လၢဂ့ၢ်၀ီကိတိာ်အလီၢ် ၀့ၢ်တကူၣ်ဒီးမိၣ် ကညီကိတိာ် ၂ ဂၤ တက့ၤပတံထီၣ် ကဒါ၀ဲလၢၤဘၣ်

လါယူၤ ၁၇ သီႇ ၂၀၂၀ နံၣ်ႇ စီၤထိလ့

မိၣ်ကီၢ်စဲၣ် ဒီး ၀့ၢ်တကူၣ်ကီၢ်ခီဒိၣ်တဖၣ်အံၤ တကီၢ်ခါ ကညီကလုာ်ဒူၣ် ကလုာ်ဂ့ၢ်၀ီကိတိာ်တဖၣ်လၢအမ့ၢ် စီၤအီၤမၠ့ၣ်ခဲၤ ဒီး နီၢ်ပါသ့ၤစၤမၠိ ၂ ဂၤအံၤ ကညီဂ့ၢ်၀ီကိတိာ်အလီၢ်အဂီၢ် လၢကဟဲတၢ်ဃုထၢန့ၣ် တက့ၤဒိးဃုထၢကဒါလၢၤသးဘၣ်အဂ့ၢ်န့ၣ် စံးဘၣ်ခ့ၣ်အဲးစံၣ် ဖဲ ၁၅ သီအနံၤန့ၣ်လီၤႉ

“လၢ၀့ၢ်တကူၣ်ကီၢ်ခီ ကညီဂ့ၢ်၀ီကိတိာ်အလီၢ်အဂီၢ် ယတက့ၤပတံထီၣ်၀ဲလၢၤဘၣ်” အဂ့ၢ်န့ၣ် ကိတိာ်နီၢ်ပါသ့ၤစၤမၠိ စံး၀ဲဒၣ်လီၤႉ နီၢ်ပါသ့ၤစၤမၠိအံၤ တကီၢ်ခါလၢ၀့ၢ်တကူၣ်ကီၢ်ခီဒိၣ် ပဒိၣ်ကရူၢ်အပူၤ မ့ၢ်ၦၤလၢအဟံးမူဒါလၢ ကညီဂ့ၢ်၀ီအမဲာ်ညါ ဟံးန့ၢ်စ့ၢ်ကီးမူဒါလၢဟိၤထဲဒီးတၢ်လဲၤတၢ်က့ၤ ဒီး တၢ်ဘိးဘၣ်ရၤလီၤ၀ဲၤကျိၤတဂၤအဂ့ၢ်န့ၣ် သ့ၣ်ညါဘၣ်လီၤႉ

ဒ်န့ၣ်အသိး မိၣ်ကီၢ်စဲၣ် ကညီကလုာ်ဒူၣ် ကလုာ်ဂ့ၢ်၀ီ စီၤအီၤမၠ့ၣ်ခဲၤ စ့ၢ်ကီး လၢမိၣ်ကီၢ်စဲၣ် ကညီဂ့ၢ်၀ီ ကိတိာ်အလီၢ်အဂီၢ် တက့ၤဒိးဃုထၢအသးလၢၤဘၣ်အဂ့ၢ်န့ၣ် စံးဘၣ်ခ့ၣ်အဲးစံၣ်ဒ်အံၤလီၤႉ

အ၀ဲစံး၀ဲ“ အခိၣ်သ့ၣ်န့ၣ် ယကမၤန့ၢ်မနုၤသ့လဲၣ်ႇ ယအဲၣ်ဒိးမၤမနုၤလဲၣ်ႇ ယၤအံၤမ့ၢ်ယြကၢးဒီးတၢ်လီၢ်ဖဲလဲၣ်ႇ အဃိန့ၣ် ယဆၢတဲာ်လီၤ၀ဲလီၤႉ ပၣ်တံၣ်အံၤမ့ၢ်ဟ့ၣ်ယၤမူဒါခီဒု ယကက့ၤဟံကဒါမူဒါလၢအဂၤတခါန့ၣ် အိၣ်၀ဲ ဒၣ်လီၤ” အဂ့ၢ်န့ၣ် ကိတိာ်စီၤအီၤမၠ့ၣ်ခဲၤ စံး၀ဲလီၤႉ

