Home တၢ်ကစီၣ် တနံၤဃီအတီၢ်ပူၤ တၢ်ခးလိာ်သးကဲထီၣ်(၅)ဘျီႇပယီၤသုးသံ(၁၀)ဂၤ

တနံၤဃီအတီၢ်ပူၤ တၢ်ခးလိာ်သးကဲထီၣ်(၅)ဘျီႇပယီၤသုးသံ(၁၀)ဂၤ

261
0
Photo: KNLA

လါယနူၤအါရံၤ ၁၀ သီႇ ၂၀၂၂ နံၣ်ႇ ခ့ၣ်အဲးစံၣ်

မုၢ်တြီၢ်ကီၢ်ရ့ၣ် သုးက့(၅)ဟီၣ်က၀ီၤပူၤ ဖဲမဟါလါယနူၤအါရံၤ ၉ သီ တနံၤဃီအတီၢ်ပူၤ တၢ်ခးလိာ်သးကဲထီၣ်၀ဲ(၅)ဘျီဒီး ဖဲန့ၣ်ပယီၤသုးမီၤစိရိၤအၦၤသံ၀ဲဒၣ်(၁၀)ဂၤႇဘၣ်ဒိ(၃)ဂၤအဂ့ၢ်န့ၣ်် ခ့ၣ်အဲၣ်ယူၣ်-မုၢ်တြီၢ်တၢ်ကစီၣ်ထုးထီၣ်ပာ်ဖျါ၀ဲဖဲတနံၤအံၤန့ၣ်လီၤႉ

ဒ်မုၢ်တြီၢ်တၢ်ကစီၣ်ထုးထီၣ်ပာ်ဖျါ၀ဲအသိး ဖဲလါယနူၤအါရံၤ ၉ သီ ဂီၤခီ ၇ နၣ်ရံၣ်ဘျဲၣ်အဆၢကတီၢ် သုးက့(၅)စုဒုၣ်တီၤအဖီလာ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးရ့ၣ်အၦၤ လဲၤခး၀ဲပယီၤသုးလၢအအိၣ်ဖဲထူၣ်မီဒၢတိၤမဲၢ်ခံတဘျီဒီး ဖဲန့ၣ်ပယီၤသုးသံ၀ဲ(၂)ဂၤန့ၣ်လီၤႉ

ဒ်န့ၣ်အသိးတကတီၢ်ဃီဖဲဂီၤခီ ၈ နၣ်ရံၣ်ဃၣ်ဃၣ်အဆၢကတီၢ် နုာ်လီၤခး၀ဲပယီၤသုးလၢအအိၣ်ဖဲတိၢ်လၢၢ်တဘျီ ဖဲန့ၣ်ပယီၤသုးဘၣ်ဒိ၀ဲတဂၤအသိး ဖဲ ၈း၂၀ မံးနံးအဆၢကတီၢ် နုာ်လီၤခးကဒီး၀ဲပယီၤသုးလၢအအိၣ်ဖဲတဃ့ၣ်ခိၣ်ႇဃီပူၤဟီၣ်က၀ီၤတဘျီဒီး ဖဲန့ၣ်ပယီၤသုးသံ၀ဲ(၃)ဂၤႇဘၣ်ဒိ၀ဲ(၂)ဂၤအဂ့ၢ်န့ၣ် စံး၀ဲန့ၣ်လီၤႉ

တကးဒံးဘၣ်လၢန့ၣ်အမဲာ်ညါ ဖဲမဟါဂီၤခီ ၉ နၣ်ရံၣ်တုၤလၢ ၁၁ နၣ်ရံၣ်ဃၣ်ဃၣ်အဆၢကတီၢ် ခီဖျိကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ်(၁၀၂)ႇသုးဒ့(၁)အၦၤလဲၤခး၀ဲပယီၤသုးမီၤစိရိၤလၢအအိၣ်ဖဲမီလိာ်ကျိတဘျီအဃိ ဖဲန့ၣ်ပယီၤသုးအသိလ့ၣ်ဟးဂီၤ၀ဲ(၃)ခိၣ်န့ၣ်လီၤႉ

တကတီၢ်ဃီဖဲမုၢ်ဃ့ၢ်လီၤ ၁ နၣ်ရံၣ်အဆၢကတီၢ် နုာ်လီၤခးကဒီးပယီၤသုးလၢအအိၣ်ဖဲထွံၣ်သံအုၣ်တဘျီဒီး ဖဲန့ၣ်ပယီၤသုးသံ၀ဲ(၅)ဂၤအဂ့ၢ်န့ၣ် ခ့ၣ်အဲၣ်ယူၣ်-မုၢ်တြီၢ်တၢ်ကစီၣ်ပာ်ဖျါ၀ဲန့ၣ်လီၤႉ

ဒ်န့ၣ်အသိးဖဲလါယနူၤအါရံၤ ၇ သီအနံၤစ့ၢ်ကီး (BGF-၁၀၁၄)သုးရ့ၣ်ခိၣ်မီၤခၠ့ၣ်အၦၤစီၤမီၤနံကိးဖှိၣ်၀ဲထံဘီကိာ်ႇထံထီၣ်ခံႇမဲးပြံးဖိခံသ၀ီသးၦၢ်တဖၣ်ဒီး တဲဘၣ်၀ဲလၢသုတဘၣ်မၤသကိးတၢ်ဒီးကီၢ်သူလ့ၤဘၣ်ႇကီၢ်သူလ့ၤအၦၤတဘၣ်ဟဲခးအသုးကလၢၤစ့ၢ်ကီးဘၣ်အသိး မ့ဟဲခးအ၀ဲသ့ၣ်န့ၣ်ကဒွဲၣ်အူကွံာ်သ၀ီသ့ၣ်တဖၣ်လီၤအဂ့ၢ်န့ၣ် ခ့ၣ်အဲၣ်ယူၣ်-မုၢ်တြီၢ်တၢ်ကစီၣ်ပာ်ဖျါ၀ဲန့ၣ်လီၤႉ

ဖဲအပူၤကွံာ်လါယနူၤအါရံၤ ၆ သီ ဟါခီအဆၢကတီၢ်စ့ၢ်ကီး ခီဖျိသုးခိးကီၢ်ဆၢ-BGF(၁၀၁၃)ခးလီၤကျိဖးဒိၣ်တဖၣ်ဆူထံသလူၢ်ထၣ်သ၀ီကရူၢ် ဘျၢၣ်ပၢၤသ၀ီကပၤအဃိ ဘၣ်သံ၀ဲဒၣ်လီၢ်က၀ီၤဖိစီၤထိတ့ၤ(၅၄)နံၣ်တဂၤကဲထီၣ်သးဒံးအဂ့ၢ်န့ၣ် လီၢ်က၀ီၤတၢ်ကစီၣ်စံး၀ဲန့ၣ်လီၤႉ