Home တၢ်ကစီၣ် လၢကအိၣ်ခိးကွၢ်(KNU)တၢ်ဟူးတၢ်ဂဲၤအဂီၢ် (BGF)မၢလီၢ်က၀ီၤဖိတဖၣ်ဒုးအိၣ်ထီၣ်သ၀ီသးၦၢ်တစိၢ်တလီၢ်

လၢကအိၣ်ခိးကွၢ်(KNU)တၢ်ဟူးတၢ်ဂဲၤအဂီၢ် (BGF)မၢလီၢ်က၀ီၤဖိတဖၣ်ဒုးအိၣ်ထီၣ်သ၀ီသးၦၢ်တစိၢ်တလီၢ်

268
0

လါအီးကထိဘၢၣ် ၈ သီႇ ၂၀၂၁ နံၣ်ႇ ခ့ၣ်အဲးစံၣ်

ဒ်သိးတၢ်ကအိၣ်ခိးကွၢ်ဟုၣ်ကွၢ်စူၣ် ကညီဒီကလုာ်စၢဖှိၣ်ကရၢ -KNU သုးက့(၁) စုဒုၣ်တီၤအဖီလာ်သုးတၢ်ဟူးတၢ်ဂဲၤဒီးကဟ့ၣ်တၢ်ကစီၣ်အဂီၢ် သုးခိးကီၢ်ဆၢ(BGF) နဲၣ်လီၤတၢ်ကလုၢ်ဆူသ၀ီ(၄)ဖျၢၣ် လီၢ်က၀ီၤသ၀ီဖိတဖၣ်လၢအကဒုးအိၣ်ထီၣ်သ၀ီသးၦၢ်တစိၢ်တလီၢ်အဂ့ၢ်န့ၣ် သ့ၣ်ညါဘၣ်လၢ KNU သုးက့(၁)ၦၤဘၣ်မူဘၣ်ဒါအအိၣ်န့ၣ်လီၤႉ

KNU သုးက့(၁)ဟီၣ်က၀ီၤ ဒူသထူၣ်ကီၢ်ရ့ၣ် ဖၣ်အၣ်ကီၢ်ဆၣ် တကီၤဘိသ၀ီကရူၢ်အပူၤ ဖဲအပူၤကွံာ်လါအီးကထိဘၢၣ် ၃ သီအနံၤ (BGF)သုးရ့ၣ်(၁၀၁၄)သုးဒ့(၂)ခိၣ် သုးခိၣ်တ့ၤ၀့ ကိး၀ဲ ကၠိၣ်ပ့ၤစ့ၣ်ႇမၠဲၤႇကိတါကၠံဒီးမံပိသ၀ီ သ၀ီၦၤဘၣ်မူဘၣ်ဒါတဖၣ်တၢ်အိၣ်ဖှိၣ်ဒီး နဲၣ်လီၤ၀ဲတၢ်ကလုၢ်လၢကဃုထၢတီၣ်ထီၣ်သ၀ီသးၦၢ်တစိၢ်တလီၢ်အဂ့ၢ်န့ၣ် KNU ဖၣ်အၣ်ကီၢ်ဆၣ် တၢ်ကစီၣ်ဒီးတၢ်ဘိးဘၣ်ရၤလီၤ၀ဲၤဒ့ ၦၤဘၣ်မူဘၣ်ဒါတဂၤ စံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“အ၀ဲသ့ၣ်သ၀ီ(၄)ဖျၢၣ်န့ၣ် တၢ်မၢအကဲ(တလါ)သးၦၢ် (၁၅)သီသးၦၢ်မီၤနီၤႉ မ့ထံၣ်ကီၢ်သူလ့ၤအၦၤတဖၣ်ဟးထီၣ်က့ၤလီၤန့ၣ်မၢဆဲးကျိးအ၀ဲသ့ၣ်အဂီၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

