လါစဲးပထ့ဘၢၣ် ၁၈ သီ, ၂၀၂၆ နံၣ်, ခ့ၣ်အဲးစံၣ်
ဖဲမဟါလါစဲးပထ့ဘၢၣ် ၁၇ သီဂီၤခီအဆၢကတီၢ်န့ၣ် လီၢ်ကဝီၤကမျၢၢ်ပှၤလီၢ်အိၣ်ကမှံဖိလၢအလဲၤဃ့ၢ်အိၣ်ကဒုသးဖဲ ဖၣ်အၣ်ကီၢ်ရ့ၣ်(သုးက့ ၇)တန့ခၠါကီၢ်ဆၣ်အပူၤဟံၣ်ခိၣ်အဖျၢၣ်(၅၀၀၀)ဘျဲၣ်အဂီၢ် (KNPC)ကမံးတံၥ်လၢအပၣ်ဃုၥ်ဝဲ (KNU/KNLA-PC),(DKBA)ဒီး(KNA)အံၤပၥ်ဖှိၣ်ထီၣ်သး မၤဝဲတၢ်လဲၤဟ့ၣ်လီၤဆီၣ်ထွဲဝဲဂံၢ်ခီၣ်ထံးတၢ်အီၣ်တၢ်အီ တၢ်ရဲၣ်တၢ်ကျဲၤတခါဖဲ ထိၣ်ကီၤကိၥ်ဟီၣ်ကဝီၤအပူၤန့ၣ်လီၤ.
တၢ်ဆီၣ်ထွဲမၤစၢၤလၢ(KNPC)လဲၤဟ့ၣ်လီၤဝဲ ဘျီဝဲအံၤန့ၣ်မ့ၢ်ဝဲ နဘူကရူၢ်, ထိၣ်ကိၤကိ, သယဲၣ်တီ,ကၠိၤပဲ(ကျုံပိုင်း), အ့စှ့ၤ(အင်းရှည်),နီၤတပွဲ,ကီၣ်ပလၤ, နါကီၣ်တ့,ထံၣ်ကလ့, နီၤတပၤ,ယီၢ်ကိၥ်, မၠၣ်ပတဲၤ,ဝဲလ့ၣ်,ကီၣ်ကမၤကရူၢ် (၁၄)ကရူၢ် ဟံၣ်ခိၣ်(၅၀၀၀)ဘျဲၣ်, ပှၤနီၣ်ဂံၢ်ခဲလၢၥ် (၁၅၀၀၀)ဃၣ်ဃၣ်အဂီၢ်အဂ့ၢ်န့ၣ် ပှၤဘၣ်မူဘၣ်ဒါစံးဝဲဒၣ်န့ၣ်လီၤ.
ဒ်န့ၣ်အသိးလၢကမျၢၢ်ပှၤလီၢ်အိၣ်ကမှံဖိအဂီၢ် တၢ်လဲၤဟ့ၣ်လီၤဆီၣ်ထွဲမၤစၢၤဝဲဟုသး(၅၀၀၀)ထၢၣ်, ညၣ်ဒၢ(၅၀၀၀)ဖျၢၣ်, အခၠိၤမိၣ်(၅၀၀၀)ကံလိ, သိအီၣ် (၅၀၀၀)ကိဒီး ပှၤလၢတၢ်လဲၤဆီၣ်ထွဲမၤစၢၤဝဲတဖၣ်အံၤ တန့ခၠါကီၢ်ဆၣ်ပူၤကမျၢၢ်ပှၤလီၢ် အိၣ်ကမှံဖိအမဲၥ်ညါ ကမျၢၢ်လၢအိၣ်ကီးတရံးကီၢ်ဆၣ်ပူၤလၢအဘၣ်ဃ့ၢ်မှံဟးဖျိးတဖၣ်ပၣ်ဃုၥ်ဝဲဒၣ်အဂ့ၢ်န့ၣ် ပှၤဘၣ်မူဘၣ်ဒါ စံးဝဲဒၣ်န့ၣ်လီၤ
လၢ(KNPC)မၤဝဲတၢ်ဟ့ၣ်လီၤတၢ်ဆီၣ်ထွဲမၤစၢၤတၢ်ရဲၣ်တၢ်ကျဲၤဘျီဝဲအံၤအပူၤန့ၣ် (KNPC)ပှၤဘၣ်မူဘၣ်ဒါလၢအမ့ၢ် ခ့ၣ်အဲၣ်ယူၣ် ကရၢခိၣ်လီၢ်လံၤ စီၤမူၤတူစ့ဖိ, စီၤကၠံၤလ့, တၢ်ဘူၣ်တၢ်ဘါခိၣ်နၢ်, (KNA)သုးခိၣ်စီၤတ့ၤဝ့,သုးခိၣ်စီၤမီၤဝ့, (DKBA) သုးခိၣ် စီၤကၠီၤသဲၣ်,( KNU/KNLA-PC) သုးခိၣ်နီၢ်ကပီၤထူ,သုးခိၣ်စီၤကၠီၤညိၣ်ဃုၥ်ဒီးကမံးတံၥ်ဖိလၢအဂၤဟဲထီၣ်ဒီး ကတိၤ ဟ့ၣ်ဂံၢ် ဟ့ၣ်ဘါလီၤတၢ်ဝံၤ ဟ့ၣ်နီၤလီၤဝဲကမျၢၢ်ပှၤလီၢ်အိၣ်ကမှံဖိသ့ၣ်တဖၣ်အံၤလၢတၢ်အီၣ်တၢ်အီသ့ၣ်တဖၣ်န့ၣ်လီၤ.
