Home တၢ်ကစီၣ် KNU သုးက့(၅)ဟီၣ်က၀ီၤပူၤ တၢ်ဒုးကဲထီၣ်အဘျီဒီးသုးမီၤစိရိၤအသုးဘၣ်ဒိအါန့ၢ်ဒံးအပူၤကွံာ်လၢညါ

KNU သုးက့(၅)ဟီၣ်က၀ီၤပူၤ တၢ်ဒုးကဲထီၣ်အဘျီဒီးသုးမီၤစိရိၤအသုးဘၣ်ဒိအါန့ၢ်ဒံးအပူၤကွံာ်လၢညါ

1722
0

လါယူၤလံ ၁ သီႇ ၂၀၂၁ နံၣ်ႇ ခ့ၣ်အဲးစံၣ်

ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ သုးက့(၅)ဟီၣ်က၀ီၤအပူၤ ဖဲအပူၤကွံာ်လါမ့ၤတုၤလၢလါယူၤအတီၢ်ပူၤ တၢ်ဒုးကဲထီၣ်ဒီးသုးမီၤစိရိၤအသုးအဘျီဟဲအါထီၣ်၀ဲဒီး သုးမီၤစိရိၤအသုးစ့ၢ်ကီးသံအါန့ၢ်ဒံးအပူၤကွံာ်လၢညါတလါဒံးအဂ့ၢ်န့ၣ် KNU သုးက့(၅)တၢ်မၤနီၣ်ကိးလါဒဲးတၢ်ဒုးကဲထီၣ်စရီအသိး သ့ၣ်ညါဘၣ်န့ၣ်လီၤႉ

ဖဲအပူၤကွံာ်လါမ့ၤအကတၢၢ်တနွံတုၤလၢလါယူၤ ၃၀ သီအနံၤန့ၣ် သုးက့(၅)ဟီၣ်က၀ီၤအပူၤ တၢ်ဒုးကဲထီၣ်ပာ်ဖှိၣ်ခဲလၢာ်အိၣ်၀ဲအဘျီ(၂၀၀)ဘျဲၣ်ဒီး သုးမီၤစိရိၤအသုးသံ(၁၀၀)ဘျဲၣ်ဒီး ဘၣ်ဒိကဒီးအဂၤ(၁၀၀)ဘျဲၣ်အဂ့ၢ်န့ၣ် KNU သုးက့(၅) ၦၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံး၀ဲန့ၣ်လီၤႉ

အ၀ဲစံး၀ဲလၢ“ခီဖျိသုးမီၤစိရိၤအသုးဟဲနုာ်လီၤဟူးဂဲၤအါထီၣ်လၢပဟီၣ်က၀ီၤပူၤအဃိ ဖဲအပူၤကွံာ်လါမ့ၤ ၂၆ သီတုၤလၢခဲအံၤတစု ဒ်ပဒိးန့ၢ်ဘၣ်စရီအသိးန့ၣ် တၢ်ဒုးကဲထီၣ်၀ဲခဲလၢာ်(၂၅၄)ဘျီဒီး သုးမီၤစိရိၤအသုးသံ(၁၅၆)ဂၤႇဘၣ်ဒိ(၁၁၇)ဂၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်=ကညီတၢ်ကစီၣ်န့ၣ်လီၤႉ

လၢန့ၣ်အမဲာ်ညါ ဖဲလါယူအကတီၢ်တၢ်ဒုးကဲထီၣ်အတီၢ်ပူၤ လၢသုးမီၤစိရိၤအသုးသံတဖၣ်အကျါပၣ်ဃုာ်၀ဲဒီး သုးစကီၤဖိ ၁ ဂၤဒီး သုးရ့ၣ်ခိၣ် ၁ ဂၤအသိး သုးမီၤစိရိၤအသိလ့ၣ်ဟးဂီၤ၀ဲ(၇)ခိၣ်ဒီး အကသ့ၣ်သံ၀ဲ (၁၉)ဒုန့ၣ်လီၤႉ မ့မ့ၢ် KNU တကပၤ သံ၀ဲ ၁ ဂၤႇ ဘၣ်ဒိ ၈ ဂၤအသိး ကမျၢၢ်သံ၀ဲ(၂)ဂၤဒီး ဘၣ်ဒိ၀ဲ(၆)ဂၤအဂ့ၢ်န့ၣ် သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးအါထီၣ်၀ဲန့ၣ်လီၤႉ