တၢ်နဲၣ်လီၤတၢ်ကလုၢ်လၢကဘၣ်ကဲသ၀ီသးၦၢ်ဒ်သိးဒီးဘၣ်ဟ့ၣ်(BGF)တၢ်ကစီၣ်အဖီခိၣ်အံၤ လီၢ်က၀ီၤသ၀ီဖိတဖၣ်ယိၣ်၀ဲလၢ(KNU)တကပၤတၢ်ထံၣ်ကမၣ်ကဟဲအိၣ်ထီၣ်၀ဲအသိး (BGF)တကပၤစ့ၢ်ကီးပာ်ဂံၢ်ပာ်ဘါ၀ဲဒၣ်စုက၀ဲၤဒီးမၢဆူၣ်သ၀ီဖိလၢကတီၣ်ထီၣ်သ၀ီသးၦၢ်အဖီခိၣ် ခီဖျိပျံၤဘၣ်၀ဲအဃိဘၣ်တီၣ်ထီၣ်သးၦၢ်လၢအတပၣ်၀ဲဒီးအ၀ဲသ့ၣ်တၢ်ပာ်သးဘၣ်အဂ့ၢ်န့ၣ် ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ

လၢတၢ်ကဃုထၢတီၣ်ထီၣ်သ၀ီသးၦၢ်အံၤအဂီၢ် BGF နဲၣ်လီၤတၢ်ကလုၢ်လၢတၢ်ကဘၣ်တီၣ်ထီၣ် သ၀ီသးၦၢ်လၢသ၀ီတဖျၢၣ်စုာ်စုာ်အပူၤဒီး ဖဲန့ၣ် ကၠိၣ်ပ့ၤစ့ၣ်သ၀ီန့ၣ် တလါ သးၦၢ်(၂)ဂၤႇ မၠဲၣ်သ၀ီန့ၣ် တလါသးၦၢ်(၂)ဂၤႇ မံပိသ၀ီ တလါ သးၦၢ်(၄)ဂၤႇ ကိတါကၠံသ၀ီန့ၣ် (၁၅)သီ သးၦၢ် ၃ ဂၤအံၤ တၢ်ကဘၣ်ပာ်၀ဲတၢ်ဆၢကတီၢ် အဆဲးခံကတၢၢ်ဖဲလါအီးကထိဘၢၣ်(၅)သီအနံၤန့ၣ်လီၤႉ

လီၢ်က၀ီၤသ၀ီဖိလၢတအဲၣ်ဒိးပာ်ဖျါအမံၤတဂၤစံး၀ဲ“သ၀ီလၢမၢကဲသ၀ီသးၦၢ်အကျါန့ၣ်ပသ၀ီနါက့ပၣ်ဃုာ်၀ဲမီၤနီၤႉ အ၀ဲသ့ၣ်အိၣ်ဒီးစုက၀ဲၤ အ၀ဲသ့ၣ်မၢအဃိဘၣ်မၤလီၤႉ ဖဲသ၀ီပူၤအံၤမၢၦၤကဲသ၀ီသးၦၢ်တလါမီၤနီၤႇပမၤသကိး၀ဲခဲလၢာ်(၃) ဂၤ လၢသ၀ီခိၣ်ထိးတဂၤႇသ၀ီခၢၣ်သးတဂၤဒီးသ၀ီခံတဂၤမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

တကီၢ်ခါတၢ်သဘံၣ်သဘုၣ်အတီၢ်ပူၤ သ၀ီဖဲန့ၣ်သ့ၣ်တဖၣ်န့ၣ် အပူၤကွံာ်သ၀ီသးၦၢ်တဖၣ် ခီဖျိတၢ်ဟဲမၤပျံၤမၤဖုးအိၣ်၀ဲအဃိ ဟးထီၣ်ကံ၁်လၢသးၦၢ်တၢ်မၤအသိး တကီၢ်ခါတၢ်ဟဲဟ့ၣ်လီၤတၢ်ကလုၢ်ခဲအံၤစ့ၢ်ကီး ဘၣ်ယိၣ်လၢတၢ်ကဟဲမၤပျံၤမၤဖုးသးသမူတၢ်ဘၣ်ယိၣ်အိၣ်၀ဲအဂ့ၢ်န့ၣ် လီၢ်က၀ီၤဖိတဖၣ်စံးအါထီၣ်၀ဲန့ၣ်လီၤႉ

ဘၣ်ထွဲဒီးတၢ်ဂ့ၢ်ကဲထီၣ်သးအံၤ ခ့ၣ်အဲးစံၣ်ဆဲးကျိး၀ဲ(BGF)ၦၤဘၣ်မူဘၣ်ဒါတဖၣ်အဘျီတဖၣ်အဘျီဘၣ်ဆၣ် တုၤလၢခဲအံၤတစုဆဲးကျိးတန့ၢ်ဒံး၀ဲဘၣ်န့ၣ်လီၤႉ