ပယီၤသုး ဖီၣ်၀ဲ ကညီကီၢ်စဲၣ်ကိတိာ်ခိၣ်ကျၢၢ်ဒီး ပာ်လီၤတၢ်ဘံၣ်တၢ်ဘၢလၢကီၢ်စဲၣ်ကိတိာ်အဟံၣ်ဒီးဘျီၣ်ဒိၣ်ရူတဖၣ်

လါဖ့ၤဘြူၤအါရံၤ ၁ သီႇ ၂၀၂၁ နံၣ်ႇ ခ့ၣ်အဲးစံၣ်

ကညီကီၢ်စဲၣ်ႇ ဖၣ်အၣ်၀့ၢ် ကီၢ်စဲၣ်ပဒိၣ်ကရူၢ်ဖိ ကိတိာ်အဟံၣ်ကရၢၢ်ဒီး ကီၢ်စဲၣ်ဘျီၣ်ဒိၣ်ကရၢၢ်ပူၤတဖၣ် ဖဲတနံၤအံၤ(လါယနူၤအါရံၤ ၁ သီ)ဂီၤခီအဆၢကတီၢ်န့ၣ် ကီၢ်ပယီၤသုးဟဲပာ်လီၤ၀ဲတၢ်ဘံၣ်တၢ်ဘၢအဂ့ၢ်န့ၣ် လီၢ်က၀ီၤဖိလၢအထံၣ်ဘၣ်ဒီးအမဲာ်တဖၣ် စံး၀ဲန့ၣ်လီၤႉ

လီၢ်က၀ီၤဖိတဂၤစံး၀ဲလၢ “ဖဲယလဲၤကပာ်ဘၣ်ဒီးထံၣ်လၢကိတိာ်အဟံၣ်န့ၣ် တၢ်ကးတံၢ်၀ဲဒီးထးပဲတြီဃံးဃံးလီၤႉ လၢတၢ်ခိၣ်ထိးန့ၣ် သုးဖိတဖၣ်အိၣ်ခိးတၢ်လီၤႉ ဘျီၣ်ဒိၣ်ရူစ့ၢ်ကီးဒ်န့ၣ်အသိးလီၤႉ ကျဲလၢအဂၤတဖၣ်န့ၣ်ဟးထီၣ်က့ၤလီၤဒ်လၢညါအသိးလီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

ဖဲတနံၤအံၤဂီၤခီ ဒ်ပနၢ်ဟူဘၣ်တၢ်ကစီၣ်အသိးန့ၣ် ပယီၤသုးဟဲဖီၣ်၀ဲ ကီၢ်စဲၣ်ကိတိာ်ခိၣ်ကျၢၢ် နါခ့ၤထွ့မၠ့ၣ်ႇ ကီၢ်ခီဒီးကီၢ်စဲၣ် ကိတိာ်ခိၣ်ကျၢၢ်တဖၣ်ႇ ၦၤဟူးဂဲၤတၢ်ဖိတနီၤဒီး ထံကီၢ်ၦၤဟ့ၣ်ကူၣ်တၢ် ဒီၣ်အီၣ်ဆါဆူးကၠံၣ်ႇ ထံကီၢ် ကီၢ်ခိၣ် အူ၀့မၠ့ၣ်တဖၣ်စ့ၢ်ကီး လၢမုၢ်နၤခီအဆၢကတီၢ် ပယီၤသုးဟဲဖီၣ်အ၀ဲသ့ၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဘၣ်ထွဲဒီးတၢ်အိၣ်သးကဲထီၣ်သးတဖၣ်အံၤ တၢ်ဆဲးကျိးအကျိၤတဖၣ်စ့ၢ်ကီးတၢ်ပတုာ်ကွံာ်၀ဲအမဲာ်ညါ ကီၢ်ပယီၤကွဲၤဟူဖျါ(MRTV)ဒီး ကီၢ်ပယီၤကွဲၤလ့လိၤတဖၣ် တၢ်ထုးထီၣ်ဘိးဘၣ်ရၤလီၤ၀ဲတအိၣ်ဒံးဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဘၣ်ဆၣ် သုးမုၢ်ဒိၣ်တၢ်ဘိးဘၣ်ရၤလီၤတၢ်ကစီၣ်လၢအမ့ၢ်အတီ(social media)အပူၤ ဖဲလါယနူၤအါရံၤ ၃၁ သီ သုးမုၢ်ဒိၣ်တၢ်ဒီသဒၢ၀ဲၤလီၢ်ခိၣ်သ့ၣ်ရူ လံာ်တၢ်ပာ်ဖျါအပူၤပာ်ဖျါ၀ဲလၢ“သုးမုၢ်ဒိၣ်အံၤ တၢ်မုာ်တၢ်ခုၣ်လၢအအိၣ်ကၢအိၣ်ယံၤႇ ကီၢ်ပယီၤထံဖိကီၢ်ဖိတဖၣ်ခဲလၢာ် ကအိၣ်ဘီၣ်အိၣ်ညီအဂီၢ် တၢ်သူၣ်ထီၣ်တၢ်ဘျၢသဲးစးခိၣ်သ့ၣ်(၂၀၀၈ နံၣ်) တၢ်ပာ်ပနီၣ်ဃာ်၀ဲလၢအမ့ၢ် တၢ်ဃုထၢလၢအသဘျ့အတီအတြၢ်ဒံၣ်မိၣ်ခြ့ၣ်စံၣ်အပတီၢ်တဖၣ်အံၤ ဒ်သိးကလူၤပိာ်မၤထွဲ၀ဲအဂီၢ် ကဟံးထီၣ်ဖီၣ်ထီၣ်၀ဲလီၤ” အဂ့ၢ်န့ၣ် ပာ်ဖျါဃာ်၀ဲန့ၣ်လီၤႉ

ဒ်န့ၣ်အသိး ဖဲတနံၤအံၤဂီၤခီ မၠၣ်၀တံၣ်ကွဲၤဟူဖျါ ထုးထီၣ်ရၤလီၤတၢ်ကစီၣ်အပူၤစံး၀ဲလၢ တၢ်တဘှါရှဲတၢ်ဃုထၢတၢ်ဖးစရီလၢအကမၣ်တဖၣ်ဘၣ်ဒီး မၤဟးဂီၤ၀ဲထံကီၢ်တၢ်ဂၢၢ်တၢ်ကျၢၤတဖၣ်အဃိ တၢ်သူၣ်ထီၣ်တၢ်ဘျၢသဲစးခိၣ်သ့ၣ်(၂၀၀၈)နံၣ်ႇ အဆၢဒိၣ်(၄၁၇)အသိး ထုးထီၣ်ဘိးဘၣ်ရၤလီၤ၀ဲလၢ ထံကီၢ်အိၣ်၀ဲလၢဂ့ၢ်ဂီၢ်အူတၢ်အိၣ်သးတနံၣ်အဂ့ၢ်န့ၣ် ထုးထီၣ်ပာ်ဖျါ၀ဲတၢ်ကစီၣ်န့ၣ်လီၤႉ

ဖဲလါဖ့ၤဘြူၤအါရံၤ(၁)သီအနံၤန့ၣ် မ့ၢ်၀ဲဒၣ် သၢဘျီတဘျီ တၢ်စးထီၣ်ကိး၀ဲကမျၢၢ်ဘျီၣ်ဒိၣ်တၢ်အိၣ်ဖှိၣ်မုၢ်နံၤစ့ၢ်ကီးန့ၣ်လီၤႉ