လါမ့ၤ ၂၈ သီႇ ၂၀၂၁ နံၣ်ႇ ခ့ၣ်အဲးစံၣ်
ဖဲအပူၤကွံာ်(လါမ့ၤ ၂၅)သီအနံၤ ခ့ၣ်အဲၣ်ယူၣ်=ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤ ချၢၣ်လွံၣ်ထူၣ်ကီၢ်ရ့ၣ်(သုးက့ ၃)ႇလၢၢ်ဒိၣ်ကီၢ်ဆၣ်အပူၤ လၢၢ်ဒိၣ်=မုၢ်သဲးကျဲမုၣ်ဖီခိၣ် ခီဖျိခ့ၣ်အဲၣ်ယူၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ် -KNLA ဒီး သုးမီၤစိရိၤအသုးတဖၣ်အဘၢၣ်စၢၤ တၢ်ခးလိာ်သးကဲထီၣ်အဃိ လီၢ်က၀ီၤပိာ်မုၣ်တဂၤဘၣ်ဒိ၀ဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
သုးမီၤစိရိၤအသုးလၢအဟဲထီၣ်ဒီးသိလ့ၣ်ဖဲလၢၢ်ဒိၣ်=မုၢ်သဲးကျဲမုၢ်ဖီခိၣ်အံၤ တၢ်ခးလိာ်သးကဲထီၣ်၀ဲဒၣ်ဒီး ဟီၣ်က၀ီၤ KNLA အသုးတဖၣ်ဒီး လၢတၢ်ခးလိာ်သးဘျီ၀ဲအံၤအပူၤ ခီဖျိသုးမီၤစိရိၤအသုးတကပၤသူ၀ဲဒၣ်ကျိဖးဒိၣ်အဃိ ဘၣ်၀ဲဒၣ်ပိာ်မုၣ်လၢအအိၣ်ဘူးဖဲန့ၣ်တဂၤလၢအဟံၣ်ပူၤန့ၣ်လီၤႉ
လၢန့ၣ်အမဲာ်ညါ တၢ်ခးလိာ်သးကဲထီၣ်ဘျီ၀ဲအံၤအပူၤ ခီဖျိကျိဖးဒိၣ်အချံလီၤတဲာ်၀ဲဒၣ်ကျးပူၤဒီးကမျၢၢ်အကရၢၢ်ပူၤအဃိ တၢ်ဘၣ်ဒိဘၣ်ထံးအိၣ်၀ဲတနီၤအဂ့ၢ်န့ၣ် KNU တၢ်ဘိးဘၣ်ရၤလီၤတၢ်ကစီၣ်၀ဲၤကျိၤ ထုးထီၣ်ဘိးဘၣ်ရၤလီၤ၀ဲ ဖဲ(လါမ့ၤ ၂၆)သီအနံၤန့ၣ်လီၤႉ
သုးမီၤစိရိၤအသုးလၢအအိၣ်လၢၢ်ဒိၣ်ကီၢ်ဆၣ်အပူၤတဖၣ် ပာ်လီၤ၀ဲဒၣ်တြဲၤဒီးသမံးသမိးတၢ်ႇ မၤပျံၤမၤဖုး၀ဲကမျၢၢ်တဖၣ်ႇ ဖီၣ်ဒုးဃာ်ကမျၢၢ်လၢတၢ်ဂ့ၢ်တအိၣ်နီတမံၤဘၣ်ဒီး ဖီၣ်ဃံး၀ဲတၢ်အံၤ လ့ၤတက့ၤတတူၢ်လိာ်ဘၣ်အသိး သုးမီၤစိရိၤအသုးဟူးဂဲၤမၤ၀ဲတၢ်ထီၣ်ဒုးတဖၣ်အံၤ လ့ၤတက့ၤတတူၢ်လိာ်ဘၣ်အဂ့ၢ်န့ၣ် KNU လၢၢ်ဒိၣ်ကီၢ်ဆၣ် ထုးထီၣ်ပာ်ဖျါ၀ဲဖဲ(လါမ့ၤ ၁၂)သီအနံၤန့ၣ်လီၤႉ
သုးမီၤစိရိၤအသုးလၢအအိၣ်ဖဲလၢၢ်ဒိၣ်ကီၢ်ဆၣ်အပူၤတဖၣ် ဖဲအပူၤကွံာ်(လါမ့ၤ ၂၄)သီအနံၤစ့ၢ်ကီး ဖီၣ်က့ၤကိး၀ဲဒၣ်လီၢ်က၀ီၤ ၦၤဂ့ၢ်၀ီကရၢဖိ နီၢ်အ့ကၠၤဒံးန့ၣ်လီၤႉ ဒ်သိးတၢ်ကပျၢ်လီၤကွံာ်နီၢ်အ့ကၠၤလၢအဆိအချ›အဂီၢ်ဒီး မ့ၢ်တပျၢ်လီၤဘၣ်န့ၣ် ကက့ၤခီၣ်ဆၢကဒါ၀ဲတဲာ်တဲာ်ဖျုဖျုအဂ့ၢ်န့ၣ် လီၢ်က၀ီၤၦၤဂ့ၢ်၀ီတၢ်ကရၢကရိထုးထီၣ်ပာ်ဖျါ၀ဲစံး၀ဲန့ၣ်လီၤႉ
တကီၢ်ခါခဲအံၤ လီၢ်က၀ီၤၦၤဂ့ၢ်၀ီနီၢ်အ့ကၠၤလၢတၢ်ဖီၣ်ဃာ်၀ဲအံၤ အဟံၣ်ဖိဃိဖိတဖၣ်စ့ၢ်ကီး အိၣ်လၢအဟံၣ်တဘူၣ်လၢၤဘၣ်ဒီး ဘၣ်ဟးစံၣ်အိၣ်ခူသူၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ
