ပယီၤသုးခးသံကံွာ်၀ဲ ၦၢ်ၦၤမၤတၢ်ဖိတဂၤအဂ့ၢ် KNU စံး၀ဲ

လါမးရှး ၁၀ သီႇ ၂၀၂၀ နံၣ်ႇ စးအဲၣ်ဆူ

ဖဲမဟါကၢာ်(လါမးရှး ၅ သီ)ႇ မုၢ်ဟါလီၤအဆၢကတီၢ်န့ၣ် KNU ကညီဒီကလုာ်စၢဖှိၣ်ကရၢ သ့ၣ်ၦၢ်၀ဲၤကျိၤ အၦၤမၤတၢ်ဖိတဂၤ ပယီၤသုးခးသံအီၤဖဲ မုၢ်ြတီၢ်(ဖၣ်ပူၣ်)ကီၢ်ရ့ၣ်ႇ ဒွဲၣ်လိကီၢ်ဆၣ် မဲၤ၀့ၤသ၀ီအပူၤအဂ့ၢ်န့ၣ် KNU သုးက့(၅) စံး၀ဲလီၤႉ

ကီၢ်ရ့ၣ် သ့ၣ်ၦၢ်ၦၤမၤတၢ်ဖိ (၂) ဂၤလၢအဒိး၀ဲဆဲးကဲးဒီး အလဲၤခီတဲာ်၀ဲ ပယီၤသုးကလၢၤအံၤအဆၢကတီၢ် ပယီၤသုး ခီၣ်ချ့သုးရ့ၣ်(ခမရ=၃၃၈)သုးကရူၢ်လၢအအိၣ်ဆီလီၤအသးဖဲမဲၤ၀့ၤသ၀ီအပူၤတဖၣ်အံၤ ခး၀ဲဒၣ်အဃိ ဘၣ်သံ၀ဲဒၣ်တဂၤအဂ့ၢ်န့ၣ် မုၢ်ြတီၢ်ကီၢ်ရ့ၣ် နဲၣ်ရွဲၣ် စီၤရီၣ်ဘ့ၤမူ စံး၀ဲဒ်အံၤလီၤႉ

အ၀ဲစံး၀ဲလၢ “ပၦၤ သ့ၣ်ၦၢ်ၦၤမၤတၢ်ဖိခံဂၤအံၤ အ၀ဲသ့ၣ်ဟးထီၣ်လၢ၀ဲၤဒၢး ကလဲၤလၢသ့ၣ်ၦၢ်လၢမူဒါအပူၤလီၤႉ ဖဲမဲၤ၀့ၤသုးကလၢၤတၢ်လီၢ်အမဲာ်ညါန့ၣ် အ၀ဲသ့ၣ်လဲၤဖၠး၀ဲဒၣ်ထီဘိလီၤႉ ဖဲအ၀ဲသ့ၣ်လဲၤ၀ဲအဆၢကတီၢ်န့ၣ် ပယီၤသုးတဖၣ်အိၣ်ခိး၀ဲဖဲန့ၣ်ဒီးခး၀ဲအဃိ ၦၤလၢအအိၣ်လၢတၢ်မဲာ်ညါတဂၤန့ၣ် တဘၣ်အီၤဘၣ်ႉ အလဲၤတၢ်န့ၣ်လဲၤ၀ဲခံဂၤလီၤႉ တချုးတုၤဒံးလၢပယီၤသုးကလၢၤတၢ်လီၢ် အပ့ၣ်(၂၀၀)ဃၣ်ဃၣ်န့ၣ်ခး၀ဲလီၤႉ တဘၣ်ၦၤလၢအအိၣ်တၢ်မဲာ်ညါတဂၤဘၣ်ဒီး ဘၣ်၀ဲဒၣ်ၦၤလၢအအိၣ်တၢ်လီၢ်ခံတဂၤလီၤႉ ခး၀ဲဒၣ်အိၣ်၀ဲအထံၣ် ၂၀ ဘျဲၣ်ညါလီၤန့ၣ်ပသ့ၣ်ညါဘၣ်လီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်လီၤႉ

