လါအီကူး ၆ သီႇ၂၀၂၀ နံၣ်ႇ ခ့ၣ်အဲးစံၣ်
ကီၢ်ခိၣ်စီၤဘးအူကၠံအိၣ်ဖျဲၣ်ထီၣ်အလီၢ်လၢအမ့ၢ် အ့ၣ်ယၣ်၀တံၣ်ကီၢ်ခီဒိၣ် ကၤကၠံထီၣ်ကီၢ်ဆၣ် ဘဲကယဲးသ၀ီအပူၤ တၢ်ရဲၣ်ကျဲၤပာ်၀ဲလၢ ဖဲတနံၣ်အံၤ လါအီကူး ၁၂ သီအနံၤ လၢအလီၤဘၣ်၀ဲ နံၣ် ၇၀ ၦဲၤ ကညီဒီကလုာ်မၤထူရၤမုၢ်နံၤအံၤ ဒ်ညီနုၢ်တၢ်မၤလၤကပီၤ၀ဲလၢအပူၤကွံာ်အသိး တၢ်မၤ၀ဲဒၣ်မူးတၢ်ရဲၣ်တၢ်ကျဲၤ တကဲထီၣ်လၢၤဘၣ်အဂ့ၢ်န့ၣ် သ့ၣ်ညါဘၣ်လၢၦၤရဲၣ်ကျဲၤတၢ်ဖိတဖၣ်အအိၣ်န့ၣ်လီၤႉ
ကညီဒီကလုာ်မၤထူရၤမုၢ်နံၤ တၢ်ရဲၣ်တၢ်ကျဲၤအံၤန့ၣ် တကီၢ်ခါကီၢ်ပယီၤဃုာ်ဒီးဟီၣ်ခိၣ်ဒီဘ့ၣ် ခီဖျိလၢ Covid-19 တၢ်ဆါသံသတြိာ်ကဲထီၣ်သးအဃိ တၢ်မၤ၀ဲဒၣ်တၢ်ရဲၣ်တၢ်ကျဲၤတန့ၢ်လၢၤဘၣ်န့ၣ်လီၤႉ
“တနံၣ်အံၤ ခီဖျိလၢတၢ်ပာ်ဖှိၣ်ထီၣ်သးအါအါဂီၢ်ဂီၢ်တန့ၢ်အဃိ ကလဲၤဒ်တၢ်ရဲၣ်တၢ်ကျဲၤအသိးန့ၣ် တအိၣ်လၢၤဘၣ်ႉ ဘၣ်ဆၣ် ဖဲတၢ်တနံၤန့ၣ် ၦၤတဂၤလၢ်လၢ်လၢအဲၣ်ဒိးဟဲဟ့ၣ်ထီၣ်တၢ်ယူာ်ယီၣ်ဆူခိၣ်နၢ်ဒိၣ်ထီတဖၣ်အအိၣ်ႇ ကညီကလုာ်တဒူၣ်ဂ့ၤတဒူၣ်ဂ့ၤ ဟဲန့ၢ်၀ဲလီၤႉ လၢပ၀ဲသ့ၣ်တပၤခီဒု ဒ်တၢ်အိၣ်ဆူၣ်အိၣ်ချ့တၢ်ပာ်ပနီၣ်အသိး ပကမၤပာ်၀ဲလီၤႉ အခဲအံၤန့ၣ် ဖဲပဟဲတုၤအကတီၢ်န့ၣ် မ့ၢ်ပတၢ်ဆၢကတီၢ်လီၤႉ တၢ်ပာ်ပနီၣ်ဃာ် တၢ်ဆၢကတီၢ်တအိၣ်ဘၣ်” အဂ့ၢ်န့ၣ် တၢ်ရဲၣ်တၢ်ကျဲၤအဂီၢ် ၦၤလၢအမၤစၢၤတၢ်တဂၤ စံး၀ဲန့ၣ်လီၤႉ
