တၢ်မၤသံမၤ၀ီကဲထီၣ်လၢ၀ီၤလ့ၤဟီၣ်က၀ီၤပူၤအံၤ ခီဖျိသုးမီၤစိရိၤအသုးဟဲဃုသ့ၣ်ညါတၢ်ဒ်ကမျၢၢ်အသိးအဃိအဂ့ၢ် KNDO ဂၢၤသးသုးခိၣ်ကျၢၢ် ရှဲလဲ

လါယူၤ ၁၅ သီႇ ၂၀၂၁ နံၣ်ႇ ခ့ၣ်အဲးစံၣ်

ဖဲလါယူၤ ၁၃ သီအနံၤ သုးမီၤစိရိၤအလံာ်တၢ်ကစီၣ်ပူၤပာ်ဖျါ၀ဲလၢ ၀ီၤလ့ၤဟီၣ်က၀ီၤပူၤ တၢ်မၤသံကွံ၁်ၦၤတ့တိၤၦၤမၤတၢ်ဖိတနီၤတၢ်ဂ့ၢ်အံၤ ၦၤလၢအသံတဖၣ်တမ့ၢ်၀ဲဒၣ်ကမျၢၢ်ဘၣ်ႇ မ့ၢ်၀ဲဒၣ်သုးမီၤစိရိၤအသုးဖိတဖၣ်လီၤဒီး ခီဖျိဟဲဃုသ့ၣ်ညါတၢ်လၢဟီၣ်က၀ီၤပူၤအဃိလီၤအဂ့ၢ်န့ၣ် ကညီဒီကလုာ်ဂၢၤသးကရၢ(KNDO)ဂၢၤသးသုးခိၣ်ကျၢၢ် စံး၀ဲန့ၣ်လီၤႉ

သုးမီၤစိရိၤထုးထီၣ်ပာ်ဖျါတၢ်ကစီၣ်လၢ အပူၤကွံာ်(လါမ့ၤ ၃၁)သီအနံၤ ဖဲမၠၣ်၀တံၣ်ကီၢ်ရ့ၣ် ၀ီၤလ့ၤ၀့ၢ် ကနဲလ့=မီၤခံကျဲမုၢ်ခိၣ် တၢ်တ့ထီၣ်(အူဟူၤကျိ)တိၤအပူၤ တၢ်မၤသံ၀ဲကမျၢၢ်ၦၤမၤတၢ်ဖိ ၂၅ ဂၤတၢ်ဂ့ၢ်အဖီခိၣ် ခ့ၣ်အဲးစံၣ်ဆဲးကျိးသံကွၢ်၀ဲ(KNDO)ဂၢၤသးသုးခိၣ်ကျၢၢ် စီၤနၢၤဒါမၠးဒီး က့ၤရှဲလဲစံး၀ဲဒ်အံၤန့ၣ်လီၤႉ

“အ၀ဲသ့ၣ်တဲ၀ဲဒၣ်လၢၦၤသံခဲလၢာ်န့ၣ်မ့ၢ်၀ဲကမျၢၢ်ႇအနီၢ်ကီၢ်တခီန့ၣ်ကမျၢၢ်တမ့ၢ်ဘၣ် မ့ၢ်၀ဲဒၣ်ပယီၤ သုးခဲလၢာ်လီၤႉ ပတဲအ၀ဲသ့ၣ်လၢဆၢကတီၢ်တၢ်အိၣ်သးခဲအံၤ တဘၣ်တ့ကျဲဘၣ်ႉ ပသံကွၢ်အ၀ဲ သ့ၣ်လၢမ့ၢ်မတဂၤမၢ၀ဲလဲၣ်န့ၣ် တဲ၀ဲဒၣ်လၢၦၤအိၣ်လၢတၢ်ဖီၣ်ခိၣ်မၢ၀ဲလီၤႉ ပနုာ်လီၤဟးထီၣ်န့ၣ် အ၀ဲသ့ၣ်ဟံးန့ၢ်တၢ်ကစီၣ်ဒီးဆှၢထီၣ်၀ဲဒၣ်တၢ်ကစီၣ်လီၤႉ မ့ၢ်တဖီၣ်အ၀ဲသ့ၣ်ဘၣ်န့ၣ် လၢပတၢ်ဘံၣ်တၢ်ဘၢ အဂီၢ်တလီၤတံၢ်ဘၣ်ႉ အနီၢ်ကီၢ်ခီန့ၣ်တအဲၣ်ဒိးမၤအ၀ဲသ့ၣ်နီတမံၤဘၣ်ႉ သုးမီၤစိရိၤအံၤ လၢတၢ်ဆၢကတီၢ်ဖုၣ်ကိာ်ဖိအပူၤန့ၣ် ဟဲထီၣ်ဒုး၀ဲဒၣ်ၦၤလီၤႉ ဖဲပဖီၣ်ဃာ်အ၀ဲသ့ၣ်အဆၢကတီၢ်န့ၣ် အ၀ဲသ့ၣ်ခးစိၦၤဒီးကျိလီၤႉ ဘၣ်၀ဲဒၣ်အ၀ဲသ့ၣ်ၦၤနါက့အိၣ်စ့ၢ်ကီးလီၤ”အဂ့ၢ်န့ၣ် KNDO ဂၢၤသးသုးခိၣ်ကျၢၢ် စီၤနၢၤဒါမၠး စံးဘၣ်ခ့ၣ်အဲးစံၣ်ဖဲ(လါယူၤ ၁၄)သီအနံၤန့ၣ်လီၤႉ

ဖဲ(KNDO)ဖီၣ်ဒီးသမံသမိးအ၀ဲသ့ၣ်အခါန့ၣ် ထံၣ်၀ဲသုးမီၤစိရိၤအသုးကူသုးကၤႇသုးတၢ်ပနီၣ်တဖၣ်ႇ သုးမီၤစိရိၤအတၢ်မၤနီၣ် မူဒါအပတီၢ်တၢ်ပနီၣ်တဖၣ်ႇ နီၢ်တယၢ်တဖၣ်ဒီး လီတဲစိလၢကဟ့ၣ်တၢ်ကစီၣ်အဂီၢ်တဖၣ်န့ၣ်လီၤႉ

လၢန့ၣ်အမဲာ်ညါ အ့ၣ်ကၠံၣ်နံၣ်ယၢၣ်လၢအတ့၀ဲတိၤတဖၣ်အံၤ မ့ၢ်ၦၤလၢသုးမီၤစိရိၤပျၢ်လီၤ၀ဲတဖၣ်လီၤဒီး ဖဲပဖီၣ်အ၀ဲသ့ၣ်အဟံၣ်ဖိဃီဖိ၀ံၤအလီၢ်ခံန့ၣ် သုးမီၤစိရိၤအသုးခး လီၤ၀ဲဒၣ်ကျိဖးဒိၣ်တဖၣ်လၢ(KNDO)၀ဲၤကျိၤအိၣ်တၢ်လီၢ်အဆၢတတဲာ်ဘၣ်အမဲာ်ညါ အ၀ဲသ့ၣ်ပာ်ဖှိၣ်ထီၣ်သးဒီး(BGF)ဒီး ဟဲထီၣ်ခး၀ဲဒၣ်အ၀ဲသ့ၣ်တၢ်လီၢ်စ့ၢ်ကီးအိၣ်၀ဲအဂ့ၢ်န့ၣ် သုးခိၣ်ကျၢၢ် စီၤနၢၤဒါမၠး စံးအါထီၣ်၀ဲန့ၣ််လီၤႉ

ဖဲ(KNDO)ဖီၣ်ဒီးသမံသမိးအ၀ဲသ့ၣ်အဆၢကတီၢ် ခီဖျိသုးမီၤစိရိၤအသုးက့ၤခးကဒါကျိဖးဒိၣ်အဃိ ၦၤလၢတၢ်ဖီၣ်ချုးန့ၢ်၀ဲအကျါ ၂ ဂၤ စံၣ်ပူၤဖျဲး၀ဲ၀ံၤအလီၢ်ခံ ပျၢ်လီၤက့ၤ၀ဲၦၤလၢအအိၣ်တ့ၢ် ပိာ်မုၣ်ပိာ်မၢၤႇဖိဒံဖိသၣ်တဖၣ်န့ၣ်လီၤႉ ဖဲတၢ်ခးလိာ်သးကဲထီၣ်အပူၤ KNDO တကပၤ တၢ်ဘၣ်ဒိဘၣ်ထံးသံအိၣ်၀ဲအဂ့ၢ်န့ၣ် စံး၀ဲန့ၣ်လီၤႉ

