လါမ့ၤ ၂၅ သီႇ ၂၀၂၁ နံၣ်ႇ ခ့ၣ်အဲးစံၣ်
ကညီကီၢ်စဲၣ် သုးကီၣ်ကးဟ့ၣ်လီၤဆီၣ်ထွဲ၀ဲဟုသးဆူကညီဖီၣ်စုက၀ဲၤကရူၢ် ၂ ဒူၣ်လၢအမ့ၢ် တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ် -DKBA ဒီး ကညီတၢ်မုာ်တၢ်ခုၣ်ကီၣ်ကး KNU/KNLA(PC) တဖၣ်အဂီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
တၢ်ဟ့ၣ်လီၤမၤစၢၤဟုသးတၢ်ဆီၣ်ထွဲအံၤ တၢ်ဟ့ၣ်လီၤမၤ၀ဲဒၣ်ဖဲ(လါမ့ၤ ၂၂)သီ ကီၢ်စဲၣ်သုးကီၣ်ကးရူ တၢ်အိၣ်ဖှိၣ်ဘျီၣ်အပူၤဒီး တၢ်ရ့လိာ်မုာ်လိာ်၀ဲၤဒၢးၦၤဘၣ်မူဘၣ်ဒါလၢအဘၣ်ထွဲတဖၣ် လဲၤထီၣ်ဟံးန့ၢ်၀ဲဒၣ်န့ၣ်လီၤႉ တၢ်မၤစၢၤဆီၣ်ထွဲဟ့ၣ်လီၤ၀ဲဒၣ် DKBA ဟုသးအထၢၣ်(၅၀၀)ဒီး KNU/KNLA(PC) ဟုသးအထၢၣ်(၄၅၀)အဂ့ၢ်န့ၣ် ကီၢ်စဲၣ်သုးကီၣ်ကးတၢ်ဘိးဘၣ်ရၤလီၤဒီး တၢ်ဒီတဒၢကမျၢၢ်ကိတိာ်၀ဲၤကျိၤထုးထီၣ်ပာ်ဖျါတၢ်ကစီၣ်အသိး သ့ၣ်ညါဘၣ်န့ၣ်လီၤႉ
ဘၣ်ထွဲဒီးတၢ်ဆီၣ်ထွဲမၤစၢၤ၀ဲဟုသးတၢ်ဂ့ၢ်အံၤ KNU/KNLA(PC) နဲၣ်ရွဲၣ်သဃဲၤ(၁)စီၤကၠီၤညိၣ် စံး၀ဲလၢ “တၢ်တခါအံၤ မၤ၀ဲလၢညါလံၤလံၤလံမီၤနီၤ တမ့ၢ်လၢခဲအံၤဘၣ်ႉ ဒ်သိးပသ့ၣ်ညါဘၣ်န့ၣ် ဟုသးအထၢၣ် ၁၀၀ ဘျဲၣ်လီၤႉ တမ့ၢ်ဆီၣ်ထွဲမၤစၢၤကျိၣ်စ့ဘၣ်ႉ မၤစၢၤ၀ဲဒၣ်တနံၣ်တဘျီခံဘျီအိၣ်စ့ၢ်မီၤႉ တမ့ၢ်လၢကိးဘျီဒဲးဘၣ်” အဂ့ၢ်န့ၣ် စံးဘၣ်ခ့ၣ်အဲးစံၣ်=ကညီတၢ်ကစီၣ်၀ဲၤလီၢ်ခိၣ်သ့ၣ်န့ၣ်လီၤႉ
လၢန့ၣ်အမဲာ်ညါ တၢ်ဆီၣ်ထွဲမၤစၢၤတဖၣ်အံၤ လၢပဒိၣ်အစိၤဘၣ်အစိၤ လၢတၢ်မုာ်တၢ်ခုၣ်ကရူၢ်တဖၣ်အဂီၢ် ကီၢ်ဆၢဂ့ၢ်၀ီကိတိာ်၀ဲၤကျိၤ ပာ်လီၤ၀ဲဒၣ်(ဘးကၠဲၤ)တဖၣ်ဒီး ကိးနံၣ်ဒဲးတၢ်ဆီၣ်ထွဲမၤစၢၤအိၣ်၀ဲလီၤအဂ့ၢ်န့ၣ် ကီၢ်စဲၣ်သုးကီၣ်ကးတၢ်ဘိးဘၣ်ရၤလီၤဒီး တၢ်ဒီတဒၢကမျၢၢ်ကိတိာ်၀ဲၤကျိၤထုးထီၣ်ပာ်ဖျါတၢ်ကစီၣ်အသိး သ့ၣ်ညါဘၣ်န့ၣ်လီၤႉ
တၢ်ဟ့ၣ်လီၤဆီၣ်ထွဲဟုသးတၢ်ရဲၣ်တၢ်ကျဲၤအပူၤ ကီၢ်စဲၣ်သုးကီၣ်ကး ၦၤပၢၤလီၢ်ဆ့ၣ်နီၤ စီၤမၠ့ၣ်အူႇ မုၢ်ထီၣ်ကလံၤ ထံးကီၢ်ခီသုး၀ဲၤလီၢ်ခိၣ်သ့ၣ် ကီၢ်ခီခိၣ်(၂)ဒီး DKBA ဒီး KNU/KNLA(PC) တၢ်ရ့လိာ်မုာ်လိာ်၀ဲၤဒၢး ၦၤဘၣ်မူဘၣ်ဒါတဖၣ်ဟဲထီၣ်၀ဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
တကီၢ်ခါဆၢကတီၢ်ခဲအံၤ ခီဖျိကီၢ်ပယီၤထံရူၢ်ကီၢ်သဲးတၢ်ဂၢၢ်တၢ်ကျၢၤတအိၣ်ဒံးဘၣ်အဃိ DKBA ဒီး KNU/KNLA(PC) အံၤ တူၢ်လိာ်၀ဲဒၣ်သုးကီၣ်ကးအတၢ်ဆီၣ်ထွဲမၤစၢၤဃုာ်ဒီး ဖဲအပူၤကွံာ် လါအ့ဖြ့ၣ် ၂၆ သီအနံၤ အတၢ်လဲၤထံၣ်လိာ်သးဒီးသုးကီၣ်ကးအဖီခိၣ် လၢကမျၢၢ်ထံဖိကီၢ်ဖိတဖၣ်အဘၢၣ်စၢၤ တၢ်ပဲာ်ထံနီၤဖးတဖၣ်စ့ၢ်ကီးဟဲအိၣ်ထီၣ်၀ဲအကလုာ်ကလုာ်န့ၣ်လီၤႉ
