)ဂၤအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ လၢန့ၣ်အမဲာ်ညါခီဖျိပယီၤသုးခးလီၤကျိဖးဒိၣ်အဃိလီၢ်က၀ီၤကမျၢၢ်အဟံၣ်အဃီဟးဂူာ်ဟးဂီၤ၀ဲအါမးဒီး လီၢ်က၀ီၤသ၀ီဖိတဖၣ်စ့ၢ်ကီးဘၣ်ဃ့ၢ်ထီၣ်၀ဲသ၀ီဒီတဖျၢၣ်ညါအဂ့ၢ်န့ၣ်သ့ၣ်ညါဘၣ်န့ၣ်လီၤႉ ကတီၢ်ခဲအံၤတီၤကၠၤအ့ႇနီၤတလၤႇကီၣ်ဖီႇလီကဲၤဒီးဖါကၠၣ်သ၀ီလီၢ်က၀ီၤကမျၢၢ်ဘၣ်ဃ့ၢ်ထီၣ်၀ဲလၢကအထိညါဒီးတနီၤန့ၣ်လဲၤစံၣ်အိၣ်၀ဲလၢသ၀ီအဂၤဒီးတနီၤန့ၣ်လဲၤစံၣ်အိၣ်၀ဲလၢ၀့ၢ်အဂၤတဖၣ်န့ၣ်လီၤႉဒ်န့ၣ်အသိးကတီၢ်ခဲအံၤပယီၤသုးခးလီၤဒံးကျိဖးဒိၣ်ဆူသ၀ီပူၤတပယူာ်ဃီအဂ့ၢ်န့ၣ်လီၢ်က၀ီၤကမျၢၢ်စံး၀ဲအသိးသ့ၣ်ညါဘၣ်န့ၣ်လီၤႉ
တၢ်စးထီၣ်မၤတၢ်လီၤမၢ်ကွံာ်တၢ်စုဆူၣ်ခီၣ်တကးထီဒါပိာ်မုၣ်(၁၆)သီတၢ်ဟူးတၢ်ဂဲၤလၢခ့ၣ်အဲၣ်ယူၣ်ဟီၣ်က၀ီၤအပူၤ
လါနိၣ်၀့ဘၢၣ် ၂၈ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲအပူၤကွံာ်လါနိၣ်၀့ဘၢၣ် ၂၅ သီအနံၤန့ၣ် ကညီပိာ်မုၣ်ကရၢ(KWO)တီခိၣ်ရိၣ်မဲစးထီၣ်အိးထီၣ်မၤ၀ဲ ဟီၣ်ခိၣ်ဒီဘ့ၣ်တၢ်မၤလီၤမၢ်ကွံာ်တၢ်စုဆူၣ်ခီၣ်တကးထီဒါပိာ်မုၣ်(၁၆)သီတၢ်ဟူးတၢ်ဂဲၤအံၤလၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဖၣ်အၣ်ကီၢ်ရ့ၣ် လူၢ်ပျဲၢ်ကီၢ်ဆၣ် ကမါထၣ်သ၀ီပူၤန့ၣ်လီၤႉ ဒ်သိးခါဆူညါတၢ်သူစုဆူၣ်ခီၣ်တကးလၢပိာ်မုၣ်ပိာ်မၢၤအဖီခိၣ်ကလီၤမၢ်ကွံာ်အဂီၢ်န့ၣ်ကိးမုၢ်နံၣ်ဒဲးဖဲလါနိၣ်၀့ဘၢၣ် ၂၅ သီအနံၤန့ၣ် ဘၣ်တၢ်မၤ၀ဲ(၁၆)သီတၢ်ဟူးတၢ်ဂဲၤအံၤလၢခ့ၣ်အဲၣ်ယူၣ်ဟီၣ်က၀ီၤအပူၤဒီး အတၢ်ပညိၣ်မ့ၢ်ဒ်သိးလီၢ် က၀ီၤကမျၢၢ်တဖၣ်ကသ့ၣ်ညါနၢ်ပၢၢ်၀ဲအဂ့ၢ်န့ၣ်(KWO)ဖၣ်အၣ်ကီၢ်ရ့ၣ်ခိၣ် နီၢ်မၣ်စ့ၤကၠီၤ စံး၀ဲဒ်အံၤန့ၣ်လီၤႉ “ပမ့ကွၢ်ဆၢကတီၢ်ခဲအံၤန့ၣ်ပထံၣ်ဘၣ်ဒံးတၢ်သူတၢ်စုဆူၣ်ခီၣ်တကးထီဒါပိာ်မုၣ်တဖၣ်အါမးဒံးလီၤႉတၢ်မၤ၀ဲတၢ်မၤလီၤမၢ်ကွံာ်တၢ်စုဆူၣ်ခီၣ်တကးထီဒါပိာ်မုၣ်တၢ်ဟူးတၢ်ဂဲၤမုၢ်နံၤအံၤမ့ၢ်မုၢ်နံၤလၢအရ့ဒိၣ်လၢပိာ်မုၣ်ပိာ်မၢၤတဖၣ်အဂီၢ်ဒိၣ်မးလီၤႉဒ်သိးပ၀ဲပိာ်မုၣ်သ့ၣ်တဖၣ်ကသ့ၣ်ညါလီၤက့ၤအတၢ်ခွဲးတၢ်ယၤဒီးတၢ်မ့ၢ်ကဲထီၣ်သးတမံၤမံၤလံန့ၣ်အနီၢ်ကစၢ်ဒၣ်၀ဲကသ့ထီဒါတၢ်သ့ၣ်တဖၣ်အံၤဒီးကတဲတၢ်ဒူဒူအဂီၢ်န့ၣ်လီၤ” အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါ(၁၆)သီတၢ်ဟူးတၢ်ဂဲၤလၢတၢ်စးထီၣ်မၤအီၤဖဲလါနိၣ်၀့ဘၢၣ် ၂၅ သီတုၤလၢလါဒံၣ်စ့ဘၢၣ် ၁၀ သီအနံၤအံၤန့ၣ် (KWO)ကတီခိၣ်ရိၣ်မဲမၤ၀ဲဒီးကနုာ်လီၤမၤ၀ဲတၢ်ဟူးတၢ်ဂဲၤအံၤလၢခ့ၣ်အဲၣ်ယူၣ်တၢ်ပၢဟီၣ်က၀ီၤ ဒူသ၀ီတဖၣ်အပူၤအသိးကမၤစ့ၢ်ကီး၀ဲတၢ်မၤလီၤမၢ်ကွံာ်တၢ်စုဆူၣ်ခီၣ်တကးထီဒါပိာ်မုၣ်တၢ်ဟ့ၣ်ပီညါတၢ်တဲသကိးတဖၣ်အဂ့ၢ်န့ၣ် နီၢ်မၣ်စ့ၤကၠီၤ စံးအါထီၣ်၀ဲန့ၣ်လီၤႉ တၢ်အိးထီၣ်(၁၆)သီတၢ်ဟူးတၢ်ဂဲၤတၢ်ရဲၣ်တၢ်ကျဲၤဘျီ၀ဲန့ၣ်အပူၤဟီၣ်က၀ီၤခ့ၣ်အဲၣ်ယူၣ်ၦၤဘၣ်မူဘၣ်ဒါႇကၠိဖိႇကၠိသရၣ်၊မုၣ်ဒီးလီၢ်က၀ီၤသ၀ီဖိတဖၣ်ဟဲထီၣ်၀ဲခဲလၢာ်(၃၀၀)ဘျဲၣ်ဒီးတၢ်ရှဲပၠးလီၤ၀ဲဘၣ်ဃးတၢ်မၤလီၤမၢ်ကွံာ်တၢ်စုဆူၣ်ခီၣ်တကးထီဒါပိာ်မုၣ်ႇတၢ်ဂဲၤဒိပၠးဘၣ်ဃးတၢ်သူတၢ်စုဆူၣ်ခီၣ်တကးလၢပိာ်မုၣ်ဖီခိၣ်ဒီးတၢ်သူၣ်၀ံၣ်သးဆၢသ့ၣ်တဖၣ်န့ၣ်လီၤႉ “လၢလူၢ်ပျဲၢ်ကီၢ်ဆၣ်ပူၤအံၤတၢ်သူတၢ်စုဆူၣ်ခီၣ်တကးန့ၣ်တမ့ၢ်ထဲလၢပိာ်မုၣ်ဘၣ်ႉဖိဒံဖိသၣ်ဒီးပိာ်ခွါတဖၣ်နါက့ပၣ်၀ဲလီၤႉဘၣ်ဆၣ်ကဲထီၣ်ဒိၣ်ဒိၣ်မုၢ်မုၢ်ဒုတအိၣ်ဒံးဘၣ်ႉဘၣ်ဆၣ်တၢ်မ့မၤ၀ဲတၢ်ရဲၣ်တၢ်ကျဲၤဒ်အံၤန့ၣ်ပ၀ဲလီၢ်က၀ီၤသ၀ီဖိကမျၢၢ်တဖၣ်ပကသ့ၣ်ညါအါထီၣ်ဘၣ်၀ဲတၢ်သူတၢ်စုဆူၣ်ခီၣ်တကးလၢပိာ်မုၣ်အဖီခိၣ်အါထီၣ်မီၤနီၤ” အဂ့ၢ်န့ၣ် ခ့ၣ်အဲၣ်ယူၣ် လူၢ်ပျဲၢ်ကီၢ်ဆၣ် ၀ဲၤဒၢးခိၣ် စီၤဘျဲၣ်လၢအဟဲထီၣ်တၢ်ရဲၣ်တၢ်ကျဲၤအံၤစံး၀ဲန့ၣ်လီၤႉ ဟီၣ်ခိၣ်ဒီဘ့ၣ်တၢ်မၤလီၤမၢ်ကွံာ်တၢ်စုဆူၣ်ခီၣ်တကးထီဒါပိာ်မုၣ်(၁၆)သီတၢ်ဟူးတၢ်ဂဲၤအံၤကိးမုၢ်နံၣ်ဒဲးန့ၣ်(KWO)တီခိၣ်ရိၣ်မဲမၤ၀ဲလၢခ့ၣ်အဲၣ်ယူၣ်ဟီၣ်က၀ီၤကိးဘ့ၣ်ဒဲးအပူၤတကးဒံးဘၣ်အမဲာ်ညါတၢ်မၤစ့ၢ်ကီးအီၤလၢကီၢ်ဆၢဘၣ်ကီဘၣ်ခဲဒဲက၀ီၤပူၤဒီးကီၢ်ဆၢ၀့ၢ်သ့ၣ်တဖၣ်အပူၤန့ၣ်လီၤႉ ကတီၢ်ခဲအံၤလၢခ့ၣ်အဲၣ်ယူၣ်ဟီၣ်က၀ီၤအပူၤခီဖျိဒုးယၤတၢ်သဘံၣ်သဘုၣ်ကဲထီၣ်ဒံး၀ဲအဃိ တၢ်ရဲၣ်တၢ်ကျဲၤအံၤတၢ်ကမၤအီၤထဲလၢခ့ၣ်အဲၣ်ယူၣ်(ဖၣ်အၣ်ကီၢ်ရ့ၣ်)အပူၤလီၤဒီး မ့မ့ၢ်ဟီၣ်က၀ီၤလၢအဂၤတဖၣ်န့ၣ်တၢ်တမၤ၀ဲတၢ်ရဲၣ်တၢ်ကျဲၤအံၤဘၣ်အဂ့ၢ်န့ၣ်သ့ၣ်ညါဘၣ်န့ၣ်လီၤႉ
တၢ်ခးသံ(ယ့ကီၢ်ဆၣ်)ပၢၤကီၢ်ခိၣ်တၢ်ဂ့ၢ်အံၤအဃိကၠိဖိမိၢ်ပၢ်တဖၣ်လဲၤဆှၢအဒံၣ်အဖိလၢကၠိတဘူၣ်လၢၤဘၣ်
လါနိၣ်၀့ဘၢၣ် ၂၄ သီႇ ၂၀၂၂ နံၣ်ႇ ခ့ၣ်အဲးစံၣ် လၢတလၢၤကီၢ်စဲၣ် ယ့ကီၢ်ဆၣ်အပူၤ တၢ်ခးသံသုးမီၤစိရိၤအပၢၤကီၢ်ခိၣ်တၢ်ဂ့ၢ်အံၤအဃိ ဖဲတနံၤလါနိၣ်၀့ဘၢၣ် ၂၄ သီဂီၤခီန့ၣ်ကၠိဖိမိၢ်ပၢ်တဖၣ်လဲၤဆှၢအဒံၣ်အဖိလၢကၠိတဘူၣ်လၢၤဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲမဟါန့ၣ် ခီဖျိယ့ဘလူကရူၢ်အံၤအိၣ်ခိးခး၀ဲ(ယ့ကီၢ်ဆၣ်)ပၢၤကီၢ်ခိၣ်အသိလ့ၣ်အံၤလၢတၢ်ဘၢၣ်စၢၤအဃိ ပၢၤကီၢ်သံ(၃)ဂၤအကျါပၣ်ဃုာ်၀ဲယ့ကီၢ်ဆၣ်ပၢၤကီၢ်ခိၣ်အံၤန့ၣ်လီၤႉတၢ်ကဲထီၣ်သး၀ံၤအလီၢ်ခံန့ၣ်ပယီၤသုးပာ်လီၤ၀ဲတၢ်ဘံၣ်တၢ်ဘၢလၢ၀့ၢ်ပူၤ၀့ၢ်ချၢဃံးဃီၣ်ဒီၣ်ဒီးအိၣ်ခိးသမံသမိးကမျၢၢ်ထံဖိကီၢ်ဖိလၢအဟးထီၣ်က့ၤလီၤတဖၣ်အဃိဘၣ်ယိၣ်တၢ်လၢဖိဒံဖိသၣ်တဖၣ်အဂီၢ်ဒီးလဲၤဆှၢဖိသၣ်လၢကၠိတလၢၤ၀ဲဘၣ်အဂ့ၢ်န့ၣ် ကၠိဖိမိၢ်ပၢ်တဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ပနၢ်ဟူတၢ်ကစီၣ်တခါန့ၣ်၀ံၤဘျီန့ၣ်တယံၤဘၣ်လၢ၀့ၢ်ပူၤန့ၣ်ကၠိဖိမိၢ်ပၢ်လဲၤကိးက့ၤအဒံၣ်အဖိလၢကၠိမီၤနီၤႉဖဲတနံၤညါအံၤဂီၤခီနါက့ၦၤတဒုးထီၣ်ၦၤဒံၣ်ၦၤဖိလၢကၠိလၢၤဘၣ်ႉၦၤဘၣ်ယိၣ်လၢဖိဒံဖိသၣ်ကဘၣ်တၢ်တမံၤမံၤအဃိမတၤတဂၤမးတဟးထီၣ်လၢတၢ်ချၢလၢၤဘၣ်”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဖဲမဟါလါနိၣ်၀့ဘၢၣ် ၂၃ သီ ဂီၤခီ ၈း၂၅ မံးနံးဃၣ်ဃၣ်အဆၢကတီၢ်န့ၣ် တၢ်ခိးခး(ယ့ကီၢ်ဆၣ်)ပၢၤကီၢ်ခိၣ် ဖဲကၠိလီသ၀ီသီ ဒုးယၤပၢဆှၢရဲၣ်ကျဲၤ၀ဲၤလီၢ်ခိၣ်သ့ၣ်(စကခ–၁၉) မုၢ်ထီၣ်ကလံၤထံးကီၢ်ခီသုး၀ဲၤလီၢ်ခိၣ်သ့ၣ် (ရတခ)စုတီၤဖီလာ်ဒုးယၤ၀ဲၤကျိၤအကပၤဒီးဖဲန့ၣ်ပၢၤကီၢ်သံ(၂)ဂၤအကျါပၣ်ဃုာ်၀ဲပၢၤကီၢ်ခိၣ်တဂၤဒီးမၤန့ၢ်၀ဲကျိ(၂)ခိၣ်အဂ့ၢ်န့ၣ်ယ့ဘလူကရူၢ်အခိၣ်စံး၀ဲန့ၣ်လီၤႉ အ၀ဲစံး၀ဲလၢ“ၦၤသံခီန့ၣ်(၃)ဂၤအကျါန့ၣ်ပၣ်ဃုာ်၀ဲပၢၤကီၢ်ခိၣ်မီၤနီၤႉဖဲအကျါန့ၣ်ပၣ်၀ဲဒၣ်ဒီးသုးစကီၤပြံတဂၤႉပၢၤကီၢ်ခိၣ်နါက့ပၣ်စ့ၢ်ႉမ့၀ံၤပၣ်ဃုာ်စ့ၢ်ကီးအ၀ဲသ့ၣ်အၦၤပၢၤကီၢ်တဂၤႉအ၀ဲသ့ၣ်ဟဲဒီးသိလ့ၣ်ပအိၣ်ခိးခးအီၤမီၤနီၤႉပမၤန့ၢ်၀ဲဒၣ်(M-16)တခိၣ်ႇကျိဖုၣ်တခိၣ်ဒီးကျိချံႇကျိအဒၢတဖၣ်မီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဖဲအပူၤကွံာ်လါစဲးပထ့ဘၢၣ်အခါစ့ၢ်ကီး ယ့ဘလူကရူၢ်အိၣ်ခိးခး၀ဲ(ခီၤစၤ)ပၢၤကီၢ်ခိၣ်အသိလ့ၣ်ဖဲ (ယ့၀့ၢ်)ကဘၠၤကၠံသ၀ီပူၤအဃိ မၤန့ၢ်၀ဲဒၣ်ကျိဖိတခိၣ်ဒံးအဂ့ၢ်န့ၣ် ကရူၢ်အခိၣ်စံး၀ဲန့ၣ်လီၤႉ