ဖဲန့ၣ်၀ံၤအလီၢ်ခံဖဲ(လါယူၤ ၁)သီ ဒီး ၉ သီအနံၤန့ၣ် KNDO ဖီၣ်က့ၤကိး၀ဲဒၣ်ၦၤတဖၣ်အကျါ ပိာ်ခွါ ၆ ဂၤႇ ပိာ်မုၣ် ၆ ဂၤႇ ဖိသၣ် ၁၀ ဂၤ ပာ်ဖှိၣ်ခဲလၢာ် ၂၂ ဂၤ ဟဲက့ၤပူၤဖျဲးထီၣ်၀ဲအသိး ခီဖျိထံၣ်ကဒါက့ၤၦၤလၢအသံ ၂၅ ဂၤအံၤအစိၣ်ဒီး ခီဖျိမၤသံ၀ဲဒၣ်ကမျၢၢ်လၢအတၢ်ကမၣ်တအိၣ်ဘၣ်တဖၣ်အဃိ ဒ်သိးသုးမီၤစိရိၤသုးကျိၤတဖၣ် ကဃုသ့ၣ်ညါမၤဖျါထီၣ်ကန့ၢ်အဂီၢ် ကဆဲးမၤ၀ဲတၢ်ဘံၣ်တၢ်ဘၢလၢအလိၣ်၀ဲတဖၣ်ဂ့ၢ်န့ၣ် သုးမီၤစိရိၤ တၢ်ကစီၣ်၀ဲၤကျိၤ ထုးထီၣ်ပာ်ဖျါ၀ဲန့ၣ်လီၤႉ

မၠၣ်၀တံၣ်ကီၢ်ရ့ၣ် ၀ီၤလ့ၤဟီၣ်က၀ီၤအံၤ အိၣ်၀ဲဒၣ်လၢခ့ၣ်အဲၣ်ယူၣ်=ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ်ႇ သုးက့(၆)ဟီၣ်က၀ီၤပူၤအဖီခိၣ် ခ့ၣ်အဲၣ်ယူၣ် ဒူပျာ်ယာ်ကီၢ်ရ့ၣ် ၦၤဘၣ်မူဘၣ်ဒါတဂၤစံး၀ဲလၢ “တၢ်အံၤခီဖျိမ့ၢ်၀ဲဒၣ်သုးတၢ်ဂ့ၢ်အဃိ မၢသုးက့ပာ်ဖှိၣ်ဃာ်တၢ်ဂ့ၢ်တၢ်ကျိၤဒီးတီၣ်ဖျါထီၣ်ဆူ GHQ (သုး၀ဲၤလီၢ်ခိၣ်သ့ၣ်)ဒီး GOC (ပၢဆှၢရဲၣ်ကျဲၤသုး၀ဲၤလီၢ်ခိၣ်သ့ၣ်)အအိၣ်လီၤႉ လၢပကီၢ်ရ့ၣ်တကပၤစ့ၢ်ကီး ပတီၣ်ဖျါထီၣ်လၢလီၢ်ခၢၣ်သးအအိၣ်အိၣ်၀ဲလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

ခ့ၣ်အဲၣ်ယူၣ်အံၤအ၀ဲၤကျိၤအိၣ်၀ဲဒၣ် ၁၄ ခါအကျါ KNLA- ကညီဒီကလုာ်တၢ်ထူၣ်ဖျဲးသုးမုၢ်ဒိၣ်အမဲာ်ညါ KNDO-ကညီဒီကလုာ်ဂၢၤသးကရၢအံၤ မ့ၢ်၀ဲဒၣ်ခ့ၣ်အဲၣ်ယူၣ်အသုးမုၢ်ဒိၣ်တခါစ့ၢ်ကီးအဃိ ဘၣ်ထွဲဒီးတၢ်ဂ့ၢ်ကဲထီၣ်သးအံၤ လီၢ်ခၢၣ်သးဒီးကီၢ်ရ့ၣ်ၦၤဘၣ်မူဘၣ်ဒါတဖၣ််စ့ၢ်ကီး ဃုသ့ၣ်ညါသမံသမိး၀ဲဒၣ်အိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