လါအီးကူး ၁၃ သီႇ ၂၀၂၁ နံၣ်ႇ ခ့ၣ်အဲးစံၣ်
ဖဲလါအီကူး ၁၁ သီအနံၤ တၢ်လဲၤပာ်လီၤ(KNLA)သုးက့ ၁ သုးက့ခိၣ် သုးခိၣ်ကျၢၢ်ဖိ စီၤပျ့ၣ်အစိၣ်တၢ်ရဲၣ်တၢ်ကျဲၤအနံၤန့ၣ် သုးမီၤစိရိၤအသုးနုာ်လီၤဟံးန့ၢ်ကွံာ်၀ဲ KNU- ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ် မီၤစကိၤကီၢ်ဆၣ်၀ဲၤဒၢးအဂ့ၢ်န့ၣ် KNU တကပၤ စံး၀ဲန့ၣ်လီၤႉ
မီၤစကိၤကီၢ်ဆၣ်၀ဲၤဒၢးအံၤအိၣ်၀ဲဒၣ်ဖဲ ပီၤကီၢ်ဆၣ်ႇ သဲအ့ၤသ၀ီဒီးကတဲၣ်သ၀ီအဘၢၣ်စၢၤဒီး ဖဲ၀ဲၤဒၢးပူၤ သုးဖိတနီၤလဲၤ၀ဲလၢတၢ်လဲၤပာ်လီၤသုးက့ခိၣ်အဆၢကတီၢ် သုးမီၤစိရိၤအသုးနုာ်လီၤဟံးန့ၢ်ကွံာ်၀ဲ၀ဲၤဒၢးဒီး ၦၤလၢအိၣ်တ့ၢ်လၢ၀ဲၤဒၢး(၃)ဂၤအံၤစ့ၢ်ကီးဖီၣ်က့ၤကိး၀ဲအဂ့ၢ်န့ၣ် KNU ဒူသထူၣ်ကီၢ်ရ့ၣ် နဲၣ်ရွဲၣ် ပဒိၣ်စီၤစိမၠ့ၣ် စံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“ဖဲန့ၣ်တမ့ၢ်ထဲလၢသုးရ့ၣ်ဘၣ်ႉ သုးက့ပာ်လီၤ၀ဲႇမ့ၢ်၀ဲဒၣ်ကီၢ်ဆၣ်အလီၢ်မီၤနီၤႉ ဖဲန့ၣ်အိၣ်၀ဲဒၣ်မူဒါခိၣ်တဂၤဒီးသုးဖိတနီၤမီၤနီၤႉ တအိၣ်အါအါဘၣ်ႉ တနီၤန့ၣ်လဲၤ၀ဲလၢတၢ်လဲၤပာ်လီၤသုးက့ခိၣ်တၢ်ရဲၣ်တၢ်ကျဲၤလီၤႉ ဖီၣ်က့ၤကိး၀ဲဒၣ်ၦၤအိၣ်တ့ၢ်ဖဲန့ၣ် ၃ ဂၤဒီး ခဲအံၤအ၀ဲသ့ၣ်ဟံးဃာ်၀ဲကီၢ်ဆၣ်၀ဲၤဒၢးလံမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ
KNU ဒူသထူၣ်ကီၢ်ရ့ၣ်ပူၤ မီၤစကိၤ၀့ၢ်အံၤ ဖဲတဲာ်လွံၢ်တဲာ်အခါန့ၣ် ခီဖျိတၢ်အိၣ်သးအကလုာ်ကလုာ်အဃိကီၢ်ပယီၤအပဒိၣ်ပၢပြး၀ဲအဃိ ခ့ၣ်အဲၣ်ယူၣ်တကပၤဂုာ်ကဒါန့ၢ်၀ဲလီၢ်ခံအိၣ်၀ဲဘၣ်ဆၣ် ကၦၤတဖၣ်ဟးထီၣ်က့ၤလီၤဟူးဂဲၤ၀ဲလၢဟီၣ်က၀ီၤအပူၤအိၣ်ဒံး၀ဲထီဘိန့ၣ်လီၤႉ
စးထီၣ်ဖဲ ၂၀၁၅ နံၣ် KNU ဆဲးလီၤ၀ဲထံကီၢ်ဒီဘ့ၣ်တၢ်ပတုာ်တၢ်ခး(NCA)၀ံၤအလီၢ်ခံန့ၣ် မ့ၢ်ကီၢ်ဆၣ်လၢတၢ်က့ၤဒုးအိၣ်ထီၣ်က့ၤ၀ဲတဘ့ၣ်အဂ့ၢ်န့ၣ် ပဒိၣ်စီၤစိမၠ့ၣ် စံးအါထီၣ်၀ဲန့ၣ်လီၤႉ
သုးမီၤစိရိၤအသုးနုာ်လီၤဟံးန့ၢ်ကွံာ်ကီၢ်ဆၣ်၀ဲၤဒၢးအံၤ မ့ၢ်၀ဲဒီးဖဲလါအီးကူး(၁၁)သီ ဟါခီအဆၢကတီၢ် သုးမီၤစိရိၤအသုးဟဲ၀ဲဒီးသိလ့ၣ်(၄)ခိၣ်ဒီးနုာ်လီၤဟံးန့ၢ်ကွံာ်၀ဲလီၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ
ဖဲအပူၤကွံာ်(လါယူၤလံ ၂၆)သီအနံၤစ့ၢ်ကီး မီၤစကိၤ ကီၢ်ဆၣ်၀ဲၤဒၢးခိၣ် ပဒိၣ်စီၤဂီၤခိၣ်စူးကွံာ်သးခီဖျိခိ၀ံၣ်တၢ်ဆါဒီး ဖဲလါအီးကူး ၁၀ သီအနံၤစ့ၢ်ကီး သုးက့(၁)သုးက့ခိၣ် သုးခိၣ်ကျၢၢ်ဖိ စီၤပျ့ၣ်စူးကွံာ်ကဒီးသးန့ၣ်လီၤႉ ဖဲတၢ်လဲၤပာ်လီၤသုးက့ခိၣ်အစိၣ်တၢ်ရဲၣ်တၢ်ကျဲၤအနံၤန့ၣ် သုးမီၤစိရိၤအသုးနုာ်လီၤဟံးန့ၢ်ကွံာ်အ၀ဲသ့ၣ်၀ဲၤဒၢးန့ၣ်လီၤႉ
တကီၢ်ခါဆၢကတီၢ်ခဲအံၤ KNU ဒူသထူၣ်ကီၢ်ရ့ၣ် သုးက့(၁)ဟီၣ်က၀ီၤအပူၤ ဒူသထူၣ်ကီၢ်ဆၣ်ႇဘံလ့ကီၢ်ဆၣ်ႇကၠဲၣ်ထိၤကီၢ်ဆၣ််ဒီးဖၣ်အၣ်ကီၢ်ဆၣ်တဖၣ်အပူၤ ဖဲစှၤသီအတီၢ်ပူၤအံၤ သုးမီၤစိရိိၤအသုးဒီးသုးခိၣ်ကီၢ်ဆၢ(BGF)သုးပာ်ဖှိၣ်တဖၣ် မၤအါထီၣ််သုးဂံၢ်ဘါဒီးဟူးဂဲၤအါထီၣ်၀ဲအဂ့ၢ်န့ၣ် ၦၤလၢအထံၣ်ဒီးအမဲာ်တဖၣ်စံး၀ဲန့ၣ်လီၤႉ
လၢန့ၣ်အမဲာ်ညါသုးမီၤစိရိၤအသုးအံၤဟံးန့ၢ်တၢ်ဒီသဒၢလၢလီၢ်က၀ီၤပိာ်မုၣ်ပိာ်မၢၤဒီးလီၢ်က၀ီၤဖိတဖၣ်အအိၣ်ဒီး ဖဲလါအီကူး ၁၁ သီအနံၤစ့ၢ်ကီး နုာ်လီၤဟးဃုတၢ်လၢပၠ့မပ့ၤစ့ၣ်သ၀ီ ဟံၣ်တဖၣ်အပူၤဒီး ဟံးဆူၣ်န့ၢ်တၢ်ဖိတၢ်လံၤတဖၣ်စ့ၢ်ကီးအိၣ်၀ဲအဂ့ၢ်န့ၣ် KNU တကပၤစံး၀ဲန့ၣ်လီၤႉ
ဖဲစှၤသီအတီၢ်ပူၤအံၤ သုးမီၤစိရိၤအသုးလဲၤ၀ဲဆူ မိၣ်ကီၢ်စဲၣ် KNU သုးက့(၁)ဟီၣ်က၀ီၤပူၤတကးဘၣ်အမဲာ်ညါ လဲၤ၀ဲဆူကညီကီၢ်စဲၣ် KNU သုးက့(၅)ဟီၣ်က၀ီၤအပူၤဒီးမၤအါထီၣ်အသုးကလၢၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဂံၢ်ခီၣ်ထံးတၢ်ကစီၣ်အအိၣ်န့ၣ်လီၤႉ
