လါစဲးပထ့ဘၢၣ် ၂၁ သီ, ၂၀၂၆ နံၣ်, ခ့ၣ်အဲးစံၣ်
ဖဲတကီၢ်ခါထံရူၢ်ကီၢ်သဲးတၢ်သဘံၣ်သဘုၣ်ဒီးတၢ်ကီတၢ်ခဲတၢ်တၤတၢ်အတီၢ်ပူၤအံၤ ခ့ၣ်အဲၣ်ယူၣ်ဟီၣ်ကဝီၤပူၤ ဒ်သိးပတီၢ်ထီ ပီညါတၢ်ပၢဆှၢရဲၣ်ကျဲၤအဂံၢ်ကဆူၣ်ထီၣ်ဒီး တၢ်ကသ့ၣ်ညါပၥ်ပနီၣ်ကီၢ်သူလ့ၤပတီၢ်ထီပီညါအံၤအဂီၢ်န့ၣ် ကညီကူၣ်သ့ဆဲး လၤ ဝဲၤကျိၤ(KECD) ပတီၢ်ထီပီညါဝဲၤဒ့ ဒုးအိၣ်ထီၣ်ဝဲကီၢ်သူလ့ၤပတီၢ်ထီပီညါကီၣ်ကး KCHE အံၤဒီး ဖဲတနံၤအံၤလါစဲးပထ့ဘၢၣ် ၂၁ သီအံၤ လီၢ်ခၢၣ်သးခ့ၣ်အဲၣ်ယူၣ်ထုးထီၣ်ဘိးဘၣ်ရၤလီၤဝဲကီၣ်ကးအံၤန့ၣ်လီၤ.
ကီၢ်သူလ့ၤပတီၢ်ထီပီညါ(Kawthoolei Council of Higher Education-KCHE)အံၤ ဖဲ(KECD)ဝဲၤကျိၤပှၤဘၣ်မူ ဘၣ်ဒါမၤဝဲတၢ်ကူၣ်လိၥ်တၢၣ်ပီၣ်တဲသကိးဝံၤလီၢ်ခံ ဖဲလါစဲးပထ့ဘၢၣ် ၉ သီအနံၤန့ၣ် ဘၣ်တၢ်စးထီၣ်ဒုးအိၣ်ထီၣ်ဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
တကတီၢ်ဃီတၢ်ဒုးအိၣ်ထီၣ် ကီၢ်သူလ့ၤပတီၢ်ထီပီညါကီၣ်ကး အတၢ်ပညိၣ်န့ၣ်မ့ၢ်ဒ်သိးတၢ်ကမၤဆူၣ်ထီၣ်ပတီၢ်ထီ ပီညါ တၢ်ပၢ ဆှၢရဲၣ်ကျဲၤ, တၢ်ကူၣ်ဘၣ်ကူၣ်သ့အကံၢ်အစီ,ပတီၢ်ထီပီညါကၠိတဖၣ်အတၢ်မၤသကိးတကးဒံးဘၣ် ဒ်သိးတၢ်ကသ့ၣ်ညါပၥ် ပနီၣ်ဝဲ ကီၢ်သူလ့ၤပတီၢ်ထီ ပီညါလၢကီၢ်သူလ့ၤပူၤဒီးထံဂုၤကီၢ်ဂၤတဖၣ်အဂီၢ်အဂ့ၢ်န့ၣ် လံၥ်တၢ်ဘိးဘၣ်ရၤလီၤအပူၤပၥ်ဖျါဝဲန့ၣ်လီၤ.
ဒ်န့ၣ်အသိးလၢ ပတီၢ်ထီပီညါကီၣ်ကးတၢ်ပၢဆှၢရဲၣ်ကျဲၤအပူၤန့ၣ် တၢ်ဃုထၢထီၣ်ဝဲခိၣ်နၢ်ခၢၣ်စး(၂၁)ဂၤဒ်ကီၣ်ကးကရၢဖိအသိး လၢအခၢၣ်စးဝဲပတီၢ်ထီပီညါကၠိ, ကညီကူၣ်သ့ဆဲးလၤဝဲၤကျိၤ(KECD) ပတီၢ်ထီပီညါဝဲၤဒ့ ဒီး ပှၤကူၣ်ဘၣ်ကူၣ်သ့စဲၤနီၢ် သ့ၣ်တဖၣ် န့ၣ်လီၤ.
ဒီးလၢကီၣ်ကးအံၤအပူၤန့ၣ် နီၢ်ဖီမူ မ့ၢ်ဝဲပှၤပၢၤလီၢ်ဆ့ၣ်နီၤ, စီၤကပံၥ် မ့ၢ်ဝဲပှၤပၢၤလီၢ်ဆ့ၣ်နီၤစၢၤ, ဒီး စီၤဟ့ၣ်စိသးကိၤခီန့ၣ် ဘၣ်တၢ်ဃုထၢအီၣ်အီၤဒ် နဲၣ်ရွဲၣ်တဂၤအသိးအဂ့ၢ်န့ၣ် သ့ၣ်ညါဘၣ်န့ၣ်လီၤ.
