သုးဖိ ၂ ဂၤ လၢအခးသံကညီပိာ်မုၣ်ဒီးအၦၤဘၣ်မူဘၣ်ဒါတဖၣ် တၢ်ကဟံးအရ့တဲာ်တဲာ်ဖျုဖျုအဂ့ၢ် ပယီၤသုးစံး၀ဲ

လါယူၤလံ ၂၂ သီႇ ၂၀၂၀ နံၣ်ႇ ခ့ၣ်အဲးစံၣ်

ဖၣ်ပူၣ်ကီၢ်ဆၣ်ႇ ပိာ်လိထၣ်သ၀ီဖိပိာ်မုၣ်တဂၤ ဘၣ်တၢ်ခးသံ၀ဲအဃိ ပယီၤသုး ၂ ဂၤလၢအတူၢ်လိာ်အၢၣ်လီၤအတၢ် ကမၣ်အံၤဒီးၦၤဘၣ်မူဘၣ်ဒါတဖၣ် တၢ်ကဟံအရ့တုၤလီၤတီၤလီၤအဂ့ၢ်န့ၣ် ပယီၤသုးမုၢ်ဒိၣ်တၢ်ကစီၣ်ကရူၢ်အံၤ ဖဲလါယူၤလံ ၂၀ သီအနံၤန့ၣ် ထုးထီၣ်ပာ်ဖျါ၀ဲတၢ်ကစီၣ်န့ၣ်လီၤႉ

လံာ်တၢ်ပာ်ဖျါအပူၤန့ၣ် ဒ်တၢ်ဃိထံမၤဖျါထီၣ်အသိး ပယီၤသုး ၂ ဂၤလၢအတူၢ်လိာ်အၢၣ်လီၤအတၢ်ကမၣ်အံၤ ဘၣ်တၢ်ဒုးဃာ်အ၀ဲသ့ၣ်လၢဘံလ့ သုးတၢ်ဒုးဃာ်အပူၤဒီး ဒ်တၢ်သိၣ်တၢ်သီအိၣ်အသိး တၢ်ကဟံအရ့တုၤလီၤတီၤအဂီၢ် တၢ်ကဃိထံဟံအရ့ဒီးဟံးထီၣ်ဖီၣ်ထီၣ်အီၤဖျိဖျိဖျါဖျါလၢအချ့အဂ့ၢ်န့ၣ် ပာ်ဖျါ၀ဲဒၣ်လီၤႉ

လၢန့ၣ်အမဲာ်ညါ ၦၤမၤကမၣ်တၢ်ဖိပယီၤသုး ၂ ဂၤအံၤ ဟးဃ့ၢ်အိၣ်ခူသူၣ်လီၤမၢ်၀ဲဒၣ်ဒီး ဖဲတၢ်ကဲထီၣ်သးအကတီၢ် သုးကလၢၤၦၤဘၣ်မူဘၣ်ဒါတဖၣ် တဟ့ၣ်ဒုးသ့ၣ်ညါ၀ဲတၢ်ကစီၣ်တဘျီဃီဆူတၢ်ဖီခိၣ်ဘၣ်ဒီး ၦၤဘၣ်မူဘၣ်ဒါတဖၣ်အံၤစ့ၢ်ကီး တၢ်ကဟံးအရ့တုၤလီၤတီၤလီၤအဂ့ၢ်န့ၣ် လၢပယီၤသုးလံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ

ဖဲလါယူၤလံ ၁၆ သီအနံၤ ဘၣ်ဃးဒီးတၢ်ဂ့ၢ်ကဲထီၣ်သးအံၤန့ၣ် လၢပယီၤသုးလံာ်တၢ်ပာ်ဖျါအပူၤန့ၣ် တၢ်ကဲထီၣ်သးအံၤဒိးန့ၢ်ဘၣ်တၢ်ကစီၣ် ဖဲလါယူၤလံ ၁၉ သီအနံၤဒီး ဖဲတၢ်ကဲထီၣ်သးဟီၣ်က၀ီၤပူၤ ပျၢ်လီၤ၀ဲဒၣ်ၦၤဘၣ်မူဘၣ်ဒါတဖၣ်ဃိထံမၤဖျါထီၣ်၀ဲဒီး ဖဲန့ၣ်ပယီၤသုးဖိလၢအမ့ၢ် ဟ့မ့ထဲၣ်ဒီး သါစိလွ့ၤ ၂ ဂၤအံၤ တဟံ၀ဲဒၣ်အခွဲးလၢသုးကလၢၤအအိၣ်ဘၣ်ဒီး လဲၤလီၤ၀ဲဒၣ်လၢသ၀ီပူၤဃုာ်ဒီးလီၢ်က၀ီၤသ၀ီဖိ ၃ ဂၤဒီး အီ၀ဲဒၣ်သံးလၢၦၤလၢဘၣ်တၢ်ခးသံအီၤတဂၤအဟံၣ်အဂ့ၢ်န့ၣ် လံာ်တၢ်ပာ်ဖျါအပူၤ ပာ်ဖျါ၀ဲလီၤႉ

