လါနိၣ်၀့ဘၢၣ် ၁၁ သီႇ ၂၀၁၉ နံၣ်ႇ စီၤရှါ
၆၄ နံၣ်ၦဲၤထီၣ် ကညီကီၢ်စဲၣ်မုၢ်နံၤ တၢ်ဂဲၤကလံၣ်ပြၢဒိအံၤ စံၣ်ညီၣ်ကွီၢ်ကရူၢ်တဖၣ် ဃုထၢထီၣ်၀ဲ တၢ်နုာ်လီၤတပြၢတၢ်ဂဲၤကလံၣ်ဒိ ၉ ကရူၢ်အကျါ ဖဲလါနိၣ်၀့ဘၢၣ် ၁၀ သီ ဟါခီန့ၣ် တၢ်ဆဲးတပြၢဂဲၤကလံၣ်၀ဲန့ၣ် ဖၣ်အၣ်ကီၢ်ဆၣ် ယသ့ၣ်ပၠၣ်သ၀ီတၢ်ဆဲးတၢ်လၤဒိအကရူၢ် မၤန့ၢ်ဘၣ်၀ဲနီၣ်ဂံၢ် ၁ ခိၣ်ဖးန့ၣ်လီၤႉ
ဘၣ်ထွဲဒီးဒိးန့ၢ်ဘၣ်၀ဲနီၣ်ဂံၢ် ၁ ခိၣ်ဖးအံၤအဖီခိၣ် ယသ့ၣ်ပၠၣ်ဒိ ၦၤနဲၣ်တၢ်အခိၣ် စီၤအီၤကၠီၤည့စံး၀ဲလၢ“ ပဒုးအိၣ်ထီၣ်တၢ်ဂဲၤလံၣ်အသနူအသီလၢပၣ်ဃုာ်ဒီး စိၤခ့ခါခဲအံၤဒီး အဲၣ်ဒိးပၢၤဃာ်က့ၤ ပလုၢ်ပလၢ် ပတၢ်ဆဲးတၢ်လၤသုတဟးဂီၤတဂ့ၤအဂီၢ် ဒီး ပပာ်ဖှိၣ်ထီၣ် တၢ် ၂ခါအံၤန့ၣ်လီၤႉ ၦၤကွၢ်တၢ်ဖိတၢ်ကၢၣ် သုတထီၣ်တဂ့ၤအဂီၢ်န့ၣ် ပသူ၀ဲဒၣ်တၢ်ဃ့ၢ်ခီၣ်ခါအက့ၢ်အဂီၤဒီး တၢ်ဂဲၤကလံၣ်အက့ၢ်အဂီၤ စ့ၢ်ကီးကဘၣ်ဖျါ၀ဲလီၤ” စံးဘၣ်ခ့ၣ်အဲးစံၣ်လီၤႉ
လၢန့ၣ်အမဲာ်ညါ ၦၤလၢအဒိးန့ၢ်ဘၣ် နီၣ်ဂံၢ် –၂ ခိၣ်ဖးန့ၣ်မ့ၢ်၀ဲ ဖၣ်အၣ်ကီၢ်ဆၣ် နီၣ်ပျ့သ၀ီတၢ်ဆဲးတၢ်လၤဒိကရူၢ်ႇ နီၣ်ဂံၢ် ၃ ခိၣ်ဖးန့ၣ် ကီၢ်ပရးသ၀ီတၢ်ဆဲးတၢ်လၤဒိကရူၢ်ႇ နီၣ်ဂံၢ် ၄ ခိၣ်ဖးန့ၣ် လူၢ်ပျဲၢ်(လဲဘွဲ)ကီၢ်ဆၣ် တၢ်ဆဲးတၢ်လၤဒိကရူၢ်ဒီး နီၣ်ဂံၢ် ၅ ခိၣ်ဖးန့ၣ် ဖၣ်အၣ်ကီၢ်ဆၣ် ကီၢ်စ့ၤဘၤသ၀ီ တၢ်ဆဲးတၢ်လၤဒိကရူၢ်သ့ၣ်တဖၣ်ဒိးန့ၢ်ဘၣ်၀ဲစုာ်စုာ်န့ၣ်လီၤႉ
