သုးမီၤစိရိၤအသုးဟဲခးကဒီး၀ဲ သုးက့ ၅ ဟီၣ်က၀ီၤ ဒ့ၣ်ပူၤနိၣ်သ၀ီ တၢ်ဘၣ်ဒိၣ်ထံးအိၣ်

လါမးရှး ၂၉ သီႇ ၂၀၂၁ နံၣ်ႇ ခ့ၣ်အဲးစံၣ်

ဖဲမဟါ လါမးရှး ၂၈ သီ မုၢ်နၤခီအဆၢကတီၢ် သုးမီၤစိရိၤအသုးကဘီယူၤဟဲခးကဒီး သုးက့ ၅ ဟီၣ်က၀ီၤ ဒ့ၣ်ပူၤနိၣ်သ၀ီဒီး ဖဲန့ၣ်တၢ်ဘၣ်ဒိဘၣ်ထံးတၢ်ဟးဂုၤဟးဂီၤအိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဖဲမဟါ ၁၁ နၣ်ရံၣ် ၄၀ မံးနံး တုၤလၢ ဂီၤခီ ၃ နၣ်ရံၣ်တခီအဆၢကတီၢ် သုးမီၤစိရိၤအသုးဟဲခးလီၤတၢ်အိၣ်၀ဲ ၃ ဘျီညါဒီး ဖဲန့ၣ်ဟံၣ်ဃီတနီၤမ့ၣ်အူအီၣ်ဟးဂီၤကွံာ်၀ဲအသိး သ၀ီဖိတဂၤဘၣ်ဒိဘၣ်ထံး၀ဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဖဲလါမးရှး ၂၇ သီ ဂီၤခီအဆၢကတီၢ် KNU သုးက့ ၅ ထီၣ်ဒုးဟံးန့ၢ်ကွံာ် သုးမီၤစိရိၤအသုးကလၢၤလၢအအိၣ်ဆီလီၤသးဖဲဃိၣ်လိာ်ကျိကၢၢ်နံၤသံမုၢ်ထၣ်တၢ်လီၢ်၀ံၤအလီၢ်ခံ သုးမီၤစိရိၤအသုးဟဲခးတၢ်ဒီးကဘီယူၤဟဲကဲထီၣ်အသးန့ၣ်လီၤႉ

ဖဲအပူၤကွံာ် လါမးရှး ၂၇ သီ ဟါခီ ၇ နၣ်ရံၣ် တုၤလၢ ဂီၤခီ ၂ နၣ်ရံၣ်အဆၢကတီၢ် ခီဖျိမီၤစိရိၤအသုးဟဲခး မုၢ်တြီၢ်ကီၢ်ရ့ၣ် သုးက့ ၅ သုး၀ဲၤလီၢ်ခိၣ်သ့ၣ်ဒီးကဘီယူၤ ၂ ဘ့ၣ်အဃိ သ၀ီဖိသံ၀ဲ ၃ ဂၤဒီး ဘၣ်ဒိ၀ဲ ၈ ဂၤအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ဘိးဘၣ်ရၤလီၤ၀ဲန့ၣ်လီၤႉ

ခီဖျိတၢ်ကစီၣ်ဟူထီၣ်လၢမီၤစိရိၤအသုးကဟဲခးတၢ်ဒီးကဘီယူၤအဃိ မဲၢ်နုာ်ထၣ်ႇဃိၣ်က့ၣ်ႇအံတူၢ်ထၣ် လီၢ်က၀ီၤဖိတဖၣ်ဒီး လီၢ်က၀ီၤဖိလၢအအိၣ်ဖဲဃိၣ်လိာ်ကျိကၢၢ်နံၤအကပိၤကပၤ ပာ်ဖှိၣ်ခဲလၢာ်အဂၤ ၃ႇ၀၀၀ ဘျဲၣ် လဲၤဃ့ၢ်၀ဲဒၣ်ဆူကီၢ်ကၠီၣ်တဲၣ်တကပၤလံန့ၣ်လီၤႉ ၦၤလၢအဃ့ၢ်မှံဟးဖျိတဖၣ် တဒိးန့ၢ်ဘၣ်တၢ်မၤစၢၤဒံးဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ခီဖျိပယီၤသုးမီၤစိရိၤအသုးသူ၀ဲကဘီယူၤဒီး ဟဲထီၣ်ခး၀ဲကညီကမျၢၢ်ထံဖိကီၢ်ဖိလၢအတၢ်ကမၣ်တအိၣ်ဘၣ်တဖၣ်အဖီခိၣ် ကညီပိာ်မုၣ်ကရၢ(KWO)ပဲာ်အၢပဲာ်သီ၀ဲတဲာ်တဲာ်ဖျုဖျုအဂ့ၢ်န့ၣ် ထုးထီၣ်ပာ်ဖျါ၀ဲန့ၣ်လီၤႉ

ဒ် KWO လံာ်ထုးထီၣ်ပာ်ဖျါအပူၤပာ်ဖျါ၀ဲလၢ ခီဖျိသုးမီၤစိရိၤအသုးဟဲထီၣ်ခးတၢ်ဒီးကဘီယူၤအဃိ ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်ႇလူၢ်သီကီၢ်ဆၣ်အပူၤ လီၢ်က၀ီၤသ၀ီဖိ ၁၀ႇ၀၀၀ ဘျဲၣ် ဘၣ်ဃ့ၢ်မှံအိၣ်ခူသူၣ်လၢၦၢ်လၢ်ကျါန့ၣ်လီၤႉ