ဖဲန့ၣ်၀ံၤအလီၢ်ခံ သုးဖိ ၂ ဂၤအံၤအီသံးမူၤဒိၣ်တလၢအဃိ သုးဖိသါစိလွ့ၤအံၤ ဂုာ်န့ၢ်ဆူၣ်၀ဲပိာ်မုၣ်အံၤအဖဲအဃိ ဖဲန့ၣ်အဆၢကတီၢ် ပယီၤသုးဖိလၢအဖီၣ်ဃာ်၀ဲကျိအံၤ (၀ံၢ်ရှါ) ပိၢ်ဖးထီၣ်၀ဲဒၣ်ဒီးဘၣ်၀ဲဒၣ်ကျးကစၢ်ပိာ်မုၣ်ဒီးသံ၀ဲဒၣ်လီၤႉ ဖဲန့ၣ်သုးဖိ ၂ ဂၤအံၤဃ့ၢ်ပူၤဖျဲးထီၣ်၀ဲအသးဒီး ဖဲလါယူၤလံ ၁၇ သီအနံၤ ဟဲက့ၤဒိးဖီၣ်က့ၤအသးလၢသုးကလၢၤပူၤအဂ့ၢ်န့ၣ် ပာ်ဖျါဃာ်၀ဲန့ၣ်လီၤႉ

ဘၣ်ဆၣ် တၢ်ကဲထီၣ်သးအဖီခိၣ် ဖဲလါယူၤလံ ၂၀ သီအနံၤ တၢ်ဂ့ၢ်လၢပယီၤသုးထုးထီၣ်ပာ်ဖျါ၀ဲတၢ်ကဲထီၣ်အသးတဖၣ်ဒီး ကညီဂံၢ်ခီၣ်ထံးတၢ်ကရၢကရိတဖၣ်ဒီး KNU-ကညီဒီကလုာ်စၢဖှိၣ်ကရၢ သုးက့(၅)အတၢ်ထုးထီၣ်ပာ်ဖျါတၢ်ဂ့ၢ်ကဲထီၣ်သးအဂ့ၢ်အကျိၤတဖၣ် ထံၣ်ဘၣ်လၢတဒ်သိးလိာ်သးဘၣ်ဒီးလီၤဆီလိာ်အသးန့ၣ်လီၤႉ

ဒ်ဂံၢ်ခီၣ်ထံးတၢ်ကရၢကရိဒီး KNU ထုးထီၣ်ပာ်ဖျါ၀ဲတၢ်ဂ့ၢ်ကဲထီၣ်သးန့ၣ် ဖဲအပူၤကွံာ် လါယူၤလံ ၁၆ သီအနံၤ မုၢ်တြီၢ်(ဖၣ်ပူၣ်)ကီၢ်ရ့ၣ်ႇ ဒွဲၣ်လိကီၢ်ဆၣ် ပိာ်လိထၣ်သ၀ီ နီၢ်မုၣ်နီၤလၢအသးနံၣ်အိၣ်(၄၀)နံၣ်တဂၤအံၤ ပယီၤသုးနီၣ်ဂံၢ်(၈) ပၢဆှၢရဲၣ်ကျဲၤသုး၀ဲၤလီၢ်ခိၣ်သ့ၣ်(စကခ) စုဒုၣ်တီၤအဖီလာ်ႇ ခီၣ်ချ့သုးရ့ၣ်(ခမရ) အၦၤသုးဖိ ၂ ဂၤလၢအမ့ၢ် မီၣ်သါမိလွ့ၤဒီးမီၣ်အ့မ့သူၣ်အံၤ ဃ့၀ဲဒၣ်ထၢၣ်သွ့ဒီးတၢ်တဟ့ၣ်အီၤဘၣ်အဃိ ခးသံ၀ဲဒၣ်ဒီးကျိ(၃)ထံၣ်၀ံၤ ဘ့ၣ်လီၤဟံးန့ၢ်၀ဲအဖဲထူဒီးနၢ်ဒံးတဖၣ်လီၤအဂ့ၢ်န့ၣ် စံး၀ဲန့ၣ်လီၤႉ

လၢတၢ်ကဲထီၣ်သးအံၤအဖီခိၣ် ၦၤလၢအမၤကမၣ်တၢ်သ့ၣ်တဖၣ် ဒ်သိးတၢ်ကဃိထံသမံသမိးတုၤလီၤတီၤလီၤ ဒီးတၢ်ကဟံးထီၣ်ဖီၣ်ထီၣ်အီၤအဂီၢ် ကညီဂံၢ်ခီၣ်ထံးတၢ်ကရၢကရိတဖၣ် ထုးထီၣ်၀ဲဒၣ်လံာ်တၢ်ပာ်ဖျါတဖၣ်စုာ်စုာ်အသိး KNU သုးက့(၅)စ့ၢ်ကီး ဆှၢ၀ဲဒၣ်လံာ်ဆူကညီကီၢ်စဲၣ် တၢ်ကွၢ်ဟုၣ်ကွၢ်စူၣ်တၢ်ပတုာ်တၢ်ခးသဃဲၤကမံးတံာ် (JMC-S) အအိၣ်န့ၣ်လီၤႉ