လါယနူၤအါရံၤ ၁၅ သီႇ ၂၀၂၀ နံၣ်ႇ စးအဲၣ်ဆူ
ကီၢ်ကၠီၣ််တဲၣ်–ကီၢ်ပယီၤကီၢ်ဆၢ ကညီဘၣ်ကီဘၣ်ခဲဒဲက၀ီၤ (၆)ဖျၢၣ်အံၤ စးထီၣ်လၢအပူၤကွံာ် ၂၀၁၉ နံၣ် တုၤလၢအခဲအံၤ တီၤထီတလၢကၠိသ့ၣ်တဖၣ် သဂၢၢ်ဘၣ်ဒံး၀ဲဒၣ်ဒီးတၢ်ဆီၣ်ထွဲမၤစၢၤတၢ်ကီတၢ်ခဲအဂ့ၢ်န့ၣ် ကညီဘၣ်ကီဘၣ်ခဲ ကမံးတံာ် တၢ်ကူၣ်ဘၣ်ကူၣ်သ့ တၢ်မၤမုၢ်ကျၢၢ် KRCEE စံး၀ဲလီၤႉ
ဘၣ်ကီဘၣ်ခဲဒဲက၀ီၤအဂီၢ် စးထီၣ်လၢ ထံဂုၤကီၢ်ဂၤ တၢ်ဆီၣ်ထဲမွၤစၢၤလီၤစှၤ၀ဲအဆၢကတီၢ်န့ၣ် ဘၣ်ကီဘၣ်ခဲဒဲ က၀ီၤအပူၤ တၢ်ကူၣ်ဘၣ်ကူၣ်သ့လၢအပတီၢ်ထီအတၢ်မၤစၢၤတဖၣ်န့ၣ်ႇ အပူၤကွံာ် ၂၀၁၈ နံၣ် စးထီၣ်လၢနံၣ်လၢာ်န့ၣ် ထံဂုၤကီၢ်ဂၤတၢ်ကရၢကရိ အတၢ်ဆီၣ်ထွဲမၤစၢၤတအိၣ်၀ဲဒၣ်လၢာ်ဘၣ်န့ၣ်လီၤႉ
ကညီတၢ်ကရၢကရိလၢအအိၣ်လၢ ထံဂုၤကီၢ်ဂၤတဖၣ်မၤစၢၤ၀ဲဒၣ်အဃိ ဆဲးအိၣ်ဆၢထၢၣ်ဒံး၀ဲအဂ့ၢ်န့ၣ် KRCEE ၦၤနဲၣ်တၢ် နီၢ်ဒီခၢးမူ စံးဘၣ်ခ့ၣ်အဲးစံၣ်လီၤႉ
အ၀ဲစံး၀ဲလၢ “ဘၣ်ဃးဒီးတၢ်မၤစၢၤပမ့ၢ်ဘၣ်တဲန့ၣ် အခိၣ်သ့ၣ်န့ၣ်မ့ၢ်၀ဲဒၣ် ကၠိသရၣ် သရၣ်မုၣ်တဖၣ် အတၢ်မၤစၢၤလီၤႉ မ့ၢ်ဘၣ်တဲတခီန့ၣ် တၢ်ကူၣ်ဘၣ်ကူၣ်သ့လၢအပတီၢ်ထီလၢအမ့ၢ် ကၠူၣ်နံၣ်ယၢၣ် ခီလ့း (Junior College) အဂီၢ်န့ၣ် စးထီၣ်လၢအပူၤကွံာ်နံၣ်စးထီၣ်န့ၣ် တၢ်မၤစၢၤတအိၣ်၀ဲဒၣ်လၢၤဘၣ်ႉ အိၣ်၀ဲဒၣ် ထဲၦၤတ၀ၢ တၢ်ကရၢကရိတခါလီၤႉ ဘၣ်ဆၣ် ပဃု၀ဲအကျိၤအကျဲဘၣ်ဖၢလီၤ” အဂ့ၢ်န့ၣ်စံးဘၣ်ခ့ၣ်အဲးစံၣ်လီၤႉ
လၢန့ၣ်အမဲာ်ညါ ဖဲတၢ်ထံၣ်လိာ်သးဒီး ၦၤလၢအဟ့ၣ်တၢ်ကူၣ်ဘၣ်ကူၣ်သ့တၢ်မၤစၢၤတၢ်ကရၢကရိတဖၣ်န့ၣ် ဂံၢ်ခီၣ်ထံးတၢ်ကူၣ်ဘၣ်ကူၣ်သ့ကၠိတဖၣ်အဂီၢ် တၢ်ကမၤစၢၤကအိၣ်၀ဲတုၤလၢ နံၣ်လၢကဟဲဒီး တၢ်ဆီၣ်ထွဲ မၤစၢၤမ့ၢ်အိၣ်ဒံးဘၣ်ဖုးန့ၣ် တအိၣ်၀ဲလၢလၢၦဲၤၦဲၤလၢၤဘၣ်အဂ့ၢ်န့ၣ် နီၢ်ဒီခၢးမူ ဆဲးစံး၀ဲဒၣ်လီၤႉ