သ့ၣ်ၦၢ်ၦၤမၤတၢ်ဖိလၢ ပယီၤသုးခးသံအီၤအံၤ မ့ၢ်၀ဲ ကီၢ်ရ့ၣ်သ့ၣ်ၦၢ် ၦၢ်ခိၣ် စီၤမီၤအ့သါ ဒီးကျိချံသၢထံၣ်အဃိ ဘၣ်တၢ်ဟဲက့ၤဆှၢအီၤဆူမုၢ်ြတီၢ်ကီၢ်ရ့ၣ်၀ဲၤဒၢးဘၣ်ဆၣ် သံ၀ဲလၢကျဲပူၤအဂ့ၢ်န့ၣ် စီၤရီၣ်ဘ့ၤမူ ဆဲးစံး၀ဲလီၤႉ

လၢန့ၣ်အမဲာ်ညါ ခီဖျိလၢတၢ်ခးသံ၀ဲဒ်အံၤ သ့ၣ်ၦၤအၦၤမၤတၢ်ဖိခံဂၤအံၤ တမ့ၢ်လၢအ၀ဲသ့ၣ် ဟးတလၢက့ၤတလၢတၢ်ပာ်ပနီၣ်တၢ်လီၢ်ဘၣ်ဒီး မ့ၢ်၀ဲဒၣ်လဲၤက့ၤ၀ဲဒၣ်လၢသ့ၣ်ၦၢ်လၢမူဒါအဂ့ၢ်ႇ ခး၀ဲဒၣ်တၢ်ဂ့ၢ်န့ၣ်မ့ၢ်လၢမနုာ်အဃိလဲၣ်န့ၣ် တၢ်ကဃုသ့ၣ်ညါ၀ဲအသိးႇ ဘၣ်ထွဲဒီးတၢ်ခး၀ဲတၢ်ဂ့ၢ်န့ၣ် ဘၣ်ဒိ၀ဲဒၣ်တၢ်သူၣ်ထီၣ်တၢ်နာ်န့ၢ်လိာ်သးအဃိ ခံကပၤလၢာ်ခိၣ်နၢ်တဖၣ်တၢ်ထံၣ်လိာ်သးအပူၤ လီၢ်ခၢၣ်သးခိၣ်နၢ်တဖၣ် ကဘၣ်ဘှါရှဲလိၣ်၀ဲအဂ့ၢ်န့ၣ် KNU မုၢ်ြတီၢ်ကီၢ်ရ့ၣ် စံး၀ဲလီၤႉ

ဘၣ်ဆၣ် ဘၣ်ထွဲဒီးတၢ်ဂ့ၢ်အ၀ဲအံၤ ပယီၤသုး မုၢ်ထီၣ်ကလံၤထံး ကီၢ်ခီသုး၀ဲၤလီၢ်ခိၣ်သ့ၣ်(ရတခ) ၦၤကတိၤတၢ်ပၢ သုးခိၣ်ဒိၣ်စိ မီၣ်မီၣ်လၣ် စံး၀ဲလၢ “တၢ်ကဲထီၣ်သးန့ၣ်ဒ်အံၤ အ၀ဲသ့ၣ်န့ၣ်ဟဲခး၀ဲဒၣ်လီၤႉ တဲ၀ဲလၢ ဟဲခး၀ဲဒၣ်သုးကလၢၤဒီးဆဲးကဲးလီၤႉ ခး၀ဲ ၉ ထံၣ်လီၤႉ ခး၀ဲ ၉ ထံၣ်အဃိ ဖဲသုးတဖၣ်က့ၤခးကဒါက့ၤ အဆၢကတီၢ်န့ၣ် ဘၣ်၀ဲဒၣ်လီၤန့ၣ်သ့ၣ်ညါဘၣ်လီၤ” အဂ့ၢ်န့ၣ် စံးဘၣ် ခ့ၣ်အဲးစံၣ်လီၤႉ

