BGF သုး ၁၀၀ ဘျဲၣ် ဟဲအါထီၣ်ကဒီးလၢဖၣ်ပူၣ်ဟီၣ်က၀ီၤပူၤအဂ့ၢ် KNU စံး၀ဲ

လါမ့ၤ ၁၁ သီႇ ၂၀၂၁ နံၣ်ႇ ခ့ၣ်အဲးစံၣ်

ဖဲမဟါ(လါမ့ၤ ၁၀)သီ ဂီၤခီအဆၢကတီၢ် သုးခိးကီၢ်ဆၢ(BGF)သုး ဟဲအါထီၣ်ကဒီးလၢကညီကီၢ်စဲၣ် ဖၣ်ပူၣ်၀့ၢ်ပူၤ အဂၤ ၁၀၀ ဘျဲၣ်အဂ့ၢ်န့ၣ် KNU- ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ် သုးက့(၅) စံး၀ဲန့ၣ်လီၤႉ

BGF သုးလၢအဟဲတုၤ၀ဲတဖၣ်အံၤ မ့ၢ်အိၣ်၀ဲဒၣ်လၢဖၣ်ပူၣ်၀့ၢ်ပူၤန့ၣ်တၢ်ဂ့ၢ်ကီတအိၣ်၀ဲဘၣ်ဆၣ် မ့ၢ်တလၢ၀ဲဒၣ်ဖၣ်ပူၣ်၀့ၢ်နုာ်လီၤလၢအ၀ဲသ့ၣ်တၢ်ပၢဟီၣ်က၀ီၤအပူၤန့ၣ် ကကဲထီၣ်၀ဲတၢ်ဘၣ်သဂၢၢ်ခးလိာ်သးသ့၀ဲအဂ့ၢ်န့ၣ် KNU သုးက့(၅)ၦၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးဘၣ်ခ့ၣ်အဲးစံၣ်န့ၣ်လီၤႉ

အ၀ဲစံး၀ဲလၢ“လၢဖၣ်ပူၣ်၀့ၢ်ပူၤ အပူၤကွံာ်လၢညါန့ၣ်(BGF)စ့ၢ်ကီးအိၣ်ဃာ်၀ဲလီၤႉ ခဲအံၤဟဲထီၣ်ကဒီးလံမီၤနီၤႉ မ့ၢ်အိၣ်လၢဖၣ်ပူၣ်၀့ၢ်ပူၤဒုတဘၣ်တၢ်နီတမံၤဘၣ်ႉ မ့ၢ်တအိၣ်ဖဲန့ၣ်ဘၣ် မ့ၢ်ဆဲးဟဲ၀ဲလၢအံၤတကပၤဒု ကကဲထီၣ်၀ဲတခါခါလီၤႉ အပူၤကွံာ်လၢညါန့ၣ် BGF တဖၣ်မ့ၢ်ဟဲနုာ်လီၤလၢပဟီၣ်က၀ီၤပူၤန့ၣ် တဟဲထဲအ၀ဲသ့ၣ်ဘၣ်ႇဟဲဃုာ်၀ဲဒီးပယီၤသုးလီၤ”အဂ့ၢ်န့ၣ် စံးဘၣ် ကညီတၢ်ကစီၣ်၀ဲၤလီၢ်ခိၣ်သ့ၣ်န့ၣ်လီၤႉ

ဖဲအပူၤကွံာ်စှၤသီအတီၢ်ပူၤ ဒ်သိးကလဲၤဆှၢန့ၢ်၀ဲပယီၤသုးတၢ်အီၣ်တၢ်အီလၢ ခ့ၣ်အဲၣ်ယူၣ် သုးက့(၅)ဟီၣ်က၀ီၤပူၤအဂီၢ် BGF သုးဂံၢ်ဘါ(၄၀၀)ဘျဲၣ် ဟဲတုၤ၀ဲဒၣ်လၢကမၤမိၢ်တကပၤ၀ံၤအလီၢ်ခံ ဟဲတုၤကဒီး၀ဲအခဲအံၤလီၤအဂ့ၢ်န့ၣ် KNU သုးက့(၅)တကပၤ စံး၀ဲန့ၣ်လီၤႉ
ဖၣ်ပူၣ်လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤ စံး၀ဲ“BGF ဒီးပယီၤသုးတဖၣ်ပာ်ဖှိၣ်ထီၣ်သးဒီး ဟးထီၣ်၀ဲဖဲဖၣ်ပူၣ်၀့ၢ် က၀ီၤဒ့(၃)ဖဲတဂီၤအံၤဒီး လဲၤထီၣ်၀ဲဒၣ်လၢဘရ့ၣ်ကၠံကိ(ဘရင်ဂျီကုန်း)တကပၤ၀ံၤ လဲၤထီၣ်၀ဲဒၣ်လၢမရဲၣ်ခံကျဲတကပၤလီၤ”အဂ့ၢ်န့ၣ် စံး၀ဲန့ၣ်လီၤႉ

ဖဲလါမ့ၤ ၉ သီအနံၤစ့ၢ်ကီး ဖဲဖၣ်ပူၣ်=ကမၤမိၢ်ကျဲ ၀ၣ်သိခိၣ်သ၀ီပူၤ သုးကီၣ်ကးအသုးဒီး BGF ပာ်ဖှိၣ်သုးဒီး KNLA သုးက့(၅)အဘၢၣ်စၢၤ တၢ်ခးလိာ်သးကဲထီၣ်ဒီး တၢ်ဘၣ်ဒိဘၣ်ထံးသံတၢ်အိၣ်သးတခီတသ့ၣ်ညါအီၤဒံးဘၣ်အဂ့ၢ်ႇ တၢ်ခးလိာ်သးဘျီ၀ဲအံၤအပူၤ ဘၣ်ထွဲဒီးတၢ်ကစီၣ်ဟူထီၣ်လၢ(BGF)သုးအၦၤသံ၀ဲ ၁၁ ဂၤတၢ်ဂ့ၢ်အံၤ ပာ်ဂၢၢ်ပာ်ကျၢၤတသ့ဒံးဘၣ်အဂ့ၢ်န့ၣ် သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံး၀ဲန့ၣ်လီၤႉ

ဘၣ်ဟဲနုာ်လီၤလၢ KNU သုးက့(၅)ဟီၣ်က၀ီၤအပူၤအံၤ ဒ်သိး ၁၀၁၃ႇ၁၀၁၄ သုးရ့ၣ်တဖၣ် ဟးထီၣ်ဟးလီၤကန့ၢ်အဂီၢ် မ့ၢ်ဒၣ်တၢ်ဟံးန့ၢ်စၢၤကျဲတၢ်ဘံၣ်တၢ်ဘၢလီၤဒီး တမ့ၢ်လဲၤထီၣ်ဒုး သုးက့(၅)ဘၣ်အဂ့ၢ်န့ၣ် ကညီကီၢ်စဲၣ် သုးခိးကီၢ်ဆၢ -BGF နဲၣ်ရွဲၣ်ခိၣ််ကျၢၢ် သုးခိၣ်ဒိၣ်စိ စီၤခၠံၣ်သူၤ စံးဘၣ်ကညီတၢ်ကစီၣ်၀ဲၤလီၢ်ခိၣ်သ့ၣ် ဖဲလါမ့ၤ ၆ သီအနံၤန့ၣ်လီၤႉ