လါစဲးပထ့ဘၢၣ် ၁၀ သီႇ ၂၀၂၀ နံၣ်ႇ ခ့ၣ်အဲးစံၣ်
ဖဲအပူၤကွံာ်စှၤသီန့ၣ် တၢ်ကဲထီၣ်သးလၢ ၦၤတဒူၣ်လၢအမၤသံ၀ဲဒၣ်ၦၤကညီ၂ ဂၤ ဖဲဖၣ်အၣ်ကီၢ်ရ့ၣ် တၢ်ကြဲၢ်ကီၢ်ဆၣ်ႇ သ့ၣ်မီၤကျူၣ်သ၀ီအံၤန့ၣ် တကီၢ်ခါဆၢကတီၢ်ခဲအံၤ တၢ်ဖီၣ်အ၀ဲသ့ၣ်ဒီးဟံအရ့လံအဂ့ၢ်န့ၣ် ဟီၣ်က၀ီၤ KNU-ညီဒီကလုာ်စၢဖှိၣ်ကရၢ ၦၤဘၣ်မူဘၣ်ဒါတဂၤ စံးဘၣ်ခ့ၣ်အဲးစံၣ် ဖဲလါစဲးပထ့ဘၢၣ် ၉ သီအနံၤန့ၣ်လီၤႉ
တၢ်ကဲထီၣ်သးန့ၣ် ဖဲအပူၤကွံာ် လါစဲးပထ့ဘၢၣ် ၁ သီအနံၤ မဲၢ်ပျၤခံသ၀ီဖိလၢအဟဲဆှၢဒိးလဲကျီၢ် ၂ ဂၤအံၤ ဟဲနီထီၣ်ကျီၢ်တုၤ၀ဲဒၣ်ဖဲလၢၢ်ကဆီတၢ်လီၢ်အံၤအဆၢကတီၢ် ၦၤတဒူၣ်အံၤဖီၣ်စၢဃာ်၀ဲဒီး မၤသံ၀ဲတုၤလၢအသံတစုလီၤအဂ့ၢ်န့ၣ် ၦၤဘၣ်မူဘၣ်တဖၣ် စံး၀ဲဒ်အံၤလီၤႉ
အ၀ဲစံး၀ဲလၢ “ၦၤ ၂ ဂၤအံၤန့ၣ် မ့ၢ်၀ဲဒၣ်ၦၤလၢအဟးဆှၢတူၢ်ငါကျီၢ်န့ၣ်လီၤႉ ဖဲအတုၤလၢလၢၢ်ကဆီတၢ်လီၢ်အခါ ၦၤတဒူၣ်န့ၣ် ဖီၣ်၀ဲဒၣ်ၦၤ ၂ ဂၤအံၤ၀ံၤ တတဲတၢ်နီတမံၤဘၣ်ဒီး မၤသံ၀ဲတဘျီဃီလီၤႉ ဘၣ်မနုၤအဃိလၢဘၣ်မၤသံ၀ဲဒၣ်အၢအၢသီသီထဲအံၤလဲၣ်န့ၣ် ပ၀ဲသ့ၣ်တဖၣ်စ့ၢ်ကီးတုၤခဲအံၤတသ့ၣ်ညါဒံးဘၣ်ႉ ခဲအံၤ ၦၤလၢအမၤကမၣ်တၢ်တဖၣ်န့ၣ် တၢ်ဖီၣ်ဒီးဟံအရ့လံလီၤ” အဂ့ၢ်န့ၣ် စံး၀ဲလီၤႉ
တၢ်ဂ့ၢ်တၢ်ကျိၤမနုၤလဲၣ်လၢဘၣ်မၤသံ၀ဲဒီး ၦၤလၢအနဲၣ်လီၤမၢ၀ဲန့ၣ်မ့ၢ်မတဂၤလဲၣ်စ့ၢ်ကီးန့ၣ် တၢ်ဆဲးဃုသ့ၣ်ညါ၀ဲအဖၢမုၢ်ဒီး တၢ်မၤဖျါထီၣ်တၢ်ကဲထီၣ်သးလီၤတံၢ်လီၤဆဲးမ့န့ၢ်မး တၢ်ကထုးထီၣ်ပာ်ဖျါ၀ဲလၢအဖိးသဲစးအဂ့ၢ်န့ၣ် ခ့ၣ်အဲၣ်ယူၣ် ၦၤဘၣ်မူဘၣ်ဒါတဖၣ် စံး၀ဲလီၤႉ
ဘၣ်ထွဲဒီးတၢ်ဂ့ၢ်ကဲထီၣ်သးအံၤန့ၣ် ဒ်တၢ်ဂီၤမူတခါလၢအရၤလီၤသးလၢ (facebook) အပူၤအသိး ပထံၣ်ဘၣ်လၢ တၢ်ခးတံၢ်ဃာ်၀ဲဒၣ်ၦၤ ၂ ဂၤအံၤအစုလၢအလီၢ်ခံဒီး ၦၤတဒူၣ်န့ၣ် တီၢ်၀ဲမၤဒၢၣ်၀ဲႇအခိၣ်ႇကိာ်ဘိဒီး အဂုာ်ဃံကပၤအလီၢ်တဖၣ်န့ၣ် တၢ်ဆဲး၀ဲဒၣ်ဒီးဒီအဘျီဘၣ်အဘျီန့ၣ်လီၤႉ
ဒ်သိးတၢ်ကမၤဖျါထီၣ်တၢ်ကဲထီၣ်ထီၣ်သးအံၤအဂီၢ် ခ့ၣ်အဲၣ်ယူၣ် လီၢ်ခၢၣ်သး ပၢဆှၢတၢ်ကမံးတံာ်ဖိတဖၣ်ႇ ဖၣ်အၣ်ကီၢ်ရ့ၣ် ၦၤပၢၤလီၢ်ဆ့ၣ်နီၤႇ နဲၣ်ရွဲၣ်ကရူၢ်ဖိတဖၣ်ဒီး ဟီၣ်က၀ီၤ ၦၤဘၣ်မူဘၣ်ဒါတဖၣ်အံၤ ဒုးအိၣ်ထီၣ်၀ဲဒၣ်တၢ်ဃိထံသ့ၣ်ညါသမံသမိးကရူၢ် တကရူၢ်စ့ၢ်ကီးအဂ့ၢ်န့ၣ် သ့ၣ်ညါဘၣ်လီၤႉ
