လါအ့ြဖ့ၣ် ၂၉ သီႇ ၂၀၂၀ နံၣ်ႇ စီၤမၠၣ်အူသၣ်
Covid-19 ဘၣ်ကူဘၣ်ဂာ်ကဲထီၣ်သးအကတီၢ် လီၢ်က၀ီၤကမျၢၢ်လၢအလီၤဘၣ်တၢ်ကီတၢ်ခဲအဖၣ်အဂီၢ် ဖဲလါအ့ြဖ့ၣ် ၂၇ သီအနံၤန့ၣ် တၢ်ဘၣ်ဘျုးဒံၣ်မိၣ်ြခ့ၣ်စံၣ်ကညီသုးမုၢ်ဒိၣ်(DKBA-NCA) ကရူၢ်အံၤ ဟ့ၣ်မၤစၢၤ၀ဲဂံၢ်ခီၣ်ထံး တၢ်အီၣ်တၢ်အီတဖၣ်ဒီး ကျိၣ်စ့တၢ်မၤစၢၤအဂ့ၢ်န့ၣ် သ့ၣ်ညါဘၣ်လီၤႉ
ကၠၤအ့စ့ၣ်ကၠံကီၢ်ဆၣ် လ့ဖးထီသ၀ီပူၤ ဟံၣ်ခိၣ် ၄၀၀ ဖျၢၣ်ဘျဲၣ်အံၤ ဟံၣ်ခိၣ်တဖျၢၣ်အဂီၢ် ဆီၣ်ထွဲမၤစၢၤ၀ဲ ဟုသး ၁ ထၢၣ်ႇ သိအီၣ် ၂ ကိႇ အံသၣ်ႇ ညၣ်အုၣ်ႇ ပသဲသၣ်ႇ မိၢ်ဂံာ်သၣ် ဒီး တၢ်ဆၢကမူၣ်(ခၠိၤမိၣ်) ဃုာ်ဒီး ဂံၢ်ခီၣ်ထံး တၢ်အီၣ်တၢ်အီလၢအဂၤတဖၣ်အမဲာ်ညါ ဟံၣ်တဖျၢၣ်န့ၣ့် ဆီၣ်ထဲမွၤစၢၤ၀ဲစ့ၢ်ကီး လၢစ့ပယီၤ (၂၀ႇ၀၀၀ ကၠး)စုာ်စုာ်အဂ့ၢ်န့ၣ် DKBA သုးရ့ၣ် ၉၀၃ သုးရ့ၣ်ခိၣ် သုးခိၣ်ဒိၣ်ဂီၢ်ဂ့ၢ် စီၤအ့ၤ၀ါ စံးဘၣ်ခ့ၣ် အဲးစံၣ်လီၤႉ
“ၦၤလၢအအိၣ်ဟဲက့ၤလၢဘၣ်ကီဘၣ်ခဲဒဲက၀ီၤတဖၣ် အါဒၣ်တက့ၢ်န့ၣ် တၢ်ကီတၢ်ခဲအိၣ်၀ဲဒၣ်အါမးလီၤႉ တၢ်ဆါကဲထီၣ်သးခဲအံၤအဆၢကတီၢ် လီၤဘၣ်တၢ်ကီတၢ်ခဲဒိၣ်၀ဲဒၣ်လီၤႉ တနီၤန့ၣ်ဘၣ်ချီအီၣ်မ့ၤချီလီၤႉ တၢ်ဖံး တၢ်မၤတအိၣ်၀ဲလၢာ်ဘၣ်ႉ ၦ့ၤဃာ်ဟုသး ၆ႇ၀၀၀ ထၢၣ်လီၤႉ တုုၤလၢလါလၢကဟဲ လါဒံၣ်စ့ဘၢၣ် ဖဲတၢ်သ့အိၣ်ဒီးၦၤန့ၣ်ကမၤစၢၤလီၤ” အဂ့ၢ်န့ၣ် DKBA ၉၀၃ သုးရ့ၣ်ခိၣ် သုးခိၣ်ဒိၣ်ဂီၢ်ဂ့ၢ် စီၤအ့ၤ၀ါ စံး၀ဲန့ၣ်လီၤႉ