အပူၤကွံာ် ဘၣ်ကီဘၣ်ခဲတၢ်ကူၣ်ဘၣ်ကူၣ်သ့အဂီၢ်န့ၣ် World Education˜ Child Dream ဃုာ်ဒီး တၢ်ကူၣ်ဘၣ်ကူၣ်သ့တၢ်ကရၢကရိအဂၤတဖၣ် ဆီၣ်ထွဲမၤစၢၤ၀ဲဒၣ်လီၤႉ ဆၢကတီၢ်ခဲအံၤ ခီဖျိလၢတၢ်ဆီၣ်ထွဲ မၤစၢၤလီၤစှၤအဃိ တီၤထီတလၢကၠိတဖၣ်န့ၣ်ႇ စးထီၣ်ဖဲ ၂၀၁၈ နံၣ် တၢ်ရဲၣ်ကျဲၤသုးက့ၤအလီၢ်ဆူ ကီၢ်ပယီၤပူၤ ကီၢ်ဆၢတၢ်လီၢ်ဒီးႇ ကၠိတနီၤန့ၣ် ဖဲ ၂၀၁၄ နံၣ်န့ၣ် သုးက့ၤအလီၢ်ဆူ ခ့ၣ်အဲၣ်ယူၣ် တၢ်ပၢဟီၣ်က၀ီၤတၢ်လီၢ်တနီၤလီၤ အဂ့ၢ်န့ၣ် KRCEE စံး၀ဲလီၤႉ
ကၠိလၢအသုးကွံာ်အသးဆူကီၢ်ပူၤတဖၣ် ဒီး ဘၣ်ကီဘၣ်ခဲဒဲက၀ီၤပူၤ ကၠိလၢအအိၣ်တ့ၢ်တဖၣ်အဂီၢ် ခီပနံၣ်တဖၣ်ႇ နီၢ်တဂၤ ၦၤမၤဘူၣ်တၢ်တဖၣ် ႇ ကၠိဖိလီၢ်လံၤလၢညါတဖၣ်ဒီး နီၢ်တဂၤၦၤလၢ အလဲၤတုၤလၢထံဂုၤကီၢ်ဂၤ တဖၣ် ဆီၣ်ထွဲမၤစၢၤ၀ဲအဃိ တၢ်ဆဲးအိၣ်ဆၢထၢၣ်၀ဲဒၣ်လီၤအဂ့ၢ်န့ၣ် ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ
“ခီဖျိလၢတၢ်ဆီၣ်ထွဲမၤစၢၤလီၤစှၤ၀ဲအဃိ ကၠိသရၣ် သရၣ်မုၣ်တဖၣ်လၢကသိၣ်လိတၢ်အဂီၢ် တၢ်ခွဲးတၢ် ယာ်လီၤစှၤ၀ဲဒၣ်အသိးႇ ကၠိဖိတဖၣ်စ့ၢ်ကီး ခီဖျိလၢပဃုန့ၢ် သရၣ် သရၣ်မုၣ်တဖၣ်တလၢတၦဲၤဘၣ်အဃိ ဟးထီၣ်ကွံာ်၀ဲဒၣ်လၢကၠိအိၣ်၀ဲဒၣ်အါမးလီၤ” အဂ့ၢ်န့ၣ်နီၢ်ဒီခၢးမူ စံး၀ဲလီၤႉ
ဖဲခ့ၣ်အဲၣ်ယူၣ် တၢ်ပၢဟီၣ်က၀ီၤ ဒီး ကီၢ်ကၠီၣ်တဲၣ် ကီၢ်ပယီၤကီၢ်ဆၢဘၣ်ကီဘၣ်ခဲဒဲက၀ီၤတဖၣ်အပူၤန့ၣ် တီၤထီတလၢကၠိ အိၣ်၀ဲဒၣ် အဖျၢၣ်(၁၀)ဘျဲၣ််ဒီးႇ ဒုးအိၣ်ဖျဲၣ်ထီၣ်၀ဲ ကၠိဖိနီၣ်ဂံၢ်လၢအကထိဘျဲၣ် ကိးနံၣ်ဒဲးန့ၣ် လီၤႉ
ကၠိဖိလၢအဖျိထီၣ်ကၠိ၀ဲတဖၣ်န့ၣ် ခီဖျိလၢကီၢ်ပယီၤပဒိၣ်တဖၣ် တၢ်ပာ်ပနီၣ်တအိၣ်ဘၣ်ဃိ နုာ်လီၤဖံးမၤတၢ်လၢ ခ့ၣ်အဲၣ်ယူၣ်၀ဲၤကျိၤ၀ဲၤဒ့တဖၣ်ႇ ကညီၦၤတ၀ၢတၢ်ကရၢကရိတဖၣ် ဒီး NGOs တၢ်ကရၢကရိတဖၣ်အပူၤ အိၣ်၀ဲဒၣ်အသိးႇ တနီၤန့ၣ်ဆဲးကျိး၀ဲဒၣ်ဒီးထံဂုၤကီၢ်ဂၤခီလ့ၣ်ကၠိတဖၣ်ဒီး ဆဲးထီၣ်၀ဲကၠိန့ၣ်လီၤႉ