ဘၣ်ဃးတၢ်လဲၤဟ့ၣ်လီၤကဒီးတၢ်ဆီၣ်ထွဲမၤစၢၤလၢပှၤဃ့ၢ်မှံဟးဖျိးအဂီၢ်ဘျီဝဲအံၤန့ၣ် (KNPC)ကမံးတံးဖိ (KNU/KNLA-PC) သုးခိၣ်စီၤကၠီၤညိၣ် စံးဝဲ “ဘၣ်ဃးကမျၢၢ်လၢအဘၣ်ဃ့ၢ်မှံဟးဖျိးဒ်ပဖီၣ်တုၤမၤတုၤအသိးန့ၣ်ပမၤစၢၤလီၤ.ပမၤစၢၤခဲအံၤန့ၣ် ဟံၣ်ဒူၣ်(၅၀၀၀)ဘျဲၣ် ပှၤနီၣ်ဂံၢ်န့ၣ်ထီၣ်ဘးဝဲလၢ(၁၅၀၀၀)ဘျဲၣ်မီၤ. ဒီးတၢ်တဘျီအံၤအိၣ်ဝဲသၢဘျီလံပမၤစၢၤန့ၣ်. ပမၤခဲအံၤန့ၣ် တမ့ၢ်ထဲလၢပပှၤကညီဖိဘၣ်ကလုၥ်ဒူၣ်လၢအဂၤပၣ်ဃုၥ်ဝဲလီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤန့ၣ်လီၤ.
တကးဒံးဘၣ်ခါဆူညါဒ်သိးလီၢ်ကဝီၤကမျၢၢ်လၢအဘၣ်ဃ့ၢ်မှံဟးဖျိးသ့ၣ်တဖၣ်အံၤ ကက့ၤအိၣ်ဘၣ်လၢအနီၣ်ကစၢ်ဒူသဝီတၢ်လီၢ် တၢ်ကျဲအဂီၢ်န့ၣ် (KNPC)ကဂုၥ်ကျဲးစၢးဃုကျဲအဂ့ၢ်န့ၣ် သုးခိၣ်စီၤကၠီၤညိၣ် စံးအါထီၣ်ဝဲန့ၣ်လီၤ.
အဝဲစံးဝဲလၢ“တၢ်ဖှိၣ်တၢ်နးလၢပှၤကမျၢၢ်ဘၣ်လဲၤခီဖျိဝဲခဲအံၤန့ၣ် ပဝဲဒၣ်(KNPC)အံၤခါဆူညါပကမၤလီၤစှၤအီၤဒ်လဲၣ်, ပကမၤ လီၤမၢ်အီၤဒ်လဲၣ်. ပပှၤကလုၥ်လၢအဘၣ်ဃ့ၢ်မှံဟးဖျိးတဖၣ်အံၤကက့ၤအိၣ်ကဒါလၢအဒူသဝီ,ကက့ၤဖံးအီၣ်မၤအီၣ်က့ၤတၢ်လၢ အတၢ်လီၢ်တၢ်ကျဲကန့ၢ်အဂီၢ်န့ၣ် ပကဃုန့ၢ်အဝဲသ့ၣ်ကျဲန့ၣ်မ့ၢ်ဝဲဒၣ်ပကမံးတံၥ်တဖုအံၤအတၢ်တိၥ်ပၥ်အတၢ်မိၣ်န့ၢ်သးလီလီၤ.