လၢန့ၣ်အမဲာ်ညါ လၢဃိၣ်သၢဖျၢၣ်ႇ လ့ဖးထီႇ မဲၢ်တဖှံႇ ကၠ့ၣ်ခၠီႇ ကၠိခၠီ၊ ပၠီၣ်မထ့ၤဒူသ၀ီ ဒီး အနါကွ့ ဒူသ၀ီကရူၢ် တဖၣ်စ့ၢ်ကီး ၦၤလၢအလီၤဘၣ်တၢ်ကီတၢ်ခဲတဖၣ်အဂီၢ်န့ၣ် ကပာ်ဖှိၣ်ထီၣ်သးဒီး ပဒိၣ် ႇ KNU-ကညီဒီ ကလုာ်စၢဖှိၣ်ကရၢတဖၣ်ဒီး ကလဲၤဟ့ၣ်ဆီၣ်ထဲမွၤစၢၤ၀ဲ ဂံၢ်ခီၣ်ထံးတၢ်အီၣ်တၢ်အီတဖၣ် ဒီး ကျိၣ်စ့တၢ်မၤစၢၤတဖၣ်အဂ့ၢ်န့ၣ် DKBA စံး၀ဲလီၤႉ
လ့ဖးထီသ၀ီဖိ စီၤအိရှ့ၣ် စံး၀ဲ “ဖဲအံၤန့ၣ် အါ၀ဲဒၣ်လၢၦၤလီၢ်အိၣ်ကမှံဖိ ဒီး ၦၤအိၣ်ဟဲ က့ၤလၢဘၣ်ကီဘၣ်ခဲဒဲ က၀ီၤပူၤန့ၣ်လီၤႉ ဖဲတၢ်ဆါအကတီၢ်အံၤ တၢ်လုၢ်အီၣ်နီၢ်ခိသးသမူန့ၣ် ကီခဲ၀ဲဒိၣ်မးလီၤႉ ဖဲအံၤန့ၣ် ပသူၣ်၀ဲ တၢ်မုၢ်တၢ်ဘိတဖၣ်လီၤႉ အီၣ်န့ၢ်ထဲတစူၤဂီၢ်လီၤႉ ကလဲၤမၤတၢ်လၢတၢ်ချၢစ့ၢ်ကီး တန့ၢ်ဘၣ်ႉ တၢ်မၤတဖၣ်စ့ၢ်ကီး ကးတံၢ်ကွံာ်အသးလံလီၤႉ ကီၢ်ပဒိၣ်ဆီၣ်ထွဲမၤစၢၤ၀ဲဟုသးတဖၣ်န့ၣ် ပ၀ဲသ့ၣ်တဖၣ်ပတဒိးန့ၢ်ဘၣ်ဘၣ်ႉ DKBA ကရူၢ် ဟဲဆီၣ်ထွဲမၤစၢၤ၀ဲၦၤ ဟုသးႇ သိအီၣ်တဖၣ်အဃိ သးခုဒိၣ်မးလီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်လီၤႉ
ၦၤလီၢ်က၀ီဖိလၢ အအိၣ်ဆိးဖဲန့ၣ်တဖၣ်အါဒၣ်တက့ၢ်န့ၣ် အပူၤကံွာ် မ့ၢ်၀ဲ ၦၤဘၣ်ကီဘၣ်ခဲဖိဒီး ၦၤလီၢ်အိၣ်ကမှံဖိတဖၣ်ဒီး အ၀ဲသ့ၣ် ဟဲက့ၤနုာ်လီၤအိၣ်ဆိးကဒါက့ၤ ဖဲတၢ်လီၢ်အ၀ဲန့ၣ် ဖဲ ၂၀၁၁နံၣ် ပဒိၣ် ဒီး ကလုာ်ဒူၣ်ဖီၣ်စုက၀ဲၤကရူၢ်တဖၣ် မၤ၀ဲတၢ်မုာ်တၢ်ခုၣ်၀ံၤအလီၢ်ခံန့ၣ်န့ၣ်လီၤႉ တကီၢ်ခါခဲအံၤ လၢအ၀ဲသ့ၣ် သူၣ်ဃာ်၀ဲတၢ်သူတၢ်သၣ်တဖၣ်န့ၣ် ခီဖျိလၢၦၤဟဲၦ့ၤတအိၣ်လၢၤဘၣ်အဃိ အါဒၣ်တက့ၢ်န့ၣ် လၢတၢ်လုၢ်အီၣ်နီၢ်ခိသးသမူအဂီၢ် တၢ်ကီတၢ်ခဲအိၣ်၀ဲလီၤအဂ့ၢ်န့ၣ် သ့ၣ်ညါဘၣ်လီၤႉ
