Home တၢ်ကစီၣ် ၂၀၂၀ နံၣ်တၢ်ဃုထၢအပူၤ ကညီဖိတဖၣ် ကအိၣ်ဃူအိၣ်ဖိးအဂီၢ် (ခ့ၣ်အဲၣ်ယူၣ်) သဆၣ်ထီၣ်

၂၀၂၀ နံၣ်တၢ်ဃုထၢအပူၤ ကညီဖိတဖၣ် ကအိၣ်ဃူအိၣ်ဖိးအဂီၢ် (ခ့ၣ်အဲၣ်ယူၣ်) သဆၣ်ထီၣ်

1675
0

ဖ့ၤဘြူၤအါရံၤ ၁၇ သီ၊ ၂၀၁၉ နံၣ်။ နါဖီမွံၤရှါ

ကညီကလုာ်ဂ့ၢ်၀ီတၢ်ဂ့ၢ်တၢ်ကျိၤသ့ၣ်တဖၣ် ဒ်သိးတၢ်တဲသကိးအီၤလၢဘျီၣ်ဒိၣ်အပူၤကန့ၢ်အဂီၢ် နံၣ်လၢကဟဲ ၂၀၂၀ တၢ်ဃုထၢအပူၤ ကညီဖိတဖၣ် ကအိၣ်ဃူအိၣ်ဖိး၀ဲအဂီၢ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ လီၢ်ခၢၣ်သးကမံးတံာ် ပဒိၣ်စီၤတီနံ သဆၣ်ထီၣ်အခံ ဖဲတၢ်မၤလၤကပီၤ ကညီဒီကလုာ်အမုၢ်နံၤ ၦဲၤ ၇၁နံၣ် ဖဲ ဧရၣ်၀တံၣ်ကီၢ်ခီဒိၣ်၊ ၀့ၢ်မၠီမၠးတၢ်ရဲၣ်တၢ်ကျဲၤအပူၤန့ၣ်လီၤႉ

ဖဲလါဖ့ၤဘြူၤအါရံၤ ၁၁သီ၊ တၢ်မၤလၤကပီၤ၀ဲကညီဒီကလုာ်မုၢ်နံၤတၢ်ရဲၣ်တၢ်ကျဲၤ ဖဲမၠီမၠးကီၢ်ဆၣ်၊ မံသွ့ခၠီသ၀ီကရူၢ်၊ စခဲကၠံသ၀ီအပူၤအံၤန့ၣ် (ခ့ၣ်အဲၣ်ယူၣ်)လီၢ်ခၢၣ်သးထီဘိကမံးတံာ်ပဒိၣ်စီၤတီနံ ကတိၤဟ့ၣ်ဒုးသ့ၣ်ညါ၀ဲ ဘၣ်ဃး တကီၢ်ခါကီၢ်ဒီတဘ့ၣ်တၢ်ပတုာ်တၢ်ခးအလံာ်ဃံးဃာ်(အဲၣ်စံၣ်အ့ၣ်) ဒီး(ခ့ၣ်အဲၣ်ယူၣ်)တၢ်လဲၤကျဲလၢတၢ်မုာ်တၢ်ခုၣ်အဂ့ၢ်အကျိၤသ့ၣ်တဖၣ်အံၤအကတီၢ် အ၀ဲစံးလီၤ၀ဲဒၣ်ဒ်န့ၣ်န့ၣ်လီၤႉ

“ဖဲ ၂၀၁၀, ၂၀၁၅ တၢ်ဃုထၢအပူၤ ပမၤတ့ၢ်မတၤလဲၣ်န့ၣ် ပကသ့ၣ်ညါလီၤႉ မ့မ့ၢ်လၢ ၂၀၂၀အံၤန့ၣ် (ခ့ၣ်အဲၣ်ယူၣ်)တကပၤဆၢထံၣ်ကညီဖိတဖၣ်လၢ ကမၤ၀ဲ ကညီဖိတၢ်မၤန့ၣ်လီၤႉ ၂၀၂၀ မ့ၢ်တုၤန့ၣ် ပခိၣ်ပနၢ်သ့ၣ် တဖၣ် ဆ့ၣ်နီၤလၢဘျီၣ်ဒိၣ်ပူၤကန့ၢ်အဂီၢ်၊ ကစံးကတိၤဘၣ် ကညီဂ့ၢ်၀ီသ့ၣ်တဖၣ်ကန့ၢ်အဂီၢ် ကညီဖိကိးဂၤဒဲကဘၣ်အိၣ်ဒီးတၢ်ဃူတၢ်ဖိးန့ၣ်လီၤႉ”အဂ့ၢ် ပဒိၣ်စီၤတီနံစံး၀ဲန့ၣ်လီၤႉ

