လါမ့ၤ ၁၄ သီႇ ၂၀၂၁ နံၣ်ႇ ခ့ၣ်အဲးစံၣ်
KNU- ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ် သုးက့(၅)ဟီၣ်က၀ီၤအပူၤ သုးမီၤစိရိၤ အသုးပာ်တ့ၢ်ကွံာ်သုးကလၢၤတနီၤဒီး လဲၤပာ်ဖှိၣ်ထီၣ်သးဒီးသုးကလၢၤဖးဒိၣ်လၢအအိၣ်ဘူးဖဲန့ၣ်တဖၣ်အဂ့ၢ်န့ၣ် KNU သုးက့(၅)စံး၀ဲန့ၣ်လီၤႉ
သုးမီၤစိရိၤအသုးပာ်တ့ၢ်ကွံာ်သုးကလၢၤတနီၤတၢ်ဂ့ၢ်အံၤ တမ့ၢ်လၢအဂုၤကဒါအလီၢ်ခံဘၣ်ဒီး ဒ်သိးကပာ်ဖှိၣ်ထီၣ်ဂံၢ်ဘါအဂီၢ် မ့ၢ်ဒၣ်လဲၤပာ်ဖှိၣ်ထီၣ်သးဒီး သုးကလၢၤဖးဒိၣ်လၢအအိၣ်ဘူးဖဲန့ၣ် တဖၣ်လီၤအဂ့ၢ်န့ၣ် KNU သုးက့(၅)ၦၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးဘၣ် ကညီတၢ်ကစီၣ်၀ဲၤလီၢ်ခိၣ်သ့ၣ်န့ၣ်လီၤႉ
အ၀ဲစံး၀ဲလၢ“ပဆိမိၣ်လၢတၢ်ကီတၢ်ခဲအိၣ်ဒီးအ၀ဲသ့ၣ်လီၤမီၤနီၤႉ ဘၣ်မနုၤအဃိလဲၣ်န့ၣ် တၢ်လဲၤထီၣ် အသုးကလၢၤအိၣ်၀ဲ ၁ ဖျၢၣ် ၂ ဖျၢၣ်လံအဃိ မ့ၢ်ဒၣ်လဲၤပာ်ဖှိၣ်ထီၣ်သးဒီးသုးကလၢၤဖးဒိၣ်လီၤႉ မ့ၢ်ဒ်သိး လၢအပူၤကွံာ်လၢညါန့ၣ် အ၀ဲသ့ၣ်အိၣ််လၢသုးကလၢၤတဖျၢၣ်န့ၣ် အါဒၣ်တက့ၢ်န့ၢ်အဂံၢ်အဘါစှၤ၀ဲလီၤႉ ခဲအံၤမ့ၢ်အအိၣ်ဆံးအါလဲၣ်န့ၣ်တသ့ၣ်ညါစ့ၢ်ကီးဘၣ်ႉသုးကလၢၤတနီၤန့ၣ် ပာ်တ့ၢ်ကွံာ်၀ဲဒၣ်ကျိအံၤ ကဘၣ်မ့ၢ်၀ဲလၢအ၀ဲသ့ၣ်၀ံ၀ဲစိာ်၀ဲတန့ၢ်လၢၤဘၣ်ဒီးကပာ်တ့ၢ်၀ဲလီၤ” အဂ့ၢ်န့ၣ် စံး၀ဲန့ၣ်လီၤႉ
သုးမီၤစိရိၤအသုးလၢအပာ်တ့ၢ်ကွံာ်သုးကလၢၤတဖၣ်အံၤမ့ၢ်၀ဲဒၣ် အူသူၣ်ထၣ်သုးကလၢၤႇမဲးကီၢ်မုၢ်ထၣ်သုးကလၢၤဒီးကီးကးခိၣ်သုးကလၢၤတဖၣ်ဒီး သုးကလၢၤတဖၣ်အံၤမ့ၢ်သုးကလၢၤလၢၦၤဂံၢ်ဘါစှၤ၀ဲဒီး သုးကလၢၤတဖျၢၣ်န့ၣ် သုးဂံၢ်ဘါအိၣ်ကထဲအဂၤ(၃၀)ဃၣ်ဃၣ်လီၤအဂ့ၢ်န့ၣ် သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးအါထီၣ်၀ဲန့ၣ်လီၤႉ
ဖဲအပူၤကွံာ် လါမးရှး ဒီး လါအ့ဖြ့ၣ်အတီၢ်ပူၤ KNLA သုးက့(၅)လဲၤထီၣ်ဒုးဟံးန့ၢ်ကွံာ် သုးကီၣ်ကးအသုးကလၢၤ ၂ ဖျၢၣ်လၢအမ့ၢ် သံမုၢ်ထၣ်ဒီးသီလဲၤထၣ်သုးကလၢၤ၀ံၤအလီၢ်ခံ ပယီၤသုးပာ်တ့ၢ်ကွံာ်သုးကလၢၤ ၄ ဖျၢၣ်ဟဲအိၣ်ထီၣ်၀ဲဒ်အံၤန့ၣ်လီၤႉ
စးထီၣ်လၢ KNLA သုးက့(၅)ထီၣ်ဒုးဟံးန့ၢ်ကွံာ်သုးကီၣ်ကးအသုးကလၢၤ ၂ ဖျၢၣ်၀ံၤအလီၢ်ခံ သုးမီၤစိရိၤအသုးကဘီယူၤဟဲကွံာ်လီၤမ့ၣ်ပိၢ်လၢ KNU သုးက့(၅)ဟီၣ်က၀ီၤပူၤအဃိ လီၢ်က၀ီၤကမျၢၢ်သံ၀ဲ ၁၄ ဂၤႇ ဘၣ်ဒိ ၂၈ ဂၤဒီး လီၢ်က၀ီၤဖိ ၄၀ႇ၀၀၀ ဘျဲၣ် ဘၣ်ဃ့ၢ်မှံဟးဖျိး၀ဲဒၣ်အဂ့ၢ်န့ၣ် ကညီၦၤဂ့ၢ်၀ီတၢ်ကရၢကရိတဖၣ်စံး၀ဲန့ၣ်လီၤႉ
KNU မုၢ်တြီၢ်ကီၢ်ရ့ၣ်ဟီၣ်က၀ီၤအပူၤ သုးမီၤစိရိၤအသုးကလၢၤအိၣ်ဆီလီၤသးဒီးဟူးဂဲၤပာ်ဖှိၣ်ခဲလၢာ်အိၣ်၀ဲအဖျၢၣ်(၈၀)ဘျဲၣ်အဂ့ၢ်န့ၣ် KNU သုးက့(၅) စံး၀ဲန့ၣ်လီၤႉ