လၢအန့ၣ်အမဲၥ်ညါလၢတၢ်မၤဖျါထီၣ်ဝဲ ကီၢ်သူလ့ၤပတီၢ်ထီပီညါကီၣ်ကး အတၢ်န့ၢ်စိန့ၢ်ကမီၤဒီးတၢ်ဖံးတၢ်မၤအံၤအဂီၢ်န့ၣ် တၢ်ဒုးအိၣ် ထီၣ်ဃုၥ်စ့ၢ်ကီးဝဲတၢ်ဖံးတၢ်မၤကမံးတံၥ်(၃)ဖုလၢအမ့ၢ် တၢ်ဆၢတဲၥ်ပၥ်လီၤတၢ်အတီၤပတီၢ်ဒီးတၢ်တူၢ်လိၥ်ပၥ်ပနီၣ်တၢ်ကမံး တံၥ်, တၢ်သမံထံဒီးအုၣ်ကီၤတၢ်အကံၢ်အစီကမံးတံၥ်, တၢ်ဃုထံၣ်သ့ၣ်ညါတၢ်,တၢ်ကတိၤန့ၢ်ခဲးတၢ်ဒီး တၢ်သူၣ်ထီၣ်တၢ်မၤသကိး တၢ်က မံးတံၥ် သ့ၣ်တဖၣ်အံၤန့ၣ်လီၤ.
ဘၣ်ဃးတၢ်ဒုးအိၣ်ထီၣ်ဝဲ ကီၢ်သူလ့ၤပီညါပတီၢ်ထီကီၣ်ကးကမံးတံၥ်အံၤန့ၣ် ကီၣ်ကးအံၤပှၤပၢၤလီၢ်ဆ့ၣ်နီၤ နီၢ်ဖီမူ စံးဝဲလၢ“ပဒုး အိၣ်ထီၣ်ကီၣ်ကးတခါအံၤဒ်သိးဒီးပကအိၣ်ဒီးနီၢ်ကစၢ်တၢ်စံၣ်ညီၣ်ပၢလီၤသးမီၤ.မ့ဝံၤဒ်သိးပတၢ်ကူၣ်ဘၣ်ကူၣ်သ့တဖၣ်အံၤတခါဒီး တခါန့ၣ်ကအိၣ်ဝဲဃံးဃီၣ်ဒီၣ်ဖိ.ဒ်သိးပပှၤကၠိဖိတဖၣ်ကဒိးန့ၢ်ဘၣ်တၢ်ခွဲးတၢ်ယၥ်အဂီၢ်လီၤ.ပမ့က့ၤကွၢ်ကဒါန့ၣ်ပဝဲသ့ၣ်တဖၣ်အံၤ ပတၢ်ခွဲးတၢ်ယၥ်တအိၣ်ဘၣ်ခီဖျိလၢပလံၥ်တၢ်အုၣ်ကီၤတဖၣ်တလၢတပှဲၤဘၣ်,ပဟးထီၣ်မၤလိတၢ်အဂီၢ်စ့ၢ်ကီးတၢ်ခွဲးတၢ်ယၥ်တအိၣ်ဘၣ်အဃိ ကီၣ်ကးအံၤကမ့ၢ်ဝဲလၢပှၤကၠိဖိသူၣ်ဘီၣ်သးစၢ်ကိးဂၤဒဲးအဂီၢ်လၢပကအိၣ်ဒီးတၢ်ကူၣ်ဘၣ်သ့လၢပအတီၢ်မီၤနီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ကီၢ်ပယီၤပူၤသုးဟံန့ၢ်ဆူၣ်ထံကီၢ်တၢ်စိတၢ်ကမီၤဝံၤလီၢ်ခံ လၢထံရူၢ်ကီၢ်သဲးဒီးဖီၣ်စုကဝဲၤတၢ်သဘံၣ်သဘုၣ်အဃိ တၢ်လုၢ်အီၣ်နီၣ် ခိသးသမူတၢ်ဂ့ၢ်ကီအမဲၥ်ညါ လၢကူၣ်သ့သနၢၣ်တကပၤစ့ၢ်ကီးမ့ၢ်တၢ်တၤတၢ်ဖးဒိၣ်တခါလၢတၢ်ဘၣ်ကွၢ်ဆၢၣ်မဲၥ်ဝဲဒၣ်လီၤ ဘၣ်ဆၣ်လၢပှၤကၠိဖိသူၣ်ဘီၣ်သးစၢ်အတၢ်မုၢ်လၢ်တိၥ်ပၥ်အဂီၢ် ကီၢ်သူလ့ၤပတီၢ်ထီပီညါကီၣ်ကး ဟဲအိၣ်ထီၣ်ဒ်အံၤ ကဲဘျုးဝဲဒၣ် ဒီးမ့ၢ်ခီၣ်ခါလၢအဂ့ၤဝဲတခါန့ၣ်လီၤ.
