မုၢ်တြီၢ်ကမျၢၢ် ၄ႇ၀၀၀ ဘျဲၣ် လဲၤပာ်ဖျါထီၣ်တၢ်ဘၣ်သးလၢပယီၤသုးကလၢၤမဲာ်ညါ

လါယူၤလံ ၂၈သီႇ ၂၀၂၀နံၣ်ႇခ့ၣ်အဲးစံၣ်

ဖဲတနံၤအံၤ လါယူၤလံ ၂၈ သီႇ ဂီၤခီ ၇ နၣ်ရံၣ် တုၤလၢဟါခီ ၂ နၣ်ရံၣ် အဆၢကတီၢ်န့ၣ် ကညီကီၢ်စဲၣ်ႇ ဖၣ်ပူၣ် (မုၢ်တြီၢ်)ကီၢ်ရ့ၣ်ႇ ဒွဲၣ်လိဒီးဘုသိၣ်ကီၢ်ဆၣ်အပူၤ လီၢ်က၀ီၤကမျၢၢ်ဒူဖိသ၀ီဖိ ၄ႇ၀၀၀ ဘျဲၣ် လဲၤပာ်ဖျါထီၣ်အသးလၢတၢ်လီၢ်ခံတီၤ ဖဲကတၢၢ်တံးဒီးကူဆံးပယီၤသုးကလၢၤမဲာ်ညါအဂ့ၢ်န့ၣ် သ့ၣ်ညါဘၣ်လီၤႉ

တၢ်ပာ်ဖျါထီၣ်တၢ်ဘၣ်သးလၢဘျီ၀ဲအံၤန့ၣ် ဒွဲၣ်လိကီၢ်ဆၣ် ကရူၢ်လၢအမ့ၢ် မာ်ထီႇ ထံသဘျုၣ်ထၣ်ႇ လ့ဖိထၣ်ႇ ကတၢၢ်တံးဒီး မ့မ့ၢ်ဘုသိၣ်ကီၢ်ဆၣ် ဟီၣ်က၀ီၤပူၤန့ၣ် မဲၤကျိႇ မဲၤညူးႇ မဲၤခူၣ်ႇ မဲၤမှဲႇ ဒ့၀ါဒီးကၠိပါတဖၣ် ကမျၢၢ်ဒူဖိသ၀ီဖိပာ်ဖှိၣ်ခဲလၢာ် ၄ႇ၆၅၀ ဂၤ လဲၤပာ်ဖျါထီၣ်၀ဲတၢ်ဘၣ်သးလၢ ပယီၤသုးကလၢၤအမဲာ်ညါန့ၣ်လီၤႉ

ဒ်သိးပယီၤသုးကလၢၤလၢအအိၣ်ဖဲဟီၣ်က၀ီၤပူၤတဖၣ် ကထုးကွံာ်သးအဂီၢ် လီၢ်က၀ီၤသ၀ီဖိတဖၣ် ပာ်ဖျါထီၣ်၀ဲ တၢ်ဂ့ၢ်(၈)ထံၣ်ဒ်အမ့ၢ် ပယီၤသုးခးသံ၀ၣ်သိခိၣ်သ၀ီဖိတၢ်ဂ့ၢ်ႇ ခးသံ၀ဲသ့ၣ်ၦၢ်ၦၤမၤတၢ််ဖိတၢ်ဂ့ၢ်ႇ ခးလီၤကျိဖးဒိၣ်လၢ သ၀ီပူၤဒီးကမျၢၢ်ဘၣ်သုးလီၢ်သုးကျဲတၢ်ဂ့ၢ်ႇ ခးသံ၀ဲကူဆံးသ၀ီဖိတၢ်ဂ့ၢ်ႇ ခးသံ၀ၣ်သိထၣ်သ၀ီဖိတၢ်ဂ့ၢ်ႇ ဒီး နီၢ်မုၣ်နီၤသံတၢ်ဂ့ၢ်ႇ ပယီၤသုးဟံတၢ်ဘံၣ်တၢ်ဘၢဒီးလဲၤတလၢက့ၤတလၢတၢ်လီၢ်အဃိ ကဲထီၣ်က့ၤတၢ်ပျံၤတၢ်ဖုး တၢ်လီၤဘၣ်ယိၣ်လၢလီၢ်က၀ီၤဖိတဖၣ်အဂီၢ်ဒီး မၤတရီတပါမၤသံဖံသူဖိ နီၢ်မုၣ်ဒါတၢ်ဂ့ၢ်ဒီး လၢန့ၣ်အမဲာ်ညါ ပယီၤသုးကလၢၤလၢအမ့ၢ် ခိၣ်သွံၣ်ထၣ်သုးကလၢၤႇ မဲၤ၀့ၤသုးကလၢၤႇ က့ၤကီၣ်သုးကလၢၤဒီး ၀ီၢ်မုၢ်သုး ကလၢၤတဖၣ် ကဘၣ်ထုးကွံာ်အသးအဂ့ၢ် ဃ့ထီၣ်၀ဲန့ၣ်လီၤႉ

ဒ်န့ၣ်အသိး ဖဲလါယူၤလံ ၁၆ သီအနံၤ ခီဖျိလၢပယီၤသုးဖိခံဂၤခးသံ၀ဲဒၣ် နီၢ်မုၣ်နီၤလၢ တၢ်ကမၣ်တအိၣ်နီတမံၤဘၣ်အဃိ ဖဲလါယူၤလံ ၂၂ သီအနံၤန့ၣ် လၢတၢ်လီၢ်လွံၢ်တီၤအပူၤ လီၢ်က၀ီၤကမျၢၢ်တကထိဘျဲၣ် ပာ်ဖျါထီၣ်စ့ၢ်ကီးတၢ်ဘၣ်သးလၢပယီၤသုးကလၢၤအမဲာ်ညါန့ၣ်လီၤႉ ဘၣ်ထွဲပယီၤသုးမၤသံ၀ဲနီၢ်မုၣ်နီၤတၢ်ဂ့ၢ်အံၤ ကညီတၢ်ကရၢကရိတဖၣ်ထီဒါ၀ဲအသိး ကညီဖိလၢအအိၣ်ယပၣ်ကီၢ်တဖၣ်စ့ၢ်ကီး ပာ်ဖှိၣ်ထီၣ်အသးဒီးမၤ၀ဲဒၣ်တၢ်ပာ်ဖျါထီၣ်တၢ်ဘၣ်သးတၢ်ရဲၣ်တၢ်ကျဲၤတခါ န့ၣ်လီၤႉ