တၢ်ခးလိာ်သးကဲထီၣ်လၢမဲၤ၀့ၤလီၢ်က၀ီၤအံၤ လီၢ်က၀ီၤသ၀ီအပူၤ ပယီၤသုးတဖၣ် နုာ်လီၤပာ်လီၤသုးကလၢၤအလီၢ်အကျဲဒီး မ့ၢ်ဘၣ်ကွၢ်လၢၦၤဂ့ၢ်၀ီခွဲးယာ်အပူၤန့ၣ် KNU ဃ့ထီၣ်၀ဲလၢကထုးကွံာ်ပယီၤသုးကလၢၤ (၇)ခါအကျါ ပၣ်ဃုာ်၀ဲဒၣ်တခါဒီး တၢ်ကဲထီၣ်သးတၢ်ဂ့ၢ်ခဲအံၤအဖီခိၣ် ကတီၣ်ထီၣ်၀ဲလၢတၢ်ခိးကွၢ်ဟုၣ်ကွၢ်စုၣ်တၢ်ပတုာ်တၢ်ခးကမံးတံာ် (JMC) တဆီအဂ့ၢ်န့ၣ် KNU လီၢ်ခၢၣ်သး သ့ၣ်ၦၢ်၀ဲၤကျိၤ စံး၀ဲလီၤႉ

လီၢ်ခၢၣ်သးသ့ၣ်ၦၢ်၀ဲၤကျိၤခိၣ် ပဒိၣ်မါဘးထိ စံး၀ဲလၢ “ကျဲအ၀ဲန့ၣ် ပလဲၤက့ၤထီဘိလီၤႉ အပူၤကွံာ်န့ၣ် ဘူး၀ဲဒၣ် ဒီးသ၀ီဒိၣ်တလၢအဃိ လၢပ၀ဲသ့ၣ်တပၤပဃ့ထီၣ်၀ဲ သုးကလၢၤ ၇ ခါအကျါန့ၣ် မ့ၢ်၀ဲတခါလီၤႉ တၢ်အိၣ်သး တခီန့ၣ် ကဘၣ်ဃုအ့ၣ်လိာ်သးဒီးအ၀ဲသ့ၣ်န့ၣ် တအိၣ်နီတမံၤဘၣ်ႉ ၀ံၤဘျီန့ၣ်ကျဲအ၀ဲန့ၣ်ၦၤလဲၤက့ၤထီဘိလီၤႉ မ့ၢ်၀ဲဒၣ်ဃုတၢ်အ့ၣ်လိာ်န့ၣ်လီၤႉ ကတီၣ်ဖျါထီၣ်တၢ်ဂ့ၢ်လၢ (JMC) အအိၣ်န့ၣ် အိၣ်၀ဲလီၤ” အဂ့ၢ်န့ၣ် စံး၀ဲန့ၣ်လီၤႉ

ဒ်န့ၣ်အသိး ဖဲအပူၤကွံာ်လါတဖၣ်စ့ၢ်ကီး KNU သုးက့(၅) ဒီး ပယီၤသုးတဖၣ်အဘၢၣ်စၢၤ တၢ်တ့ကျဲႇ တၢ်လဲၤတလၢတၢ်ပာ်ပနီၣ်လီၢ်က၀ီၤ ဃုာ်ဒီးတၢ်ဂ့ၢ်ခိၣ်တီအဂၤတဖၣ် တၢ်ခးလိာ်သးကဲထီၣ်၀ဲဒၣ်ဒီး ခီဖျိသုးတၢ်သဘံၣ်သဘုၣ်အဃိ လီၢ်က၀ီၤဒူဖိသ၀ီဖိတဖၣ် ဘၣ်ဃ့ၣ်မှံဟးဖျိးအိၣ်ဒံး၀ဲအဖၢမုၢ်လီၤအဂ့ၢ် KNU တပၤစံး၀ဲလီၤႉ

လၢန့ၣ်အမဲာ်ညါ တၢ်ပတုာ်တၢ်ခးကဂၢၢ်ကျၢၤအဂီၢ်ဒီး KNU သုးက့(၅) တၢ်ဂ့ၢ်သ့ၣ်တဖၣ်အဖီခိၣ် တၢ်ကဘှါရှဲ၀ဲအဂီၢ် KNU လီၢ်ခၢၣ်သးခိၣ်နၢ်တဖၣ် ဒီး သုးပဒိၣ် ခိၣ်နၢ်ဒိၣ်ထီတဖၣ် ထံၣ်လိာ်သးအိၣ်၀ဲ(၂) ဘျီလံန့ၣ်လီၤႉ