KNLA လီၢ်ခၢၣ်သး သုးကသံၣ်၀ဲၤဒ့ ကသံၣ်တၢ်သိၣ်လိ တၢ်မၤလိဖိ ဖျိထီၣ်ကဒီး ၅၄ ဂၤ

လါနိၣ်၀့ဘၢၣ် ၁၂ သီႇ ၂၀၁၉ နံၣ်ႇ စးအဲၣ်ဆူ

ကညီဒီကလုာ်စၢဖှိၣ်ကရၢ– KNU စုဒုၣ်စုတီၤအဖီလာ်ႇ ကညီဒီကလုာ်တၢ်ထူၣ်ဖျဲးသုးမုၢ်ဒိၣ် – KNLA လီၢ်ခၢၣ်သးသုးကသံၣ်၀ဲၤဒ့ (၃၃) ၀ီတ၀ီ ဂံၢ်ခီၣ်ထံး သုးကသံၣ်တၢ်မၤလိလၢအပၣ်ဃုာ်ဒီးကလုာ်ဒူၣ်တဖၣ်န့ၣ် တၢ်မၤ၀ဲတၢ်ပျၢ်က့ၤ တၢ်မၤလိတၢ်ရဲၣ်တၢ်ကျဲၤအံၤဖဲ KNLA သုး၀ဲၤလီၢ်ခိၣ်သ့ၣ်န့ၣ်လီၤႉ

တၢ်မၤလိအံၤ ကညီႇ ပအိ(တီသူ), ပလီၣ်ႇ ခၠ့ႇ နၤကၣ် ဒီးရၢၣ်ခၢၣ်ကလုာ်ဒူၣ်တဖၣ် ပၣ်ဃုာ်၀ဲဒီး တၢ်မၤလိဖိ အိၣ်၀ဲ ၅၄ဂၤန့ၣ်လီၤႉ စးထီၣ် ဖဲလါယူၤ ဒီး လၢဃုလါအတီၢ်ပူၤ တၢ်ဟ့ၣ်၀ဲတၢ်သိၣ်လိဘၣ်ဃးဒီး ဂံၢ်ခီၣ်ထံး ကသံၣ်ဂ့ၢ်၀ီတၢ်သ့တၢ်ဘၣ်တဖၣ်အဂ့ၢ်န့ၣ် တၢ်သိၣ်လိဘၣ်မူဘၣ်ဒါ လီၢ်ခၢၣ်သး သုးကသံၣ်၀ဲၤဒ့ မူဒါခိၣ် သုးခိၣ်ဒိၣ်စိ နီၢ်စ့ဒ့ကဲ စံးဘၣ်ခ့ၣ်အဲးစံၣ်လီၤႉ

အ၀ဲစံး၀ဲလၢ“ ပအိးထီၣ်တၢ်သိၣ်လိအံၤ ခီဖျိလၢ ကလုာ်ဒူၣ်ခဲလၢာ်အကျါ ကဟူးဂဲၤမၤတၢ်လၢအၦၤကလုာ်အဂီၢ် ကကဲ၀ဲတၢ်တိစၢၤမၤစၢၤကသ့အဂီၢ်ဒီး လၢပၦၤတ၀ၢတၢ်ကရၢကရိအပူၤလၢကလုာ်ဒူၣ်တဖၣ်အဂီၢ် ဒ်သိးပ ကသ့မၤစၢၤဘၣ်ဃးတၢ်အိၣ်ဆူၣ်အိၣ်ချ့တဖၣ်န့ၣ်လီၤႉ ၦၤလၢအဖျိထီၣ်၀ဲတၢ်သိၣ်လိသ့ၣ်တဖၣ်အဂီၢ်န့ၣ် လၢဂံၢ်ခီၣ်ထံး တၢ်သိၣ်လိအပတီၢ်အံၤ ဒ်သိးဒီး လၢခံတပတီၢ် ကဆဲးမၤလိကဒီးတၢ်ကူၣ်ဘၣ်ကူၣ်သ့လၢအပတီၢ်ထီအဂီၢ်န့ၣ် ပဆၢမုၢ်လၢ်၀ဲဒီး တၢ်လၢအလိၣ်တဖၣ်န့ၣ် ပကမၤစၢၤအီၤန့ၣ်” စံး၀ဲဒၣ်လီၤႉ

ဂံၢ်ခီၣ်ထံးသုးကသံၣ်တၢ်သိၣ်လိလၢအယံာ်၀ဲဃုလါအတီၢ်ပူၤအံၤ တၢ်ဟ့ၣ်၀ဲဂံၢ်ခီၣ်ထံးသုးတၢ်သိၣ်လိတကးဘၣ်အမဲာ်ညါ ဂ့ၢ်ဂီၢ်အူတၢ်ကူစါယါဘျါဆိႇ ဘၣ်ဃးဒီးတၢ်သူ၀ဲကသံၣ် တၢ်ကိး၀ဲကသံၣ်အမံၤႇ ဂံၢ်ခီၣ်ထံးတၢ်ကွဲးတၢ်ကါႇ ဂံၢ်ခီၣ်ထံးနီၢ်ခိက့ၢ်ဂီၤႇ ကမျၢၢ်တၢ်အိၣ်ဆူၣ်အိၣ်ချ့ႇ ဂံၢ်ခီၣ် ထံးတၢ်ကွၢ်ထွဲမဲာ်ချံတဖၣ် ဘၣ်တၢ်မၤလိ၀ဲအဂ့ၢ်န့ၣ် တၢ်သိၣ်လိၦၤဘၣ်မူဘၣ်ဒါတဖၣ်စံး၀ဲဒၣ်န့ၣ်လီၤႉ

တၢ်မၤလိဖိ နါနွ့ထွ့စၣ်စံး၀ဲလၢ“ယဟဲထီၣ်တၢ်သိၣ်လိအံၤ ခီဖျိလၢကက့ၤမၤစၢၤက့ၤ ပၦၤကလုာ်ကမျၢၢ်အဂီၢ်လီၤႉ တၢ်လီၢ်လၢတၢ်သ့ၣ်ညါနၢ်ပၢၢ်စှၤအလီၢ်န့ၣ် ပကဟးဟ့ၣ်နီၤလီၤဘၣ်ဃးတၢ်အိၣ်ဆူၣ်အိၣ်ချ့ႇ အခဲအံၤ တၢ်သိၣ်လိပျၢ်လံအဃိ ပကက့ၤမၤစၢၤတၢ်လၢပၦၤတ၀ၢအကျါ”အဂ့ၢ်န့ၣ် စံး၀ဲန့ၣ်လီၤႉ

ကသံၣ်တၢ်သိၣ်လိအံၤ ဘၣ်တၢ်အိးထီၣ်မၤလိဟ့ၣ်၀ဲ ကိးနံၣ်ဒဲးလၢ KNLA လီၢ်ခၢၣ်သးသုးကသံၣ်၀ဲၤဒ့ဒီး လၢအပူၤကွံာ်နံၣ်န့ၣ် တၢ်နီၤဖးလီၤ၀ဲတၢ်သိၣ်လိအံၤ (၂ )ကရူၢ်ဒီး လၢသုးက့ (၅) လီၢ်က၀ီၤစ့ၢ်ကီးဘၣ်တၢ်အိးထီၣ်န့ၢ်၀ဲအဂ့ၢ်န့ၣ်သ့ၣ်ညါဘၣ်န့ၣ်လီၤႉ