တၢ်မုာ်တၢ်ခုၣ်တၢ်ရ့လိာ်မုာ်လိာ်အံၤ ဒ်သိးကျဲကအိးထီၣ်သးအဂီၢ် ကဘၣ်ဟံးထီၣ်ဖီၣ်ထီၣ်၀ဲန့ၣ် အ့ၣ်ယၣ်၀တံၣ် ကိတိာ်ခိၣ်ကျၢၢ်လီၢ်လံၤ မါကၠီၣ်နံၣ်ဟ့ၣ်သဆၣ်ထီၣ်၀ဲ

လါဒံၣ်စ့ဘၢၣ် ၆ သီႇ ၂၀၁၉ နံၣ်ႇ စးအဲၣ်ဆူ

ကီၢ်ပယီၤတၢ်ရ့လိာ်မုာ်လိာ်လၢအမုာ်အခုၣ်အံၤ ဒ်သိးအကျဲကအိးထီၣ်သးအဂီၢ် ကဂုာ်ကျဲးစၢးမၤအီၤအဂ့ၢ်န့ၣ် အ့ၣ်ယၣ်၀တံၣ်ကီၢ်ခီဒိၣ် ကိတိာ်ခိၣ်ကျၢၢ်လီၢ်လံၤ မါကၠီၣ်နံၣ် ဆီၣ်တခူထီၣ်ကညီသးစၢ်တဖၣ် ဖဲလါဒံၣ်စ့ဘၢၣ် ၆ သီအနံၤ လၢတၢ်စးထီၣ်မၤ၀ဲ အ့ၣ်ယၣ်၀တံၣ်ကီၢ်ခီ ကညီသးစၢ်တၢ်ထံၣ်လိာ်အိၣ်သကိးအံၤအပူၤ ဖဲအ့ၣ်ယၣ်၀တံၣ်ကီၢ်ခီဒိၣ် ပသံၣ်ကီၢ်စဲၣ် မယါကၠီတၢ်လီၢ်အံၤန့ၣ်လီၤႉ

“အခဲအံၤကီၢ်ပယီၤန့ၣ် တၢ်မုာ်တၢ်ခုၣ်ကန့ၢ်အဂီၢ်န့ၣ် တၢ်ဂုာ်ကျဲးစၢး၀ဲလီၤႉ ပ၀ဲသ့ၣ်တဖၣ်ပကဘၣ်မ့ၢ်ကညီလၢအစဲၤနီၢ်ဒီး ကဘၣ်ပာ်ပသးမ့ၢ်လဲၢ်မ့ၢ်ထီႇ ကီၢ်ပယီၤတၢ်ရ့လိာ်မုာ်လိာ်အံၤ ဒ်သိးဒီးကျဲကအိးထီၣ်အသးအဂီၢ်ပကဘၣ်မၤလီၤႉ ကီၢ်ပယီၤတၢ်ရ့လိာ်မုာ်လိာ်အံၤ ဒ်သိးကကဲထီၣ်လၢဟီၣ်ခိၣ်ဒီဖျၢၣ်တၢ်ရ့လိာ်မုာ်လိာ်န့ၣ် ဖဲပစိၤအံၤပကဘၣ်ဂုာ်ကျဲးစၢးလီၤႉ ဖိမုၣ် ဖိခွါတဖၣ်စ့ၢ်ကီး ကဘၣ်ဂုာ်ကျဲးစၢး၀ဲဒီး ကဘၣ်လဲၤ၀ဲဒ်တၢ်တီခိၣ်ရိၣ်မဲအတၢ်ပာ်ဖှိၣ်အသိးန့ၣ် အဲၣ်ဒိးဟ့ၣ် သဆၣ်ထီၣ်သုလီၤ”အဂ့ၢ်န့ၣ် ဟ့ၣ်သဆၣ်ထီၣ်၀ဲဖဲ တၢ်အိးထီၣ်တၢ်ရဲၣ်တၢ်ကျဲၤမူးအပူၤန့ၣ်လီၤႉ

လၢန့ၣ်အမဲာ်ညါ ကညီသးစၢ်တပၤကဘၣ်အိၣ်ဒီးတၢ်ပာ်သးလၢအဂ့ၤအမဲာ်ညါ ဒီကလုာ်မူဒါတဖၣ်စ့ၢ်ကီး ကဘၣ်ဟံးထီၣ် ဖီၣ်ထီၣ်ပမူပဒါကသ့အဂီၢ်ႇ ပကဘၣ်မၤဒိၣ်ထီၣ်ထီထီၣ်တၢ်အကံၢ်အစီဒီး ပကဘၣ်အိၣ်ကတဲာ်ကတီၤထီၣ်သးအဂီၢ် လိၣ်၀ဲအဂ့ၢ်န့ၣ် မါကၠီၣ်နံၣ်ဟ့ၣ်ကူၣ်ဟ့ၣ်ဖး၀ဲလီၤႉ