လၢဂ့ၢ်၀ီအလီၢ်အဂီၢ် ကိတိာ်စီၤအီၤမၠ့ၣ်ခဲၤအံၤ တက့ၤနုာ်လီၤကဒါလၢၤဘၣ်အဖီခိၣ်ႇ မိၣ်ကီၢ်စဲၣ် ကညီကလုာ်ဒူၣ် ကလုာ်ဂ့ၢ်၀ီကိတိာ်အလီၢ်န့ၣ် ပီၣ်ကီၢ်ဆၣ်ဖိတဂၤလၢအမ့ၢ် ဒီၣ်ကထၢၣ်စီၤသၤစ့ၤအံၤ တီၣ်ထီၣ်၀ဲလံာ်ဆှၢနုာ်အဂ့ၢ်န့ၣ် မိၣ်ကီၢ်စဲၣ်အပူၤ ကညီကရူၢ်ကရၢတဖၣ်စံး၀ဲလီၤႉ

လၢန့ၣ်အမဲာ်ညါ ၀့ၢ်တကူၣ်ကီၢ်ခီဒိၣ် ကညီကလုာ်ဒူၣ် ကလုာ်ဂ့ၢ်၀ီကိတိာ်အလီၢ်န့ၣ်ႇ ၦၤဟူးဂဲၤလၢ ထံရူၢ်ကီၢ်သဲးဂ့ၢ်၀ီတဂၤလၢအမ့ၢ် နီၢ်အိလၣ်အံၤ ကနုာ်လီၤဒိးဃုထၢအသးဒ် ကလုာ်ဒူၣ်တဖၣ် ဒံၣ်မိၣ်ြခ့ၣ်စံၣ်ပၣ်တံၣ်(UNDP) အခၢၣ်စးအသိးအဂ့ၢ်န့ၣ် စံးဘၣ်ခ့ၣ်အဲးစံၣ်ဖဲတနံၤအံၤ န့ၣ်လီၤႉ

မိၣ်ကီၢ်စဲၣ် ဒီး ၀့ၢ်တကူၣ်ကီၢ်ခီဒိၣ်တဖၣ်အံၤ လၢတကီၢ်ခါ ကညီကလုာ်ဒူၣ် ကလုာ်ဂ့ၢ်၀ီကိတိာ်တဖၣ် တက့ၤဒိးဃုထၢထီၣ်အသးဘၣ်အဃိ လၢအ၀ဲသ့ၣ်တဖၣ်အလီၢ် ကညီဂ့ၢ်၀ီကိတိာ်အသီတဖၣ်န့ၣ် နံၣ်လၢကဟဲ ၂၀၂၀ တၢ်ဃုထၢန့ၣ် ကညီကလုာ်ဒူၣ်တဖၣ် ကဘၣ်ဃုထၢထီၣ်၀ဲဒၣ်န့ၣ်လီၤႉ

တကီၢ်ခါ ကညီကီၢ်စဲၣ် လၢအချၢ မိၣ်ကီၢ်စဲၣ်ႇ တနီသရံၣ်ႇ ပကိႇ အ့ၣ်ယၣ်၀တံၣ်ဒီး ၀့ၢ်တကူၣ်ကီခီဒိၣ်တဖၣ်န့ၣ် ကညီကလုာ်ဒူၣ်ဂ့ၢ်၀ီကိတိာ်အိၣ်၀ဲဒၣ် ၅ ဂၤ ဒီး အ၀ဲသ့ၣ်တဖၣ်န့ၣ် မ့ၢ်၀ဲဒၣ် NLD ပၣ်တံၣ်ကရၢဖိတဖၣ်န့ၣ်လီၤႉ