ဒ်န့ၣ်အသိး သုးမီၤစိရိၤအသုုးခးလီၤကျိဖးဒိၣ်(၂၃၂)ဖျၢၣ်လၢဒူသ၀ီတၢ်ဖံးအီၣ်မၤအီၣ်လီၢ်ကျဲအပူၤအသိး သုးမီၤစိရိၤအသုး ပၢဆှၢ်ရဲၣ်ကျဲၤသုး၀ဲၤလီၢ်ခိၣ်သ့ၣ် (စကခ–၈)စုဒုၣ်တီၤအဖီလာ် ခီၣ်ချ›သုးရ့ၣ်(ခမရ–၄၁၀)ဒီး (ခမရ–၄၃၀)သုးဖိတဖၣ် ခးအီၣ်၀ဲလီၢ်က၀ီၤသ၀ီဖိအထိး ၃ ဒုဒီး ဟံးန့ၢ်၀ဲတၢ်လိမုၢ် ၂ ဘ့ၣ်ႇလီဆၣ်ဒၢ(battery)ဖးဒိၣ် ၁ ဖျၢၣ်ဒီး ဟံးန့ၢ်၀ဲစ့မၤဘူၣ်တနီၤဃုာ်ဒီးလီတဲစိတဖျၢၣ်အဂ့ၢ်န့ၣ် KNU သုးက့(၅)ထၢဖှိၣ်မၤနီၣ်မၤဃါတၢ်ဂ့ၢ်တၢ်ကျိၤအသိး သ့ၣ်ညါဘၣ်န့ၣ်လီၤႉ

ဖဲလါယူၤအတီၢ်ပူၤ သုးမီၤစိရိၤအသုးခးလီၤကျိဖးဒိၣ်အဖျၢၣ်အါန့ၢ်ဒံးအပူၤကွံာ်လါမ့ၤဘၣ်ဆၣ် ဟံၣ်ဟးဂီၤတအါန့ၢ်ဒံးအပူၤကွံာ်လၢညါအသိးဘၣ်အဂ့ၢ်န့ၣ် KNU သုးက့(၅)တကပၤ စံး၀ဲန့ၣ်လီၤႉ

ဒ်န့ၣ်အသိးတကီၢ်ခါခဲအံၤ သုးမီၤစိရိၤအသုးဒီး KNU အဘၢၣ်စၢၤတၢ်ဒုးကဲထီၣ်အံၤ ကဲထီၣ်အါ၀ဲလၢ KNU သုးက့(၅)ႇသုးက့(၁)ႇသုးက့(၃)ဟီၣ်က၀ီၤအပူၤဒီး တကီၢ်ခါခဲအံၤစ့ၢ်ကီးလၢသုးက့(၃)ဘ့ၣ်အကီၢ်ဆၢန့ၣ် သုးမီၤစိရိၤအသုးဃုာ်ဒီးသုးခိးကီၢ်ဆၢ BGF သုးပာ်ဖှိၣ်တဖၣ် မၤၦဲၤထီၣ်အနီၣ်ဂံၢ်ဟူးဂဲၤ၀ဲအဂ့ၢ်န့ၣ် KNU တကပၤ စံး၀ဲန့ၣ်လီၤႉ

ဖဲအပူၤကွံာ်လါတဖၣ်အတီၢ်ပူၤ ခီဖျိသုးမီၤစိရိၤအသုးဟဲကွံာ်လီၤမ့ၣ်ပိၢ်လၢ KNU သုးက့(၅)ဟီၣ်က၀ီၤပူၤအဃိ ကမျၢၢ်ထံဖိကီၢ်လၢအဘၣ်ဃ့ၢ်မှံဟးဖျိးတဖၣ် တနီၤန့ၣ်က့ၤအိၣ်ဆိးကဒါ၀ဲလၢအနီၢ်ကစၢ်တၢ်လီၢ်တၢ်ကျဲလံအသိး တနီၤန့ၣ်တက့ၤအိၣ်ဒံး၀ဲဘၣ်ဒီး ဆဲးအိၣ်ဒံး၀ဲဒၣ်လၢတစိၢ်တလီၢ်ၦၤလီၢ်အိၣ်ကမှံတၢ်လီၢ်အိၣ်၀ဲဒီး လၢန့ၣ်အမဲာ်ညါလိၣ်ဘၣ်၀ဲဒၣ်ကသံၣ်ကသီဒီး ဂံၢ်ရခီၣ်ထံးတၢ်အီၣ်တၢ်အီသ့ၣ်တဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