တနံၣ်အံၤ အ့ၣ်ယၣ်၀တံၣ်ကီၢ်ခီဒိၣ် ကညီမၤထူရၤမုၢ်နံၤန့ၣ် ညီနုၢ်ဒ်တၢ်မၤ၀ဲမူးတၢ်ရဲၣ်တၢ်ကျဲၤတဖၣ်လၢအမ့ၢ် တၢ်စံၣ်တဲၤတဲလီၤတၢ်ရဲၣ်တၢ်ကျဲၤတဖၣ်ႇ တၢ်ဃ့ဘါထုကဖၣ် အတၢ်ရဲၣ်တၢ်ကျဲၤတဖၣ် တၢ်တမၤ၀ဲလၢၤဘၣ်ဒီး တၢ်ကမၤ၀ဲဒ်နီၢ်တဂၤအတၢ်ရဲၣ်တၢ်ကျဲၤလီၤဒီး ကဟဲဟ့ၣ်ထီၣ်တၢ်ယူးထီၣ်လၢအသဘျ့အဂီၢ် ရဲၣ်ကျဲၤပာ်၀ဲဒၣ်န့ၣ်လီၤႉ
တၢ်မၤ၀ဲဒၣ်တၢ်ရဲၣ်တၢ်ကျဲၤတန့ၢ်လၢၤ၀ဲဘၣ်ဆၣ် တနံၣ်အံၤကညီဒီကလုာ်မၤထူရၤမုၢ်နံၤအံၤ ဒ် တၢ်ပာ်ပနီၣ်ဃာ်၀ဲတၢ်အိၣ်ဆူၣ်အိၣ်ချ့တၢ်သိၣ်တၢ်သီတဖၣ်အသိး ဘဲကယဲးသ၀ီ ကညီဒီကလုာ်ကီၢ်ခိၣ်စီၤဘးအူကၠံ တၢ်သ့ၣ်နီၣ်လၢၢ်ထူၣ်န့ၣ် ၦၤကိးဂၤဒဲးဟဲဟ့ၣ်တၢ်ယူးယီၣ်သ့၀ဲအဂ့ၢ်န့ၣ် ၦၤရဲၣ်ကျဲၤတၢ်ဖိတဖၣ် ကွဲမုာ်၀ဲန့ၣ်လီၤႉ
လၢန့ၣ်အမဲာ်ညါ တနံၣ်အံၤ ကညီမၤထူရၤမုၢ်နံၤအံၤ ၦၤလၢကဟဲဟ့ၣ်တၢ်ယူးယီၣ်တဖၣ်အဂီၢ် တၢ်အီၣ်တၢ်အီႇ တၢ်သ့စုအလီၢ်ႇ တၢ်ထိၣ်တၢ်ကိၢ်လီၢ်ႇ တၢ်ကဘၣ်ကးဘၢနါဒ့ ဃုာ်ဒီးတၢ်ပာ်ပနီၣ်ဃာ် တၢ်အိၣ်ဆူၣ်အိၣ်ချ့တၢ်သိၣ်တၢ်သီအသိး တၢ်ကတဲာ်ကတီၤပာ်၀ဲဒၣ်အဂ့ၢ်န့ၣ် သ့ၣ်ညါဘၣ်လီၤႉ
အ့ၣ်ယၣ်၀တံၣ် ဒီး ၀့ၢ်တကူၣ်ကီၢ်ခီဒိၣ်တဖၣ်အပူၤ ဘၣ်ထွဲဒီးတၢ်မၤ၀ဲဒၣ်ကညီမၤထူရၤမုၢ်နံၤအံၤန့ၣ် အပူၤကွံာ်တၢ်တဘၣ်သူ၀ဲမၤထူရၤ၀ီၢ်သြဲဘၣ်အံၤ တၢ်တြီဃာ်အိၣ်၀ဲအမဲာ်ညါ ၦၤလၢအတီခိၣ်ရိၣ်မဲ ရဲၣ်ကျဲၤတၢ်ရဲၣ်တၢ်ကျဲၤအံၤတနီၤ ကဲထီၣ်သးတုၤ၀ဲလၢတၢ်ကဟံအရ့အံၤအိၣ်၀ဲဒၣ်န့ၣ်လီၤႉ
