လါမ့ၤ ၂၀ သီႇ ၂၀၂၁ နံၣ်ႇ ခ့ၣ်အဲးစံၣ်
ကညီကမျၢၢ်ထံဖိကီၢ်ဖိလၢအအိၣ်လၢတၢ်လီၢ်တတီၤဂ့ၤတတီၤဂ့ၤ ဖဲလၢမ့ၢ်ထုးထီၣ်ရၤလီၤတၢ်ကစီၣ်ခါ ကဒဲကဒဲအဘၢၣ်စၢၤဒ်သိးသုတကဲထီၣ်တၢ်ဘၣ်ဒိဘၣ်ထံးတဂ့ၤအဂီၢ် ကဟးဆှဲသကိးအီၤအဂ့ၢ် ကညီတၢ်ထူၣ်ဖျဲးသုးမုၢ်ဒိၣ် ၀ဲၤလီၢ်ခိၣ်သ့ၣ် ပၢဆှၢသုးဂ့ၢ်၀ီခိၣ်ကျၢၢ် သုးခိၣ်ကျၢၢ်ဂီၢ်ဂ့ၢ် စီၤပံလးစ့ၣ် ဃ့သကွံာ်ကညး၀ဲန့ၣ်လီၤႉ
တကီၢ်ခါလၢကညီကမျၢၢ်ထံဖိကီၢ်ဖိအကျါ ဘၣ်ထွဲဒီးတၢ်ထုးထီၣ်ရၤလီၤတၢ်ကစီၣ်တဖၣ်အံၤ ကညီတၢ်ထူၣ်ဖျဲးသုးမုၢ်ဒိၣ်(KNLA) ၀ဲၤလီၢ်ခိၣ်သ့ၣ် ပၢဆှၢသုးဂ့ၢ်၀ီခိၣ်ကျၢၢ် သုးခိၣ်ကျၢၢ်ဂီၢ်ဂ့ၢ် စီၤပံလးစ့ၣ် ထုးထီၣ်ဘိးဘၣ်ရၤလီၤ၀ဲလံာ်တၢ်ပာ်ဖျါတဘ့ၣ် ဖဲလါမ့ၤ ၁၈ သီအနံၤဒီး စံး၀ဲဒ်အံၤန့ၣ်လီၤႉ
“ကညီဒီတကလုာ်လၢအအိၣ်လၢထံသၢဘ့ၣ်ကီၢ်သၢဘ့ၣ်ဃုာ်ဒီးထံလီၢ်ကီၢ်ပူၤဒီး တၢ်ပၢၢ်ဆၢဟီၣ်က၀ီၤအပူၤခဲလာ်လၢအဟ့ၣ်တၢ်ကစီၣ်ႇဆှၢတၢ်ကစီၣ်ႇကွဲးတၢ်ကစီၣ်ဒီးရၤလီၤတၢ်ကစီၣ်အခါ ဒ်သိးသုတကဲထီၣ်တၢ်ဂ့ၢ်ကီလၢၦၤဒိကနၣ်တၢ်ဖိႇၦၤဖးတၢ်ဖိအဂီၢ်တဂ့ၤအဂီၢ် ကဒဲကဒဲအဘၢၣ်စၢၤ သုတကဲထီၣ်တၢ်ခဲၣ်သူခဲၣ်ဂီၤတဂ့ၤဒီး သုတကဲထီၣ်တၢ်ကရၢကရိဒီတခါအလၤကပီၤတဂ့ၤအဂီၢ် လၢတၢ်အဲၣ်ဘၣ်က့ၤပၦၤကလုာ်အလုၢ်လၢ်ထူသနူလၢမိၢ်ပၢ်ဖံဖုအစိၤလၢထးတဖၣ်အသိး မ့ၢ်ယတၢ်ဃ့သကွံာ်ကညးသုလီၤ”အဂ့ၢ်န့ၣ် အ၀ဲစံး၀ဲန့ၣ်လီၤႉ
လၢန့ၣ်အမဲာ်ညါ ကညီကမျၢၢ်ထံဖိကီၢ်ဖိလၢအအိၣ်တၢ်လီၢ်တပူၤဂ့ၤတပူၤဂ့ၤ တၢ်ဖံးတၢ်မၤတၢ်စံးကတိၤလၢပကဖံးမၤစံးကတိၤအီၤတဖၣ်န့ၣ် မ်ပကဆိကမိၣ်အီၤထံထံဆးဆး၀ံၤမးပကစံးကတိၤမၤအီၤအဂ့ၢ်န့ၣ် KNLA သုးမုၢ်ဒိၣ်၀ဲၤလီၢ်ခိၣ်သ့ၣ် ပၢဆှၢသုးဂ့ၢ်၀ီခိၣ်ကျၢၢ် သုးခိၣ်ကျၢၢ်ဂီၢ်ဂ့ၢ် စီၤပံလးစ့ၣ် ဆီၣ်တခူထီၣ်၀ဲန့ၣ်လီၤႉ
တကီၢ်ခါတၢ်အိၣ်သးခဲအံၤ ပထံၣ်ဘၣ်လၢကညီၦၤတ၀ၢအပူၤ တမ့ၢ်လၢအမ့ၢ်(professional) တၢ်ကစီၣ်၀ဲၤကျိၤဘၣ်ဒီး ဟံးန့ၢ်တၢ်ကစီၣ်ႇပာ်ဖျါထီၣ်တၢ်ကစီၣ်အံၤ တမ့ၢ်လၢအအိၣ်ဒီး တၢ်ကစီၣ် တၢ်ဂ့ၢ်တၢ်ကျိၤလၢတၢ်ပာ်ဂၢၢ်ပာ်ကျၢၤအီၤလီၤတံၢ်လီၤဆဲးဘၣ်ဒီး ထုးထီၣ်ရၤလီၤ၀ဲဒၣ်လၢစိၣ်ရှၢၣ်မံ ဒံၣ်ယၢၣ်အပူၤန့ၣ်လီၤႉ လၢန့ၣ်အမဲာ်ညါ လၢတၢ်ထုးထီၣ်ရၤလီၤတၢ်ကစီၣ် တနီၤအကျါ တဘၣ်လိာ်ဖိးမံသးဒီးတၢ််ကစီၣ်အတၢ်သိၣ်တၢ်သီဘၣ်ဒီး ကတိၤဒုၣ်ဒွဲၣ်ထီဒုၣ်ထီဒါ၀ဲနီၢ်တဂၤစ့ၢ်ကီးအိၣ်၀ဲန့ၣ်လီၤႉ
ခီဖျိတၢ်ဖံးတၢ်မၤဒ်အံၤအဃိ လၢကညီဒီတကလုာ်တၢ်ပၢၢ်ဆၢအဖီခိၣ် တကဲထီၣ်၀ဲတၢ်တိစၢၤမၤစၢၤဘၣ်အဃိ ကဟ့ၣ်ထီၣ် တၢ်ပဲာ်ထံနီၤဖးထဲဒၣ်လၢအကဲထီၣ်တၢ်ကဲဘျုးအဂီၢ်တဖၣ်ဒီး ကညီဒီတကလုာ်လၢအအိၣ်လၢတၢ်လီၢ်တပူၤဂ့ၤတပူၤဂ့ၤ ကပာ်ဖှိၣ်မၤစၢၤသကိး၀ဲအဂီၢ်စ့ၢ်ကီးန့ၣ် ပၢဆှၢသုးဂ့ၢ်၀ီခိၣ်ကျၢၢ် ဆီၣ်တခူထီၣ်၀ဲန့ၣ်လီၤႉ