ကီၢ်ပယီၤပူၤ ကလုာ်ဒူၣ်တဖၣ်အိၣ်ဆိး၀ဲအါအါဂီၢ်ဂီၢ်ဘၣ်ဆၣ် ကလုာ်ဒူၣ်ဒိၣ်ႇ ကလုာ်ဒူၣ်ဆံး ဘၣ်တၢ်နီၤဖးအ၀ဲသ့ၣ်တဖၣ် အိၣ်၀ဲအသိး ကလုာ်တၢ်သဘံၣ်သဘုၣ်တဖၣ်အိၣ်ထီၣ်၀ဲအမဲာ်ညါ ကီၢ်ပယီၤဒိးန့ၢ်ဘၣ်တၢ်သဘျ့ဖဲ ၁၉၄၈နံၣ်၀ံၤအလီၢ်ခံ ကလုာ်ဒူၣ်ဖီၣ်စုက၀ဲၤတၢ်ပၢၢ်ဆၢကရူၢ်တဖၣ် အိၣ်ထီၣ်၀ဲဒီး တုၤအက့ၤသူၣ်ထီၣ်၀ဲ ကလုာ်ဘၣ်လိာ်ဖိးမံလိာ်သး တန့ၢ်ဒံးဘၣ်န့ၣ်လီၤႉ

လၢန့ၣ်အမဲာ်ညါ ကလုာ်ဒူၣ်တဖၣ်ဘၣ်တၢ်ပာ်အဒူၣ်အဆၢဒီး တၢ်ဆီၣ်တံၢ်မၤနၢၤအဃိ ဒ်သိးဒီကလုာ်တၢ်တုၤသိးထဲသိး ကန့ၢ်အဂီၢ်ႇဘၣ်ဒုးအိၣ်ထီၣ်၀ဲ စုက၀ဲၤတၢ်ပၢၢ်ဆၢအံၤလီၤအဂ့ၢ်န့ၣ် ကလုာ်ဒူၣ်ဖီၣ်စုက၀ဲၤတဖၣ်စံး၀ဲန့ၣ်လီၤႉ

သးစၢ် စးအီၤကၠီၤကၠီၤ စံး၀ဲလၢ “တၢ်ရ့လိာ်မုာ်လိာ်ႇ ဒ်သိးကကဲထီၣ်တၢ်မုာ်တၢ်ခုၣ် လၢၦၤတ၀ၢတၢ်ကရၢကရိန့ၣ် ပ၀ဲကလုာ်ဒူၣ်တဖၣ်အဘၢၣ်စၢၤန့ၣ် လၢပ၀ဲတပၤ ကဘၣ်အိၣ်ဒီးတၢ်ပာ်သးလၢအထီအမဲာ်ညါ တဂၤဒီးတဂၤလိၣ်၀ဲဒၣ်လၢ ကဘၣ်အိၣ်ဒီးတၢ်ဒိသူၣ်ဒိသးႇ တၢ်နၢ်ပၢၢ်လိာ်သးလီၤႉ တၢ်ခွဲးတၢ်ယာ်လၢပဘၣ်ဒိးန့ၢ်ဘၣ်တဖၣ် ကဘၣ်အိၣ်ဒီးတၢ် တုၤသိးထဲသိးန့ၣ်လိၣ်၀ဲလီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်လီၤႉ

သးစၢ်တၢ်ထံၣ်လိာ်အိၣ်သကိးလၢ တၢ်မၤအီၤ စးထီၣ်ဖဲ လါဒံၣ်စ့ဘၢၣ် ၆ သီတုၤ ၇ သီအံၤန့ၣ် တၢ်က့ၤပဲာ်ထံနီၤဖး၀ဲ ကီၢ်စၢဖှိၣ် ဘျီၣ်ဒိၣ်တဖၣ်ႇ အ့ၣ်ယၣ်၀တံၣ် ကီၢ်ခီဒိၣ် ဘျီၣ်ဒိၣ်တဖၣ် အတၢ်ဖံးတၢ်မၤဒီး တၢ်ဟ့ၣ်ခီဟ့ၣ်နီၤလီၤတၢ်ထံၣ် ဘၣ်ထဲွ၂၀၂၀ တၢ်ဃုထၢႇတၢ်တၢၣ်ပီၣ်တဲသကိး သးစၢ်ကရူၢ်တဖၣ် တၢ်ဆဲးကျိးတၢ်ဖံးတၢ်မၤတဖၣ်ဒီး ဆၢတဲာ်လီၤ၀ဲ ဆူညါတၢ်မၤသ့ၣ်တဖၣ်န့ၣ်လီၤႉ

တၢ်မၤ၀ဲ အ့ၣ်ယၣ်၀တံၣ် ကညီသးစၢ်တၢ်ထံၣ်လိာ်အိၣ်သကိး လၢခံသီအတီၢ်ပူၤအံၤ ဘၣ်တၢ်ကွဲမုာ်၀ဲ ကီၢ်ရ့ၣ် ၆ ဘ့ၣ် ကီၢ်ဆၣ် ပာ်ဖှိၣ်ခဲလၢာ်၂၆ ဘ့ၣ်အပူၤ ကညီသးစၢ်တဖၣ်ႇ ကညီထံရူၢ်ကီၢ်သဲးပၣ်တံၣ် ခိၣ်နၢ်တဖၣ် ခဲလၢာ်ပာ်ဖှိၣ် အဂၤ ၈၀ ဘျဲၣ် ဟဲထီၣ်၀ဲန့ၣ်လီၤႉ