လါစဲးပထ့ဘၢၣ် ၁၃ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ချၢၣ်လွံၢ်ထူၣ်ကီၢ်ရ့ၣ်(သုးက့ ၃) မူကီၢ်ဆၣ် ဘိၣ်ဆိၣ်ခ့ၤ(ဘုတ်ဆုတ်ခင်)သဝီအပူၤ ခီဖျိပယီၤသုးလဲၤတ့ၢ်လီၤဒြိမ့ၣ်ပိၢ် အဃိ ဃုၥ်ဒီးဖိသၣ်လၢအသးနံၣ်အိၣ်တနံၣ်အံၤသံဝဲ(၆)ဂၤဒီး ဘၣ်ဒိဘၣ်ထံးဝဲ(၈)ဂၤအဂ့ၢ်န့ၣ် ခ့ၣ်အဲၣ်ယူၣ် ထုးထီၣ်ပၥ်ဖျါဝဲဖဲတနံၤ အံၤ လါစဲးပထ့ဘၢၣ် ၁၃ သီအံၤန့ၣ်လီၤ.
ဖဲအပူၤကွံၥ်လါစဲးပထ့ဘၢၣ် ၅ သီအနံၤန့ၣ် သုးမီၤစိရိၤအသုးလၢအိၣ်ဆီလီၤသးဖဲ(တခွန်တိုင်)သဝီသ့ၣ်တဖၣ်အံၤ လဲၤတ့ၢ်လီၤဝဲ ဒြိမ့ၣ်ပိၢ်လၢ(ဘုတ်ဆုတ်ခင်)သဝီပူၤ ၂ ဘျီအဂ့ၢ်န့ၣ် စံးဝဲန့ၣ်လီၤ.
လၢသုးမီၤစိရိၤအတၢ်လဲၤတ့ၢ်လီၤဒြိမ့ၣ်ပိၢ်ဘျီဝဲအံၤ ဖိသၣ် ဟံယိ(၁)နံၣ်ဒီး အူယၤစၣ်(၅၂)နံၣ်, ရၤမၤဒ့ၤရံၤ(၄၂)နံၣ်, အူစၤစ့ၣ်ထရံ (၃၂)နံၣ်, စူၣ်ကနံၤ(၂၄)နံၣ်, အူစူးနံကူမါ(၅၅)နံၣ် ပှၤကမျၢၢ်(၆)ဂၤအံၤသံဝဲတဘျီဃီဖဲတၢ်ကဲထီၣ်သးဒီး လၢန့ၣ်အမဲၥ်ညါကမျၢၢ် ဘၣ်ဒိစ့ၢ်ကီးဝဲ(၈)ဂၤန့ၣ်လီၤ.
ဒ်ခ့ၣ်အဲၣ်ယူၣ်အလံၥ်တၢ်ပၥ်ဖျါပူၤအိၣ်ဝဲအသိးန့ၣ် ကမျၢၢ်လၢအဘၣ်ဒိဘၣ်ထံး(၈)န့ၣ်အကျါ ပၣ်ဃုၥ်ဝဲဖိသၣ်(၇)နံၣ် တဂၤ, (၁၃)နံၣ်တဂၤ,(၁၆)နံၣ်တဂၤဒီး ပှၤလၢအဂၤ(၅)ဂၤန့ၣ်မ့ၢ်ဝဲ အူဘရၤကၠူ(၂၅)နံၣ်, စူးလၤကၠူရံၤယၤ(၃၅)နံၣ်, မီၤကိၤရံၤဘ့ၤ (၃၈)နံၣ်, ရၤကူမၤ(၃၈)နံၣ်, ဒီၤရၤမၤက့ၤရံၤ(၄၂)နံၣ် သ့ၣ်တဖၣ်အံၤန့ၣ်လီၤ.
ချၢၣ်လွံၢ်ထူၣ်ကီၢ်ရ့ၣ်ဟီၣ်ကဝီၤ သုးဟံန့ၢ်တၢ်စိတၢ်ကမီၤဝံၤလီၢ်ခံ မူကီၢ်ဆၣ်ဃုၥ်ဒီးလၢၢ်ဒိၣ်ကီၢ်ဆၣ်,ဆီထံးကီၢ်ဆၣ်အပူၤ တၢ်ဒုးကဲထီၣ်အိၣ်ဂ့ၤ/တအိၣ်ဂ့ၤ ပယီၤသုးအံၤညီနုၢ်သူဝဲကဘီယူၤ,ကျိဖးဒိၣ်,ဒြိ ပညိၣ်လဲၤတ့ၢ်လီၤဝဲတၢ်လၢလီၢ်ကဝီၤကမျၢၢ် အိၣ်ဆိးလီၢ်ကျဲအိၣ်ဝဲတလီၢ်လီၢ် န့ၣ်လီၤ.
ဒ်န့ၣ်အသိးသုးမီၤစိရိၤလၢအထီဒါမၤကမၣ်ဝဲပှၤဟီၣ်ခိၣ်ဖိခွဲးယၥ်ကိးမုၢ်နံၤဒဲးအံၤ အၢၣ်လီၤတူၢ်လိၥ်ဝဲလၢကလူၤပိၥ်မၤထွဲ ဝဲ အၣ်စံၣ်ယၣ် ASEAN’s five-point consensus တၢ်သးလီၤပလိၥ်(၅)ထံၣ်အိၣ်ဝဲဘၣ်ဆၣ် တုၤလၢခဲအံၤတလူၤပိၥ်မၤထွဲ ဝဲဘၣ်အမဲၥ်ညါ သူဒံးဝဲကဘီယူၤ,ဒြိ,ကျိဖးဒိၣ် ပၥ်ဝဲတၢ်ခးပနီၣ်ဆူကမျၢၢ်ထံဖိကီၢ်ဖိတပယူၥ်ဃီအဂ့ၢ်န့ၣ် ခ့ၣ်အဲၣ်ယူၣ် စံးဝဲ န့ၣ်လီၤ.
ဒီးလၢသုးမီၤစိရိၤအတၢ်ဟူးတၢ်ဂဲၤအံၤအဃိစ့ၢ်ကီး တုၤလၢခဲအံၤ ခ့ၣ်အဲၣ်ယူၣ်ဟီၣ်ကဝီၤတဖၣ်အပူၤ ကမျၢၢ်သဂၢၢ်ဘၣ်ဝဲ တၢ်သံတၢ်ပှၢ်, တၢ်ဘၣ်ဒိဘၣ်ထံးဟဲအါထီၣ်ဝဲဒၣ်ကွ့ၢ်ကွ့ၢ်တကးဒံးဘၣ် တၢ်စုလီၢ်ခီၣ်ခိၣ်တၢ်ပီးတၢ်လီဘၣ်ဒိဘၣ်ထံးဟးဂီၤဝဲ ကိးမုၢ်နံၤဒဲး အသိး ကမျၢၢ်တဖၣ်ဘၣ်အိၣ်မူလၢတၢ်ပျံၤတၢ်ဖုးတၢ်ဘၣ်ယိၣ် ဘၣ်ဘှီအပူၤတုၤလၢခဲအံၤတစုန့ၣ်လီၤ.
