လါဖ့ၤဘြူၤအါရံၤ ၃ သီႇ၂၀၂၃ နံၣ်ႇ ခ့ၣ်အဲးစံၣ်
ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၄)ထုးထီၣ်ပာ်ဖျါလံာ်လၢတၢ်ပၢၢ်ဆၢသုးဖိသံၣ်ဖိဒီးတၢ်ဒီသဒၢ ကမျၢၢ်(PDF)သုးတဖၣ်ကဟးထီၣ်ကွံာ်လၢသုးခိၣ်စီၤအဲၣ်ခွံတီခိၣ်ရိၣ်မဲကီၢ်သူလ့ၤသုးမုၢ်ဒိၣ်(KTLA)စုတီၤဖီလာ်၀ံၤအလီၢ်ခံ ဖဲလါယနူၤအါရံၤ ၁ သီအနံၤ တၢ်ဒုးကဲထီၣ်၀ဲလၢခံခီခံကပၤအဘၢၣ်စၢၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဖဲလါယနူၤအါရံၤ ၃၁ သီအနံၤ ခ့ၣ်အဲၣ်ယူၣ်(သုးက့ ၄)ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးဂ့ၢ်၀ီ၀ဲၤဒၢး ထုးထီၣ်ပာ်ဖျါလံာ်လၢတၢ်ပၢၢ်ဆၢသုးဖိသံၣ်ဖိတဖၣ်ကဟးထီၣ်ကွံာ်လၢသုးခိၣ်စီၤအဲၣ်ခွံစုတီၤဖီလာ်၀ံၤအလီၢ်ခံန့ၣ် (KNLA)ဟဲခး၀ဲထံမုၢ်ၦၢ်ဟီၣ်က၀ီၤလီၤဆီ(KTLA)တြဲၤအိၣ်ခိးတၢ်လီၢ်တခါအဂ့ၢ်န့ၣ် (သုးရ့ၣ် ၃) သုးဒ့(၈) သုးခိၣ်စိ စီၤဆၣ်ကညီ စံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“မ့ၢ်အနီၢ်ကီၢ်လီၤပၦၤန့ၣ်သံကွံာ်(၁)ဂၤမီၤနီၤႉပၦၤန့ၣ်လဲၤခိးတၢ်ဖဲန့ၣ်(၆)ဂၤႉ(သုးက့ ၄)အသိလ့ၣ် ဟဲထီၣ်၀ဲဒၣ်(၂)ခိၣ်ႉဟဲဘျီခး၀ဲပၦၤန့ၣ်လီၤမီၤနီၤႉအခးကမၣ်ဒုတမ့ၢ်ဘၣ်ႉအ၀ဲန့ၣ်တဲတ့ၢ်ဃာ်၀ဲမီၤနီၤလၢကဘၣ်မၤဆှဲကွံာ်ၦၤန့ၣ်ႉပအိၣ်ခိးတၢ်ဖဲန့ၣ်န့ၣ်အ၀ဲသ့ၣ်သ့ၣ်ညါ၀ဲလီၤႉအ၀ဲသ့ၣ်နါက့တဲ၀ဲလၢကခိးပယီၤကမၤဆှဲပယီၤကခးပယီၤဒ်သိးသိးလီၤဘျီအဃိန့ၣ်ပၦၤခီတပာ်သူၣ်ပာ်သးဘၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
တၢ်ခးလိာ်သးကဲထီၣ်ဘျီ၀ဲအံၤ(KTLA)အၦၤသံ(၁)ဂၤဒီးတၢ်ဟံးန့ၢ်ကွံာ်အ၀ဲသ့ၣ်(M16)ကျိတခိၣ်ဒီးစဲးတၢ်ဖိတၢ်လံၤတဖၣ်စ့ၢ်ကီးန့ၣ်လီၤႉကတီၢ်ခဲအံၤတၢ်ဖ့ၣ်စၢအိၣ်ထီၣ်၀ဲလၢခံခီခံကပၤအဘၢၣ်စၢၤဒီး(KNU)အံၤတၢ်ရဲၣ်တၢ်ကျဲၤအိၣ်လၢကမၤဆှဲကွံာ်(KTLA)အၦၤကိးဂၤဒဲးအဂ့ၢ်န့ၣ် သုးခိၣ်စိ စီၤဆၣ်ကညီ စံးအါထီၣ်၀ဲန့ၣ်လီၤႉ
ဘၣ်ဃးဒီးတၢ်ဂ့ၢ်ကဲထီၣ်သးအံၤခ့ၣ်အဲးစံၣ်–ကညီတၢ်ကစီၣ်၀ဲၤလီၢ်ခိၣ်သ့ၣ်ဆဲးကျိး၀ဲခ့ၣ်အဲၣ်ယူၣ်(သုးက့ ၄) အိၣ်၀ဲဘၣ်ဆၣ် ခီဖျိၦၤဘၣ်မူဘၣ်ဒါလဲၤတလၢတၢ်အဃိၦၤတအိၣ်လၢကစံးဆၢတၢ်ဂ့ၢ်အံၤဘၣ်အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
သုးခိၣ်စီၤအဲၣ်ခွံတီခိၣ်ရိၣ်မဲ(KTLA)ဒီး(KNLA)သုးက့ ၄ အဘၢၣ်စၢၤတၢ်သဘံၣ်သဘုၣ်ကဲထီၣ်အိၣ်၀ဲတလီၢ်လီၢ်ဒီး ဘၣ်ဃးတၢ်မၤသံကမျၢၢ်တၢ်ဂ့ၢ်အံၤစ့ၢ်ကီးလိာ်ဘၢလိာ်ကွီၢ်ကဒါလိာ်သးအိၣ်၀ဲအသိးတၢ်ဖီလာ်သုးဖိကဒဲကဒဲအဘၢၣ်စၢၤတၢ်ခးလိာ်သးကဲထီၣ်အိၣ်၀ဲစ့ၢ်ကီးန့ၣ်လီၤႉ
ဖဲအပူၤကွံာ်လါယနူၤအါရံၤ ၃၁ သီအနံၤ ဘၣ်ဃးဒီးခ့ၣ်အဲၣ်ယူၣ်(သုးက့ ၄)ထုးထီၣ်လံာ်ကညး၀ဲလၢ တၢ်ပၢၢ်ဆၢသုးဖိသံၣ်ဖိတဖၣ်ကဟးထီၣ်ကွံာ်လၢသုးခိၣ်စီၤအဲၣ်ခွံတီခိၣ်ရိၣ်မဲ(KTLA)စုတီၤဖီလာ်အံၤအဖီခိၣ် (KNLA)လီၢ်ခၢၣ်သး၀ဲၤလီၢ်ခိၣ်သ့ၣ်တူၢ်လိာ်၀ဲအဂ့ၢ်န့ၣ် ထုးထီၣ်စ့ၢ်ကီး၀ဲလံာ်တၢ်ပာ်ဖျါဖဲလါဖ့ၤဘြူၤအါရံၤ ၁ သီ အနံၤန့ၣ်လီၤႉ