ပယီၤသုးစံး၀ဲလၢအသုးကျိၤကနုာ်လီၤအဃိမၢ၀ဲဒၣ်(စွ့ၣ်ကၠ့ၣ်)၀့ၢ်ပူၤက၀ီၤဒ့ဒီးသ၀ီတဖျၢၣ်လၢကသုးလီၢ်သုးကျဲ
လါနိၣ်၀့ဘၢၣ် ၂၄ သီႇ ၂၀၂၂ နံၣ်ႇ ခ့ၣ်အဲးစံၣ် ခီဖျိသုးမီၤစိရိၤအသုးကျိၤအံၤတၢ်ရဲၣ်တၢ်ကျဲၤအိၣ်လၢကနုာ်လီၤလၢချၢၣ်လွံၢ်ထူၣ်ကီၢ်ရ့ၣ်ပူၤအဃိ ဒုးသ့ၣ်ညါမၢ၀ဲဒၣ်ပကိကီၢ်ခီႇစွ့ၣ်ကၠ့ၣ်၀့ၢ်က၀ီၤဒ့(၂)ဘ့ၣ်ဒီးသ၀ီလၢအိၣ်ဘူးဖဲန့ၣ်တဖျၢၣ်လၢကသုးလီၢ်သုးကျဲအဂ့ၢ်န့ၣ်ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ထုးထီၣ်ပာ်ဖျါ၀ဲဖဲမဟါလါနိၣ်၀့ဘၢၣ် ၂၃ သီအနံၤန့ၣ်လီၤႉ ပယီၤသုးအံၤတၢ်ရဲၣ်တၢ်ကျဲၤအိၣ်လၢကနုာ်လီၤမၤ၀ဲတၢ်ထီၣ်ဒုးလၢခ့ၣ်အဲၣ်ယူၣ်(သုးက့ ၃)ဟီၣ်က၀ီၤ ချၢၣ်လွံၢ်ထူၣ်ကီၢ်ရ့ၣ်ပူၤအဃိ စးထီၣ်ဖဲတလါအံၤလါနိၣ်၀့ဘၢၣ် ၁၄ သီန့ၣ် အ၀ဲသ့ၣ်ကတီၤထီၣ်သးဒီးမၤအါထီၣ်၀ဲ သုးသိလ့ၣ်ထးႇကျိဖးဒိၣ်သိလ့ၣ်သ့ၣ်တဖၣ်အသိးဒုးသ့ၣ်ညါ၀ဲစွ့ၣ်ကၠ့ၣ်၀့ၢ်(ခၠ့ၤတီၤယၤ)‚ကျွဲတဲ(ကွဲၣ်သ့ၣ်)က၀ီၤဒ့ခံဘ့ၣ်အံၤဒီး(ဆှါ)သ၀ီဖိတဖၣ်လၢကသုးလီၢ်သုးကျဲအဂ့ၢ်န့ၣ်ခ့ၣ်အဲၣ်ထုးထီၣ်ပာ်ဖျါ၀ဲန့ၣ်လီၤႉ ဘၣ်ဃးဒီးတၢ်ဂ့ၢ်အံၤၦၤလၢမၤစၢၤၦၤဃ့ၢ်မှံဟးဖျိးလၢအိၣ်ဟီၣ်က၀ီၤဖဲန့ၣ်အပူၤတဂၤစံး၀ဲ“မ့ၢ်ပယီၤသုးဖဲလဲၣ်တဒူၣ်မၢၦၤသုးလီၢ်သုးကျဲလဲၣ်ခီန့ၣ်ပတသ့ၣ်ညါဘၣ်ႉပဟးသံကွၢ်ဘျီသ၀ီဖိတဖၣ်တဲ၀ဲလၢပယီၤသုးမၢၦၤသုးလီၢ်သုးကျဲန့ၣ်အမ့ၢ်လီၤႉမ့ၢ်ကဘၣ်သုးလီၢ်သုးကျဲအဆဲးခံကတၢၢ်ဖဲလဲၣ်တနံၤလဲၣ်ခီန့ၣ်တသ့ၣ်ညါ၀ဲလီၤတံၢ်လီၤဆဲးဘၣ်”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ပယီၤသုးမၢစွ့ၣ်ကၠ့ၣ်၀့ၢ်(က၀ီၤဒ့)ခံဘ့ၣ်ဒီးသ၀ီတဖျၢၣ်အပူၤကမျၢၢ်အဂၤ(၅၀၀၀)ဘျဲၣ်လၢကသုးလီၢ်သုးကျဲဘၣ်ဆၣ်ခီဖျိသ၀ီဖိဒီးကမျၢၢ်လၢအိၣ်က၀ီၤဒ့ပူၤတဖၣ်အံၤတၢ်ကီတၢ်ခဲအိၣ်လၢကသုးလီၢ်သုးကျဲအဃိတုၤလၢခဲအံၤအ၀ဲသ့ၣ်တသုးဘၣ်လီၢ်ကျဲဒံးဘၣ်အိၣ်ဒံး၀ဲလၢက၀ီၤဒ့ဒီးသ၀ီပူၤအဖၢမုၢ်လီၤအဂ့ၢ်န့ၣ်ချၢၣ်လွံၢ်ထူၣ်ကီၢ်ရ့ၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ တကးဒံးဘၣ်လၢန့ၣ်အမဲာ်ညါဖဲလါနိၣ်၀့ဘၢၣ် ၂၂ သီ ၁၂း၃၀ အဆၢကတီၢ်န့ၣ် ပယီၤသုးသိလ့ၣ်(၈)ခိၣ်နုာ် လီၤ၀ဲဆူ(စွ့ၣ်ကၠ့ၣ်)ကျိဖးဒိၣ်လူၢ်၀ံၤအလီၢ်ခံဖဲဟါခီ ၄ နၣ်ရံၣ်အဆၢကတီၢ်န့ၣ် သုးသိလ့ၣ်(၈)ခိၣ်အကျါ ဟးထီၣ်က့ၤ၀ဲဆူ(သၣ်ဆ့း)တကပၤ ၄ ခိၣ်အဂ့ၢ်န့ၣ် ခ့ၣ်အဲၣ်ယူၣ်စံး၀ဲန့ၣ်လီၤႉ ခီဖျိတၢ်ကစီၣ်ဟူထီၣ်သါလီၤလၢပယီၤသုးကျိၤကနုာ်လီၤလၢချၢၣ်လွံၢ်ထူၣ်ကီၢ်ရ့ၣ်(စွ့ၣ်ကၠ့ၣ်)က၀ီၤဒ့ႇသ၀ီပူၤအံၤဒီးလၢမုၢ်နၤခီအဆၢကတီၢ်စ့ၢ်ကီးပယီၤသုးခးလီၤကျိဖးဒိၣ်ဆူသ၀ီပူၤအဃိလီၢ်က၀ီၤကမျၢၢ်တဖၣ်ဘၣ်အိၣ်လၢတၢ်ပျံၤတၢ်ဖုးတၢ်ဘၣ်ယိၣ်ဘၣ်ဘှီပူၤအဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ ဖဲအပူၤကွံာ်လါနိၣ်၀့ဘၢၣ် ၁၂ သီအနံၤန့ၣ် ခ့ၣ်အဲၣ်ယူၣ်(သုးက့ ၃)စုတီၤအဖီလာ် ကညီဒီကလုာ်တၢ်ထူၣ်ဖျဲးသုးမုၢ် ဒိၣ်(KNLA)သုးပာ်ဖှိၣ်ထီၣ်မၤန့ၢ်၀ဲပယီၤသုးကလၢၤ(၃)ဖျၢၣ်လၢအမ့ၢ်သၣ်ဆ့းသုးကလၢၤႇဘီကထၣ်ဒီးတိၤသ့ၣ်ဖူသုးကလၢၤအံၤလၢတသီအတီၢ်ပူၤန့ၣ်လီၤႉဖဲတၢ်ထီၣ်မၤန့ၢ်သုးကလၢၤဘျီ၀ဲန့ၣ်အပူၤခီဖျိသုးမီၤစိရိၤအကဘီယူၤဟဲက့ၤတ့ၢ်လီၤကဒါမ့ၣ်ပိၢ်အဃိလီၢ်က၀ီၤကမျၢၢ်လၢအိၣ်ဘူးသုးကလၢၤခိၣ်ဃၢၤဖဲန့ၣ်တဖၣ်ဘၣ်ဃ့ၢ်ထီၣ်၀ဲအဂၤ(၂၀၀၀)ဘျဲၣ်ဒံးန့ၣ်လီၤႉ