တနံၣ်ညါအံၤဒိလၢအနုာ်လီၤတၢ်ပြၢတဖၣ်မ့ၢ်၀ဲ မၠၣ်၀တံၣ်ကီၣ်ရ့ၣ်ဒိႇ ကၠးအ့ဆ့ၣ်ကၠံကီၢ်ဆၣ်ဒိႇလူၢ်ပျဲၢ်ကီၢ်ဆၣ်ဒိႇ ကီးတရံးကီၢ်ဆၣ်ခၢၣ်စးဒိႇ ကီးတရံးကီၢ်ဆၣ် ကီၢ်ပရးသီခါဖၠၣ်တၢ်ကူၣ်ဘၣ်ကူၣ်သ့ဒိႇ ဖၣ်အၣ်ကီၢ်ဆၣ် ၀့ၢ်ခိၣ်ဒိႇ ကီၢ်ပရး (ဟံၣ်လၤပလီဖီၤ ရွ့ၣ်ကီၢ်ပရး) ဒိႇ ယသ့ၣ်ပၠၤပာ်ဖှိၣ်ဒိႇ နီၤပျ့ၤ(ဟံၣ်မီလၤဒိ နီၤပျ့ၤဖိ )ဒိႇ ကီၢ်စ့ၤဘၤ(ဟံၣ်လၤအဲဒိ ဆ့ၣ်ဘီၤဖိ)ဒိႇ ဖုတခ့ၣ် နီၣ်ဂံၢ် ၁ ဒီး ၂ ဒိတဖၣ် ခဲလၢာ် ၁၂ ဖု နုာ်လီၤတပြၢ၀ဲဒၣ်န့ၣ်လီၤႉ
လၢတၢ်ဂုာ်ကျဲးစၢးဒီးတၢ်ထဲးဂံၢ်ထဲးဘါခိၣ်ဖးန့ၣ် ဖုတခ့ၣ်တၢ်ဆဲးတၢ်လၤဒိကရူၢ် ၂ ဒိးန့ၢ်ဘၣ်၀ဲဒီး ဒိကရူၢ်လၢအနုာ်လီၤတပြၢတၢ်လၢအအိၣ်တ့ၢ်တဖၣ် ဒိးန့ၢ်ဘၣ်၀ဲခိၣ်ဖးလီၤဆီတဖၣ်န့ၣ်လီၤႉ ခိၣ်ဖးတဖၣ်အံၤ ဘၣ်တၢ်ဟ့ၣ်လီၤမၤလၤကပီၤအီၤလၢ ကီၢ်စဲၣ်ကိတိာ်ခိၣ်ကျၢၢ် နါခ့ၤထွ့မၠ့ၣ် ဒီး ကီၢ်စဲၣ်ပဒိၣ်ကိတိာ်အၦၤသ့ၣ်တဖၣ်န့ၣ်လီၤႉ
ကညီကီၢ်စဲၣ်မုၢ်နံၤအံၤ လၢအလီၤဘၣ်ဖဲ လါနိၣ်၀့ဘၢၣ် ၇သီ တုၤ ၉သီန့ၣ် ဒိလၢအနုာ်လီၤတပြၢတၢ် ၁၂ ကရူၢ်အံၤ ဂဲၤကလံၣ်တပြၢ၀ဲ၀ံၤအလီၢ်ခံ စံၣ်ညီၣ်ကွီၢ်တဖၣ်ဃုထၢထီၣ်၀ဲဒိ ၉ ကရူၢ်ဒီး ဖဲ ၁၀သီဟါခီန့ၣ် ဘၣ်တၢ်ဆဲးဃုထၢအီၤဒီး ဘၣ်တပြၢ၀ဲန့ၣ်လီၤႉ