ဖဲအပူၤကွံာ်၂၀၁၅ နံၣ်တၢ်ဃုထၢအပူၤ ကညီထံရူၢ်ကီၢ်သဲးပၣ်တံၣ်လၢ အသူၣ်လီၤအသး ဖဲကညီကီၢ်စဲၣ်အပူၤ လၢအမ့ၢ်ဖျိၤ=စှီၤဒံၣ်မိၣ်ကရဲးတ့ၣ်ပာ်တံၣ်(PSDP)၊ ကညီဒံၣ်မိၣ်ကရဲးတ့ၣ်ပၣ်တံၣ်(KDP)၊ ကညီကီၢ်စဲၣ်ဒံၣ်မိၣ် ကရဲးတ့ၣ်ဒီးတၢ်ဂုၤထီၣ်ပသီထီၣ်ပၣ်တံၣ်(KSDDP)၊ တၢ်ဃူတၢ်ဖိး ကညီဒီကလုာ်ဒံၣ်မိၣ်ကရဲး တ့ၣ်ပၣ်တံၣ် (UKNDP)ဒီး ကညီထံရူၢ်ကီၢ်သဲးပၣ်တံၣ် လၢအအိၣ်ဆီလီၤအသး ဖဲ၀့ၢ်တကူၣ် ဒ်အမ့ၢ် ကညီကမျၢၢ်ပၣ်တံၣ်(KPP)ဒီး ကညီဒီကလုာ်ပၣ်တံာ်(KNP) ပၣ်တံၣ်ခဲလၢာ် ၆ ပၣ်တံၣ်အံၤ လၢကီၢ်တဘ့ၣ်အပတီၢ် ခၢၣ်စး(၂၀၃)ဂၤနုာ်လီၤဒိးဃုထၢအသးဘၣ်ဆၣ် ဖဲန့ၣ်ခၢၣ်စးမၤနၢၤ၀ဲတၢ်ဖးအိၣ်ဒၣ် (၁)ဂၤ ဧိၤန့ၣ်လီၤႉ

ကညီထံရူၢ်ကီၢ်သဲးပၣ်တံၣ်တဖၣ် တမၤနၢၤတၢ်ဃုထၢဘၣ်အံၤန့ၣ် မ့ၢ်၀ဲတၢ်အိၣ်ကတီၤဆိပာ်သးအဂံၢ်စၢ်၊ ကျိၣ်စ့အတၢ်လိၣ်၊ ကညီဖိအါဒၣ်တၢ်တက့ၢ်တၢ်နာ်န့ၢ်အီၣ်ကညီပၣ်တံၣ်အဖီခိၣ်စှၤ၀ဲ လၢအမ့ၢ်တၢ်ဂ့ၢ်သ့ၣ်တဖၣ် အံၤလီၤအဂ့ၢ်န့ၣ် ကညီထံရူၢ်ကီၢ်သဲးပၣ်တံၣ် ခိၣ်နၢ်တဖၣ် ပဲာ်ထံနီၤဖး၀ဲန့ၣ်လီၤႉ

ကညီဒီကလုာ်ဒံၣ်မိၣ်ကရဲးတ့ၣ်ပၣ်တံၣ်(KNDP) လၢအဆီလီၤသး ဖဲကညီကီၢ်စဲၣ် အံၤ ၦၤပၢၤလီၢ်ဆ့ၣ်နီၤမါအီၣ်ပၠံၣ်စိစံး၀ဲလၢ“ ၂၀၂၀ တၢ်ဃုထၢမ့ၢ်တုၤန့ၣ် (ခ့ၣ်အဲၣ်ယူၣ်)တကပၤ စံး၀ဲလၢ ကဟ့ၣ်ဂံၢ်ဟ့ၣ်ဘါ၀ဲ ကညီထံရူၢ်ကီၢ်သဲးပၣ်တံၣ်တဖၣ်န့ၣ် အိၣ်၀ဲလီၤႉ တမ့ၢ်လၢကျိၣ်စ့ဒီးတၢ်မၤစၢၤအဂၤဘၣ်ဆၣ် ကဘၣ်မ့ၢ်၀ဲ တၢ်ဟ့ၣ်ဂံၢ်ဟ့ၣ်ဘါအပတီၢ်လီၤ”အဂ့ၢ် စံး၀ဲန့ၣ်လီၤႉ

တကီၢ်ခါဆၢကတီၢ်အခဲအံၤ လၢကီၢ်ပယီၤဒီတဘ့ၣ်အပတီၢ်န့ၣ် ကညီထံရူၢ်ကီၢ်သဲးပၣ်တံၣ် အိၣ်၀ဲ ၄ပၣ်တံၣ် န့ၣ်လီၤႉ ဖဲကညီကီၢ်စဲၣ်အပူၤန့ၣ် (KNDP) ဒီး (PSDP)ပၣ်တံၣ် ၂ဖုအံၤ အိၣ်ဆီလီၤအသးဒီး မ့မ့ၢ်လၢ၀့ၢ်တကူၣ်ကီၢ်ခီဒိၣ်အပူၤန့ၣ် (KPP)ဒီး(KNP) ပၣ်တံၣ် ၂ဖုအံၤ အိၣ်ဆီလီၤအသးန့ၣ်လီၤႉ