လါယူၤလံ ၅ သီႇ ၂၀၂၁ နံၣ်ႇ ခ့ၣ်အဲးစံၣ်
ကညီကီၢ်စဲၣ် မၠၣ်၀တံၣ်၀့ၢ်ပူၤ ဖဲမဟါလါယူၤလံ ၄ သီအနံၤ ပိာ်ခွါလၢခိ၀ံၣ်ဘၣ်ကူအီၤတဂၤသံကွံာ်၀ဲဒီး မၠၣ်၀တံၣ်၀့ၢ်ပူၤတနွံအတီၢ်ပူၤ ခိ၀ံၣ်တၢ်ဆါဘၣ်ကူဘၣ်ဂာ်ကဲထီၣ်သးဒီး ၦၤသံအိၣ်တုၤ၀ဲလၢ ၃ ဂၤလံအဂ့ၢ်န့ၣ် သ့ၣ်ညါဘၣ်န့ၣ်လီၤႉ
မၠၣ်၀တံၣ်၀့ၢ် နီၣ်ဂံၢ်(၃)က၀ီၤဒ့ အလီဖယါကျဲ ပိာ်ခွါလၢအသးနံၣ်အိၣ်(၅၁)နံၣ်တဂၤ သံကွံာ်၀ဲဖဲမဟါလၢခိ၀ံၣ်တၢ်ဆါအဃိလီၤအဂ့ၢ်န့ၣ် မၠၣ်၀တံၣ်၀့ၢ် နီၣ်ဂံၢ်(၃)က၀ီၤဒ့ ပၢပြးရူၦၤဘၣ်မူဘၣ်ဒါတဂၤ စံး၀ဲန့ၣ်လီၤႉ
ခီဖျိခိ၀ံၣ်တၢ်ဆါအဃိ ဖဲအပူၤကွံာ်(လါယူၤ ၂၇)သီအနံၤစ့ၢ်ကီး ပိာ်ခွါလၢအသးနံၣ်အိၣ်(၆၃)နံၣ်ဒီး လါယူၤလံ ၁ သီအနံၤ ပိာ်မုၣ်လၢအသးနံၣ်အအိၣ်(၅၂)နံၣ်သံကွံာ်၀ဲဒီး လၢတနွံအတီၢ်ပူၤမၠၣ်၀တံၣ်၀့ၢ်ပူၤ ၦၤသံလၢခိ၀ံၣ်အဃိအိၣ်တုၤ၀ဲလၢ ၃ ဂၤလံန့ၣ်လီၤႉ
မၠၣ်၀တံၣ်၀့ၢ်ပူၤ အပူၤကွံာ်လါယူၤ ၂၁ သီအနံၤတုၤလၢလါယူၤလံထီၣ် ၃ သီအနံၤ ဒ်မၠၣ်၀တံၣ်တၢ်ဆါဟံၣ်ၦၤဘၣ်မူဘၣ်ဒါသမံသမိး၀ဲတၢ်ဆါအသိး တၢ်ထံၣ်န့ၢ်ၦၤဘၣ်ခိ၀ံၣ်တၢ်ဆါအိၣ်၀ဲ(၂၇၀)ဘျဲၣ်အဂ့ၢ်န့ၣ် သ့ၣ်ညါဘၣ်လၢ မၠၣ်၀တံၣ်၀့ၢ် တၢ်တိစၢၤမၤစၢၤၦၤဂ့ၢ်၀ီကရူၢ်ကရၢအအိၣ်န့ၣ်လီၤႉ
ၦၤလၢတၢ်ထံၣ်န့ၢ်လၢအအိၣ်ဒီးခိ၀ံၣ်တၢ်ဆါဃၢ်တဖၣ် တၢ်ကူဆါယါဘျါပာ်အ၀ဲသ့ၣ်လၢမဲၢ်ကနဲက၀ီၤဒ့သီ(covid center)ဒီး နီၣ်ဂံၢ်(၄)က၀ီၤဒ့ ကၠီၣ်လိကၠံ(covid center)အလီၢ်န့ၣ်လီၤႉ လၢ(covid center)အလီၢ် ကိးနံၤဒဲးတၢ်အီၣ်တၢ်အီလၢတနံၤဂီၢ်ဘၣ်ဟ့ၣ်၀ဲစ့တနံၤ(၃ႇ၅၀၀)ကၠးဒီး ၦၤဆါတဖၣ်ဘၣ်ဟ့ၣ်၀ဲတၢ်သမံသမိးခိ၀ံၣ်တၢ်ဆါခံဘျီဂီၢ်လၢစ့ပယီၤ(၂၀ႇ၀၀၀)ကၠးအဂ့ၢ်န့ၣ် သ့ၣ်ညါဘၣ်န့ၣ်လီၤႉ
လၢန့ၣ်အမဲာ်ညါ ၦၤလၢအအိၣ်ဘူးအိၣ်တံၢ်ဘၣ်ဒီးၦၤဘၣ်ခိ၀ံၣ်တၢ်ဆါတဖၣ်စ့ၢ်ကီး အ၀ဲသ့ၣ်ဘၣ်အိၣ်(Quarantine)အသီ(၁၀)လၢ(center)အလီၢ်ဒီး တၢ်အီၣ်တၢ်အီအဂီၢ်တသီန့ၣ်ဘၣ်ဟ့ၣ်၀ဲ(၃ႇ၅၀၀)ကၠးဒီး contant persons တဖၣ်ဘၣ်ဟ့ၣ်လီၤစ့ၢ်ကီး၀ဲတၢ်သမံသမိးခိ၀ံၣ်အၦ့ၤခံဘျီဂီၢ်လၢစ့ပယီၤ(၂၀ႇ၀၀၀)ကၠးအဂ့ၢ်န့ၣ် သ့ၣ်ညါဘၣ်န့ၣ်လီၤႉ