မ့ဘၣ်ကွၢ်အဝဲသ့ၣ်ဃ့ၢ်ထီၣ်န့ၣ်တနီၤန့ၣ်အိၣ်လၢ(၃)နံၣ်ဘျဲၣ်,တနီၤန့ၣ်အိၣ်လၢ(၂)နံၣ်ဘျဲၣ်လံ.ဖဲတၢ်ဘၢၣ်စၢၤအံၤအဟံၣ်အဃီ ဟးဂီၤအိၣ်စ့ၢ်.အတၢ်ဖံးအီၣ်မၤအီၣ်လီၢ်ဟးဂီၤဒီးအိၣ်လီၤ.အဃိလၢအဝဲသ့ၣ်တၢ်အိၣ်မူခါညါအဂီၢ်မ့ၢ်ဝဲတၢ်ကီတၢ်ခဲဖးဒိၣ်တမံၤလီၤ ”အဂ့ၢ်န့ၣ် စံးဝဲန့ၣ်လီၤ.
ဒ်န့ၣ်အသိးလၢတၢ်ရဲၣ်တၢ်ကျဲၤအံၤအပူၤ ကီးတရံးကမျၢၢ်ပှၤလီၢ်အိၣ်ကမှံပိၥ်မုၣ်လၢအလဲၤဃ့ၢ်အိၣ်ကဒုသးဖဲတန့ခၠါဟီၣ်ကဝီၤပူၤ တဂၤစ့ၢ်ကီး တဲဖျါထီၣ်ဝဲတကီၢ်ခါအတၢ်ကီတၢ်ခဲ,ခါဆူညါတၢ်ဘၣ်ယိၣ်ဘၣ်ဘှီတၢ်အိၣ်သး ဒီး အဲၣ်ဒိးက့ၤဆူအနီၣ်ကစၢ်တၢ်လီၢ် တၢ်ကျဲ ဒူသဝီလၢအဆိအချ့အိၣ်ဝဲအဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါလၢအလဲၤထီၣ်တၢ်ရဲၣ်တၢ်ကျဲၤအံၤတဂၤ တဲပၠးကဒါဝဲန့ၣ်လီၤ.
တကီၢ်ခါခဲအံၤကီးတရံးကီၢ်ဆၣ်ဒီၣ်တန့ခၠါကီၢ်ဆၣ်ပူၤကမျၢၢ်လၢအဘၣ်ဃ့ၢ်မှံဟးဖျိးတဖၣ်အံၤတနီၤန့ၣ်အဟံၣ်အဃီဟးဂူၥ် ဟးဂီၤအိၣ်အသိး တုၤလၢခဲအံၤလၢအဝဲသ့ၣ်ဟီၣ်ကဝီၤပူၤန့ၣ်တၢ်ဂၢၢ်တၢ်ကျၢၤတအိၣ်ဒံးဘၣ်အဃိ ဘၣ်လဲၤအိၣ်ဆိဝဲလၢ အဘူး အတံၢ်,အသမူသကိးဟံၣ်,ကရၢၢ်ပူၤအံၤဒီး လၢကတီၢ်ယံၤအဂီၢ်ဘၣ်ယိၣ်ဝဲတၢ်လၢဒံၣ်ဖိတၢ်ကူၣ်ဘၣ်ကူၣ်သ့ဒီး တၢ်လုၢ်အီၣ်နီၢ်ခိ သးသမူအဂီၢ်အဂ့ၢ်န့ၣ် သ့ၣ်ညါဘၣ် န့ၣ်လီၤ.
(KNPC)လၢအလဲၤဟ့ၣ်လီၤဝဲဂံၢ်ခီၣ်ထံးတၢ်အီၣ်တၢ်အီတၢ်ဆီၣ်ထွဲမၤစၢၤလၢကမျၢၢ်အဂီၢ်လၢအဘၣ်တၢ်ဒုးအိၣ်ထီၣ်အီၤဖဲ အပူၤကွံၥ်လါအ့ဖြ့ၣ် ၈ သီအခါအံၤ ဖဲလါဝဲန့ၣ် ၂၁ သီန့ၣ် ကီးတရံးကမျၢၢ်ပှၤလီၢ်အိၣ်ကမှံဖိ ဟံၣ်ခိၣ်(၃၀၀၀)ဘျဲၣ် ပှၤနီၣ်ဂံၢ်(၁၉၀၀၀)ဘျဲၣ် လၢအလဲၤဃ့ၢ်အိၣ်ကဒုသးဖဲတန့ခၠါကီၢ်ဆၣ်ပူၤအံၤ တဖၣ် ကမံးတံၥ်ကရူၢ်အံၤလဲၤဟ့ၣ်လီၤဒံးဝဲဂံၢ်ခီၣ်ထံး တၢ်အီၣ်တၢ်အီဒ်အမ့ၢ် ဟုသး,သိ, အခၠိၤမိၣ်,ညၣ်ဒၢ, ညၣ်အုၣ်,မိၢ်ဂံၥ်သၣ်ဒီးအံသၣ်သ့ၣ်တဖၣ်ဒံးန့ၣ်လီၤ.
