တၢ်ဒုးကဲထီၣ်တလီၢ်လီၢ်အဃိ မၠၣ်၀တံၣ်–ကီးတရံးအ့ရှါကျဲ သိလ့ၣ်ဟးထီၣ်က့ၤလီၤစှၤလီၤ၀ဲ

လါဖ့ၤဘြူၤအါရံၤ ၇ သီႇ ၂၀၂၃ နံၣ်ႇ ခ့ၣ်အဲးစံၣ်

လၢကညီကီၢ်စဲၣ် ကီးတရံး၀့ၢ်ခိၣ်၀့ၢ်ဃၢၤကီးနွဲၣ်သ၀ီတကပၤန့ၣ် ခီဖျိတၢ်ဒုးကဲထီၣ်၀ဲလၢပယီၤသုးဒီး ဟီၣ်က၀ီၤတၢ်ပၢၢ်ဆၢသုးပာ်ဖှိၣ်အဘၢၣ်စၢၤခဲအံၤခဲအံၤအဃိ စးထီၣ်တလါအံၤထီၣ် မၠၣ်၀တံၣ်–ကီးတရံးအ့ရှါကျဲန့ၣ် သိလ့ၣ်ဟးထီၣ်က့ၤလီၤစှၤလီၤ၀ဲအဂ့ၢ်န့ၣ် ၦၤနီသိလ့ၣ်ဖိတဖၣ်စံး၀ဲန့ၣ်လီၤႉ

ဖဲအပူၤကွံာ်လါအခါလၢကီးတရံးကီၢ်ဆၣ်(တတါကၠိ)သ၀ီပူၤဒီး(ကီးနွဲၣ်)သ၀ီပူၤန့ၣ် တၢ်ဒုးကဲထီၣ်၀ဲလၢပယီၤသုးဒီး ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်အဘၢၣ်စၢၤ၀ံၤအလီၢ်ခံ တလါညါအံၤစ့ၢ်ကီးတၢ်ဒုးကဲထီၣ်ဒံး၀ဲ အဃိ ကမျၢၢ်ၦၤလဲၤက့ၤတၢ်ဖိဒီးသိလ့ၣ်တဖၣ်ဟးထီၣ်က့ၤလီၤစှၤလီၤ၀ဲအဂ့ၢ်န့ၣ် ၦၤနီသိလ့ၣ်ဖိတဂၤစံး၀ဲဒ်အံၤန့ၣ်လီၤႉ

“ကျဲတၢ်အိၣ်သးခဲအံၤန့ၣ်သိလ့ၣ်ဟးထီၣ်က့ၤလီၤတအိၣ်အါအါဘၣ်ႉသိလ့ၣ်ဟးထီၣ်က့ၤလီၤအိၣ်ဖးစှၤညါႉလၢအ၀ဲတနံၤန့ၣ်ပယီၤသုးကျိၤလဲၤထီၣ်အဃိသိလ့ၣ်ဟးထီၣ်က့ၤလီၤတအိၣ်လၢၤဘၣ်ႉဖဲ (၃) သီအခါန့ၣ်နါက့တၢ်ဒုးကဲထီၣ်ဒံးလၢ(ကီးနွဲၣ်)သ၀ီပူၤဒံးႉၦၤလဲၤက့ၤတၢ်ဖိနါက့ဟးထီၣ်က့ၤလီၤတအိၣ်အါအါဘၣ်ႉယၤနါက့ယဘၣ်လဲၤချ့ချ့ဘၣ်ဟဲက့ၤလီၤချ့ချ့လီၤႉမ့မ့ၢ်အ့ရှါကျဲတၢ်အိၣ်သးဒုတဂ့ၤအါအါဘၣ်ႉလဲၤဒုဘၣ်လဲၤလၢတၢ်ပလီၢ်ပဒီပူၤလီၤမီၤနီၤႉ” အဂ့ၢ်န့ၣ် စံး၀ဲန့ၣ်လီၤႉ

ဖဲအပူၤကွံာ်လါစ့ၢ်ကီးတၢ်ဒုးကဲထီၣ်၀ဲလၢကီးတရံး၀့ၢ်ပူၤအသိးတၢ်ခိၣ်တၢ်ဃၢၤဖဲန့ၣ်စ့ၢ်ကီးခံခီခံကကပၤတၢ်ဒုးဆူၣ်ထီၣ်ဒံး၀ဲအဃိဖဲသုးမီၤစိရိၤမၤတၢ်ဒီသဒၢဒီးဘံၣ်ဘၢတၢ်အိၣ်ဖှိၣ်အခါန့ၣ်ထုးထီၣ်၀ဲတၢ်ကလုၢ်လၢ(ကီးတရံးကီၢ်ဆၣ်)အံၤမ့ၢ်၀ဲသုးတၢ်ပၢတၢ်ပြးန့ၣ်လီၤႉ

လၢန့ၣ်အမဲာ်ညါဖဲလါဖ့ၤဘြူၤအါရံၤ ၃ သီအနံၤန့ၣ် လၢကီးနွဲၣ်သ၀ီဘၢၣ်စၢၤ(ယွၤသ့ၣ်)ကျဲဖးဒ့န့ၣ် တၢ်ဒုးကဲထီၣ်ဒံး၀ဲလၢပယီၤသုးဒီးဟီၣ်က၀ီၤတၢ်ပၢၢ်ဆၢသုးပာ်ဖှိၣ်အဘၢၣ်စၢၤစှၤမံးနံးဒံးအဂ့ၢ်န့ၣ် လီၢ်က၀ီၤသ၀ီဖိလၢအိၣ်ဘူးဖဲန့ၣ်တဂၤစံး၀ဲန့ၣ်လီၤႉ

အ၀ဲစံး၀ဲလၢ“တၢ်ခးလိာ်သးဒုကဲထီၣ်တစဲးမီၤနီၤႉကဲထီၣ်၀ဲဒီး(BGF)မီၤနီၤႉမ့ၢ်အကဲထီၣ်ဒီးမနုာ်သုးကျိၤလဲၣ်ဒုပတသ့ၣ်ညါလီၤတံၢ်လီၤဆဲးဒံးဘၣ်ႉကဲထီၣ်လၢကီးနွဲၣ်သ၀ီဘၢၣ်စၢၤ(ယွၤသ့ၣ်)ကျဲဖးဒ့န့ၣ်မီၤနီၤ”အဂ့ၢ်န့ၣ် စံး၀ဲန့ၣ်လီၤႉ

ဒ်န့ၣ်အသိးလၢမၠၣ်၀တံၣ်–ကီးတရံးအ့ရှါကျဲန့ၣ် ခီဖျိတၢ်ဒုးကဲထီၣ်လၢပယီၤသုးဒီးကညီဒီကလုာ်တၢ်ထူၣ်ဖျဲး သုးမုၢ်ဒိၣ်(KNLA)သုးပာ်ဖှိၣ်အဘၢၣ်စၢၤခဲအံၤခဲအံၤအဃိ လၢ(သ့ၣ်ကါညံၣ်နီၣ်)တြဲၤန့ၣ် ပယီၤသုးအိၣ်ခိးသမံသမိး ကမျၢၢ်ၦၤလဲၤက့ၤတၢ်ဖိဒီးသိလ့ၣ်တဖၣ်အဂ့ၢ်န့ၣ် သ့ၣ်ညါဘၣ်လၢၦၤနီသိလ့ၣ်ဖိတဖၣ်အအိၣ်န့ၣ်လီၤႉ