Home တၢ်ကစီၣ် သုးမီၤစိရိၤအသုးဒီး BGF သုး ခး၀ဲအဃိ ဘၣ်ဒိ၀ဲကမျၢၢ် ၂ ဂၤ

သုးမီၤစိရိၤအသုးဒီး BGF သုး ခး၀ဲအဃိ ဘၣ်ဒိ၀ဲကမျၢၢ် ၂ ဂၤ

1132
0

လါမ့ၤ ၂၈ သီႇ ၂၀၂၁ နံၣ်ႇ ခ့ၣ်အဲးစံၣ်

သုးမီၤစိရိၤအသုးဒီး BGF သုးပာ်ဖှိၣ်ကရူၢ် လၢအအိၣ်ခိးတၢ်ဖဲရၤမတံ(မၠၣ်၀တံၣ်)=မဲၢ်ထီးသလ့ကျဲ တၢ်သမံသမိးတြဲၤ(မံလီၤခၠီတိၤ)ကျဲဖီခိၣ်တဖၣ် ခး၀ဲသိလ့ၣ်တခိၣ်လၢအတဒုးသမံသမိးသးဘၣ်အဃိ ဖဲန့ၣ် ကမျၢၢ် ၂ ဂၤ ဘၣ်ဒိ၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဖဲတနံၤအံၤ(လါမ့ၤ ၂၈)သီ မုၢ်ထူၣ် ၁၂ နၣ်ရံၣ်အဆၢကတီၢ် ရၤမတံ၀့ၢ် နီၣ်ဂံၢ် ၃ က၀ီၤဒ့ ရၤမတံ =မဲၢ်ထီးသလ့ကျဲမုၢ်ခိၣ် မံလီၤခၠီတိၤအကပၤ သုးမီၤစိရိၤအသုးဒီး BGF သုးပာ်ဖှိၣ်တဖၣ် ဖဲအသမံသမိး သိလ့ၣ်ဟးထီၣ်ဟးလီၤတဖၣ်အကတီၢ် ခီဖျိသိလ့ၣ်တခိၣ်တအိၣ်ပတုာ်ဘၣ်ဒီးနီစံၣ်၀ဲအဃိ တၢ်လူၤခး၀ဲအဂ့ၢ်န့ၣ် ကမျၢၢ်လၢအအိၣ်က၀ီၤဒ့ပူၤတဖၣ် စံး၀ဲန့ၣ်လီၤႉ

ဖဲလၢတၢ်လူၤခး၀ဲသိလ့ၣ်အဆၢကတီၢ် ကျိချံဘၣ်၀ဲဒၣ်ကမျၢၢ်လၢအအိၣ်လၢသိၣ်လ့ၣ်ပူၤ ၁ ဂၤဒီး ၦၤနီဒိးလဲသိလ့ၣ်ယီၢ်လၢအဟးထီၣ်က့ၤလီၤ ၁ ဂၤ ဘၣ်ဒိဘၣ်ထံး၀ဲအဃိ ခဲအံၤတၢ်လဲၤဆှၢ ကူဆါယါဘျါအ၀ဲသ့ၣ်လၢသ့ၣ်ကါညံၣ်နီၣ်သုးမီၤစိရိၤအသုးတၢ်ဆါဟံၣ်အဂ့ၢ်န့ၣ် က၀ီၤဒ့ ၦၤဘၣ်မူဘၣ်ဒါတဖၣ် စံး၀ဲန့ၣ်လီၤႉ

လၢန့ၣ်အမဲာ်ညါ ခီဖျိသုးမီၤစိရိၤအသုးဘံၣ်ဘၢကရူၢ်ခး၀ဲအဃိ ပိာ်မုၣ်တဂၤဘၣ်ဒီးကျိသံ၀ဲဒၣ်အဂ့ၢ်န့ၣ် လီၢ်က၀ီၤကမျၢၢ်တနီၤစံး၀ဲဒၣ်ဘၣ်ဆၣ် ခ့ၣ်အဲးစံၣ်=ကညီတၢ်ကစီၣ်၀ဲၤလီၢ်ခိၣ်သ့ၣ် ပာ်ဂၢၢ်ပာ်ကျၢၤ၀ဲလီၤလီၤဆီဆီတန့ၢ်ဒံးဘၣ်န့ၣ်လီၤႉ

စးထီၣ်ဖဲတနံၤအံၤဂီၤခီန့ၣ် ရၤမတံ၀့ၢ်ချၢဒီးတၢ်ကနုာ်လီၤ၀့ၢ်ပူၤကျဲခိၣ်ထိး ဃုာ်ဒီးတၢ်ကဲထီၣ်သးအလီၢ်ခဲအံၤတဖၣ် သုးမီၤစိရိၤအသုးဒီး BGF သုးပာ်ဖှိၣ်ကရူၢ်တဖၣ် ဆီလီၤ၀ဲဒၣ်တၢ်ဘံၣ်တၢ်ဘၢတဖၣ်ဒီး ကွၢ်ဃုသမံသမိး၀ဲတၢ်အိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