DKBA ဖီၣ်ချုးန့ၢ်၀ဲ ကသံၣ်မူၤဘှီး ၁ႇ၈၀၀ ကံလိဘျဲၣ်

လါအီကူး ၂၀ သီႇ ၂၀၂၀ နံၣ်ႇ န့ၣ်နီၣ်

ဖဲလါအီကူး ၁၉ သီ ဟါခီအဆၢကတီၢ်န့ၣ် တၢ်ဖီၣ်ချုးန့ၢ်၀ဲဒၣ် ICE ကသံၣ်မူၤဘှီး ၁ႇ၈၀၀ ကံလိဒီး ပံၤ၀ါကိၣ် လိၣ်တဖၣ် လၢဃုပၣ်( ၆ ဘ့) သိလ့ၣ်လၢအတီၣ်၀ဲဒၣ်တၢ်သူၣ်ထီၣ်ဘှီထီၣ်တၢ်ပီးတၢ်လီတဘ့ၣ်အပူၤ ဖဲ မၠၣ်၀တံၣ်–စိၣ်ဆံမၠဲၣ် ကျဲမုၢ်ဖီခိၣ် သဲဖၠူၤခၠီတြဲၤလိၤ အဂ့ၢ်န့ၣ် သ့ၣ်ညါဘၣ်လၢ DKBA ၦၤဘၣ်မူဘၣ်ဒါအအိၣ်လီၤႉ

တၢ်ကဲထီၣ်သးန့ၣ် တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ် (DKBA) နီၣ်ဂံၢ် ၉၀၉ သုးရ့ၣ်ႇ သုးဒ့ခိၣ် သုးခိၣ် စီၤဖါဒံၣ် တီခိၣ်ရိၣ်မဲကရူၢ်အံၤ ဖဲလါအီကူး ၁၉ သီ မုၢ်ထူၣ် ၁၁ နၣ်ရံၣ် ၁၅ မံးနံးအဆၢကတီၢ် ကိးသမံ၀ဲဒၣ်သိလ့ၣ်အံၤ ဖဲသဲဖၠူၤခၠီတြဲၤအ၀ဲန့ၣ်အကတီၢ် ဖီၣ်ချုးန့ၢ်၀ဲကသံၣ်မူၤဘှီးတဖၣ်ဃုာ်ဒီး ၦၤလၢအိၣ်သိလ့ၣ်အပူၤ ၄ ဂၤန့ၣ်လီၤႉ

ဘၣ်ထွဲဒီးတၢ်ဖီၣ်ချုးန့ၢ်ကသံၣ်မူၤဘှီးတၢ်ဂ့ၢ်အံၤ တၢ်ကသမံသမိး၀ဲအဂီၢ် ၦၤလၢတၢ်ဖီၣ်ချုးန့ၢ်၀ဲ ၄ ဂၤအံၤ DKBA ဟ့ၣ်အးလီၤက့ၤ၀ဲဒၣ်ဆူ မၠၣ်၀တံၣ်ဟီၣ်က၀ီၤ ပယီၤသုးတဖၣ်ဒီး မၠၣ်၀တံၣ်ကီၢ်ရ့ၣ် ပၢၤကီၢ်သုးအအိၣ်န့ၣ်လီၤႉ ၦၤလၢတၢ်ဖီၣ်န့ၢ်၀ဲပိာ်ခွါ ၄ ဂၤအံၤန့ၣ် မၠၣ်၀တံၣ်ကီၢ်ရ့ၣ် ပၢၤကီၢ်သုး ပၢၤဃာ်သမံသမိး၀ဲအဂ့ၢ်န့ၣ် သ့ၣ်ညါဘၣ်လီၤႉ

ဒ်န့ၣ်အသိး ဖဲအပူၤကွံာ် လါအီကူး ၁၁ သီအနံၤစ့ၢ်ကီး မၠၣ်၀တံၣ်၀့ၢ် ကလံၤထံး စူၣ်ကလံကီၢ်ဆၣ် ဘျဲၣ်ဒိၣ်သ၀ီကျဲမုၢ်ဖီခိၣ််န့ၣ် တၢ်ဖီၣ်ချုးန့ၣ်၀ဲဒၣ် ICE ကသံၣ်မူၤဘှီး ၃၉၁ ကံလိဒီး ၦၤ ၄ ဂၤန့ၣ်လီၤႉ